Athamaki wa Mbere

5 Rĩrĩa Hiramu mũthamaki wa Turo+ aaiguire atĩ Suleimani nĩ aaitĩrĩirio maguta agatuĩka mũthamaki ithenya rĩa ithe, agĩtũma ndungata ciake kũrĩ Suleimani, tondũ Hiramu aatũire arĩ mũrata wa Daudi.*+ 2 Nake Suleimani agĩtũma ndũmĩrĩri kũrĩ Hiramu akĩmwĩra atĩrĩ:+ 3 “Nĩ ũĩ wega atĩ baba Daudi ndaahotire gwaka nyũmba nĩ ũndũ wa rĩĩtwa rĩa Jehova Ngai wake tondũ wa mbaara iria ookĩrĩirũo nacio kuuma mĩena yothe o nginya rĩrĩa Jehova aaigire thũ ciake rungu rwa makinya ma magũrũ make.+ 4 No rĩu Jehova Ngai wakwa nĩ aheete ũhurũko na mĩena yothe.+ Gũtirĩ mũndũ o na ũmwe ũraregana na niĩ na gũtirĩ ũndũ mũũru ũrekĩka.+ 5 Nĩ ũndũ ũcio, ndĩrenda gwaka nyũmba nĩ ũndũ wa rĩĩtwa rĩa Jehova Ngai wakwa, o ta ũrĩa Jehova eerĩire baba Daudi akĩmwĩra ũũ: ‘Mũrũguo ũrĩa ngaaiga gĩtĩ-inĩ kĩa ũnene ithenya rĩaku, nĩwe ũgaaka nyũmba ĩyo nĩ ũndũ wa rĩĩtwa rĩakwa.’+ 6 Rĩu atha andũ aku mandemere mĩtarakwa ya Lebanoni.+ Ndungata ciakwa nĩ ikũrutithania wĩra na ndungata ciaku, na nĩ ngũrĩha ndungata ciaku mũcara kũringana na mũigana ũrĩa ũkuuga, nĩ gũkorũo nĩ ũĩ atĩ gũtirĩ o na ũmwe witũ ũĩ gũtema mĩtĩ ta Asidoni.”+

7 Rĩrĩa Hiramu aaiguire ciugo cia Suleimani, agĩkena mũno na akiuga ũũ: “Jehova arogoocwo ũmũthĩ, nĩ gũkorũo nĩ aheete Daudi mũriũ mũũgĩ athamakĩre andũ aya aingĩ ũguo!”+ 8 Nĩ ũndũ ũcio Hiramu agĩtũmĩra Suleimani ndũmĩrĩri ĩno: “Nĩ ndaigua ndũmĩrĩri ĩyo ũndũmĩire. Nĩ ngwĩka ũrĩa wothe ũrenda, ngũhe mbaũ cia mũtarakwa na cia mũthengera.+ 9 Ndungata ciakwa nĩ igũcikũrũkia kuuma Lebanoni icirehe iria-inĩ, na ndĩciohe irĩ mĩgogo nĩguo ĩgerere iria-inĩ o nginya harĩa ũkũnjĩra. Njoke ndĩmĩohorithĩrie hau, na ũmĩkuue kuuma hau. Nawe ũũhe irio iria ngũgwĩtia cia andũ a nyũmba yakwa.”+

10 Kwoguo Hiramu akĩheana mbaũ cia mũtarakwa na cia mũthengera iria ciothe Suleimani eendaga. 11 Nake Suleimani akĩhe Hiramu ngano ithimi 20,000 cia kori* ĩrĩ irio cia andũ a nyũmba yake o hamwe na maguta mega biũ ma ndamaiyũ* ithimi 20 cia kori. Icio nĩcio indo iria Suleimani aaheaga Hiramu mwaka o mwaka.+ 12 Na Jehova akĩhe Suleimani ũũgĩ o ta ũrĩa Aamwĩrĩire.+ Na kwarĩ na thayũ gatagatĩ-inĩ ka Hiramu na Suleimani, na eerĩ magĩthondeka ũiguano.*

13 Mũthamaki Suleimani agĩatha arũme kuuma Isiraeli guothe a kũruta wĩra mũritũ; agĩatha arũme 30,000.+ 14 Aatũmaga gĩkundi kĩa arũme 10,000 mathiĩ Lebanoni, o mweri gĩkundi kĩmwe. Maaikaraga mweri ũmwe Lebanoni na mĩeri ĩĩrĩ kwao mĩciĩ; na Adoniramu+ nĩwe warũgamagĩrĩra andũ acio maathĩtwo marutage wĩra mũritũ. 15 Suleimani aarĩ na andũ a moko* 70,000 na andũ 80,000 a gwacũhia mahiga+ irĩma-inĩ,+ 16 o hamwe na anene 3,300 a Suleimani+ arĩa maarĩ anyabara a kũrũgamĩrĩra andũ acio a wĩra. 17 Mũthamaki agĩathana, nao makĩenja mahiga manene, mahiga ma goro,+ nĩguo mũthingi+ wa nyũmba ĩyo wakwo na mahiga maicũhie.+ 18 Nĩ ũndũ ũcio aaki a Suleimani na aaki a Hiramu na Agebali+ magĩicũhia mahiga, na makĩhaarĩria mbaũ na mahiga nĩ ũndũ wa gwaka nyũmba ĩyo.