Ũhoro Mwega Ũrĩa Waandĩkirũo nĩ Mariko
11 Na rĩrĩa maakuhĩrĩirie Jerusalemu, Bethifage na Bethania+ Kĩrĩma-inĩ kĩa Mĩtamaiyũ, agĩtũma arutwo ake erĩ+ 2 akĩmeera ũũ: “Thiĩi gĩcagi-inĩ kĩĩrĩa mũrona, na mwakinya nĩ mũkuona njaũ ya ndigiri yohetwo, ĩrĩa gũtarĩ mũndũ ũrĩ wamĩikarĩra. Mũmĩohore na mũndehere haha. 3 Na mũndũ o wothe angĩmũũria atĩrĩ, ‘Mũramĩohora nĩkĩ?’ Mũmwĩre, ‘Mwathani nĩ aramĩbatara na nĩ ekũmĩcokia o na ihenya.’” 4 Kwoguo magĩthiĩ na magĩkora njaũ ĩyo ya ndigiri yohetwo handũ mũrango-inĩ hakuhĩ na njĩra, na makĩmĩohora.+ 5 No andũ amwe arĩa maarũngiĩ hau makĩmoria atĩrĩ: “Mũrohora njaũ ĩyo ya ndigiri nĩkĩ?” 6 Makĩmeera o ũrĩa Jesu ooigĩte, nao andũ acio makĩreka mathiĩ.
7 Magĩtwarĩra Jesu njaũ ĩyo+ ya ndigiri na makĩmĩigĩrĩra nguo ciao cia igũrũ, nake akĩmĩikarĩra.+ 8 Ningĩ andũ aingĩ makĩara nguo ciao cia igũrũ njĩra-inĩ, nao angĩ magĩtua mathĩgĩ mĩgũnda-inĩ.+ 9 Na andũ arĩa maathiaga marĩ mbere yake na arĩa maarĩ thutha wake maanagĩrĩra makiugaga ũũ: “Twahoya ũmũhonokie!+ Kũrathimwo nĩ ũrĩa ũroka na rĩĩtwa rĩa Jehova!*+ 10 Kũrathimwo nĩ Ũthamaki ũrĩa ũroka wa ithe witũ Daudi!+ Twakũhoya ũmũhonokie ũrĩ kũu igũrũ mũno!” 11 Agĩtonya Jerusalemu na agĩthiĩ hekarũ-inĩ, akĩrora maũndũ mothe, no tondũ mathaa nĩ maathiĩte mũno, agĩthiĩ Bethania marĩ hamwe na arĩa Ikũmi na Erĩ.+
12 Mũthenya ũyũ ũngĩ rĩrĩa mooimaga Bethania, akĩigua ahũtiĩ.+ 13 Arĩ haraya akĩona mũkũyũ warĩ na mathangũ, na agĩthiĩ harĩ guo kũrora kana no one kĩndũ. No aakinya ho, gũtirĩ kĩndũ oonire tiga o mathangũ, tondũ gĩtiarĩ kĩmera kĩa ngũyũ. 14 Nĩ ũndũ ũcio akĩwĩra atĩrĩ: “Mũndũ o na ũrĩkũ ndakanarĩe itunda kuuma harĩ wee rĩngĩ.”+ Nao arutwo ake nĩ maathikagĩrĩria.
