Zekaria
13 “Mũthenya ũcio gĩthima nĩ gĩkaahingũrũo nĩ ũndũ wa nyũmba ya Daudi o na aikari a Jerusalemu nĩ ũndũ wa gũtheria mehia na gĩko.+
2 Jehova mũnene wa ita ekuuga atĩrĩ, “Mũthenya ũcio, nĩ ngaatharia marĩĩtwa ma mĩhianano mehere bũrũri-inĩ,+ na ndĩgaacoka kũririkanwo rĩngĩ; na nĩ ngeeheria anabii+ o na roho wa thahu thĩinĩ wa bũrũri ũcio. 3 Na kũngĩkaagĩa mũndũ ũkũratha ũhoro rĩngĩ, ithe na nyina arĩa maamũciarire makaamwĩra atĩrĩ, ‘Ndũgũtũũra muoyo tondũ nĩ warĩtie maheeni na rĩĩtwa rĩa Jehova.’ Na ithe na nyina arĩa maamũciarire nĩ makaamũtheca nĩ ũndũ wake kũratha.+
4 “Mũthenya ũcio o mũnabii nĩ agaaconoka nĩ ũndũ wa kĩoneki gĩake rĩrĩa ekũratha; na matigekĩra nguo* ya maguoya+ nĩgetha maheenanie. 5 Na nĩ akoiga atĩrĩ, ‘Niĩ ndirĩ mũnabii. Ndĩ mũndũ ũrĩmaga tĩri, tondũ nĩ harĩ mũndũ wangũrire rĩrĩa ndarĩ mwĩthĩ.’ 6 Na angĩkorio nĩ mũndũ atĩrĩ, ‘Ironda ici irĩ gatagatĩ ga ciande ciaku* nĩ cia kĩĩ?’ akaamũcokeria amwĩre, “Ndagĩire ironda ici ndĩ thĩinĩ wa nyũmba ya arata akwa.’”*
7 “Atĩrĩrĩ wee rũhiũ rwa njora, arahũka ũũkĩrĩre mũrĩithi wakwa,+
Ũũkĩrĩre mũndũ ũrĩa mũrata wakwa,” ũguo nĩguo Jehova mũnene wa ita ekuuga.
“Ringa mũrĩithi,+ ũreke rũũru rũhurunjũke;*+
Na nĩ ngeerekeria guoko gwakwa harĩ andũ arĩa matarĩ igweta.”
8 Jehova ekuuga atĩrĩ, “Na thĩinĩ wa bũrũri wothe,
Icunjĩ igĩrĩ thĩinĩ waguo nĩ ikaaniinwo ithire;*
Na gĩcunjĩ kĩu kĩngĩ gĩa gatatũ nĩ gĩgaatigara thĩinĩ waguo.
9 Na nĩ ngaahĩtũkĩria gĩcunjĩ kĩu gĩa gatatũ mwaki-inĩ;
Na nĩ ngaamatheria ta ũrĩa betha ĩtheragio,
Na ndĩmagerie ta ũrĩa thahabu ĩgeragio.+
Nĩ magaakaĩra rĩĩtwa rĩakwa,
Na niĩ nĩ ngaametĩka.
Ngooiga atĩrĩ, ‘Acio nĩ andũ akwa,’+
Nao moige, ‘Jehova nĩ Ngai witũ.’”