Isaia
34 Atĩrĩrĩ inyuĩ ndũrĩrĩ, kuhĩrĩriai mũigue,
O na inyuĩ ikundi cia andũ thikĩrĩriai.
Thĩ o na kĩrĩa gĩothe kĩiyũire kuo nĩ ithikĩrĩrie,
Bũrũri o hamwe na maciaro maguo mothe.
2 Nĩ gũkorũo marakara ma Jehova nĩ merekeirio kũrĩ ndũrĩrĩ ciothe,+
Namo mangʼũrĩ make makerekerio kũrĩ mbũtũ ciacio ciothe.+
Nĩ agaacituĩra kũniinwo;
Nĩ agaacineana ciũragwo.+
3 Andũ ao arĩa makooragwo magaateo nja,
Na mũnungo wa ciimba ciao nĩ ũkaambata na igũrũ;+
4 Mbũtũ ciothe cia igũrũ nĩ ikaabutha ithire,
Narĩo igũrũ nĩ rĩgaakũnjwo o ta gĩkũnjo.
Mbũtũ ciothe ciarĩo nĩ ikaahooha ithire,
O ta ũrĩa ithangũ ihoohu rĩgũaga kuuma mũthabibũ-inĩ
Na ũrĩa ngũyũ hoohu ĩgũaga kuuma mũkũyũ-inĩ.
5 “Nĩ gũkorũo rũhiũ rwakwa rwa njora nĩ rũkaaihũga rũrĩ kũrĩa igũrũ.+
Nĩ rũgaaikũrũkĩra Edomu rũrĩ na ituĩro,+
Kũrĩ andũ arĩa nduĩrĩire kũniinwo.
6 Jehova arĩ na rũhiũ rwa njora; nĩ rũkaaiyũra thakame.
Rũgaakorũo rũiyũrĩte maguta,+
Rũkaaiyũra thakame ya tũtũrũme na ya mbũri,
Rũkaaiyũra maguta ma higo cia ndũrũme.
Nĩ gũkorũo Jehova arĩ na igongona thĩinĩ wa Bozira,
Na njũragano nene thĩinĩ wa bũrũri wa Edomu.+
7 Ndegwa cia gĩthaka nĩ ikooragwo hamwe nao,
Tũtegwa hamwe na andũ arĩa marĩ hinya.
Bũrũri wao nĩ ũkaaihũgio nĩ thakame,
Naruo rũkũngũ rwao rũrindwo nĩ maguta.”
9 Tũrũũĩ twa kũu* nĩ tũkaagarũrũo tũtuĩke rami,
Rũkũngũ rwa kuo rũtuĩke ũbiriti,
Naguo bũrũri ũcio wothe ũtuĩke ta rami ĩrakana.
10 Gũtikaahorio mũthenya kana ũtukũ
Ndogo yakuo ĩgaatũũra yambataga tene na tene.
Kuuma njiarũa nginya njiarũa gũgaatũũra kũrĩ kwanangĩku;
Gũtirĩ mũndũ ũgaatuĩkanĩria kuo tene na tene.+
11 Nyoni ĩrĩa ĩtagwo gakuua-ũrogi na njege nĩ ikeegwatĩra kũu,
Na ndundu iria irĩ matũ manene na mahuru nĩ cigaaikara kuo.
Nĩ agaatambũrũkia igũrũ rĩa kuo rũrigi rwa gũthima rwa tũhũ
Na kabirũ ga* kwananga.
12 Gũtirĩ mũndũ wakuo harĩ arĩa marĩ igweta ũgaatuwo mũthamaki,
Nao anene a kũu othe nĩ magaathira.
13 Mĩigua nĩ ĩkaamera nyũmba-inĩ ciakuo iria ndaya na igũrũ irĩ na ũgitĩri,
Thabai na ria rĩrĩ na mĩigua imere kũndũ gwakuo kũrĩa kũirigĩre.
Gũgaatuĩka kĩmamo kĩa ngui cia gĩthaka,+
Na gĩikaro kĩa nyaga.
14 Nyamũ cia werũ-inĩ nĩ igaacemania na nyamũ iria igambaga,
Nayo mbũri ya gĩthaka* nĩ ĩkaagambĩrĩra ĩrĩa ĩngĩ.
Kũu nĩkuo nyoni ĩrĩa ĩthiaga ũtukũ ĩgaaikara na yone handũ ha kũhurũka.
15 Kũu nĩkuo nyoka ĩkeeyakĩra gĩtara na ĩrekie matumbĩ,
Na nĩ ĩkaamatũrĩkia na ĩmacokanĩrĩrie kĩĩruru-inĩ kĩayo.
Na kũu nĩkuo hũngũ igaacokanĩrĩra, o hũngũ ya mwera na njamba yayo.
16 Thuthuria ibuku rĩa Jehova na ũrĩthome wanĩrĩire:
Gũtirĩ o na ĩmwe ĩkaaga;
Gũtirĩ o na ĩmwe ĩkaaga njamba yayo,
Nĩ gũkorũo kanua ka Jehova nĩko koigĩte ũguo,
Na nĩ roho wake ũcicokanĩrĩirie hamwe.
17 Nĩ we ũcicukĩire mĩtĩ,
Na guoko gwake nĩ gũthimĩte handũ harĩa iheetwo gĩikaro.*
Ikeegwatĩra kuo mahinda mothe;
Igaaikara kuo njiarũa-inĩ ciothe.