Thaburi
IBUKU RĨA KERĨ
(Thaburi 42-72)
Kũrĩ mũrũgamĩrĩri. Maskili* ya ariũ a Kora.+
42 O ta ũrĩa thwariga ĩĩriragĩria tũrũũĩ twa maĩ,
Noguo o na niĩ ngwĩriragĩria, wee Ngai.
2 Nĩ nyotagĩra Ngai, nganyotera Ngai ũrĩa ũtũũraga muoyo.+
Hihi nĩ rĩ ngaathiĩ nĩgetha ngorũo ndĩ mbere ya Ngai?+
3 Maithori makwa matuĩkĩte irio ciakwa mũthenya na ũtukũ;
Andũ manyũrũragia mũthenya wothe makanjũria atĩrĩ: “Ngai waku arĩ kũ?”+
4 Ndirikanaga maũndũ maya, ngaitũrũra ngoro* yakwa,
Tondũ kũrĩ hĩndĩ ndatwaranaga na kĩrĩndĩ;
Ndathiaga na njĩra ya gĩtĩo* ndĩ mbere yao tũgĩthiĩ nyũmba-inĩ ya Ngai,
Kũrĩ na inegene rĩa gĩkeno na gũcokia ngatho
Rĩa kĩrĩndĩ gĩgĩkũngũĩra gĩathĩ.+
5 Nĩ kĩĩ kĩratũma ndangĩke?+
Nĩ kĩĩ kĩratũma thĩnĩke ũguo thĩinĩ wakwa?
6 Atĩrĩrĩ Ngai wakwa, nĩ ndĩratangĩka.+
Nĩkĩo ndĩrakũririkana,+
Ndĩ bũrũri-inĩ wa Jorodani na tũcũmbĩrĩ twa Herimoni,
Ndĩ Kĩrĩma-inĩ kĩa Mizari.*
7 Maĩ mariku metaga maĩ mariku
Rĩrĩa kwaiguĩka mũgambo wa ndururumo ciaku cia maĩ.
Nĩ humbĩrĩtwo nĩ makũmbĩ maku mothe marĩa manene.+
8 Jehova nĩ arĩnyonagia wendo wake mwĩhokeku mũthenya,
Narĩo ũtukũ ngaina ũhoro wake, ngahoya Ngai ũrĩa ũũheaga muoyo.+
9 Ngũũria Ngai o we ndũmba yakwa ya ihiga atĩrĩ:
“Nĩ kĩĩ gĩtũmĩte ũriganĩrũo nĩ niĩ?+
Nĩ kĩĩ gĩgũtũma njikare na kĩeha nĩ ũndũ wa kũhinyĩrĩrio nĩ thũ yakwa?”+
10 Thũ ciakwa cinyũrũragia irĩ na rũmena rũnene;*
Cinyũrũragia mũthenya wothe ikanjũria atĩrĩ: “Ngai waku arĩ kũ?”+
11 Nĩ kĩĩ kĩratũma ndangĩke?
Nĩ kĩĩ kĩratũma thĩnĩke ũguo thĩinĩ wakwa?