Malaki
1 Ĩno nĩ ndũmĩrĩri nditũ:
Kiugo kĩa Jehova kũrĩ Isiraeli kũgerera Malaki:*
2 “Nĩ ndĩmuonetie wendo inyuĩ andũ aya,”+ ũguo nĩguo Jehova ekuuga.
No inyuĩ muugaga: “Ũtuonetie wendo na njĩra ĩrĩkũ?”
“Githĩ Esau ndaarĩ mũrũ wa nyina na Jakubu?”+ ũguo nĩguo Jehova ekuuga. “No nĩ ndendete Jakubu, 3 na Esau nĩ ndamũthũire;+ na ngĩtũma irĩma ciake ituĩke kũndũ gũtiganĩrie+ na igai rĩake ngĩrĩtigĩra ngui cia werũ-inĩ.”+
4 “O na gũtuĩka andũ a Edomu moigaga, ‘Nĩ tũhehenjetwo, no nĩ tũgaacoka na twake rĩngĩ kũndũ kũu kwanangĩku,’ Jehova mũnene wa ita ekuuga atĩrĩ, ‘Nĩ magaaka, no nĩ ngaamomora, na mageetagwo “gĩcigo kĩrĩa kĩa waganu” na “andũ arĩa Jehova atuĩrĩire atĩ nĩ ehia tene na tene.”+ 5 Maitho manyu ene nĩ makoona ũndũ ũcio, na nĩ mũkoiga atĩrĩ: “Jehova arotũũgĩrio igũrũ rĩa gĩcigo kĩa Isiraeli.”’”
6 “‘Mũriũ nĩ atĩaga ithe,+ na ndungata ĩgatĩa mwathi wayo. Nĩ ũndũ ũcio angĩkorũo ndĩ ithe wanyu-rĩ,+ gĩtĩo kĩrĩa kĩnjagĩrĩire kĩrĩ ha?+ Na angĩkorũo ndĩ mwathi wanyu-rĩ,* gwĩtigĩrũo kũrĩa kũnjagĩrĩire kũrĩ ha?* Ũguo nĩguo Jehova mũnene wa ita ekũmwĩra inyuĩ athĩnjĩri-Ngai arĩa mũnyararaga rĩĩtwa rĩakwa.+
“‘No inyuĩ muugaga: “Tũnyararĩte rĩĩtwa rĩaku na njĩra ĩrĩkũ?”’
7 “‘Na njĩra ya kũruta irio irĩ* na thahu kĩgongona-inĩ gĩakwa.’
“‘Ningĩ muugaga atĩrĩ: “Tũgũthahĩtie na njĩra ĩrĩkũ?”’
“‘Na njĩra ya kuuga: “Metha ya Jehova+ nĩ kĩndũ gĩa kũnyararũo.” 8 Na rĩrĩa mũkũruta nyamũ ndumumu ĩrĩ igongona, muugaga atĩrĩ: “Ti ũũru.” Na rĩrĩa mũkũruta nyamũ nyonju kana ndwaru mũkoiga: “Ti ũũru.”’”+
“Ta geriai kũrutĩra ngavana wanyu nyamũ icio. Hihi nĩ egũkenio nĩ inyuĩ kana amwamũkĩre na njĩra njega?” ũguo nĩguo Jehova mũnene wa ita ekuuga.
9 “Na rĩu-rĩ, thaithai* Ngai nĩguo twĩtĩkĩrĩke harĩ we. Mũkĩrutaga magongona ta macio kuuma guoko-inĩ kwanyu ene-rĩ, hihi nĩ ekwamũkĩra mũndũ o na ũmwe wanyu na njĩra njega?” ũguo nĩguo Jehova mũnene wa ita ekuuga.
10 “Na nũũ gatagatĩ-inĩ kanyu ũngĩĩrutĩra kũhingaga mĩrango?*+ Nĩ gũkorũo mũtiĩtĩkagĩra o na gwakia kĩgongona gĩakwa hatarĩ marĩhi.+ Ndikenagio nĩ inyuĩ o na hanini,” ũguo nĩguo Jehova mũnene wa ita ekuuga, “na ndikenagio o na hanini nĩ igongona o rĩothe riumĩte guoko-inĩ kwanyu.”+
11 “Nĩ gũkorũo kuuma irathĩro rĩa riũa nginya ithũĩro rĩarĩo, rĩĩtwa rĩakwa rĩgaakorũo rĩrĩ inene gatagatĩ-inĩ ka ndũrĩrĩ.+ Kũndũ guothe magongona nĩ magaacinwo marute ndogo, na maruta nĩ makaarutwo nĩ ũndũ wa rĩĩtwa rĩakwa, marĩ kĩheo gĩtheru; tondũ rĩĩtwa rĩakwa rĩgaakorũo rĩrĩ inene gatagatĩ-inĩ ka ndũrĩrĩ,”+ ũguo nĩguo Jehova mũnene wa ita ekuuga.
12 “No nĩ mũrĩthahagia*+ rĩrĩa mũkuuga atĩrĩ, ‘Metha ya Jehova nĩ ĩthahĩtio, na maciaro mayo, irio ciayo, ciagĩrĩirũo kũnyararũo.’+ 13 Ningĩ muugaga ũũ, ‘Atĩrĩrĩ, kaĩ nĩ ũndũ ũrĩ mĩnoga-ĩ!’ na mũkamĩtembanĩria iromo,” ũguo nĩguo Jehova mũnene wa ita ekuuga. “Na mũrehaga nyamũ cia kũiya, iria nyonju, na iria ndwaru. Ti itherũ mũrehaga indo ta icio irĩ kĩheo! Hihi nĩ njagĩrĩirũo gũkĩamũkĩra kuuma guoko-inĩ kwanyu?”+ ũguo nĩguo Jehova ekuuga.
14 “Kũnyitwo nĩ kĩrumi nĩ mũndũ mwara ũrĩa ũrĩ na nyamũ ya njamba ĩtarĩ na kaũgũ rũũru-inĩ rwake, no akehĩta mwĩhĩtwa na akarutĩra Jehova igongona rĩa nyamũ ĩrĩ na kaũgũ.* Nĩ gũkorũo niĩ ndĩ Mũthamaki mũnene+ na rĩĩtwa rĩakwa rĩgaakorũo rĩrĩ rĩa kũmakania gatagatĩ-inĩ ka ndũrĩrĩ,”+ ũguo nĩguo Jehova mũnene wa ita ekuuga.