Atiirĩrĩri Bũrũri
18 Na rĩrĩ, matukũ-inĩ macio gũtiarĩ mũthamaki thĩinĩ wa Isiraeli.+ Na matukũ-inĩ macio mũhĩrĩga wa Adani+ nĩ gwetha weethaga kũndũ gwa gũikara gũtuĩke igai rĩao, tondũ gũkinyĩria hĩndĩ ĩyo matiegwatĩire igai gatagatĩ-inĩ ka mĩhĩrĩga ya Isiraeli.+
2 Adani magĩgĩtũma arũme atano kuuma famĩlĩ-inĩ yao, arũme marĩ na ũhoti kuuma Zora na Eshitaoli,+ mathiĩ magathigane bũrũri na maũtuĩrie. Makĩmeera atĩrĩ: “Thiĩi mũgatuĩrie bũrũri ũcio.” Rĩrĩa maakinyire gĩcigo-inĩ kĩrĩa kĩrĩ irĩma kĩa Efiraimu, nyũmba-inĩ ya Mika,+ makĩraarĩrĩra kuo. 3 Rĩrĩa maakuhĩrĩirie nyũmba ya Mika, makĩigua mũgambo* wa mwanake ũrĩa Mũlawii na makĩũmenya, nĩ ũndũ ũcio magĩthiĩ kũrĩ we makĩmũũria ũũ: “Nũũ wakũrehire gũkũ? Nĩ kĩĩ ũreka gũkũ? Nĩ kĩĩ gĩtũmĩte ũkorũo ũrĩ gũkũ?” 4 Akĩmacokeria atĩrĩ: “Mika aanjĩkĩire ũũ na ũũ, na akĩnyandĩka nduĩke mũthĩnjĩri-ngai wake.”+ 5 Magĩcoka makĩmwĩra ũũ: “Twagũthaitha ũũrie Ngai kana rũgendo rwitũ nĩ rũkũgaacĩra.” 6 Mũthĩnjĩri-ngai ũcio akĩmeera atĩrĩ: “Thiĩi na thayũ. Jehova arĩ hamwe na inyuĩ rũgendo-inĩ rwanyu.”
7 Nĩ ũndũ ũcio arũme acio atano magĩthiĩ na mbere na rũgendo rwao na magĩkinya Laishi.+ Magĩkĩona ũrĩa andũ a kũu meeikaragia o ta Asidoni. Maaikaraga mahooreire matekwĩrĩgĩrĩra ũgwati,+ na gũtiarĩ na mũhinyanĩrĩria wamagiaga bũrũri-inĩ ũcio. Maarĩ kũraihu na Asidoni, na matieingĩranagia na mũndũ ũngĩ o wothe.
8 Rĩrĩa maacokire kũrĩ ariũ a ithe wao kũu Zora na Eshitaoli,+ ariũ a ithe wao makĩmoria atĩrĩ: “Kũrathiire atĩa?” 9 Makĩmacokeria ũũ: “Nĩ twambatei tũkamatharĩkĩre, nĩ gũkorũo nĩ tũronire bũrũri ũcio ũrĩ mwega mũno. Mũrahindahinda nĩkĩ? Mũtikamaĩrĩrie gũthiĩ kwĩgwatĩra bũrũri ũcio. 10 Mwakinya kuo, mũgũkora andũ materĩgĩrĩire ũgwati,+ na bũrũri ũcio nĩ mwariĩ. Ngai nĩ aũneanĩte guoko-inĩ kwanyu, na nĩ kũndũ gũtarĩ kĩndũ kĩagĩte harĩ indo iria irĩ thĩinĩ wa thĩ.”+
11 Thutha ũcio arũme 600 marĩ na indo cia mbaara a kuuma famĩlĩ-inĩ ya Adani makiumagara kuuma Zora na Eshitaoli.+ 12 Makĩambata na makĩamba hema ciao Kiriathu-jearimu+ thĩinĩ wa Juda. Nĩkĩo handũ hau, harĩa he mwena wa ithũĩro wa Kiriathu-jearimu hetagwo Mahane-dani*+ nginyagia ũmũthĩ. 13 Makiuma hau magĩthiĩ gĩcigo-inĩ kĩrĩa kĩrĩ irĩma kĩa Efiraimu na magĩkinya nyũmba-inĩ ya Mika.+
14 Arũme atano acio maathiĩte gũthigana bũrũri wa Laishi+ makĩra ariũ a ithe wao atĩrĩ: “Hihi nĩ mũroĩ atĩ nyũmba-inĩ ici kũrĩ na ebodi, mĩhianano ya terafimu,* mũhianano wa gwacũhio, na mũhianano wa cuma?*+ Mwĩciriei ũrĩa mwagĩrĩirũo nĩ gwĩka.” 15 Nĩ ũndũ ũcio makĩamba kũrũgama kũu magĩthiĩ nyũmba-inĩ ya mwanake ũrĩa Mũlawii+ mũciĩ kwa Mika na makĩmũũria ũhoro wake. 16 Ihinda rĩu rĩothe, arũme acio 600 a Dani,+ marĩ na indo cia mbaara, maarũgamĩte mũromo-inĩ wa kĩhingo. 