Athamaki wa Kerĩ

13 Mwaka-inĩ wa 23 wa Jehoashu+ mũrũ wa Ahazia+ mũthamaki wa Juda, Jehoahazu mũrũ wa Jehu+ nĩ aatuĩkire mũthamaki wa Isiraeli thĩinĩ wa Samaria, na agĩathana mĩaka 17. 2 Nake agĩthiĩ na mbere gwĩka maũndũ moru maitho-inĩ ma Jehova, na akĩrũmĩrĩra mehia marĩa Jeroboamu mũrũ wa Nebati aatũmĩte Isiraeli mehie.+ Ndaigana gũtigana namo. 3 Nĩ ũndũ ũcio marakara ma Jehova+ magĩakana kwerekera Isiraeli,+ na akĩmaneana guoko-inĩ kwa Mũthamaki Hazaeli+ wa Siria na guoko-inĩ kwa Beni-hadadi+ mũrũ wa Hazaeli matukũ-inĩ mao mothe.

4 Thutha wa ihinda Jehoahazu agĩthaithana etĩkĩrĩke nĩ Jehova,* na Jehova akĩmũthikĩrĩria, nĩ gũkorũo nĩ oonete ũrĩa mũthamaki wa Siria aahinyĩrĩirie Isiraeli.+ 5 Nake Jehova akĩhe Isiraeli mũhonokia+ nĩguo amateithũre kuuma guoko-inĩ gwa Siria, nao Aisiraeli makĩhota gũtũũra mĩciĩ-inĩ yao o ta hau kabere.* 6 (No rĩrĩ, matiatiganire na mehia ma nyũmba ya Jeroboamu marĩa aatũmĩte Isiraeli mehie.+ Maathiire o na mbere na mehia macio,* na mũtĩ wa kũhoywo*+ ũgĩthiĩ na mbere kũrũgama thĩinĩ wa Samaria.) 7 Jehoahazu aatigirũo na mbũtũ ya atwarithia a mbarathi 50 tu, ngaari 10 cia mbarathi, na thigari 10,000 cia gũthiĩ na magũrũ, tondũ mũthamaki wa Siria nĩ aamanangĩte,+ akamarangĩrĩria ta rũkũngũ hĩndĩ ya kũhuuha ngano.*+

8 Ha ũhoro wa maũndũ macio mangĩ megiĩ Jehoahazu, ũrĩa wothe eekire o na hinya wake, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli? 9 Thutha ũcio Jehoahazu akĩhurũkio hamwe na maithe make ma tene na makĩmũthika Samaria;+ na mũrũwe Jehoashu agĩtuĩka mũthamaki ithenya rĩake.

10 Mwaka-inĩ wa 37 wa Mũthamaki Jehoashu wa Juda, Jehoashu+ mũrũ wa Jehoahazu nĩ aatuĩkire mũthamaki wa Isiraeli kũu Samaria, na agĩathana mĩaka 16. 11 Nake agĩthiĩ na mbere gwĩka maũndũ moru maitho-inĩ ma Jehova, akĩaga gũtigana na mehia marĩa mothe Jeroboamu mũrũ wa Nebati aatũmĩte Isiraeli mehie.+ Aathiire na mbere na* mehia macio.

12 Ha ũhoro wa maũndũ macio mangĩ megiĩ Jehoashu, ũrĩa wothe eekire o na hinya wake na ũrĩa aarũire na Mũthamaki Amazia wa Juda,+ na githĩ ti maandĩke ibuku-inĩ rĩa maũndũ ma mahinda ma athamaki a Isiraeli? 13 Thutha ũcio Jehoashu akĩhurũkio hamwe na maithe make ma tene, na Jeroboamu*+ agĩikarĩra gĩtĩ gĩake kĩa ũnene. Jehoashu agĩgĩthikwo Samaria hamwe na athamaki a Isiraeli.+

