Ũhoro Mwega Ũrĩa Waandĩkirũo nĩ Johana
21 Thutha ũcio Jesu akĩĩyonithania rĩngĩ kũrĩ arutwo ake* Iria-inĩ rĩa Tiberia. Eeyonithanirie na njĩra ĩno. 2 Simoni Petero, Toma (ũrĩa wetagwo Wa-mahatha),+ Nathanieli+ wa kuuma Kana ya Galili, ariũ a Zebedi,+ na arutwo angĩ ake erĩ maarĩ hamwe. 3 Simoni Petero akĩmeera: “Ndathiĩ gũtega thamaki.” Nao makĩmwĩra: “Tũgũthiĩ nawe.” Makiumagara na makĩingĩra gatarũ, ĩndĩ ũtukũ ũcio gũtirĩ kĩndũ maanyitire.+
4 No rĩrĩa gwathererũkaga, Jesu akĩrũgama rũteere-inĩ rwa iria, no arutwo acio matiamenyaga atĩ nĩ Jesu.+ 5 Jesu akĩmoria: “Ciana ici, hihi mũrĩ na kĩndũ gĩa* kũrĩa?” Makĩmũcokeria: “Aca!” 6 Nake akĩmeera: “Ikiai neti mwena wa ũrĩo wa gatarũ na nĩ mũkũnyita kĩndũ.” Kwoguo magĩikia neti, no matiahotire kũmĩgucia nĩ ũndũ wa ũrĩa thamaki ciarĩ nyingĩ.+ 7 Nake mũrutwo ũrĩa weendetwo nĩ Jesu+ akĩra Petero ũũ: “Nĩ Mwathani!” Rĩrĩa Simoni Petero aaiguire atĩ nĩ Mwathani, agĩĩkĩra* nguo yake ya igũrũ, tondũ aarĩ njaga,* na akĩrũga iria-inĩ. 8 No arutwo acio angĩ magĩũka na gatarũ, magucĩtie neti ĩyo yaiyũrĩte thamaki, tondũ matiarĩ kũraihu na thĩ nyũmũ, maarĩ ta fiti 300.*
9 Rĩrĩa maakinyire rũteere-inĩ rwa iria, makĩona mwaki wa makara na thamaki cigĩrĩirũo igũrũ rĩaguo na hau haarĩ na mũgate. 10 Jesu akĩmeera atĩrĩ: “Rehei thamaki imwe harĩ icio mwanyita.” 11 Nĩ ũndũ ũcio Simoni Petero agĩtonya gatarũ-inĩ na akĩgucia neti ĩyo yaiyũire thamaki nene 153, akĩmiumĩria rũteere-inĩ rwa iria. O na irĩ nyingĩ ũguo, neti ĩyo ndĩatuĩkangire. 12 Jesu akĩmeera: “Ũkai mwĩgagũre.” Na gũtirĩ mũrutwo o na ũmwe warĩ na ũmĩrĩru wa kũmũũria: “Wee nĩwe ũ?” tondũ nĩ maamenyaga nĩ Mwathani. 13 Jesu akĩoya mũgate na akĩmanengera, agĩcoka agĩka o taguo na thamaki. 14 Rĩu nĩrĩo rĩarĩ riita rĩa gatatũ+ Jesu kuumĩrĩra arutwo ake thutha wa kũriũka kuuma kũrĩ arĩa akuũ.
15 Marĩkia kwĩgagũra, Jesu akĩũria Simoni Petero: “Simoni mũrũ wa Johana, nĩ ũnyendete gũkĩra ici?” Petero akĩmũcokeria: “Ĩĩ nĩ ngwendete Mwathani, wee nĩ ũĩ nĩ ngwendete.” Akĩmwĩra: “Heaga tũgondu twakwa gĩa kũrĩa.”+ 16 Ningĩ akĩmũũria riita rĩa kerĩ: “Simoni mũrũ wa Johana, nĩ ũnyendete?” Agĩcokia: “Ĩĩ nĩ ngwendete Mwathani, wee nĩ ũĩ nĩ ngwendete.” Akĩmwĩra: “Rĩithagia tũgondu twakwa.”+ 17 Ningĩ akĩmũũria riita rĩa gatatũ: “Simoni mũrũ wa Johana, nĩ ũnyendete?” Petero akĩigua ũũru nĩ ũndũ wa kũũrio riita rĩa gatatũ: “Nĩ ũnyendete?” Nĩ ũndũ ũcio akĩmwĩra atĩrĩ: “Mwathani, wee nĩ ũĩ maũndũ mothe; nĩ ũĩ nĩ ngwendete.” Jesu akĩmwĩra: “Heaga tũgondu twakwa gĩa kũrĩa.+ 18 Ngũkwĩra atĩrĩ o ma o ma, rĩrĩa warĩ mũnyinyi, nĩwe weĩkĩraga nguo na ũgathiĩ kũrĩa ũkwenda. No wakũra, ũgaatambũrũkagia moko mũndũ ũngĩ agagwĩkĩra nguo agacoka agagũtwara kũrĩa ũtarenda.” 19 Ooigire ũguo kuonania nĩ gĩkuũ kĩa mũthemba ũrĩkũ angĩagoocithirie Ngai nakĩo. Arĩkia kuuga ũguo, akĩmwĩra: “Thiĩ na mbere kũnũmĩrĩra.”+
20 Petero akĩĩhũgũra akĩona mũrutwo ũrĩa weendetwo nĩ Jesu+ amarũmĩrĩire, ũrĩa hĩndĩ ya irio cia hwaĩ-inĩ wetiiranĩtie gĩthũri-inĩ kĩa Jesu na akĩmũũria: “Mwathani, nũũ ũgũgũkunyanĩra?” 21 Kwoguo rĩrĩa oonire mũrutwo ũcio, Petero akĩũria Jesu: “Mwathani, ĩ nake mũndũ ũyũ?” 22 Jesu akĩmwĩra: “Angĩkorũo nĩ wendi wakwa aikare nginya ngaacoka-rĩ, ũndũ ũcio ũragũthĩnia nĩkĩ? Wee thiĩ na mbere kũnũmĩrĩra.” 23 Nĩ ũndũ ũcio ũhoro ũkĩhunja kũrĩ ariũ a Ithe witũ atĩ mũrutwo ũcio ndangĩakuire. No rĩrĩ, Jesu ndaamwĩrĩte atĩ ndangĩakuire, ĩndĩ ooigĩte: “Angĩkorũo nĩ wendi wakwa aikare nginya ngaacoka-rĩ, ũndũ ũcio ũragũthĩnia nĩkĩ?”
24 Ũcio nĩwe mũrutwo+ ũrĩa ũheanĩte ũira wĩgiĩ maũndũ macio na no we waandĩkire maũndũ macio, na nĩ tũĩ atĩ ũira wake nĩ wa ma.
25 Ningĩ, nĩ kũrĩ maũndũ mangĩ maingĩ Jesu eekire, marĩa korũo nĩ maandĩkirũo mothe, ngwĩciria thĩ ndĩngĩaiganĩrire ikũnjo iria ingĩaandĩkirũo.+