Ũhoro Mwega Ũrĩa Waandĩkirũo nĩ Mariko
8 Matukũ-inĩ macio, o rĩngĩ nĩ haarĩ na kĩrĩndĩ kĩnene kĩa andũ na matiarĩ na kĩndũ gĩa kũrĩa. Nĩ ũndũ ũcio Jesu agĩta arutwo ake akĩmeera atĩrĩ: 2 “Nĩ ndĩraiguĩra kĩrĩndĩ gĩkĩ tha,+ nĩ ũndũ gĩkoretwo hamwe na niĩ thikũ ithatũ na gĩtirĩ na kĩndũ gĩa kũrĩa.+ 3 Ingĩmeera mainũke marĩ ahũtu,* nĩ mekũgwa njĩra-inĩ, nĩ gũkorũo amwe ao moimĩte kũndũ kũraya.” 4 No arutwo ake makĩmũũria: “Gũkũ werũ-inĩ mũndũ angĩruta kũ mĩgate ya kũigana andũ aya?” 5 Nake akĩmoria atĩrĩ: “Mũrĩ na mĩgate ĩigana?” Makĩmũcokeria: “Mũgwanja.”+ 6 Akĩra kĩrĩndĩ kĩu gĩikare thĩ. Agĩcoka akĩoya mĩgate ĩyo mũgwanja, agĩcokia ngatho, akĩmĩenyũranga, na akĩnengera arutwo ake mamĩheane, nao makĩgaĩra kĩrĩndĩ kĩu.+ 7 Ningĩ nĩ maarĩ na tũthamaki tũigana ũna, na thutha wa gũtũrathima, akĩmeera magaĩre andũ. 8 Nao makĩrĩa makĩhũna, na arutwo makĩũngania cienyũ iria ciatigarire ikĩiyũra ikabu* mũgwanja nene.+ 9 Na rĩrĩ, arũme arĩa maarĩ ho maarĩ ta 4,000. Agĩcoka akĩmoigĩra ũhoro.
10 O hĩndĩ ĩyo akĩingĩra gatarũ hamwe na arutwo ake na magĩthiĩ gĩcigo-inĩ kĩa Dalumanutha.+ 11 Marĩ kũu, Afarisai magĩthiĩ kũrĩ we makĩambĩrĩria gũkararania nake makĩenda kuona kĩmenyithia kuuma igũrũ, marĩ na muoroto wa kũmũgeria.+ 12 Nake akĩnyitwo nĩ kĩeha kĩnene ngoro-inĩ, akiuga ũũ: “Rũciaro rũrũ rũrenda kuona kĩmenyithia nĩkĩ?+ Ngũmwĩra atĩrĩ o ma, gũtirĩ kĩmenyithia rũciaro rũrũ rũkuonio.”+ 13 Agĩcoka akĩmatiga, akĩingĩra gatarũ o rĩngĩ, agĩthiĩ mũrĩmo ũcio ũngĩ wa iria.
14 No arutwo makĩriganĩrũo nĩ gũkuua mĩgate, na matiarĩ na kĩndũ kĩngĩ thĩinĩ wa gatarũ tiga mũgate ũmwe tu.+ 15 Nake akĩmahe mũkaana mũrũmu akĩmeera atĩrĩ: “Ikaragai mũhingũrĩtie maitho manyu na mwĩmenyagĩrĩre ndawa ya kũimbia ya Afarisai na ya Herode.”+ 16 Nĩ ũndũ ũcio makĩambĩrĩria gũkararania o ene tondũ matiakuuĩte mĩgate. 17 Rĩrĩa aaiguire ũguo akĩmeera: “Nĩ kĩĩ kĩratũma mũkararanie nĩ ũndũ wa gũkorũo mũtarĩ na mĩgate? Nginya rĩu mũtirĩ mũranyita o na kana mũgataũkĩrũo? Kaĩ ngoro cianyu ithiĩte o na mbere kwaga ũtaũku? 18 ‘O na gũtuĩka mũrĩ na maitho-rĩ, kaĩ mũtarona; na o na gũtuĩka mũrĩ na matũ-rĩ, kaĩ mũtaraigua?’ Kaĩ mũtararirikana 19 hĩndĩ ĩrĩa ndenyũrangĩire arũme arĩa 5,000 mĩgate ĩrĩa ĩtano,+ muonganirie cienyũ ikabu cigana ciyũrĩte?” Nao makĩmwĩra: “Ikũmi na igĩrĩ.”+ 20 “Rĩrĩa ndenyũrangĩire arũme arĩa 4,000 mĩgate mũgwanja-rĩ, muonganirie cienyũ ikabu* cigana nene ciyũrĩte?” Nao makĩmũcokeria: “Mũgwanja.”+ 21 Nake akĩmoria atĩrĩ: “O na rĩu mũtirĩ mũrataũkĩrũo?”
