Ũhoro Mwega Ũrĩa Waandĩkirũo nĩ Luka
14 Hĩndĩ ĩngĩ nĩ aathiire kũrĩa irio mũciĩ kwa mũtongoria ũmwe wa Afarisai mũthenya wa Thabatũ, nao andũ nĩ maamũroraga mũno. 2 Na rĩrĩ, hau mbere yake haarĩ na mũndũrũme warĩ na mũrimũ wa kũimba mwĩrĩ.* 3 Nĩ ũndũ ũcio Jesu akĩũria arĩa mooĩ Watho wega na Afarisai atĩrĩ: “Nĩ kwagĩrĩire kũhonania mũthenya wa Thabatũ kana gũtiagĩrĩire?”+ 4 No magĩkira. Nĩ ũndũ ũcio akĩnyita mũndũ ũcio, akĩmũhonia, na akĩmwĩra athiĩ. 5 Agĩcoka akĩmoria atĩrĩ: “Nũũ gatagatĩ-inĩ kanyu, ndegwa yake kana mũrũwe angĩgwa thĩinĩ wa gĩthima+ mũthenya wa Thabatũ,+ ũtangĩmũgucia o hĩndĩ ĩyo amũrute?” 6 No matiahotire kũmũcokeria.
7 Thutha wa kuona ũrĩa arĩa maanyitĩtwo ũgeni meethuuragĩra handũ harĩa hatĩĩku makĩria, akĩmahe ngerekano.+ Akĩmeera atĩrĩ: 8 “Rĩrĩa wetwo nĩ mũndũ iruga-inĩ rĩa ũhiki-rĩ, ndũgaikarage handũ harĩa hatĩĩku makĩria.+ Hihi ahota gũkorũo etĩte mũndũ ũngĩ mũtĩĩku gũgũkĩra. 9 Nake mũndũ ũrĩa ũmũnyitĩte ũgeni inyuerĩ oke akwĩre, ‘Reke mũndũ ũyũ aikare hau ũrĩ.’ Nawe hĩndĩ ĩyo ũthiĩ ũconokete ũgaikare handũ harĩa hatarĩ hatĩĩku mũno. 10 No rĩrĩa wanyitwo ũgeni-rĩ, thiaga ũgaikara handũ harĩa hatarĩ hatĩĩku mũno, nĩguo mũndũ ũrĩa ũkũnyitĩte ũgeni oka, akwĩre atĩrĩ, ‘Mũrata, thiĩ harĩa hatĩĩku makĩria.’ Nawe nĩ ũgũtĩĩka harĩ ageni acio angĩ othe.+ 11 Nĩ gũkorũo mũndũ o wothe wĩtũũgagĩria nĩ akaanyihio, na ũrĩa wothe wĩnyihagia nĩ agaatũũgĩrio.”+
12 Jesu agĩcoka akĩra mũndũ ũcio wamũnyitĩte ũgeni atĩrĩ: “Rĩrĩa ũkũhaarĩria iruga rĩa mũthenya kana rĩa hwaĩ-inĩ-rĩ, ndũgetage arata aku kana ariũ a thoguo kana andũ a mbarĩ cianyu kana itonga cia itũũra. Kwaga ũguo, o nao hihi mahota gũgaagwĩta iruga-inĩ, naguo ũndũ ũcio ũtuĩke irĩhi harĩ wee. 13 No rĩrĩa wahaarĩria iruga, ĩtaga arĩa athĩni, cionje, arĩa mathuaga, na atumumu;+ 14 na nĩ ũrĩgĩaga na gĩkeno, tondũ acio matirĩ kĩndũ gĩa gũkũrĩha nakĩo. Nĩ gũkorũo nĩ ũkaarĩhwo hĩndĩ ĩrĩa andũ arĩa athingu makaariũkio.”+
15 Rĩrĩa ũmwe wa arĩa maanyitĩtwo ũgeni aaiguire ũguo akĩmwĩra ũũ: “Gũkena nĩ mũndũ ũrĩa ũkaarĩagĩra* Ũthamaki-inĩ wa Ngai.”
