Athamaki wa Kerĩ

3 Na rĩrĩ, Jehoramu+ mũrũ wa Ahabu aatuĩkire mũthamaki wa Isiraeli kũu Samaria mwaka-inĩ wa 18 wa Mũthamaki Jehoshafatu wa Juda, na agĩathana mĩaka 12. 2 Nake agĩthiĩ na mbere gwĩka maũndũ moru maitho-inĩ ma Jehova, no ti na gĩkĩro kĩrĩa ithe kana nyina meekĩte, nĩ gũkorũo nĩ eeheririe gĩtugĩ gĩa kũhoywo kĩa Baali kĩrĩa ithe aathondekete.+ 3 No rĩrĩ, nĩ aanyitĩrĩire mehia marĩa Jeroboamu mũrũ wa Nebati aatũmĩte Isiraeli mehie.+ Ndaatiganire namo.

4 Na rĩrĩ, Mesha Mũthamaki wa Moabi aarĩ mũrĩithi wa ngʼondu, na nĩ aarĩhaga igooti rĩa tũgondu 100,000 na ndũrũme 100,000 itarĩ nyenje guoya kũrĩ mũthamaki wa Isiraeli. 5 Rĩrĩa Ahabu aakuire,+ mũthamaki wa Moabi akĩremera mũthamaki wa Isiraeli.+ 6 Nĩ ũndũ ũcio, Mũthamaki Jehoramu akiumagara mũthenya ũcio kuuma Samaria na agĩcokanĩrĩria andũ a Isiraeli othe. 7 Ningĩ agĩtũmana ndũmĩrĩri kũrĩ Mũthamaki Jehoshafatu wa Juda, akiuga ũũ: “Mũthamaki wa Moabi nĩ anemeire. Hihi nĩ ũgũthiĩ na niĩ tũkarũe na Moabi?” Nake akiuga: “Ĩĩ nĩ ngũthiĩ.+ Niĩ nawe tũrĩ ũndũ ũmwe. Andũ akwa no ta andũ aku. Mbarathi ciakwa no ta mbarathi ciaku.”+ 8 Ningĩ akĩũria atĩrĩ: “Tũkwambata tũgereire njĩra ĩrĩkũ?” Nake akĩmũcokeria akĩmwĩra: “Tũkũgera njĩra ya werũ wa Edomu.”

9 Mũthamaki ũcio wa Isiraeli agĩcoka akiumagara hamwe na mũthamaki wa Juda na mũthamaki wa Edomu.+ Na thutha wa gũthiũrũrũka thikũ mũgwanja, gũtiarĩ na maĩ ma kũnyuo nĩ thigari na mahiũ marĩa maamoimĩte thutha. 10 Mũthamaki wa Isiraeli agĩkiuga atĩrĩ: “Kaĩ ũyũ nĩ ũndũ mũũru-ĩ! Jehova etĩte athamaki aya atatũ, nogetha amaneane guoko-inĩ kwa Moabi!” 11 Nake Jehoshafatu akiuga ũũ: “Kaĩ gũtarĩ mũnabii wa Jehova gũkũ ũngĩtũtuĩrĩria ũhoro kũrĩ Jehova?”+ Nayo ndungata ĩmwe ya mũthamaki wa Isiraeli ĩgĩcokia ĩkiuga: “Elisha+ mũrũ wa Shafati ũrĩa waitagĩrĩria Elija maĩ moko* arĩ gũkũ.”+ 12 Jehoshafatu agĩcoka akiuga ũũ: “Kiugo kĩa Jehova kĩrĩ hamwe nake.” Nĩ ũndũ ũcio, mũthamaki wa Isiraeli na Jehoshafatu na mũthamaki wa Edomu magĩikũrũka kũrĩ we.