15 Magĩkinya Jerusalemu. Agĩtonya thĩinĩ wa hekarũ na akĩambĩrĩria kũrutũrũra andũ arĩa meendagia na makagũra indo thĩinĩ wa hekarũ, na akĩngʼaũrania metha cia arĩa maakũũranagia mbeca, na itĩ cia arĩa meendagia ndutura,+ 16 na ndeetĩkagĩria mũndũ o na ũrĩkũ ahĩtũkĩrie kĩndũ hekarũ-inĩ. 17 Na aarutanaga akameera: “Githĩ ti kwandĩke ũũ: ‘Nyũmba yakwa ĩgeetagwo nyũmba ya mahoya harĩ ndũrĩrĩ ciothe’?+ No inyuĩ mũmĩtuĩte ngurunga ya atunyani.”+ 18 Nao anene a athĩnjĩri-Ngai na andĩki-watho makĩigua ũhoro ũcio, na makĩambĩrĩria gũcaria ũrĩa mangĩmũũraga;+ nĩ gũkorũo nĩ maamwĩtigagĩra tondũ kĩrĩndĩ gĩothe nĩ kĩagegetio nĩ ũrutani wake.+
19 Rĩrĩa gwakuhĩrĩirie gũtuka, makiuma kũu itũũra-inĩ. 20 No rũcinĩ tene rĩrĩa maahĩtũkaga, makĩona mũtĩ ũrĩa wa mũkũyũ ũũmĩte nginya o mĩri-inĩ yaguo.+ 21 Petero akĩririkana ũrĩa gwekĩkĩte na akĩmwĩra atĩrĩ: “Rabii, ta rora! mũkũyũ ũrĩa ũrarumire nĩ ũũmĩte.”+ 22 Nake Jesu akĩmacokeria akĩmeera atĩrĩ: “Gĩai na wĩtĩkio harĩ Ngai. 23 Ngũmwĩra atĩrĩ na ma, mũndũ wothe angĩkeera kĩrĩma gĩkĩ, ‘Uma haha ũthiĩ ũgwe iria-inĩ,’ na age nganja ngoro-inĩ yake, na etĩkie atĩ ũrĩa oiga nĩ ũgwĩkĩka, ũndũ ũcio nĩ ũgeekĩka.+ 24 Na nĩkĩo ngũmwĩra atĩrĩ, maũndũ marĩa mothe mũhoyaga na mũgetia, gĩagai na wĩtĩkio atĩ nĩ mũmamũkĩrĩte, na nĩ mũrĩheagwo.+ 25 Na rĩrĩa mũkũrũgama nĩguo mũhoe, ohagĩrai andũ arĩa angĩ maũndũ marĩa mothe mamwĩhĩirie, nĩgetha o nake Ithe wanyu wa igũrũ amuohagĩre mehia manyu.”+ 26 *——
27 Magĩcoka magĩthiĩ Jerusalemu o rĩngĩ. Na rĩrĩa aathiangaga kũu thĩinĩ wa hekarũ, anene a athĩnjĩri-Ngai na andĩki-watho o hamwe na athuri magĩthiĩ harĩ we 28 na makĩmũũria atĩrĩ: “Wĩkaga maũndũ maya na wathani ũrĩkũ? Kana nũũ ũkũheete wathani ũyũ wa gwĩka maũndũ maya?”+ 29 Jesu akĩmeera ũũ: “Nĩ ngũmũũria kĩũria kĩmwe. Njokeriai, na niĩ nĩ ngũmwĩra njĩkaga maũndũ maya na wathani ũrĩkũ. 30 Ũbatithio wa Johana+ woimĩte igũrũ kana woimĩte kũrĩ andũ?* Njokeriai.”+ 31 Nĩ ũndũ ũcio makĩambĩrĩria kwĩrana atĩrĩ: “Tũngiuga, ‘Woimĩte igũrũ,’ egũtũũria, ‘Mwakĩagire kũmwĩtĩkia nĩkĩ?’ 32 Kana tuuge, ‘Woimĩte kũrĩ andũ’?” Magĩĩtigĩra kuuga ũguo tondũ kĩrĩndĩ gĩetĩkĩtie atĩ kũna Johana aarĩ mũnabii.+ 33 Nĩ ũndũ ũcio magĩcokeria Jesu atĩrĩ: “Tũtiũĩ.” Jesu akĩmeera: “O na niĩ ndikũmwĩra njĩkaga maũndũ maya na wathani ũrĩkũ.”