Ũhoro Mwega Ũrĩa Waandĩkirũo nĩ Mathayo

27 Rĩrĩa gwakinyire rũcinĩ, anene othe a athĩnjĩri-Ngai na athuri a kĩrĩndĩ magĩciira marĩ hamwe nĩguo morage Jesu.+ 2 Thutha wa kũmuoha, makĩmũtwara na makĩmũneana kũrĩ Pilato ũrĩa warĩ ngavana.+

3 Nake Judasi ũrĩa wamũkunyanĩire ona atĩ Jesu nĩ atuĩrũo kũũragwo, akĩgiĩka ngoro na agĩcokia icunjĩ iria 30 cia betha kũrĩ anene a athĩnjĩri-Ngai na athuri,+ 4 akĩmeera: “Nĩ ndĩrehirie rĩrĩa ndĩrakunyanĩire thakame ya mũndũ ũtarĩ na mehia.” Nao makĩmwĩra: “Ũndũ ũcio ũgĩtũkoniĩ atĩa ithuĩ? Nĩ ũhoro waku!”* 5 Nĩ ũndũ ũcio, agĩikia icunjĩ icio cia betha thĩinĩ wa hekarũ na akiumagara. Agĩcoka agĩthiĩ akĩĩita.+ 6 No anene a athĩnjĩri-Ngai makĩoya icunjĩ icio cia betha makiuga: “Tũtiagĩrĩirũo gũciikia kĩgĩna-inĩ kĩrĩa kĩamũre, tondũ ciumanĩte na thogora wa thakame.” 7 Rĩrĩa maarĩrĩirie ũndũ ũcio, makĩhũthĩra mbeca icio kũgũra mũgũnda wa mũũmbi wa nyũngũ, makĩũtua wa gũthikaga ageni. 8 Nĩ ũndũ ũcio, mũgũnda ũcio wĩtagwo Mũgũnda wa Thakame+ nginyagia ũmũthĩ ũyũ. 9 Hĩndĩ ĩyo ciugo ici iria ciaaririo nĩ mũnabii Jeremia ikĩhinga: “Na makĩoya icunjĩ icio 30 cia betha, nĩcio thogora ũrĩa watuĩtwo wa mũndũ ũcio, o we ũrĩa watuĩrĩirũo thogora nĩ ariũ amwe a Isiraeli, 10 na makĩgũra nacio mũgũnda wa mũũmbi wa nyũngũ, kũringana na ũrĩa Jehova* aanjathire.”+

11 Hĩndĩ ĩyo Jesu akĩrũgama mbere ya ngavana, nake ngavana akĩmũũria atĩrĩ: “Wee nĩwe Mũthamaki wa Ayahudi?” Jesu akĩmũcokeria: “Wee mwene nĩ woiga.”+ 12 No rĩrĩa anene a athĩnjĩri-Ngai na athuri maamũthitangaga, gũtirĩ ũndũ ooigire.+ 13 Nĩ ũndũ ũcio Pilato akĩmũũria: “Kaĩ ũtaraigua maũndũ marĩa mothe maragũthitangĩra?” 14 O na kũrĩ ũguo, ndaamũcokeirie ũndũ, ndooigire kiugo o na kĩmwe, nginya ngavana ũcio akĩgega mũno.

15 Na rĩrĩ, o gĩathĩ o gĩathĩ, ngavana ũcio nĩ aamenyerete kuohora mũndũ ũrĩa kĩrĩndĩ gĩkwenda.+ 16 Hĩndĩ ĩyo, nĩ kwarĩ mũndũ warĩ kĩmaramari kĩũru mũno woohetwo wetagwo Baraba. 17 Na hĩndĩ ĩyo kĩrĩndĩ kĩonganĩte hamwe, Pilato agĩkĩũria atĩrĩ: “Mũkwenda ndĩmuohorere ũ, Baraba-ĩ, kana Jesu ũrĩa andũ metaga Kristo?” 18 Nĩ gũkorũo Pilato nĩ aamenyaga atĩ maaneanĩte Jesu nĩ ũndũ wa ũiru. 19 Makĩria ma ũguo, hĩndĩ ĩrĩa aaikarĩire gĩtĩ gĩa ciira, mũtumia wake agĩtũma ndũmĩrĩri kũrĩ we akiuga: “Mũndũ ũcio mũthingu ndũkamwĩke ũndũ, tondũ nĩ ngiĩkire mũno ũmũthĩ kĩroto-inĩ nĩ ũndũ wake.” 20 No anene a athĩnjĩri-Ngai na athuri makĩringĩrĩria kĩrĩndĩ gĩĩtie Baraba,+ na kiuge Jesu oragwo.+ 21 Nake ngavana ũcio akĩũria kĩrĩndĩ ũũ: “Mũrenda ndĩmuohorere ũ harĩ andũ aya erĩ?” Nakĩo gĩkiuga: “Baraba.” 22 Pilato akĩmoria atĩrĩ: “Nake Jesu ũyũ andũ metaga Kristo ndĩmwĩke atĩa?” Nao othe makiuga: “Nĩ acuurio mũtĩ-inĩ!”*+ 23 Akĩũria ũũ: “Nĩkĩ? Nĩ ũũru ũrĩkũ ekĩte?” No magĩkĩrĩrĩria kwanĩrĩra: “Nĩ acuurio mũtĩ-inĩ!”+

