Isaia
19 Ĩno nĩ ndũmĩrĩri nditũ ĩkoniĩ Misiri:+
Atĩrĩrĩ, Jehova ahaicĩte itu rĩrathiĩ na ihenya agĩũka Misiri.
Nacio ngai itarĩ kĩene cia Misiri nĩ ikaainaina irĩ mbere yake,+
Na ngoro ya Misiri ĩtweke thĩinĩ wayo.
2 “Nĩ ngaacogera Amisiri mokĩrĩre Amisiri,
Na mahũũrane o ene,
O ũmwe okĩrĩre mũrũ wa nyina o na ũrĩa marigainie,
Itũũra rĩũkĩrĩre rĩrĩa rĩngĩ, ũthamaki ũũkĩrĩre ũrĩa ũngĩ.
3 Na roho wa Misiri nĩ ũgaatukanĩrũo thĩinĩ wayo,
Na nĩ ngaahĩngĩcithania mĩbango yakuo.+
Nao makaahoya ũteithio kũrĩ ngai itarĩ kĩene,
Kũrĩ arogi na kũrĩ arĩa maragia na maroho na kũrĩ arĩa marathagĩra andũ maũndũ.+
4 Nĩ ngaaneana Misiri harĩ mwathi ũtarĩ tha,
Na nĩ magaathagwo nĩ mũthamaki mũũru,”+ ũguo nĩguo Mwathani ũrĩa wa ma, Jehova mũnene wa ita ekuuga.
5 Maĩ ma iria nĩ makaahũithio,
Naruo rũũĩ rũngʼare na rũhũe.+
6 Na njũũĩ nĩ ikaanunga;
Tũmĩtaro twa Nailo kũu Misiri tũhwererekere na tũngʼare.
Na mathanjĩ na nyeki ibuthe.+
7 Mĩmera ĩrĩa ĩrĩ hũgũrũrũ-inĩ cia Rũũĩ rwa Nailo, harĩa rũũĩ rũu rwahũkanĩire,
Na mĩgũnda yothe ĩrĩa ĩhandĩtwo mbeũ hũgũrũrũ-inĩ cia Rũũĩ rwa Nailo+ nĩ ĩkooma.+
Nĩ ĩkaahurutwo yehere biũ, na ndĩgaakorũo kuo rĩngĩ.
8 Na ategi a thamaki nĩ makaanyitwo nĩ kĩeha,
Arĩa maikagia ndwano thĩinĩ wa Nailo nĩ magaacakaya,
Nao arĩa matambũrũkagia neti ciao maĩ-inĩ nĩ makaahwererekera.
9 Arĩa marutaga wĩra na ũguta* ũrĩa ũcanũrĩtwo+
Na arĩa matumaga nguo cia rangi mwerũ nĩ magaaconorithio.
10 Atumi a kuo nĩ makaamemendwo;
Na aruti wĩra a mũcara othe manyitwo nĩ kĩeha kĩnene.*
11 Anene a Zoani+ nĩ akĩgu.
Ataarani arĩa ogĩ mũno a Firauni maheanaga ũtaaro ũtarĩ mwega.+
Ũngĩhota atĩa kwĩra Firauni atĩrĩ:
“Niĩ ndĩ rũciaro rwa andũ arĩa ogĩ,
Rũciaro rwa athamaki a tene”?
12 Andũ aku arĩa ogĩ-rĩ, makĩrĩ kũ?+
Ta nĩ makwĩre angĩkorũo nĩ moĩ ũrĩa Jehova mũnene wa ita aciirĩire gwĩka Misiri.
13 Anene a Zoani nĩ mekĩte maũndũ ma ũrimũ;
Nao atongoria a mĩhĩrĩga yakuo makahĩtithia Misiri.
14 Jehova nĩ aitĩrĩirie Misiri roho wa kũhĩngĩcanĩrũo;+
Nao makahĩtithia bũrũri wa Misiri maũndũ-inĩ mothe marĩa wĩkaga,
O ta mũrĩĩu ũratũgũga matahĩko-inĩ make.
15 Na bũrũri wa Misiri ndũgaakorũo na wĩra o wothe wa kũruta,
Wa kũrutwo nĩ mũtwe kana mũtingʼoe, thuuna kana nyeki.*
16 Mũthenya ũcio bũrũri wa Misiri ũkaahaana o ta atumia, ũkaainaina na ũnyitwo nĩ guoya nĩ ũndũ wa guoko gwa kũmakania kũrĩa Jehova mũnene wa ita akooya igũrũ awerekeirie.+ 17 Na bũrũri wa Juda nĩ ũgaatuĩka kĩndũ gĩa gwĩtigĩrũo nĩ Misiri. Nĩ makaanyitwo nĩ guoya maigua bũrũri ũcio wagwetwo tondũ wa itua rĩrĩa Jehova mũnene wa ita atuĩte igũrũ rĩao.+
18 Mũthenya ũcio nĩ gũgaakorũo na matũũra matano bũrũri-inĩ wa Misiri mararia rũthiomi rwa Kanaani+ na makehĩta nĩ megũkorũo marĩ ehokeku harĩ Jehova mũnene wa ita. Itũũra rĩmwe rĩgeetagwo Itũũra rĩa Kwananga.
19 Mũthenya ũcio nĩ gũkaagĩa na kĩgongona kĩa Jehova gatagatĩ ka bũrũri wa Misiri na gĩtugĩ kĩa Jehova mũhaka-inĩ wa bũrũri ũcio. 20 Igaakorũo irĩ rũũri na ũira harĩ Jehova mũnene wa ita bũrũri-inĩ wa Misiri; tondũ nĩ magaakaĩra Jehova nĩ ũndũ wa arĩa mamahinyagĩrĩria, na nĩ akaamatũmĩra mũhonokia, mũnene, ũrĩa ũkaamahonokia. 21 Na Jehova nĩ akaamenyeka harĩ Amisiri, nao Amisiri nĩ makaamenya Jehova mũthenya ũcio, na nĩ makaaruta magongona o na iheo na mehĩte mwĩhĩtwa harĩ Jehova na maũhingie. 22 Jehova nĩ akaahũũra Misiri,+ amĩhũũre na amĩhonie; nao nĩ magaacokerera Jehova, nake nĩ akaaigua mathaithana mao na amahonie.
23 Na rĩrĩ, mũthenya ũcio nĩ gũgaakorũo na barabara nene+ kuuma Misiri nginya Ashuri. Thutha ũcio Ashuri nĩ ĩgaathiĩ Misiri, na Misiri ĩthiĩ Ashuri, na Misiri nĩ ĩgaatungatĩra Ngai ĩrĩ hamwe na Ashuri. 24 Mũthenya ũcio Isiraeli ĩgaatuĩka ya gatatũ hamwe na Misiri na Ashuri,+ ĩrĩ kĩrathimo harĩ thĩ, 25 nĩ gũkorũo Jehova mũnene wa ita nĩ agaakorũo amarathimĩte, akoiga: “Kũrathimwo nĩ andũ akwa, Misiri, na wĩra wa moko makwa, Ashuri, na igai rĩakwa Isiraeli.”+