13 Nake Elisha akĩra mũthamaki wa Isiraeli atĩrĩ: “Ndĩ na ũhoro ũrĩkũ nawe?+ Thiĩ kũrĩ anabii a thoguo na kũrĩ anabii a nyũkwa.”+ No mũthamaki wa Isiraeli akĩmwĩra ũũ: “Aca, tondũ Jehova nĩwe wĩtĩte athamaki aya atatũ nĩguo amaneane guoko-inĩ kwa Moabi.” 14 Nake Elisha akiuga ũũ: “O ta ũrĩa Jehova mũnene wa ita, o ũcio ndungatagĩra* atũũraga muoyo, tiga nĩ ũrĩa heete Jehoshafatu+ mũthamaki wa Juda gĩtĩo, ndingĩakũrora kana ndindanĩre nawe.+ 15 Rĩu-rĩ, ndeherai mũhũũri wa kĩnanda kĩa mũgeeto.”*+ Rĩrĩa mũhũũri ũcio wa kĩnanda kĩa mũgeeto aambĩrĩirie gũkĩhũũra, guoko kwa Jehova gũgĩũka igũrũ rĩa Elisha.+ 16 Nake akiuga, “Ũũ nĩguo Jehova ekuuga: ‘Enjai mĩtaro ĩiyũre mũkuru-inĩ ũyũ, 17 nĩ gũkorũo Jehova ekuuga atĩrĩ: “Mũtikuona rũhuho na mũtikuona mbura; no mũkuru ũyũ nĩ ũkũiyũra maĩ,+ na nĩ mũkũmanyua, inyuĩ, mahiũ manyu, na nyamũ cianyu icio ingĩ.”’ 18 No ũyũ nĩ ũndũ mũnini mũno maitho-inĩ ma Jehova,+ tondũ nĩ ekũneana nginya Moabi guoko-inĩ kwanyu.+ 19 No mũhaka mũmomore itũũra o rĩothe rĩrĩ na ũgitĩri+ na itũũra o rĩothe rĩega, mwagĩrĩirũo gũtema mũtĩ o wothe mwega, mũhingĩrĩrie ithima ciothe cia maĩ, na mũgũnda o wothe mwega mũũthũkangie na mahiga.”+

20 Na rĩrĩ, rũcinĩ hĩndĩ ya igongona rĩa mũtu rĩa rũcinĩ,+ o rĩmwe maĩ makiuma mwena wa Edomu na bũrũri ũcio ũkĩiyũra maĩ.

21 Amoabi othe makĩigua atĩ athamaki acio nĩ maambatĩte kũrũa nao, nĩ ũndũ ũcio, magĩcokanĩrĩria arũme othe arĩa mangĩakuuire indo cia mbaara,* na magĩikara mũhaka-inĩ. 22 Rĩrĩa mookĩrire rũcinĩ tene, maĩ nĩ maamũrĩkĩtwo nĩ riũa, na harĩ Amoabi arĩa maarĩ mwena ũcio ũngĩ, maĩ macio moonekaga marĩ matune ta thakame. 23 Nao makiuga: “Ĩno nĩ thakame! Hatarĩ nganja athamaki acio nĩ moraganĩte o ene na rũhiũ rwa njora. Nĩ tũgĩthiĩi tũgatahe indo,+ inyuĩ andũ a Moabi!” 24 Rĩrĩa maakinyire kambĩ-inĩ ya Isiraeli, Aisiraeli magĩũkĩra na makĩambĩrĩria kũũraga andũ acio a Moabi, nao makĩũra.+ Makĩmarũmĩrĩra makĩingĩra Moabi, makĩũragaga Amoabi o magĩthiaga. 25 Nao makĩmomora matũũra, na o mũndũ agĩikia ihiga mũgũnda-inĩ wothe mwega, makĩũiyũria mahiga; makĩhingĩrĩria ithima ciothe cia maĩ,+ na magĩtema mũtĩ wothe mwega.+ Thutha-inĩ thingo cia mahiga cia Kiri-haresethu+ nocio ciatigirũo irũgamĩte, na andũ arĩa maahũthagĩra kĩgũtha magĩthiũrũrũkĩria itũũra rĩu na makĩrĩmomora.

26 Hĩndĩ ĩrĩa mũthamaki wa Moabi oonire atĩ nĩ atoorio mbaara-inĩ, agĩthiĩ na arũme 700 marĩ na hiũ cia njora nĩguo matũrĩkanie mathiĩ kũrĩ mũthamaki wa Edomu;+ no matiahotire gwĩka ũguo. 27 Nĩ ũndũ ũcio, akĩoya mũrũ wake wa irigithathi ũrĩa warĩ athane ithenya rĩake na akĩmũruta arĩ igongona rĩa njino+ rũthingo-inĩ. Na gũkĩgĩa marakara manene kwerekera Isiraeli, kwoguo makĩmweherera magĩcoka bũrũri-inĩ wao.