Kĩambĩrĩria
48 Thutha wa maũndũ macio, Jusufu akĩrũo ũũ: “Atĩrĩrĩ, baba wanyu nĩ arathiĩ athirĩtwo nĩ hinya.” Agĩgĩthiĩ na ariũ ake eerĩ Manase na Efiraimu.+ 2 Nake Jakubu akĩrũo ũũ: “Mũrũguo Jusufu nĩ oka kũrĩ we.” Nĩ ũndũ ũcio Isiraeli akĩĩhe hinya na agĩikara thĩ ũrĩrĩ-inĩ wake. 3 Na Jakubu akĩra Jusufu:
“Ngai Mwene-Hinya-Wothe nĩ aanyumĩrĩire ndĩ Luzu bũrũri-inĩ wa Kanaani na akĩndathima.+ 4 Akĩnjĩra, ‘Nĩ ngũtũma ũciarane, na ndũme ũingĩhe, na ngũtue kĩũngano kĩa ikundi cia andũ,+ naguo bũrũri ũyũ nĩ ngaaũhe mbeũ yaku* ĩrĩa ĩgooka thutha waku, ũtuĩke igai rĩa gũtũũra.’+ 5 Na rĩu ariũ aku eerĩ arĩa waciarĩirũo bũrũri-inĩ wa Misiri itanoka kũrĩ we gũkũ Misiri, nĩ akwa.+ Efiraimu na Manase megũtuĩka akwa o ta ũrĩa Rubeni na Simeoni marĩ akwa.+ 6 No ciana iria ũgũciarĩrũo thutha wao cigũtuĩka ciaku. Cigeetanagio na marĩĩtwa ma ariũ a ithe igai-inĩ rĩacio.+ 7 No niĩ-rĩ, rĩrĩa ndoimaga Padani, Rakeli agĩkua+ arĩ hakuhĩ na niĩ bũrũri-inĩ wa Kanaani, tũrĩ o haraihu nĩguo tũkinye Efiratha.+ Kwoguo ngĩmũthika njĩra-inĩ ya gũthiĩ Efiratha, nĩkuo Bethilehemu.”+
8 Isiraeli agĩcoka akĩona ariũ a Jusufu na akĩũria: “Aya nĩa?” 9 Nĩ ũndũ ũcio Jusufu akĩra ithe ũũ: “Nĩ ariũ akwa arĩa Ngai aheete ndĩ gũkũ.”+ Nake akiuga: “Ndagũthaitha ũmarehe harĩ niĩ, nĩgetha ndĩmarathime.”+ 10 Na rĩrĩ, maitho ma Isiraeli nĩ maatigĩte kuona wega nĩ ũndũ wa ũkũrũ, na nĩ aaremagwo nĩ kuona. Kwoguo Jusufu akĩmatwara hakuhĩ nake, nake akĩmamumunya na akĩmahĩmbĩria. 11 Isiraeli akĩra Jusufu atĩrĩ: “Ndieciragia nĩ ngoona ũthiũ waku,+ no Ngai nĩ arekete nyone nginya mbeũ yaku.”* 12 Jusufu agĩcoka akĩmeheria maru-inĩ ma Isiraeli, na akĩinamĩrĩra agĩturumithia ũthiũ wake thĩ.
13 Jusufu akĩmoya eerĩ, akĩnyita Efiraimu+ na guoko gwake kwa ũrĩo arĩ mwena wa ũmotho wa Isiraeli nake Manase+ akĩmũnyita na guoko gwake kwa ũmotho arĩ mwena wa ũrĩo wa Isiraeli, na akĩmatwara hakuhĩ nake. 14 No rĩrĩ, Isiraeli aatambũrũkirie guoko gwake kwa ũrĩo agĩkũigĩrĩra mũtwe-inĩ wa Efiraimu, o na gũtuĩka nĩwe warĩ mũnini, na akĩigĩrĩra guoko gwake kwa ũmotho mũtwe-inĩ wa Manase. Aaigĩrĩire moko make ũguo akĩmenyaga, tondũ Manase nĩwe warĩ irigithathi.+ 15 Agĩcoka akĩrathima Jusufu na akiuga:+
“Ngai ũrĩa wa ma ũrĩa maithe maitũ Iburahimu na Isaaka maathiaga marĩ mbere yake,+
O we Ngai ũrĩa wa ma ũkoretwo akĩndĩithia ũtũũro-inĩ wakwa nginya ũmũthĩ-rĩ,+
16 Mũraika ũrĩa ũkoretwo akĩnduta ũũru-inĩ wothe,+ arorathima tũmwana tũtũ.+
Maroetanagio na rĩĩtwa rĩakwa na metanagio na rĩĩtwa rĩa maithe maitũ, Iburahimu na Isaaka,
Maroingĩha matuĩke kĩrĩndĩ kĩnene thĩinĩ wa thĩ.”+
17 Rĩrĩa Jusufu oonire atĩ ithe aathiire o na mbere kũigĩrĩra guoko gwake kwa ũrĩo mũtwe-inĩ wa Efiraimu-rĩ, ũndũ ũcio ndwamũkenirie, kwoguo akĩgeria kũnyita guoko gwa ithe akweherie mũtwe-inĩ wa Efiraimu akũigĩrĩre mũtwe-inĩ wa Manase. 18 Jusufu akĩra ithe ũũ: “Ti ũguo baba, nĩ gũkorũo ũyũ nĩwe irigithathi.+ Igĩrĩra guoko gwaku kwa ũrĩo mũtwe-inĩ wake.” 19 No ithe agĩikara akĩregaga na akiuga: “Nĩ ndĩramenya, mũrũ wakwa, nĩ ndĩramenya. O nake nĩ agaatuĩka andũ aingĩ, na o nake nĩ agaatuĩka mũndũ mũnene. O na kũrĩ ũguo-rĩ, mũrũ wa nyina ũyũ mũnini nĩ akaaneneha kũmũkĩra,+ nayo mbeũ yake* nĩ ĩkaingĩha ĩiganane na ndũrĩrĩ.”+ 20 Kwoguo agĩthiĩ na mbere kũmarathima mũthenya ũcio,+ akiuga:
“Isiraeli nĩ makũgwetage rĩrĩa mekũrathimana, makoiga,
‘Ngai arogũtua o ta Efiraimu na o ta Manase.’”
Agĩgĩikara akĩigaga Efiraimu mbere ya Manase.
21 Isiraeli agĩcoka akĩra Jusufu: “Atĩrĩrĩ, niĩ nĩ gũkua ndĩrakua,+ no hatarĩ nganja Ngai nĩ egũthiĩ na mbere gũkorũo hamwe nawe na agũcokie bũrũri-inĩ wa maithe manyu ma tene.+ 22 No niĩ-rĩ, nĩ ndakũhe gĩcunjĩ kĩmwe kĩa mũgũnda* makĩria ma ariũ a thoguo, kĩrĩa ndoire kuuma guoko-inĩ kwa Aamori na rũhiũ rwakwa rwa njora na ũta wakwa.”