Thaburi

1 Gũkena nĩ mũndũ ũrĩa ũtathiaga kũringana na ũtaaro wa andũ arĩa aganu

Na ndarũgamaga njĩra-inĩ ya arĩa mehagia+

Na ndaikaraga thĩ gĩtĩ-inĩ kĩa andũ arĩa manyũrũranagia.+

 2 No watho wa Jehova nĩguo ũmũkenagia,+

Na athomaga watho ũcio Wake na mĩheehũ* ũtukũ na mũthenya.+

 3 Nake arĩhaanaga ta mũtĩ ũhandĩtwo mĩtaro-inĩ ya maĩ,

Mũtĩ ũrĩa ũgĩaga na maciaro kĩmera kĩaguo gĩakinya,

Namo mathangũ maguo matihoohaga.

 4 Andũ arĩa aganu matihaana ũguo;

Matariĩ ta mahuti marĩa mombũragwo nĩ rũhuho.

 5 Nĩkĩo andũ arĩa aganu matakaahota kũrũgama hĩndĩ ya ituĩro;+

O na andũ ehia matikaahota kũrũgama kĩgomano-inĩ kĩa andũ arĩa athingu.+

 6 Nĩ gũkorũo Jehova nĩ amenyaga njĩra ya andũ arĩa athingu,+

No njĩra ya andũ arĩa aganu nĩ ĩgaathira.+