Ezekieli

18 Na kiugo kĩa Jehova gĩkĩnginyĩra o rĩngĩ ngĩrũo atĩrĩ: 2 “Thimo ĩno mũgwetaga thĩinĩ wa bũrũri wa Isiraeli yugaga atĩa, ‘Maithe ma ciana nĩ marĩte thabibũ ngagatu, no magego ma ciana makaigua thithi’?+

3 Jehova Mwathani Ũrĩa Mũnene oigĩte ũũ, “‘O ta ũrĩa niĩ ndũũraga muoyo, mũtigaacoka kũgweta thimo ĩyo thĩinĩ wa Isiraeli. 4 Atĩrĩrĩ, mĩoyo* yothe nĩ yakwa. Muoyo wa ithe o na muoyo wa mũriũ, yothe nĩ yakwa. Mũndũ* ũrĩa wĩhagia nĩwe ũgaakua.

5 “‘Ĩ angĩkorũo mũndũ nĩ mũthingu na ekaga maũndũ ma kĩhooto na marĩa magĩrĩire. 6 Ndarĩaga magongona marutĩirũo mĩhianano irĩma-inĩ igũrũ;+ ndehokaga mĩhianano ĩrĩ magigi* ya nyũmba ya Isiraeli; ndathahagia mũtumia wa mũndũ ũrĩa ũngĩ+ kana agakoma na mũtumia ũrĩ ihinda-inĩ rĩa mweri;+ 7 ndahinyagĩrĩria mũndũ o na ũrĩkũ,+ no nĩ acokagĩria mũndũ ũrĩa ũrĩ na thiirĩ wake kĩndũ gĩake gĩa kũrũgamĩrĩra thiirĩ;+ ndatunyaga mũndũ o na ũrĩkũ,+ no nĩ aheaga ũrĩa mũhũtu irio ciake mwene+ nake ũrĩa ũrĩ njaga akamũhumbĩra na nguo;+ 8 ndakombanagĩra nĩguo etie maciaro kana one uumithio,+ no nĩ ethemaga gwĩka ũndũ ũtarĩ wa kĩhooto;+ nĩ atuithanagia ciira na kĩhooto kĩa ma gatagatĩ ka mũndũ na ũrĩa ũngĩ;+ 9 na atũũraga arũmagĩrĩra mawatho makwa na agathĩkĩra matuĩro makwa ma ciira nĩguo ekage maũndũ na wĩhokeku. Mũndũ ũcio nĩ mũthingu na hatarĩ nganja nĩ agaatũũra muoyo,’+ ũguo nĩguo Jehova Mwathani Ũrĩa Mũnene ekuuga.

10 “‘No mũndũ ũcio angĩgĩa mũriũ mũtunyani+ kana mũũragani*+ kana wĩkaga ũndũ o wothe wa macio mangĩ 11 (o na gũtuĩka ithe ndekĩte ũndũ o na ũmwe wa macio)—mũriũ ũcio nĩ arĩaga magongona marutĩirũo mĩhianano irĩma-inĩ igũrũ, nĩ athahagia mũtumia wa mũndũ ũrĩa ũngĩ, 12 nĩ ahinyagĩrĩria abatari na athĩni,+ agatunya andũ indo ciao, ndacokagia kĩrĩa oete gĩa kũrũgamĩrĩra thiirĩ, nĩ ehokaga mĩhianano ĩrĩ magigi,+ nĩ ekaga maũndũ marĩ magigi,+ 13 akombanagĩra nĩguo etie maciaro na one uumithio+—mũriũ ũcio ndagaatũũra muoyo. No mũhaka akooragwo nĩ ũndũ wa maũndũ macio mothe marĩ magigi ekĩte. Thakame yake mwene nĩ ĩkaamũcokerera.

14 “‘Ĩ angĩkorũo mũndũ arĩ na mũriũ wonaga mehia mothe marĩa ithe ekaga, na o na gũtuĩka nĩ amonaga, we ndekaga maũndũ ta macio. 15 Ndarĩaga magongona marutĩirũo mĩhianano irĩma-inĩ igũrũ; ndehokaga mĩhianano ĩrĩ magigi ya nyũmba ya Isiraeli; ndathahagia mũtumia wa mũndũ ũrĩa ũngĩ; 16 ndahinyagĩrĩria mũndũ o na ũrĩkũ; ndaregaga na kĩrĩa oete gĩa kũrũgamĩrĩra thiirĩ; ndatunyaga andũ indo ciao; nĩ aheaga ũrĩa mũhũtu irio ciake mwene nake ũrĩa ũrĩ njaga akamũhumbĩra na nguo; 17 nĩ ethemaga kũhinyĩrĩria mũthĩni; ndakombanagĩra nĩguo etie maciaro kana one uumithio; nĩ athĩkagĩra matuĩro makwa ma ciira na akarũmĩrĩra mawatho makwa. Mũndũ ũcio ndagaakua nĩ ũndũ wa mahĩtia ma ithe. Hatarĩ nganja nĩ agaatũũra muoyo. 18 No tondũ ithe nĩ ekĩte maũndũ ma ungumania, agatunya mũrũ wa ithe, na ageka andũ ake maũndũ moru, nĩ agaakua nĩ ũndũ wa mahĩtia make.

