Maũndũ Marĩa Meekirũo nĩ Atũmwo
27 Na rĩrĩ, tondũ nĩ gwatuirũo atĩ tũtwarũo Italia+ na meri, Paulo na andũ angĩ arĩa moohetwo makĩneanwo kũrĩ mũnene ũmwe wa mbũtũ wetagwo Juliasi, ũrĩa warĩ wa gĩkundi kĩa Augusto. 2 Tũkĩhaica meri yoimĩte Aduramitiamu yakiriĩ gũthiĩ icukĩro-inĩ cia meri iria irĩ gĩcũa-inĩ gĩa gĩcigo kĩa Asia, na tũkĩambĩrĩria rũgendo; Mũmakedonia woimĩte Thesalonike wetagwo Aristariko+ aarĩ hamwe na ithuĩ. 3 Mũthenya ũrĩa warũmĩrĩire tũgĩkinya Sidoni, nake Juliasi, nĩ ũndũ wa ũtugi* wake kwerekera Paulo, akĩmwĩtĩkĩria athiĩ kũrĩ arata ake makamũrũmbũiye.
4 Kuuma kũu tũkĩhaica meri tũgĩthiĩ tũgereire hakuhĩ na Kuporo, nĩguo twĩgitie huho iria cioimaga mwena ũrĩa twathiaga. 5 Tũgĩcoka tũkĩgerera iria-inĩ gatagatĩ hakuhĩ na Kilikia na Pamfilia tũgĩkinya gĩcukĩro-inĩ kĩa Mira thĩinĩ wa Likia. 6 Tũrĩ kũu, mũnene ũcio wa mbũtũ akĩona meri yoimĩte Aleksandiria yerekeire Italia, na agĩtwatha tũhaice meri ĩyo. 7 Thutha wa gũthiĩ o kahora ihinda rĩa thikũ nyingĩ, tũgĩkinya Kinindo na mathĩna. Na tondũ tũtingĩahotire gũthiĩ ĩmwe kwa ĩmwe nĩ ũndũ wa rũhuho, tũgĩthiĩ tũgereire hakuhĩ na Kirete tũngʼetheire Salimone nĩguo twĩgitie rũhuho. 8 Tũgĩthiĩ na mathĩna maingĩ tũgereire hakuhĩ na rũteere rwa iria, tũgĩkinya handũ hetagwo Gĩcukĩro Kĩega, hakuhĩ na itũũra rĩa Lasea.
9 Ihinda iraya nĩ rĩahĩtũkĩte na hĩndĩ ĩyo kwarĩ ũgwati gũthiĩ na meri, tondũ nginya hĩndĩ ya kwĩhinga ya Mũthenya wa Kũhumbĩra Mehia+ nĩ yahĩtũkĩte, nĩ ũndũ ũcio Paulo akĩmataara 10 akĩmeera atĩrĩ: “Athuri aya, nĩ ndĩrona atĩ rũgendo rũrũ rwitũ nĩ rũgũkorũo na mwanangĩko na nĩ tũkũũrũo nĩ mĩrigo ĩno tũkuuĩte, na meri, o hamwe na mĩoyo* itũ.” 11 O na kũrĩ ũguo, mũnene wa mbũtũ aathikĩrĩirie mũtwarithia wa meri na mwene meri handũ ha ũrĩa Paulo ooigaga. 12 Tondũ gĩcukĩro kĩu gĩtiarĩ kĩega gĩa gũikarũo hĩndĩ ya heho, andũ aingĩ makĩheana ũtaaro makiuga tũthiĩ na mbere na rũgendo nĩguo mone kana nĩ megũkinya Foinike maikare kuo hĩndĩ ĩyo ya heho, gĩcukĩro-inĩ gĩa Kirete kĩrĩa kĩaramĩte kwerekera mwena wa rũgongo wa irathĩro na kwerekera mwena wa mũhuro wa irathĩro.