17 Arũme atano acio maathiĩte gũthigana bũrũri ũcio+ magĩtonya kuoya mũhianano ũcio wa gwacũhio, ebodi,+ mĩhianano ya terafimu,*+ na mũhianano wa cuma.*+ (Mũthĩnjĩri-ngai+ aarũgamĩte mũromo-inĩ wa kĩhingo hamwe na arũme acio 600 maarĩ na indo cia mbaara.) 18 Magĩkĩingĩra nyũmba ya Mika na makĩoya mũhianano ũcio wa gwacũhio, ebodi, mĩhianano ya terafimu,* na mũhianano wa cuma.* Mũthĩnjĩri-ngai ũcio akĩmoria atĩrĩ: “Nĩ kĩĩ mũreka?” 19 Nao makĩmwĩra ũũ: “Kira ki. Humbĩra kanua gaku na guoko, na ũũke tũthiĩ nawe ũtuĩke baba* na mũthĩnjĩri-ngai witũ. Nĩ ũndũ ũrĩkũ mwega—nĩwe gũtuĩka mũthĩnjĩri-ngai harĩ nyũmba ya mũndũ ũmwe-ĩ+ kana nĩ gũtuĩka mũthĩnjĩri-ngai harĩ mũhĩrĩga na famĩlĩ ngʼima thĩinĩ wa Isiraeli?”+ 20 Mũthĩnjĩri-ngai ũcio agĩgĩkenio nĩ ũhoro ũcio, na akĩoya ebodi ĩyo, mĩhianano ya terafimu,* na mũhianano wa gwacũhio+ na magĩthiĩ hamwe na andũ acio.
21 Magĩkĩgarũrũka nĩguo methiĩre, matongoretio nĩ ciana, mahiũ, na indo cia goro. 22 Na mathiangĩte itĩna kuuma mũciĩ-inĩ wa Mika, arũme arĩa maaikaraga mĩciĩ ĩrĩa yarĩ hakuhĩ na mũciĩ wa Mika makĩũngana hamwe na magĩkinyĩra Adani. 23 Rĩrĩa meetire Adani maanĩrĩire, makĩĩhũgũra kũmarora na makĩũria Mika atĩrĩ: “Nĩ kĩĩ kĩũru? Mwongana hamwe nĩkĩ?” 24 Nĩ ũndũ ũcio akiuga ũũ: “Muoya ngai ciakwa iria ndathondekire, na mwathiĩ nginya na mũthĩnjĩri-ngai. Ndagĩtigwo na kĩĩ? Mũngĩgĩcoka mũnjũrie atĩa, ‘Nĩ kĩĩ kĩũru nawe?’” 25 Adani makĩmũcokeria atĩrĩ: “Tiga gũtwanĩrĩra ũguo; kwaga ũguo, mwahota gũtharĩkĩrũo nĩ arũme marĩ na marũrũ, na ũndũ ũcio no ũtũme ũũrũo nĩ muoyo* waku na mĩoyo* ya andũ a nyũmba yaku.” 26 Nĩ ũndũ ũcio Adani magĩĩthiĩra; nake Mika, thutha wa kuona atĩ maarĩ na hinya kũmũkĩra, akĩhũndũka agĩcoka gwake mũciĩ.
27 Thutha wa kuoya kĩrĩa Mika aathondekete, o hamwe na mũthĩnjĩri-ngai wake, magĩthiĩ Laishi,+ kũrĩ andũ maaikaraga mahooreire matekwĩrĩgĩrĩra ũgwati.+ Makĩmatharĩkĩra na rũhiũ rwa njora na magĩcina itũũra rĩu na mwaki. 28 Gũtiarĩ mũndũ wa kũrĩhonokia, nĩ gũkorũo nĩ rĩaraihanĩrĩirie na Sidoni na matieingĩranagia na mũndũ ũngĩ o wothe na rĩarĩ mũkuru-inĩ mwaraganu* ũrĩa warĩ wa Bethi-rehobu.+ Thutha ũcio magĩaka itũũra rĩu rĩngĩ na magĩikara kuo. 29 Ningĩ, magĩta itũũra rĩu Dani,+ o ta ũrĩa Dani ithe wao eetagwo, ũrĩa Isiraeli aaciarĩirũo.+ No itũũra rĩu rĩetagwo Laishi mbere ĩyo.+ 30 Thutha ũcio Adani makĩĩhandĩra mũhianano ũcio wa gwacũhio,+ na Jonathani+ mũrũ wa Gerishomu,+ mũrũ wa Musa, na ariũ ake magĩtuĩka athĩnjĩri-ngai a mũhĩrĩga wa Adani o nginya mũthenya ũrĩa aikari a bũrũri ũcio maathiire ithamĩrio. 31 Magĩkĩhanda mũhianano ũcio wa gwacũhio Mika aathondekete, na ũgĩikara ho matukũ mothe marĩa nyũmba ya Ngai ũrĩa wa ma yarĩ Shilo.+