Ũhoro Mwega Ũrĩa Waandĩkirũo nĩ Mariko
7 Na rĩrĩ, Afarisai na andĩki-watho amwe arĩa mooimĩte Jerusalemu makĩũngana mamũthiũrũrũkĩirie.+ 2 Na makĩona arutwo amwe ake makĩrĩa irio na moko marĩ na thahu, ũguo nĩ kuuga, matethambĩte moko.* 3 (Nĩ gũkorũo Afarisai na Ayahudi othe matirĩaga irio matethambĩte moko nginya o kĩgokora, tondũ manyitagĩrĩra kĩrĩra kĩa athuri a mahinda ma tene, 4 na rĩrĩa moima thoko, matirĩaga irio matambĩte gwĩthamba. Na nĩ kũrĩ irĩra ingĩ nyingĩ manyitagĩrĩra, ta kũbatithia ikombe, njagi, na indo cia gĩcango.)+ 5 Kwoguo Afarisai acio na andĩki-watho makĩmũũria atĩrĩ: “Nĩ kĩĩ gĩtũmaga arutwo aku mage kũrũmĩrĩra kĩrĩra kĩa athuri a mahinda ma tene, no marĩaga irio ciao na moko marĩ na thahu?”+ 6 Nake akĩmeera ũũ: “Hinga ici, Isaia nĩ aarathire wega igũrũ rĩanyu, o ta ũrĩa kwandĩkĩtwo atĩrĩ, ‘Andũ aya maheaga gĩtĩo na mĩromo yao no ngoro ciao irĩ kũraya na niĩ.+ 7 Ũthathaiya ũrĩa maheaga nĩ wa tũhũ, nĩ gũkorũo marutanaga maathani ma andũ marĩ ta morutani.’+ 8 Mũtiganaga na maathani ma Ngai, mũkanyitĩrĩra kĩrĩra kĩa andũ.”+
9 Ningĩ akĩmeera ũũ: “Inyuĩ mũregaga na wara gwathĩkĩra maathani ma Ngai nĩguo mũtũũrie kĩrĩra kĩanyu.+ 10 Kwa ngerekano-rĩ, Musa ooigire ũũ, ‘Tĩaga thoguo na nyũkwa,’+ na ‘Ũrĩa ũkaaruma* ithe kana nyina no mũhaka oragwo.’+ 11 No inyuĩ muugaga atĩrĩ, ‘Mũndũ angĩra ithe kana nyina ũũ: “Kĩrĩa gĩothe ingĩgũteithia nakĩo nĩ korubani (ũguo nĩ kuuga, kĩheo kĩamũrĩirũo Ngai),”’ 12 mũticokaga kũreka ekĩre ithe kana nyina ũndũ o na ũmwe.+ 13 Na njĩra ĩyo mũkagithia kiugo kĩa Ngai kĩene nĩ ũndũ wa kĩrĩra kĩanyu kĩrĩa mũtiganagĩra.+ Na nĩ mwĩkaga maũndũ mangĩ maingĩ ta macio.”+ 14 Nĩ ũndũ ũcio agĩta kĩrĩndĩ o rĩngĩ, agĩkĩra atĩrĩ: “Thikĩrĩriai, inyuĩ inyuothe, na mũtaũkĩrũo nĩ ũrĩa ngũmwĩra.+ 15 Gũtirĩ kĩndũ kiumaga na nja gĩgatonya thĩinĩ wa mũndũ kĩngĩmũthahia, no maũndũ marĩa moimaga thĩinĩ wa mũndũ nĩmo mamũthahagia.”+ 16 *——
17 Na rĩrĩa aatonyire nyũmba kĩrĩndĩ gĩtarĩ ho, arutwo ake makĩambĩrĩria kũmũũria ũhoro wĩgiĩ ngerekano ĩyo.+ 18 Nĩ ũndũ ũcio akĩmoria atĩrĩ: “Kaĩ o na inyuĩ mwagĩte ũtaũku o ta andũ acio? Kaĩ mũtoĩ atĩ gũtirĩ kĩndũ kiumaga na nja gĩkaingĩra thĩinĩ wa mũndũ kĩngĩmũthahia, 19 nĩ gũkorũo gĩtingĩraga ngoro-inĩ yake no kĩingĩraga nda, gĩgacoka gĩkoima nja ya mwĩrĩ?”* Na njĩra ĩyo, akĩonania atĩ gũtirĩ irio irĩ thahu. 20 Ningĩ akĩmeera ũũ: “Kĩrĩa kiumaga thĩinĩ wa mũndũ nĩkĩo kĩmũthahagia.+ 21 Tondũ thĩinĩ wa ngoro cia andũ+ nĩkuo kuumaga methugunda moru: ngomanio itagĩrĩire,* ũici, ũũragani, 22 ciĩko cia ũtharia, ũkoroku, ciĩko cia waganu, maheeni, mĩtugo ya rũtũrĩko,* riitho rĩrĩ na ũiru, irumi, mwĩtĩo, na ũrimũ. 23 Maũndũ macio mothe moru moimaga na thĩinĩ na nĩmo mathahagia mũndũ.”