13 Rĩrĩa rũhuho rwa kuuma mwena wa mũhuro rwahurutanire o kahora-rĩ, magĩĩciria atĩ muoroto wao nĩ wahinga, na makĩruta meri nanga makĩambĩrĩria gũthiĩ magereire hakuhĩ na Kirete hakuhĩ na rũteere rwa iria. 14 No rĩrĩ, thutha wa kahinda kanini, rũhuho rũnene mũno rwĩtagwo Eurakulo* rũkĩmĩhũũra. 15 Tondũ meri nĩ yatindĩkirũo nĩ rũhuho mũno na ĩkĩremwo nĩ gũthiĩ na mbere ĩrorete na kũrĩa rũhuho rũu rwoimaga, tũgĩtiga kũmĩtwarithia tũkĩambĩrĩria gũtwarũo nĩ rũhuho. 16 Tũgĩcoka tũgĩthiĩra hakuhĩ na gacigĩrĩra getagwo Kauda kũrĩa twegitirie rũhuho rũu, o na kũrĩ ũguo, ndwarĩ ũndũ mũhũthũ kũhonokia gatarũ* karĩa kaarĩ mwena wa thutha wa meri. 17 No thutha wa gũkahaicia meri-inĩ, makĩhĩtũkĩria mĩkanda rungu rwa meri makĩmĩoha, na tondũ nĩ meetigagĩra ndĩkahate mũthanga-inĩ wa Siritisi* makĩohora mĩkanda ya kũmĩtwarithia, nayo meri ĩgĩtwarithio nĩ rũhuho. 18 Na tondũ nĩ twacũgagio mũno nĩ kĩhuhũkanio kĩu, mũthenya ũrĩa warũmĩrĩire makĩambĩrĩria gũte mĩrigo ĩmwe iria-inĩ nĩguo meri ĩhũthahũthe. 19 Naguo mũthenya wa gatatũ, magĩte indo imwe cia meri ĩyo na moko mao ene.
20 Na rĩrĩa kwaagire kuumĩra riũa o na kana njata ihinda rĩa thikũ nyingĩ, na nĩ twahũũragwo nĩ kĩhuhũkanio kĩnene, mwĩhoko witũ wothe wa kũhonoka ũkĩambĩrĩria gũthira. 21 Thutha wa gũikara ihinda iraya matekũrĩa, Paulo akĩrũgama gatagatĩ-inĩ kao akĩmeera: “Athuri aya, korũo nĩ mwathikĩrĩirie ũtaaro wakwa mũtingĩoimire Kirete na nĩ ũndũ ũcio mũtingĩonete mwanangĩko ũyũ na mũtingĩroorũo nĩ indo.+ 22 O na kũrĩ ũguo, rĩu ndamũthaitha mũgĩe na ũmĩrĩru tondũ gũtirĩ o na ũmwe wanyu ũgũkua, no meri nĩ tũkũũrũo nĩyo. 23 Ngai ũrĩa niĩ ndĩ wake na ndutagĩra ũtungata mũtheru atũmire mũraika+ wake ũtukũ, arũgama hakuhĩ na niĩ 24 anjĩra atĩrĩ: ‘Paulo, ndũgetigĩre. No mũhaka ũrũgame mbere ya Kaisari,+ na atĩrĩrĩ, Ngai nĩ ekũhonokia andũ arĩa othe mũrĩ nao nĩ ũndũ waku.’ 25 Kwoguo-rĩ, gĩai na ũmĩrĩru andũ aya, nĩ gũkorũo ndĩ na wĩtĩkio harĩ Ngai atĩ o ũguo njĩrirũo noguo gũgwĩkĩka. 26 O na kũrĩ ũguo, nĩ tũgũikio rũteere-inĩ rwa gĩcigĩrĩra kĩmwe.”+
27 Na rĩrĩa ũtukũ wa 14 wakinyire o tũgĩcũgagio Iria-inĩ rĩa Adria, ũtukũ gatagatĩ aruti wĩra a meri makĩambĩrĩria kwĩgereria atĩ twarĩ hakuhĩ gũkinya thĩ nyũmũ. 28 Magĩthima ũriku makĩona atĩ nĩ fathomu 20,* na maathiathia magĩthima rĩngĩ makĩona atĩ nĩ fathomu 15.* 29 Na tondũ wa gwĩtigĩra tũtikahate mahiga-inĩ, makĩrekia nanga inya mwena wa thutha wa meri na nĩ meeriragĩria mũno gũkĩe. 30 No rĩrĩa aruti wĩra a meri maageragia kũũra, na makĩharũrũkia gatarũ iria-inĩ magĩĩtua atĩ nĩ nanga mararekia kuuma mwena wa mbere, 31 Paulo akĩra mũnene wa mbũtũ o hamwe na thigari atĩrĩ: “Andũ aya mangĩaga gũikara thĩinĩ wa meri, mũtikũhonoka.”+ 32 Nacio thigari ikĩrenga mĩkanda ya gatarũ kau ikĩreka kagwe.
