Ezekieli

37 Na rĩrĩ, guoko kwa Jehova kwarĩ igũrũ rĩakwa, na Jehova akĩnjoya kũgerera roho wake akĩnjiga gatagatĩ ka mũkuru mwaraganu,+ na waiyũire mahĩndĩ. 2 Akĩngeria kũrĩa guothe maarĩ, na ngĩona atĩ kwarĩ na mahĩndĩ maingĩ mũno maaraganĩte mũkuru-inĩ ũcio mwaraganu, na maarĩ momũ mũno.+ 3 Akĩnjũria atĩrĩ: “Mũrũ wa mũndũ, mahĩndĩ maya no macoke muoyo?” Na niĩ ngĩmwĩra ũũ: “Jehova Mwathani Ũrĩa Mũnene, wee nĩwe ũĩ.”+ 4 Nake akĩnjĩra atĩrĩ: “Rathĩra mahĩndĩ maya ũhoro ũmeere ũũ, ‘Inyuĩ mahĩndĩ maya momũ, iguai kiugo kĩa Jehova:

5 “‘Jehova Mwathani Ũrĩa Mũnene arera mahĩndĩ maya atĩrĩ: “Nĩ ngaatũma mĩhũmũ ĩingĩre thĩinĩ wanyu, na nĩ mũgaacoka muoyo.+ 6 Nĩ ngaamwĩkĩra mĩkiha na nyama, na ndĩmwĩkĩre ngothi na njĩkĩre mĩhũmũ thĩinĩ wanyu, na nĩ mũgaacoka muoyo; na nĩ mũkaamenya atĩ niĩ nĩ niĩ Jehova.”’”

7 Na niĩ ngĩratha ũhoro o ta ũrĩa ndathĩtwo. Na rĩrĩa ndarathaga, gũkĩgĩa inegene ta rĩa mũgambo wa indo irakorogocana, namo mahĩndĩ macio makĩambĩrĩria gũcokanĩrĩra, o ihĩndĩ rĩkĩnyitana na rĩrĩa rĩagĩrĩire. 8 Ngĩcoka ngĩona mahĩndĩ macio magĩa mĩkiha na nyama, na magĩĩkĩrũo ngothi. No matiarĩ na mĩhũmũ thĩinĩ wamo.

9 Agĩcoka akĩnjĩra atĩrĩ: “Mũrũ wa mũndũ, rathĩra rũhuho ũhoro. Rũrathĩre ũhoro ũrwĩre ũũ, ‘Jehova Mwathani Ũrĩa Mũnene oigĩte atĩrĩ: “Wee rũhuho rũrũ,* ũka uumĩte huho-inĩ iria inya ũhurutĩre andũ aya mooragirũo, nĩgetha macoke muoyo.”’”

10 Na niĩ ngĩratha ũhoro o ta ũrĩa aanjathĩte, nayo mĩhũmũ ĩkĩingĩra* thĩinĩ wao, makĩambĩrĩria gũcoka muoyo na kwĩrũgamia na magũrũ,+ na maarĩ mbũtũ nene mũno.

11 Agĩcoka akĩnjĩra atĩrĩ: “Mũrũ wa mũndũ, mahĩndĩ macio nĩ nyũmba yothe ya Isiraeli.+ Nao moigaga ũũ, ‘Mahĩndĩ maitũ nĩ momũ, na kĩĩrĩgĩrĩro gitũ nĩ gĩthirĩte.+ Ithuĩ nĩ tũniinĩtwo biũ.’ 12 Nĩ ũndũ ũcio, ratha ũhoro ũmeere atĩrĩ, ‘Jehova Mwathani Ũrĩa Mũnene oigĩte ũũ: “Nĩ ngaahingũra mbĩrĩra cianyu+ na ndĩmwarahũre kuuma mbĩrĩra-inĩ cianyu, inyuĩ andũ akwa, ndĩmũtware bũrũri wa Isiraeli.+ 13 Na nĩ mũkaamenya atĩ niĩ nĩ niĩ Jehova rĩrĩa ngaahingũra mbĩrĩra cianyu na ndĩmwarahũre kuuma mbĩrĩra-inĩ cianyu, inyuĩ andũ akwa.”’+ 14 ‘Nĩ ngeekĩra roho wakwa thĩinĩ wanyu na nĩ mũgaacoka muoyo,+ na nĩ ngaamũtwara bũrũri-inĩ wanyu; na nĩ mũkaamenya atĩ niĩ mwene, Jehova, nĩ njarĩtie na ngeka ũndũ ũcio,’ ũguo nĩguo Jehova ekuuga.”

