Isaia
16 Tũmai ndũrũme kũrĩ mũtongoria wa bũrũri,
Kuuma itũũra rĩa Sela gũtuĩkanĩria werũ-inĩ
Nginya kĩrĩma-inĩ kĩa mwarĩ wa Zayuni.
2 O ta nyoni ĩingatĩtwo gĩtara-inĩ kĩayo,+
Ũguo noguo aarĩ a Moabi magaakorũo matariĩ iringĩro-inĩ cia Arinoni.+
3 “Heanai ũtaaro, tuai itua.
Tũmai kĩĩruru kĩanyu kĩa mĩaraho gĩtuĩke o ta ũtukũ.
Hithai arĩa mahurunjũkĩte na mũtigakunyanĩre arĩa marethara.
4 Reke andũ akwa arĩa mahurunjũkĩte maikare thĩinĩ waku, wee Moabi.
Tuĩka handũ hao ha kwĩhitha nĩ ũndũ wa mũniinani.+
Mũhinyanĩrĩria nĩ agaakinya mũthia wake.
Mwanangĩko nĩ ũgaakinya mũthia.
Nao arĩa marangagĩrĩria arĩa angĩ thĩ nĩ magaathira thĩinĩ wa thĩ.
5 Nakĩo gĩtĩ kĩa ũnene nĩ gĩkaahandwo kĩrũmĩte wega nĩ ũndũ wa wendo mwĩhokeku.
Na ũrĩa ũgaagĩikarĩra hema-inĩ ya Daudi agaakorũo arĩ mwĩhokeku;+
Agaatuanĩra ciira na kĩhooto na nĩ akaahingia ũthingu na ihenya.”+
6 Nĩ tũiguĩte ũhoro wa mwĩtĩo wa Moabi—nĩ mwĩtĩi mũno+—
Tũkaigua mwĩtũũgĩrio na mwĩtĩo wake o na mangʼũrĩ make;+
No mĩario yake ya tũhũ ndĩgakinyanĩra.
7 Nĩ ũndũ ũcio Moabi nĩ ĩkaarĩra nĩ ũndũ wa mĩtangĩko ya Moabi;
Othe nĩ makaarĩra.+
Arĩa makaahũũrũo nĩ makaarĩra nĩ ũndũ wa keki cia thabibũ nyũmithie cia Kiri-haresethu.+
8 Nĩ gũkorũo mĩgũnda ya Heshiboni+ nĩ ĩhoohete,
Mũthabibũ wa Sibima,+
Atongoria a ndũrĩrĩ nĩ marangĩrĩirie honge ciaguo ndune;*
Ciakinyĩte o nginya Jazeru;+
Na igatherema nginya werũ-inĩ.
Thuuna ciaguo ciatambĩte kũraya igakinya o iria-inĩ.
9 Nĩkĩo gĩgũtũma ndĩre nĩ ũndũ wa mũthabibũ wa Sibima o ta ũrĩa ndĩrarĩra nĩ ũndũ wa Jazeru.
Na nĩ ngũmũihũgia na maithori makwa, inyuĩ Heshiboni na Eleale,+
Tondũ mbugĩrĩrio nĩ ũndũ wa matunda manyu ma hĩndĩ ya ũrugarĩ na magetha manyu nĩ ĩthirĩte.*
10 Gĩkeno na ndũhiũ nĩ cieheretio mũgũnda-inĩ wa matunda,
Na gũtirĩ nyĩmbo cia gĩkeno irainwo kana mbugĩrĩrio mĩgũnda-inĩ ya mĩthabibũ.+
Mũhihi wa ndibei nĩ atigĩte kũhiha ndibei ihihĩro-inĩ,
Nĩ gũkorũo nĩ ndũmĩte mbugĩrĩrio ĩthire.+
11 Nĩkĩo ndĩratuumatuuma ngoro-inĩ yakwa thĩinĩ nĩ ũndũ wa Moabi,+
O ta ndigi cia kĩnanda kĩa mũgeeto,
Na ngatuumatuuma ngoro-inĩ yakwa thĩinĩ nĩ ũndũ wa Kiri-haresethu.+
12 O na hĩndĩ ĩrĩa Moabi enogia arĩ handũ hatũũgĩru na athiĩ handũ hake hatheru akahoe, agaakorũo arutĩte wĩra wa tũhũ.+
13 Kĩu nĩkĩo kiugo kĩrĩa Jehova aarĩtie hau kabere igũrũ rĩgiĩ Moabi. 14 Na rĩu Jehova ekuuga ũũ: “Ihinda-inĩ rĩa mĩaka ĩtatũ, o ta mĩaka ya mũruti wĩra wa mũcara,* riri wa Moabi nĩ ũgaaconorithio na ngũĩ cia mĩthemba yothe, na arĩa magaatigara magaakorũo marĩ anini mũno na matarĩ kĩene.”+