33 Na rĩrĩa kwarĩ hakuhĩ gũkĩa, Paulo akĩringĩrĩria andũ acio othe marĩe akĩmeera atĩrĩ: “Ũmũthĩ nĩ mũthenya wa 14 ihinda-inĩ rĩrĩa mũkoretwo mwetereire mũno, mũtekũrĩa kĩndũ o na kĩ. 34 Kwoguo-rĩ, ndamũthaitha mũrĩe; ũndũ ũyũ nĩ wa bata harĩ inyuĩ, nĩ gũkorũo gũtirĩ nginya rũcuĩrĩ rwa mũtwe wa mũndũ o na ũmwe wanyu rũkũũra.” 35 Arĩkia kuuga ũguo, akĩoya mũgate, agĩcokeria Ngai ngatho arĩ mbere yao othe, agĩcoka akĩwenyũranga na akĩambĩrĩria kũrĩa. 36 Nĩ ũndũ ũcio, othe makĩgĩa na ũmĩrĩru na makĩambĩrĩria kũrĩa o nao. 37 Twarĩ andũ* 276 thĩinĩ wa meri ĩyo. 38 Rĩrĩa maarĩire makĩigania, makĩambĩrĩria gũikia ngano iria-inĩ nĩguo meri ĩhũthahũthe.+
39 Rĩrĩa gwathererũkire, matiamenyaga nĩ kũ kũu maarĩ,+ no makĩona rũteere rwarĩ na mũthanga na magĩtua itua rĩa gũkinyia meri ĩyo hau angĩkorũo nĩ mangĩahotire. 40 Kwoguo magĩtinia nanga makĩreka igwe iria-inĩ, na o hĩndĩ ĩyo makĩregeria mĩkanda ya mĩiko ya gũtwarithia meri; na thutha wa kwambatia gĩtaama kĩa mwena wa mbere nĩguo kĩhurutwo nĩ rũhuho, magĩkũũra merekeire rũteere-inĩ rũu. 41 Na rĩrĩ, makĩgũtha kĩhũba kĩa mũthanga wacokanĩrĩirio nĩ maĩ, makĩgereria meri mũthanga igũrũ naguo mwena wayo wa mbere ũkĩhata ĩkĩremwo nĩ gũthiĩ, naguo mwena wa thutha ũkĩambĩrĩria kuunĩkanga tũcunjĩ nĩ ũndũ wa kũhũũrũo na hinya nĩ makũmbĩ.+ 42 Nacio thigari ikĩbanga kũũraga ohwo acio nĩguo gũtikagĩe o na ũmwe wao ũgũtubĩra ore. 43 No mũnene wa thigari nĩ aatuĩte itua rĩa kũhonokia Paulo na kwoguo akĩmagiria gwĩka ũguo maabangĩte. Agĩathana atĩ arĩa mangĩahotire gũtubĩra marũge iria-inĩ mathiage rũteere-inĩ, 44 nao acio angĩ maarĩ mamarũmĩrĩre, amwe menyitĩrĩire mbaũ-inĩ na angĩ icunjĩ-inĩ cia meri ĩyo. Othe magĩkinya thĩ nyũmũ magĩkĩhonoka.+