24 Rĩrĩa Pilato oonire atĩ gũtirĩ ũndũ arateithia, na ithenya rĩa ũguo no inegene rĩrongerereka, akĩoya maĩ na agĩĩthamba moko arĩ mbere ya kĩrĩndĩ, akiuga ũũ: “Ndingĩcokererũo nĩ thakame ya mũndũ ũyũ. Nĩ ũhoro wanyu.” 25 Hĩndĩ ĩyo andũ acio othe makiuga: “Reke ithuĩ na ciana citũ tũcokererũo nĩ thakame yake.”+ 26 Nĩ ũndũ ũcio akĩmohorera Baraba, na akĩhũũrithia Jesu iboko+ na akĩmũneana akoragĩrũo mũtĩ-inĩ.+

27 Nacio thigari cia ngavana igĩtwara Jesu kwa ngavana ũcio mũciĩ na igĩcokanĩrĩria mbũtũ yothe ya thigari ĩthiũrũrũkĩirie Jesu.+ 28 Na thutha wa kũmũruta kanjũ yake, makĩmũhumba kabuuti gatune,+ 29 na magĩtuma thũmbĩ ya mĩigua makĩmwĩkĩra mũtwe na makĩmũnengera ithanjĩ guoko-inĩ kwa ũrĩo. Magĩcoka magĩturia maru mbere yake makĩmũnyũrũria makĩmwĩraga: “Geithĩka,* wee Mũthamaki wa Ayahudi!” 30 Makĩmũtuĩra mata,+ na makĩoya ithanjĩ rĩu na makĩambĩrĩria kũmũringa mũtwe narĩo. 31 Thutha wa kũmũnyũrũria, makĩmũruta kabuuti kau makĩmũhumba nguo ciake cia igũrũ, magĩcoka makĩmũtwara makamũhũũrĩrĩre mũtĩ-inĩ na mĩcumarĩ.+

32 Rĩrĩa maathiaga, makĩona mũndũ wa kuuma Kurene wetagwo Simoni. Nao makĩmũtindĩkĩrĩria akuue mũtĩ wa Jesu wa kũnyarirĩrũo.*+ 33 Na maakinya kũndũ gwĩtagwo Gologotha, ũguo nĩ kuuga, Kũndũ kwa Ihĩndĩ rĩa Kĩongo,+ 34 makĩmũhe ndibei ĩtukanĩtio na maĩ ma nyongo* anyue;+ no thutha wa kũmĩcama, akĩrega kũmĩnyua. 35 Rĩrĩa maamũhũũrĩrĩire mũtĩ-inĩ na mĩcumarĩ, makĩgayana nguo ciake cia igũrũ na njĩra ya gũcuka mĩtĩ,+ 36 na magĩikara thĩ hau mamũrangĩire. 37 Ningĩ, igũrũ rĩa mũtwe wake makĩhũũrĩra maandĩko maya megiĩ ũndũ ũrĩa aathitangĩirũo: “Ũyũ nĩwe Jesu, Mũthamaki wa Ayahudi.”+

38 Na aici erĩ magĩcuurio mĩtĩ-inĩ hakuhĩ nake, ũmwe mwena wake wa ũrĩo na ũcio ũngĩ mwena wake wa ũmotho.+ 39 Nao andũ arĩa maahĩtũkagĩra hau nĩ maamũnyũrũragia,+ makĩinagia mĩtwe yao+ 40 makiugaga ũũ: “Wee ũroigaga atĩ nĩ ũkũmomora hekarũ na ũmĩake na thikũ ithatũ-rĩ,+ wĩhonokie! Angĩkorũo ũrĩ mũrũ wa Ngai-rĩ, wĩrute mũtĩ-inĩ ũcio wa kũnyarirĩrũo!”*+ 41 O nao anene a athĩnjĩri-Ngai na andĩki-watho hamwe na athuri makĩambĩrĩria kũmũnyũrũria makiugaga ũũ:+ 42 “Nĩ arahonokagia arĩa angĩ no we mwene ndangĩhota kwĩhonokia! Angĩkorũo nĩ Mũthamaki wa Isiraeli-rĩ,+ rĩu nĩ erute mũtĩ-inĩ wa kũnyarirĩrũo,* na nĩ tũkũmwĩtĩkia. 43 Nĩ aigĩte mwĩhoko wake harĩ Ngai; rĩu Ngai nĩ akĩmũhonokie angĩkorũo nĩ aramwenda,+ nĩ gũkorũo ooigire atĩrĩ, ‘Niĩ ndĩ Mũrũ wa Ngai.’”+ 44 O nao aici arĩa maacuurĩtio mĩtĩ-inĩ hamwe nake nĩ maamũnyũrũragia.+