24 Oima kũu, agĩthiĩ gĩcigo-inĩ gĩa Turo na Sidoni.+ Akĩingĩra nyũmba na ndeendaga mũndũ o na ũmwe amenye atĩ nĩ akinya, no nĩ aamenyekire. 25 O hĩndĩ ĩyo mũtumia warĩ na kairĩtu kaarĩ na roho mũũru akĩigua ũhoro wake na agĩthiĩ harĩ we akĩĩgũithia thĩ magũrũ-inĩ make.+ 26 Mũtumia ũcio aarĩ Mũngiriki, kuuma* Foenicia bũrũri-inĩ wa Siria; na agĩikara akĩmũthaithaga arute kairĩtu kau ndaimono. 27 No Jesu akĩmwĩra atĩrĩ: “Reke ciana ciambe ihũne, nĩ gũkorũo ti wega kuoya mũgate wa ciana ũikĩrie tũgui.”+ 28 No rĩrĩ, mũtumia ũcio akĩmũcokeria akĩmwĩra atĩrĩ: “Nĩ ma, mwathi wakwa, no o na tũgui nĩ tũrĩaga rũitĩki rwa ciana rũrĩa rũgũaga rungu rwa metha.” 29 Nake Jesu akĩmwĩra ũũ: “Nĩ ũndũ wa ũguo woiga-rĩ, thiĩ; ndaimono ĩyo nĩ yoima thĩinĩ wa kairĩtu gaku.”+ 30 Nĩ ũndũ ũcio akĩinũka mũciĩ agĩkora kaana kau gakomete ũrĩrĩ-inĩ, na ndaimono ĩyo nĩ yoimĩte.+
31 Rĩrĩa Jesu aahũndũkire kuuma gĩcigo gĩa Turo, akĩgerera Sidoni agĩthiĩ Iria-inĩ rĩa Galili, agereire gĩcigo kĩa Dekapoli.*+ 32 Arĩ kũu andũ makĩmũrehera mũndũ ũtaaiguaga na ũtaahotaga kwaria wega,+ na makĩmũthaitha amũigĩrĩre moko. 33 Nake akĩmweheria kĩrĩndĩ-inĩ akĩmũtwara handũ hatarĩ andũ. Agĩcoka agĩikia ciara ciake matũ-inĩ ma mũndũ ũcio, na thutha wa gũtua mata, akĩmũhutia rũrĩmĩ.+ 34 Agĩcoka akĩrora igũrũ, akĩhũmũka na hinya na akĩmwĩra atĩrĩ: “Efatha,” ũguo nĩ kuuga, “Hingũka.” 35 Namo matũ make makĩhingũka+ na thĩna wake wa kwaria ũgĩthira, akĩambĩrĩria kwaria wega. 36 Jesu agĩcoka akĩmakaania matikeere mũndũ o na ũrĩkũ,+ no o ũrĩa aathiaga na mbere kũmakaania noguo maamemerekagia ũhoro ũcio makĩria.+ 37 Nao andũ makĩgega mũno,+ makiuga ũũ: “Ciĩko ciake ciothe nĩ cia magegania. Aratũma nginya andũ arĩa mataiguaga maigue na arĩa mataragia marie.”+