Kũrĩ Aroma
2 Nĩ ũndũ ũcio, ndũrĩ na kĩĩgwatio wee mũndũ ũyũ, o na ũngĩkorũo ũrĩ ũ,+ angĩkorũo nĩ ũtuanagĩra; nĩ gũkorũo rĩrĩa watuĩra mũndũ ũngĩ, ũkoragwo ũgĩĩtuĩra wee mwene, tondũ wee ũtuanagĩra nĩ wĩkaga maũndũ o ta macio.+ 2 Rĩu nĩ tũĩ atĩ ituĩro rĩa Ngai rĩkoragwo rĩringaine na ũhoro wa ma, kwerekera andũ arĩa mamenyerete gwĩka maũndũ ta macio.
3 No wee mũndũ ũyũ, o wee ũtuagĩra andũ arĩa mamenyerete gwĩka maũndũ ta macio na no ũmekaga-rĩ, hihi ũreciria atĩ nĩ ũkoorĩra ituĩro rĩa Ngai? 4 Kana hihi ũnyararaga ũtonga wa ũtugi wake+ na ũkirĩrĩria+ na wetereri wake,+ tondũ ndũĩ atĩ nĩ Ngai ũrageria gũgũtongoria kũgerera ũtugi wake nĩguo wĩrire?+ 5 No kũringana na ũrĩa ngoro yaku yũmĩte na ĩkaga kwĩrira, nĩ mangʼũrĩ ũreigĩra ma mũthenya ũrĩa wa mangʼũrĩ na wa kũguũrio gwa ituĩro rĩa Ngai rĩa ũthingu.+ 6 Na nĩ akaarĩha o mũndũ kũringana na ciĩko ciake:+ 7 muoyo wa tene na tene harĩ arĩa macaragia riri na gĩtĩo na ũhoro wa kwaga kũbutha+ na njĩra ya gũthiĩ na mbere kũruta wĩra ũrĩa mwega; 8 no rĩrĩ, arĩa mendete ngũĩ na matathĩkagĩra ũhoro ũrĩa wa ma no mathĩkagĩra maũndũ matarĩ ma ũthingu, nĩ magaakinyĩrũo nĩ mangʼũrĩ na marakara.+ 9 Gũgaakorũo na thĩna na mĩtangĩko kũrĩ mũndũ o wothe wĩkaga maũndũ moru, mbere kũrĩ Mũyahudi na ningĩ kũrĩ Mũngiriki; 10 no gũgaakorũo na riri, gĩtĩo, na thayũ kũrĩ mũndũ o wothe wĩkaga maũndũ mega, mbere kũrĩ Mũyahudi+ na ningĩ kũrĩ Mũngiriki.+ 11 Tondũ Ngai ndarĩ mũthutũkanio.+
12 Nĩ gũkorũo arĩa othe meehirie matarĩ na watho makaaniinwo matarĩ na watho;+ no arĩa othe meehirie marĩ rungu rwa watho magaatuĩrũo na watho.+ 13 Nĩ gũkorũo arĩa maiguaga watho tio athingu mbere ya Ngai, no arĩa mekaga ũrĩa watho uugĩte nĩ magaatuwo athingu.+ 14 Nĩ gũkorũo hĩndĩ ĩrĩa andũ a ndũrĩrĩ, arĩa matarĩ na watho,+ meka maũndũ marĩa watho uugĩte meĩrĩte o ene, andũ acio, o na gũtuĩka matirĩ na watho, nĩ monanagia atĩ watho ũrĩ thĩinĩ wao. 15 O ene nĩo monanagia atĩ kĩrĩa kĩrĩ thĩinĩ wa watho nĩ kĩandĩke ngoro-inĩ ciao, nacio thamiri ciao ikamarutagĩra ũira, na meciria-inĩ* mao ene magaciirithagio kana magateterũo. 16 Maũndũ macio nĩ mageekĩka mũthenya ũrĩa Ngai kũgerera Kristo Jesu agaatuĩra maũndũ ma hitho ma andũ,+ kũringana na ũhoro mwega ũrĩa hunjagia.
17 Rĩu-rĩ, angĩkorũo nĩ wĩĩtaga Mũyahudi+ na nĩ wĩhokaga watho na ũkeraha nĩ ũndũ wa Ngai, 18 na nĩ ũĩ wendi wake na nĩ wĩtĩkagĩra maũndũ marĩa mega biũ tondũ nĩ ũrutĩtwo* maũndũ ma Watho,+ 19 na nĩ wĩtĩkĩtie biũ atĩ ũrĩ mũtongoria wa atumumu, ũtheri wa arĩa marĩ nduma-inĩ, 20 mũtaari wa arĩa matarĩ ogĩ, mũrutani wa ciana nini, na ũrĩ na mũhianĩre wa ũmenyo na wa ũhoro ũrĩa wa ma ũrĩ thĩinĩ wa Watho— 21 no rĩrĩ, kaĩ wee ũrutaga mũndũ ũngĩ ũterutaga wee mwene?+ Wee ũhunjagia, ‘Ndũkanaiye-rĩ,’+ nĩ ũiyaga? 22 Wee uugaga, ‘Ndũkanatharie-rĩ,’+ nĩ ũtharagia? Wee ũthũire mĩhianano-rĩ, nĩ ũiyaga indo cia hekarũ? 23 Wee wĩrahagĩra watho-rĩ, nĩ wagagĩra Ngai gĩtĩo na njĩra ya kwagarara Watho? 24 Tondũ o ta ũrĩa kwandĩkĩtwo, “rĩĩtwa rĩa Ngai nĩ rĩrumagwo gatagatĩ-inĩ ka ndũrĩrĩ nĩ ũndũ wanyu.”+
25 Kũrua-rĩ,+ kũngĩkorũo na ũguni tu angĩkorũo nĩ wĩkaga kũringana na watho;+ no angĩkorũo nĩ wagararaga watho, kũrua gwaku gũtuĩkĩte ta kwaga kũrua. 26 No angĩkorũo mũndũ ũtarĩ mũruu+ nĩ arũmagĩrĩra maũndũ ma ũthingu marĩa Watho uugĩte-rĩ, na githĩ kwaga kũrua gwake gũtirĩtaragwo ta arĩ kũrua?+ 27 Rĩrĩa mũndũ ũcio ũtaruĩte mwĩrĩ arũmĩrĩra ũrĩa Watho uugĩte, nĩ agũtuagĩra wee wagararaga watho o na gũtuĩka nĩ ũkoragwo na watho ũrĩa mwandĩke na nĩ ũruĩte. 28 Tondũ Mũyahudi ti ũrĩa wonanagia ũguo na igũrũ,+ o na kũrua ti kũrĩa kwa na igũrũ, kwa mwĩrĩ.+ 29 No Mũyahudi nĩ ũrĩa wa na thĩinĩ,+ na kũrua gwake nĩ kwa ngoro+ kũgerera roho no ti kũgerera watho ũrĩa mwandĩke.+ Mũndũ ũcio agaathagĩrĩrio nĩ Ngai no ti andũ.+