Zekaria

5 Ningĩ ngĩtiira maitho, ngĩona gĩkũnjo kĩrombũka. 2 Nake akĩnjũria atĩrĩ: “Nĩ kĩĩ ũrona?”

Na niĩ ngĩmwĩra: “Ndĩrona gĩkũnjo kĩrombũka, kĩrĩ na ũraihu wa mĩkono* 20 na wariĩ wa mĩkono 10.”

3 Agĩcoka akĩnjĩra atĩrĩ: “Gĩkĩ nĩkĩo kĩrumi kĩrĩa kĩrathiĩ igũrũ rĩa thĩ yothe, tondũ mũndũ o wothe ũiyaga,+ ta ũrĩa kwandĩkĩtwo mwena ũmwe wakĩo, ndaherithĩtio; na mũndũ o wothe wĩhĩtaga mwĩhĩtwa,+ ta ũrĩa kwandĩkĩtwo mwena ũcio ũngĩ wakĩo, ndaherithĩtio. 4 ‘Nĩ niĩ ndĩgĩtũmĩte,’ ũguo nĩguo Jehova mũnene wa ita ekuuga, ‘na nĩ gĩgaatonya thĩinĩ wa nyũmba ya mũici na thĩinĩ wa nyũmba ya mũndũ ũrĩa wĩhĩtaga mwĩhĩtwa wa maheeni na rĩĩtwa rĩakwa; na gĩgaaikara thĩinĩ wa nyũmba ĩyo na kĩmĩniine na kĩniine mbaũ ciayo na mahiga mayo.’”

5 Nake mũraika ũcio waaragia na niĩ agĩũka kũrĩ niĩ akĩnjĩra atĩrĩ: “Ta tiira maitho wone kĩrĩa kĩroimĩra.”

6 Na niĩ ngĩmũũria: “Nĩ kĩĩ kĩu?”

Akĩnjokeria akĩnjĩra: “Kĩu nĩ gĩkabu kĩa eba* kĩroimĩra.” Agĩcoka akĩnjĩra atĩrĩ: “Ũguo nĩguo mahaana thĩinĩ wa thĩ yothe.” 7 Na ngĩona ngunĩko ya gĩthiũrũrĩ yathondeketwo na ngocorai* yoywo na igũrũ, na haarĩ mũtumia waikarĩte thĩ thĩinĩ wa gĩkabu kĩu. 8 Nake mũraika ũcio akiuga: “Ũyũ nĩ Waganu.” Agĩcoka akĩmũtindĩka acoke thĩinĩ wa gĩkabu kĩu kĩa eba, na agĩcokia na ihenya gĩkunĩko kĩu kĩa ngocorai* mũromo-inĩ wa gĩkabu kĩu.

9 Ngĩcoka ngĩtiira maitho ngĩona atumia erĩ magĩũka, na mookaga makuuĩtwo nĩ rũhuho. Maarĩ na mathagu maatariĩ ta ma njũũ. Na makĩoya gĩkabu kĩu na igũrũ magĩgĩtwara rĩera-inĩ. 10 Na niĩ ngĩũria mũraika ũcio waaragia na niĩ atĩrĩ: “Maratwara gĩkabu kĩu kĩa eba kũ?”

11 Nake akĩnjokeria: “Maragĩtwara bũrũri wa Shinaru*+ makamwakĩre nyũmba; na yarĩka, nĩ makaamũiga kuo handũ harĩa hamwagĩrĩire.”