Marũa ma Mbere Kũrĩ Timotheo
3 Ciugo ici nĩ cia kwĩhokeka: Mũndũrũme angĩkorũo nĩ arerutanĩria gũtuĩka mũrori,+ nĩ arerirĩria wĩra mwega. 2 Nĩ ũndũ ũcio mũrori agĩrĩirũo gũkorũo atarĩ ũcuke, mũthuri wa mũtumia ũmwe, mũndũ wĩkaga maũndũ na ũigananĩru, ũrĩ na meciria mega,*+ ũrĩ mĩbango mĩega, mũnyitani ũgeni,+ ũrĩ ũhoti wa kũrutana,+ 3 ũtakoragwo arĩ mũrĩĩu,+ ũtarĩ wa mbaara,* mũndũ ũtanyitagĩrĩra mawoni make,+ ũtarĩ wa ngũĩ,+ ũtendete mbeca,+ 4 mũndũ ũrũgamagĩrĩra nyũmba yake mwene na njĩra njega, ũkoragwo na ciana irathĩka na cioyaga maũndũ na ũritũ+ 5 (tondũ mũndũ angĩkorũo ndoĩ kũrũgamĩrĩra nyũmba yake mwene-rĩ, angĩkĩhota atĩa kũrũmbũiya kĩũngano kĩa Ngai?), 6 ti mũndũ ũratuĩkire Mũkristiano ica ikuhĩ,+ nĩgetha ndakae kũgĩa na mwĩtĩo akinyĩrũo nĩ ituĩro rĩrĩa rĩatuĩrĩirũo Mũcukani. 7 Ningĩ-rĩ, agĩrĩirũo gũkorũo na ũira mwega kuuma* harĩ andũ arĩa marĩ nja,+ nĩgetha ndagatuĩke wa kũnyũrũrio* na agwe mũtego-inĩ wa Mũcukani.
8 Ndungata cia kĩũngano o nacio ciagĩrĩirũo gũkorũo irĩ andũ moyaga maũndũ na ũritũ, mataragia mĩario ya ũhinga,* matanyuaga ndibei nyingĩ, matakorokagĩra uumithio ũtarĩ wa kĩhooto,+ 9 makĩrũmagia hitho ĩrĩa theru ya wĩtĩkio marĩ na thamiri theru.+
10 Ningĩ, acio nĩ mambe magerio kana nĩ magĩrĩire, thutha ũcio matuĩke ndungata, tondũ matirĩ ũndũ mangĩĩcukĩrũo.+
11 Atumia o nao magĩrĩirũo kuoyaga maũndũ na ũritũ, matarĩ a gũcambania,+ magekaga maũndũ na ũigananĩru, na ehokeku maũndũ-inĩ mothe.+
12 Ndungata ya kĩũngano yagĩrĩire gũkorũo ĩrĩ mũthuri wa mũtumia ũmwe, ũrũgamagĩrĩra ciana ciake na njĩra njega o hamwe na nyũmba yake mwene. 13 Nĩ gũkorũo arũme arĩa matungataga na njĩra njega nĩ magĩaga na mũrũgamo mwega na wĩyathi mũnene wa kwaria ũhoro-inĩ wa wĩtĩkio ũrĩa ũrĩ thĩinĩ wa Kristo Jesu.
14 Ndĩrakwandĩkĩra maũndũ maya, o na gũtuĩka nĩ ndĩrerĩgĩrĩra gũka kũrĩ we ica ikuhĩ, 15 nĩgetha ingĩaga gũka na ihenya, ũmenye mĩthiĩre ĩrĩa wagĩrĩirũo gũkorũo nayo thĩinĩ wa nyũmba ya Ngai,+ nĩyo kĩũngano kĩa Ngai ũrĩa ũtũũraga muoyo, na nĩkĩo gĩtugĩ na kĩndũ gĩa gũtiirĩrĩra ũhoro ũrĩa wa ma. 16 Ti itherũ, hitho ĩyo theru ya kwĩrutĩra harĩ Ngai nĩ nene: ‘Oonithanirio arĩ na mwĩrĩ wa nyama,+ agĩtuwo mũthingu thĩinĩ wa roho,+ akiumĩrĩra araika,+ akĩhunjio gatagatĩ-inĩ ka ndũrĩrĩ,+ agĩtĩkio thĩinĩ wa thĩ,+ akĩamũkĩrũo igũrũ na riri.’