22 Magĩcoka magĩthiĩ Bethisaida. Na arĩ kũu, andũ makĩmũrehera mũndũ warĩ mũtumumu, na makĩmũthaitha amũhutie.+ 23 Nake akĩnyita mũndũ ũcio mũtumumu guoko akĩmuumia nja ya gĩcagi. Thutha wa kũmũtuĩra mata maitho,+ akĩmũigĩrĩra moko na akĩmũũria: “Nĩ ũrona kĩndũ?” 24 Nake mũndũ ũcio agĩtiira maitho, akiuga ũũ: “Ndĩrona andũ, no mahaana ta mĩtĩ ĩrathiĩ.” 25 Jesu akĩhutia mũndũ ũcio maitho rĩngĩ, nake akĩambĩrĩria kuona wega. Agĩcokerio ũhoti wake wa kuona, na akĩhota kuona indo ciothe wega. 26 Nĩ ũndũ ũcio akĩmwĩra ainũke mũciĩ, akĩmwĩra ũũ: “Ndũkaingĩre gĩcagi.”
27 Jesu na arutwo ake magĩcoka makiumagara merekeire icagi-inĩ cia Kaisarea Filipi, na marĩ njĩra-inĩ akĩambĩrĩria kũũria arutwo ake ũũ: “Andũ moigaga niĩ ndĩ ũ?”+ 28 Makĩmwĩra ũũ: “Moigaga wee nĩwe Johana Mũbatithania,+ no angĩ makoiga wee nĩwe Elija,+ nao angĩ makoiga ũrĩ ũmwe wa anabii.” 29 Agĩcoka akĩmoria atĩrĩ: “Ĩ inyuĩ na inyuĩ muugaga ndĩ ũ?” Petero agĩcokia: “Wee nĩwe Kristo.”+ 30 Akĩmahe mũkaana mũrũmu matikeere mũndũ o na ũrĩkũ ũhoro wake.+ 31 Ningĩ akĩambĩrĩria kũmaruta atĩ no mũhaka Mũrũ wa mũndũ acemanie na mĩnyamaro mĩingĩ na aregwo nĩ athuri na anene a athĩnjĩri-Ngai na andĩki-watho na oragwo,+ acoke ariũkio thutha wa thikũ ithatũ.+ 32 Ooigire ũguo atekũhithĩrĩra. No Petero akĩmũtwara keheri-inĩ akĩambĩrĩria kũmũkaania.+ 33 Nake akĩĩhũgũra akĩrora arutwo ake, na agĩkũũma Petero akĩmwĩra: “Coka thutha wakwa, Shaitani! nĩ ũndũ ndũreciria meciria ma Ngai, ĩndĩ ũreciria meciria ma andũ.”+
34 Agĩcoka agĩta kĩrĩndĩ harĩ we na arutwo ake na akĩmeera ũũ: “Mũndũ o wothe angĩenda kũnũmĩrĩra, nĩ erege na oe mũtĩ wake wa kũnyarirĩrũo* na anũmagĩrĩre.+ 35 Nĩ gũkorũo mũndũ o wothe wendaga kũhonokia muoyo wake nĩ akoorũo nĩguo, no mũndũ o wothe ũkũrũo nĩ muoyo wake nĩ ũndũ wakwa na nĩ ũndũ wa ũhoro ũrĩa mwega nĩ akaaũhonokia.+ 36 Atĩrĩrĩ, mũndũ angĩgunĩka atĩa nĩ kwĩgwatĩra thĩ yothe no orũo nĩ muoyo wake?+ 37 Nĩ kĩĩ mũndũ angĩruta nĩguo akũũre muoyo wake nakĩo?+ 38 Nĩ gũkorũo mũndũ o wothe ũconokaga nĩ ũndũ wakwa, na nĩ ũndũ wa ciugo ciakwa rũciaro-inĩ rũrũ rwa andũ ehia na atharia,* o nake Mũrũ wa mũndũ nĩ akaamũconokera+ rĩrĩa agooka arĩ na riri wa Ithe arĩ hamwe na araika arĩa atheru.”+