16 Jesu akĩmwĩra atĩrĩ: “Mũndũ ũmwe nĩ aahaarĩirie iruga inene rĩa hwaĩ-inĩ,+ na agĩta andũ aingĩ. 17 Ithaa rĩa irio cia hwaĩ-inĩ agĩtũma ngombo yake ĩkeere arĩa maanyitĩtwo ũgeni atĩrĩ, ‘Ũkai, tondũ maũndũ mothe rĩu nĩ mahaarĩrie.’ 18 Ĩndĩ othe makĩambĩrĩria kũruta ciĩgwatio.+ Mũndũ wa mbere akĩmwĩra atĩrĩ, ‘Nĩ ndĩragũrire mũgũnda na nĩ ndĩrabatara gũthiĩ kũũrora; thiĩ ũmwĩre andekere.’ 19 Ũngĩ akiuga, ‘Nĩ ndĩragũrire ndegwa ikũmi cia kuohererũo icoki irĩ igĩrĩ igĩrĩ na ndĩrenda gũthiĩ gũcigeria; thiĩ ũmwĩre andekere.’+ 20 Nake ũngĩ akiuga, ‘No hĩndĩ ndĩrahikanirie, nĩ ũndũ ũcio ndikũhota gũka.’ 21 Nĩ ũndũ ũcio ngombo ĩyo ĩkĩhũndũka na ĩgĩtwara ũhoro ũcio kũrĩ mwathi wayo. Nake mwathi wayo akĩrakara akĩra ngombo yake atĩrĩ, ‘Thiĩ narua njĩra-inĩ iria nene o na tũcocoro-inĩ twa itũũra, ũrehe andũ arĩa athĩni na arĩa cionje na atumumu na arĩa mathuaga.’ 22 Thutha wa kahinda ngombo ĩyo ĩkiuga, ‘Mwathi wakwa, ũndũ ũrĩa wathanire nĩ wekwo, na no kũrĩ kũndũ gũtigaru.’ 23 Kwoguo mwathi wayo akĩmĩra atĩrĩ, ‘Thiĩ barabara-inĩ na tũcĩra-inĩ ũmaringĩrĩrie moke, nĩguo nyũmba yakwa ĩiyũre.+ 24 Nĩ gũkorũo ngũmwĩra atĩrĩ, gũtirĩ mũndũ o na ũmwe wa acio maretĩtwo ũgũcama iruga rĩakwa rĩa hwaĩ-inĩ.’”+
25 Na rĩrĩ, kĩrĩndĩ kĩnene nĩ gĩatwaranaga nake, akĩĩhũgũra agĩkĩra atĩrĩ: 26 “Mũndũ o wothe angĩũka kũrĩ niĩ na ndathũire* ithe na nyina na mũtumia wake na ciana ciake na ariũ na aarĩ a nyina, o hamwe na muoyo* wake mwene,+ ndangĩtuĩka mũrutwo wakwa.+ 27 Ũrĩa wothe ũtekuoya mũtĩ wake wa kũnyarirĩrũo* na anũmĩrĩre ndangĩtuĩka mũrutwo wakwa.+ 28 Kwa ngerekano-rĩ, nũũ gatagatĩ-inĩ kanyu akĩenda gwaka nyũmba ndaya na igũrũ ũtambaga gũikara thĩ agatara kĩrĩa arabatara nĩguo one kana kĩrĩa arĩ nakĩo nĩ gĩkũigana kũmĩrĩkia? 29 Angĩaga gwĩka ũguo, ahota gwaka mũthingi no aremwo nĩ kũmĩrĩkia, nao andũ othe maamĩona mambĩrĩrie kũmũnyũrũria, 30 makiugaga atĩrĩ: ‘Mũndũ ũyũ aambĩrĩirie gwaka no ndaahotire kũrĩkia.’ 31 Kana nĩ mũthamaki ũrĩkũ ũthiaga mbaara-inĩ kũrũa na mũthamaki ũngĩ atambĩte gũcokania ndundu na andũ ake nĩgetha one kana arĩ na thigari 10,000 nĩ ekũhota gwĩtiiria ũcio ũroka kũrũa nake arĩ na thigari 20,000? 32 Angĩkorũo kũna ndangĩmwĩtiiria-rĩ, atũmaga gĩkundi kĩa mabarũthi kũrĩ ũcio ũngĩ arĩ o kũraya nĩguo agacarie thayũ. 33 Na njĩra o ta ĩyo, gũtirĩ o na ũmwe wanyu ũtoigĩire indo ciake ciothe ũhoro* ũngĩtuĩka mũrutwo wakwa.+
34 “Hatarĩ nganja, cumbĩ nĩ mwega. No cumbĩ ũngĩthira hinya waguo-rĩ, ũngĩcokio mũcamo na kĩĩ?+ 35 Ndũngĩagĩrĩra harĩ tĩri kana harĩ thumu. Andũ nĩ kũũte maũteaga. Ũrĩa ũrĩ na matũ ma kũigua, nĩ aigue.”+