Samueli wa Kerĩ

4 Rĩrĩa Ishi-boshethu+ mũrũ wa Saulu aaiguire atĩ Abineri nĩ oragĩirũo Hebironi,+ akĩaga ũmĩrĩru* na Aisiraeli othe magĩtangĩka mũno. 2 Na rĩrĩ, nĩ kwarĩ na arũme erĩ maarũgamagĩrĩra ikundi cia atunyani cia mũrũ wa Saulu: ũmwe eetagwo Baana nake ũcio ũngĩ Rekabu. Maarĩ ariũ a Rimoni Mũbeerothu, wa mũhĩrĩga wa Benjamini. (Nĩ gũkorũo Beerothu+ o nakuo gwataragwo kũrĩ gĩcunjĩ kĩa Benjamini. 3 Abeerothu moorire magĩthiĩ Gitaimu,+ na matũire kuo marĩ ageni nginyagia ũmũthĩ.)

4 Na rĩrĩ, Jonathani mũrũ wa Saulu+ aarĩ na mũrũwe warĩ muonju magũrũ.*+ Aarĩ na mĩaka ĩtano rĩrĩa ndũmĩrĩri ĩgiĩ Saulu na Jonathani yokire kuuma Jezireeli,+ nake mũtumia ũrĩa wamũreraga akĩmuoya na akĩũra, no hĩndĩ ĩyo ooraga arĩ na guoya, mũriũ ũcio akĩgwa na akĩonja. Mũriũ ũcio eetagwo Mefiboshethu.+

5 Rekabu na Baana, ariũ a Rimoni Mũbeerothu, magĩthiĩ mũciĩ kwa Ishi-boshethu mahinda-inĩ ma mũthenya rĩrĩa riũa rĩkoragwo rĩhiũhĩte, makĩmũkora ahurũkĩte mathaa macio ma mĩaraho. 6 Makĩingĩra nyũmba metuĩte ta arĩ ngano marenda kuoya, makĩmũtheca nda; thutha ũcio Rekabu na mũrũ wa nyina Baana+ makĩũra. 7 Hĩndĩ ĩyo maaingĩrire nyũmba, maamũkorire akomete ũrĩrĩ rumu-inĩ yake ya gũkoma, makĩmũtheca makĩmũũraga, na thutha ũcio makĩmũrenga mũtwe. Magĩcoka makĩoya mũtwe wake na magĩthiĩ ũtukũ mũgima magereire barabara-inĩ ĩrĩa ĩthiĩte Araba. 8 Na magĩtwara mũtwe ũcio wa Ishi-boshethu+ kũrĩ Daudi kũu Hebironi, makĩra mũthamaki ũũ: “Ĩ ũyũ mũtwe wa Ishi-boshethu mũrũ wa Saulu thũ yaku+ ĩrĩa yacaragia muoyo* waku.+ Mũthenya ũyũ wa ũmũthĩ Jehova nĩ arĩhĩirie mwathi wakwa mũthamaki harĩ Saulu na njiarũa ciake.”

9 O na kũrĩ ũguo, Daudi agĩcokeria Rekabu na mũrũ wa nyina Baana, ariũ a Rimoni Mũbeerothu, akĩmeera ũũ: “O ta ũrĩa Jehova atũũraga muoyo, o we ũrĩa wahonokirie kuuma mĩtangĩko-inĩ yothe,+ 10 rĩrĩa mũndũ ũmwe aandeheire ndũmĩrĩri akĩnjĩra atĩrĩ, ‘Saulu nĩ akuĩte,’+ eeciragia andehera ũhoro mwega, ngĩmũnyita na ngĩmũũragĩra+ o kũu Zikilagi. Kĩu nĩkĩo kĩheo kĩrĩa mũndũ ũcio wandeheire ndũmĩrĩri ĩyo aamũkĩrire kuuma kũrĩ niĩ! 11 Na githĩ ndingĩgĩka ũguo o na makĩria rĩrĩa arũme aganu moragĩire mũndũ mũthingu thĩinĩ wa nyũmba yake mwene ũrĩrĩ-inĩ wake! Githĩ ndiagĩrĩirũo gwĩtia thakame yake kuuma moko-inĩ manyu+ na ndĩmweherie thĩinĩ wa thĩ?” 12 Daudi agĩcoka agĩatha anake ake mamorage.+ Makĩmatinia moko na magũrũ na makĩmacuuria+ hakuhĩ na karia kũu Hebironi. No makĩoya mũtwe wa Ishi-boshethu makĩũthika mbĩrĩra-inĩ ya Abineri kũu Hebironi.