15 Kiugo kĩa Jehova gĩkĩnginyĩra o rĩngĩ ngĩrũo atĩrĩ: 16 “Nawe mũrũ wa mũndũ-rĩ, oya kamũtĩ wandĩke ũũ igũrũ rĩako, ‘Gaka nĩ ka Juda na andũ a Isiraeli arĩa marĩ hamwe nake.’*+ Ũcoke woe kamũtĩ kangĩ wandĩke ũũ igũrũ rĩako, ‘Gaka nĩ ka Jusufu, kamũtĩ ka Efiraimu, na andũ othe a nyũmba ya Isiraeli arĩa marĩ hamwe nake.’*+ 17 Ũcoke ũnyitanĩrie tũmĩtĩ tũu nĩgetha tũtuĩke kamũtĩ kamwe tũrĩ guoko-inĩ gwaku.+ 18 Nao andũ anyu* mangĩkũũria atĩrĩ, ‘Kaĩ ũtaratwĩra gĩtũmi kĩa maũndũ maya?’ 19 ũmeere, ‘Jehova Mwathani Ũrĩa Mũnene oigĩte ũũ: “Nĩ ngoya kamũtĩ ka Jusufu karĩa karĩ guoko-inĩ kwa Efiraimu, hamwe na mĩhĩrĩga ya Isiraeli ĩrĩa ĩrĩ hamwe nake, na nĩ ngaamanyitithania harĩ kamũtĩ ka Juda; na nĩ ngaamatua kamũtĩ kamwe,+ nao matuĩke kamũtĩ kamwe marĩ guoko-inĩ gwakwa.”’ 20 Tũmĩtĩ tũu ũkwandĩka igũrũ rĩatuo twagĩrĩirũo gũkorũo guoko-inĩ gwaku nĩguo matuone.

21 “Ũcoke ũmeere ũũ, ‘Jehova Mwathani Ũrĩa Mũnene oigĩte atĩrĩ: “Nĩ ngaaruta Aisiraeli gatagatĩ-inĩ ka ndũrĩrĩ kũrĩa maathiire na nĩ ngaamacokanĩrĩria hamwe kuuma mĩena yothe ndĩmatware bũrũri-inĩ wao.+ 22 Ngaamatua rũrĩrĩ rũmwe bũrũri-inĩ ũcio,+ irĩma-inĩ cia Isiraeli, na othe magaathagwo nĩ mũthamaki ũmwe,+ na matigaacoka gũkorũo marĩ ndũrĩrĩ igĩrĩ; ningĩ matigaacoka gũkorũo magayũkanĩte mothamaki merĩ.+ 23 Matigaacoka gwĩthahia rĩngĩ na mĩhianano yao ĩrĩ magigi* na mĩtugo yao ĩrĩ magigi o na mehia mao mothe.+ Nĩ ngaamahonokia kuuma harĩ kwaga kwĩhokeka kwao guothe kũrĩa gwatũmire mehie, na nĩ ngaamatheria. Magaatuĩka andũ akwa, na niĩ mwene nduĩke Ngai wao.+

24 “‘“Daudi ndungata yakwa nĩwe ũgaatuĩka mũthamaki wao,+ na othe magaakorũo na mũrĩithi ũmwe.+ Nĩ magaathiaga kũringana na matuĩro makwa ma ciira na magaathĩkĩra mawatho makwa biũ.+ 25 Magaatũũra bũrũri-inĩ ũrĩa ndaheire Jakubu ndungata yakwa, kũrĩa maithe manyu ma tene maaikaraga,+ na magaatũũra kuo tene na tene,+ o ene hamwe na ciana ciao* na ciana cia ciana ciao;+ nake Daudi ndungata yakwa nĩwe ũgaatuĩka mũtongoria wao tene na tene.+

26 “‘“Na nĩ ngaarĩkanĩra kĩrĩkanĩro gĩa thayũ hamwe nao;+ gĩgaatuĩka kĩrĩkanĩro gĩa gũtũũra tene na tene hamwe nao. Nĩ ngaatũma mehande na ndũme maingĩhe+ na njige handũ hakwa harĩa hatheru gatagatĩ-inĩ kao tene na tene. 27 Hema yakwa ĩgaakorũo* hamwe nao,* na niĩ nĩ ngaatuĩka Ngai wao, nao matuĩke andũ akwa.+ 28 Nacio ndũrĩrĩ nĩ ikaamenya atĩ niĩ Jehova, nĩ niĩ ndĩratheria Isiraeli, rĩrĩa handũ hakwa harĩa hatheru hagaatũũra gatagatĩ-inĩ kao tene na tene. ”’”+