45 Kuuma ta thaa thita cia mũthenya, gũkĩgĩa nduma bũrũri-inĩ ũcio wothe nginya ta thaa kenda cia mũthenya.+ 46 Kĩndũ ta thaa kenda cia mũthenya, Jesu akĩanĩrĩra na mũgambo mũnene akiuga: “Eli, Eli, lama sabakithani?” ũguo nĩ kuuga, “Ngai wakwa, Ngai wakwa, ũndiganĩirie nĩkĩ?”+ 47 Rĩrĩa andũ amwe arĩa maarũgamĩte hau maaiguire ũguo, makĩĩrana atĩrĩ: “Mũndũ ũyũ areta Elija.”+ 48 Na o hĩndĩ ĩyo ũmwe wao akĩhanyũka, akĩoya thibonji, akĩmĩrikia thĩinĩ wa ndibei ngagatu na akĩmĩthecereria ithanjĩ-inĩ na akĩmũhe anyue.+ 49 No acio angĩ makiuga: “Tiganai nake! Rekei tuone kana Elija nĩ egũka kũmũhonokia.” 50 O rĩngĩ Jesu akĩanĩrĩra na mũgambo mũnene agĩcoka agĩtuĩkana.+

51 Nakĩo gĩtaama kĩa handũ harĩa hatheru+ gĩgĩtarũkana icunjĩ igĩrĩ+ kuuma igũrũ nginya thĩ,+ nayo thĩ ĩgĩthingitha nacio ndwaro cia mahiga igĩatũkanga. 52 Na mbĩrĩra* ikĩhingũka, na mĩĩrĩ mĩingĩ ya arĩa aamũre arĩa maakuĩte ĩgĩikio nja 53 na ĩkĩonwo nĩ andũ aingĩ. (Na rĩrĩa aariũkirio, andũ arĩa maathiĩte mbĩrĩra-inĩ icio makĩingĩra itũũra rĩrĩa itheru.) 54 No rĩrĩa mũnene wa mbũtũ na arĩa maarĩ hamwe nake makĩrangĩra Jesu moonire gĩthingithia na maũndũ macio magĩkĩka, magĩĩtigĩra mũno na makiuga: “Hatarĩ nganja, ũyũ ararĩ Mũrũ wa Ngai.”+

55 Ningĩ atumia aingĩ arĩa maatwaranĩte na Jesu kuuma Galili nĩguo mamũtungatĩre nĩ meeroragĩra marĩ haraya;+ 56 amwe ao maarĩ Mariamu Mũmagidali, na Mariamu nyina wa Jakubu na Jose, na nyina wa ariũ a Zebedi.+

57 Na tondũ kwarĩ hakuhĩ gũtuka-rĩ, hagĩũka mũndũ ũmwe mũtongu kuuma Arimathea wetagwo Jusufu, ũrĩa o nake watuĩkĩte mũrutwo wa Jesu.+ 58 Mũndũ ũcio agĩthiĩ kũrĩ Pilato na akĩhoya anengerũo mwĩrĩ wa Jesu.+ Nake Pilato agĩathana anengerũo.+ 59 Jusufu akĩoya mwĩrĩ ũcio, akĩũthaya na gĩtambaya gĩtheru gĩa gatani ĩrĩa njega,+ 60 na akĩũkomia thĩinĩ wa mbĩrĩra*+ yake njerũ ĩrĩa eenjete rwaro-inĩ rwa ihiga. Na thutha wa kũgaragaria ihiga inene mũromo-inĩ wa mbĩrĩra* ĩyo, akiumagara. 61 No Mariamu Mũmagidali na Mariamu ũcio ũngĩ magĩthiĩ na mbere gũikara hau, maikaire thĩ mbere ya mbĩrĩra.+

62 Mũthenya ũyũ ũngĩ, ũrĩa warũmĩrĩire mũthenya wa Kũhaarĩria,+ anene a athĩnjĩri-Ngai na Afarisai makĩgomana harĩ Pilato, 63 makĩmwĩra: “Mũnene, nĩ twaririkana atĩ rĩrĩa mũheenania ũcio ararĩ muoyo aroigĩte atĩrĩ, ‘Nĩngaariũka thutha wa thikũ ithatũ.’+ 64 Nĩ ũndũ ũcio-rĩ, athana atĩ mbĩrĩra ĩyo ĩrangĩrũo nginya mũthenya wa gatatũ nĩguo arutwo ake matigoke mamũiye+ macoke mambĩrĩrie kwĩra andũ, ‘Nĩ ariũkĩtio kuuma kũrĩ arĩa akuũ!’ Na maheeni macio mangĩkorũo marĩ moru gũkĩra marĩa ma mbere.” 65 Pilato akĩmeera atĩrĩ: “No muoe arangĩri. Thiĩi mũmĩrangĩre o ũrĩa mũngĩhota.” 66 Nao magĩthiĩ makĩgitĩra mbĩrĩra ĩyo na njĩra ya gũthingĩrĩria ihiga rĩayo biũ na makĩiga arangĩri ho.