19 “‘No nĩ mũkoria atĩrĩ: “Mũriũ araga gũcokererũo nĩ mahĩtia ma ithe nĩkĩ?” Hatarĩ nganja mũriũ ũcio nĩ agaatũũra muoyo+ tondũ nĩ ekĩte maũndũ ma kĩhooto na ma ũthingu, nĩ arũmĩrĩire mawatho makwa mothe na akamathĩkĩra. 20 Mũndũ ũrĩa wĩhagia nĩwe ũgaakua.+ Mũriũ ndagaacokererũo nĩ mahĩtia ma ithe, na ithe ndagaacokererũo nĩ mahĩtia ma mũriũ. Mũndũ mũthingu agaatuĩrũo kũringana na ũthingu wake arĩ wiki, na mũndũ mwaganu atuĩrũo kũringana na waganu wake arĩ wiki.+

21 “‘Mũndũ mwaganu angĩtigana na mehia marĩa mothe ekĩte na arũmĩrĩre mawatho makwa na eke maũndũ ma kĩhooto na ma ũthingu, hatarĩ nganja nĩ agaatũũra muoyo. Ndagaakua.+ 22 Gũtirĩ ihĩtia o na rĩmwe rĩa marĩa ekĩte rĩkaaririkanwo.+ Nĩ agaatũũra muoyo nĩ ũndũ wa gwĩka maũndũ ma ũthingu.’+

23 “‘Kaĩ ngenagio o na hanini nĩ gĩkuũ kĩa mũndũ mwaganu?’+ ũguo nĩguo Jehova Mwathani Ũrĩa Mũnene ekuuga. ‘Githĩ ti kwenda ingĩenda agarũrũke atigane na mĩthiĩre yake nĩguo atũũre muoyo?’+

24 “‘No mũndũ mũthingu angĩtigana na ũthingu wake eke ũndũ mũũru,* ageka maũndũ mothe marĩ magigi marĩa andũ aganu mekaga-rĩ, hihi nĩ agaatũũra muoyo? Gũtirĩ gĩĩko o na kĩmwe kĩa ũthingu eekire gĩkaaririkanwo.+ Nĩ agaakua nĩ ũndũ wa kwaga kwĩhokeka na nĩ ũndũ wa mehia marĩa ekĩte.+

25 “‘No nĩ mũkoiga atĩrĩ: “Njĩra ya Jehova ti ya kĩhooto.”+ Ta thikĩrĩriai inyuĩ nyũmba ya Isiraeli! Hihi nĩ njĩra yakwa ĩtarĩ ya kĩhooto?+ Githĩ ti njĩra cianyu itarĩ cia kĩhooto?+

26 “‘Mũndũ mũthingu angĩtigana na ũthingu wake eke ũndũ mũũru acoke akue nĩ ũndũ waguo-rĩ, agaakua nĩ ũndũ wa ũũru wake mwene.

27 “‘Nake mũndũ mwaganu angĩtigana na waganu ũrĩa ekĩte na ambĩrĩrie gwĩka maũndũ ma kĩhooto na ma ũthingu, nĩ akaahonokia muoyo wake mwene.+ 28 Rĩrĩa ataũkĩrũo na atigana na mehia marĩa mothe ekĩte, hatarĩ nganja nĩ agaatũũra muoyo. Ndagaakua.

29 “‘No nyũmba ya Isiraeli nĩ ĩkoiga atĩrĩ: “Njĩra ya Jehova ti ya kĩhooto.” Hihi kũna nĩ njĩra ciakwa itarĩ cia kĩhooto, inyuĩ nyũmba ya Isiraeli?+ Githĩ ti njĩra cianyu itarĩ cia kĩhooto?’

30 “‘Nĩ ũndũ ũcio, ngaatuĩra o ũmwe wanyu kũringana na njĩra ciake,+ inyuĩ nyũmba ya Isiraeli,’ ũguo nĩguo Jehova Mwathani Ũrĩa Mũnene ekuuga. ‘Garũrũkai, ĩni, mũgarũrũke biũ mũtigane na mehia manyu mothe nĩguo matigatuĩke mũhĩnga harĩ inyuĩ matũme mũkorũo na mahĩtia. 31 Tiganai na mehia mothe marĩa mwĩkĩte+ na mũgĩe na* ngoro njerũ na roho mwerũ,+ tondũ rĩrĩ, mũgũgĩkua nĩkĩ+ inyuĩ andũ a nyũmba ya Isiraeli?’

32 “‘Niĩ ndikenagio o na hanini nĩ gĩkuũ kĩa mũndũ o na ũrĩkũ,’+ ũguo nĩguo Jehova Mwathani Ũrĩa Mũnene ekuuga. ‘Nĩ ũndũ ũcio, garũrũkai nĩgetha mũtũũre muoyo.’”+