14 Rĩrĩa Elisha+ aarwarire mũrimũ ũrĩa wacokire gũtũma akue, Jehoashu mũthamaki wa Isiraeli nĩ aaikũrũkire kũrĩ we na akĩmũrĩrĩra akiuga: “Wũi baba! Wũi baba! Ngaari ya mbarathi ya Isiraeli na atwarithia ake a mbarathi!”+ 15 Nake Elisha akĩmwĩra: “Oya ũta na mĩguĩ.” Nĩ ũndũ ũcio akĩoya ũta na mĩguĩ. 16 Agĩcoka akĩra mũthamaki ũcio wa Isiraeli atĩrĩ: “Nyita ũta na guoko gwaku.” Agĩkĩnyita ũta na guoko gwake, nake Elisha akĩigĩrĩra moko make igũrũ rĩa moko ma mũthamaki. 17 Agĩcoka akĩmwĩra atĩrĩ: “Hingũra ndirica ĩyo ĩrorete mwena wa irathĩro.” Nake akĩmĩhingũra. Elisha akiuga: “Ratha!” Nake akĩratha. Elisha agĩcoka akiuga atĩrĩ: “Mũguĩ wa Jehova wa ũhootani,* mũguĩ wa ũhootani* kwerekera Siria! Nĩ ũkaahũũra* Siria kũu Afeku+ nginya ũmĩniine biũ.”

18 Ningĩ akĩmwĩra: “Oya mĩguĩ,” nake akĩmĩoya. Agĩcoka akĩra mũthamaki wa Isiraeli atĩrĩ: “Ratha thĩ.” Nake akĩratha thĩ maita matatũ agĩcoka agĩtiga. 19 Hĩndĩ ĩyo, mũndũ ũcio wa Ngai ũrĩa wa ma akĩrakara mũno nĩ ũndũ wake na akiuga atĩrĩ: “Ũkwagĩrĩirũo kũratha thĩ maita matano kana matandatũ! Ũngĩeka ũguo, nĩ ũngĩkaahũũra Siria nginya ũmĩniine biũ, no rĩu ũkaahũũra Siria o maita matatũ tu.”+

20 Thutha ũcio Elisha agĩkua na agĩthikwo. Nĩ kwarĩ ikundi cia atunyani cia Amoabi+ ciokaga bũrũri-inĩ ũcio kĩambĩrĩria-inĩ kĩa mwaka.* 21 Rĩrĩa andũ amwe maathikaga mũndũ, makĩona gĩkundi kĩa atunyani, nĩ ũndũ ũcio magĩikia mũndũ ũcio o rĩmwe harĩa Elisha aathikĩtwo na makĩũra. Rĩrĩa mũndũ ũcio aahutirie mahĩndĩ ma Elisha, agĩcoka muoyo+ na akĩrũgama na magũrũ make.

22 Na rĩrĩ, Mũthamaki Hazaeli+ wa Siria aahinyĩrĩirie Isiraeli+ matukũ mothe ma Jehoahazu. 23 No rĩrĩ, Jehova nĩ aarekire metĩkĩrĩke harĩ we na akĩmaiguĩra tha+ na akĩmarũmbũiya nĩ ũndũ wa kĩrĩkanĩro gĩake hamwe na Iburahimu,+ Isaaka,+ na Jakubu.+ Ndeendaga kũmaniina, na ndarĩ amaingata akameheria mbere yake nginya ũmũthĩ ũyũ. 24 Rĩrĩa Mũthamaki Hazaeli wa Siria aakuire, mũrũwe Beni-hadadi agĩtuĩka mũthamaki ithenya rĩake. 25 Jehoashu mũrũ wa Jehoahazu agĩtunya Beni-hadadi mũrũ wa Hazaeli matũũra marĩa Hazaeli ooete kuuma harĩ ithe Jehoahazu hĩndĩ ya mbaara. Jehoashu akĩmũhũũra* maita matatũ,+ na akĩoya matũũra macio ma Isiraeli akĩmacokia.