Samueli wa Kerĩ

12 Nĩ ũndũ ũcio Jehova agĩtũma Nathani+ kũrĩ Daudi. Agĩthiĩ kũrĩ we+ na akĩmwĩra ũũ: “Nĩ kwarĩ na andũ erĩ itũũra-inĩ rĩmwe, ũmwe aarĩ mũtongu nake ũcio ũngĩ aarĩ mũthĩni. 2 Mũndũ ũcio mũtongu aarĩ na ngʼondu na ngʼombe nyingĩ mũno;+ 3 no mũndũ ũcio mũthĩni aarĩ na kamwatĩ kamwe kanini aagũrĩte.+ Agĩkarũmbũyia, na gagĩkũra karĩ hamwe nake na ariũ ake. Kaarĩaga tũirio tũnini tũrĩa aakoragwo natuo na gakanyua kuuma gĩkombe-inĩ gĩake na gagakoma moko-inĩ make. Na gaatuĩkĩte o ta mwarĩ. 4 Thutha ũcio mũgeni agĩũka kwa mũndũ ũcio mũtongu, no ndeetĩkĩrire kuoya ngʼondu yake o na kana ngʼombe nĩguo ahaarĩrie irio nĩ ũndũ wa mũgendi ũcio wokĩte gwake. Ithenya rĩa ũguo, ooire kagondu kau ka mũndũ ũcio mũthĩni na agĩgathĩnjĩra mũndũ ũcio wokĩte gwake.”+

5 Daudi aigua ũguo, akĩrakara mũno nĩ ũndũ wa mũndũ ũcio, na akĩra Nathani ũũ: “O ta ũrĩa Jehova atũũraga muoyo,+ mũndũ ũrĩa wĩkĩte ũndũ ũcio agĩrĩire kũũragwo! 6 Na agĩrĩirũo kũrĩha maita mana nĩ ũndũ wa kagondu kau,+ tondũ wa gwĩka ũndũ ũcio na kwaga kuonania ũcayanĩri.”

7 Nathani akĩra Daudi ũũ: “Mũndũ ũcio nĩwe! Ũũ nĩguo Jehova Ngai wa Isiraeli oigĩte: ‘Niĩ mwene ndagũitĩrĩirie maguta ũtuĩke mũthamaki wa Isiraeli,+ na ngĩkũhonokia kuuma guoko-inĩ gwa Saulu.+ 8 Niĩ ndarĩ na wendi wa gũkũnengera nyũmba ya mwathi waku+ na kũiga atumia a mwathi waku moko-inĩ maku,+ na ngĩkũnengera nyũmba ya Isiraeli na ya Juda.+ Na makĩria ma ũguo, nĩ ndarĩ na wendi wa gũgwĩkĩra maũndũ mangĩ maingĩ makĩria.+ 9 Nĩ kĩĩ kĩratũmire ũnyarare kiugo kĩa Jehova na njĩra ya gwĩka maũndũ moru maitho-inĩ make? Ũroragire Uria Mũhiti na rũhiũ rwa njora!+ Ũracoka ũroya mũtumia wake ũramũtua mũtumia waku+ thutha wa kũũraga Uria kũgerera rũhiũ rwa njora rwa Aamoni.+ 10 Rĩu rũhiũ rwa njora rũtikehera nyũmba-inĩ yaku,+ nĩ gũkorũo nĩ niĩ ũranyararire rĩrĩa ũroire mũtumia wa Uria Mũhiti atuĩke mũtumia waku.’ 11 Ũũ nĩguo Jehova oigĩte: ‘Nĩ ngũkũrehera thĩna kuuma nyũmba-inĩ yaku mwene;+ na nĩ ngoya atumia aku ndĩmaneane kũrĩ mũndũrũme ũngĩ wĩroreire na maitho maku,+ na agaakoma na atumia aku mũthenya barigici.*+ 12 O na gũtuĩka wee ũrekire ũguo na hitho,+ niĩ ngeeka ũndũ ũcio mbere ya andũ othe a Isiraeli mũthenya barigici.’”*

13 Nake Daudi akĩra Nathani ũũ: “Nĩ njĩhĩirie Jehova.”+ Nathani agĩcokeria Daudi atĩrĩ: “Nake Jehova nĩ akuohera mehia maku.*+ Ndũgũkua.+ 14 O na kũrĩ ũguo, tondũ nĩ wagĩire Jehova gĩtĩo na njĩra nene ũndũ-inĩ ũyũ, kahĩĩ kau ũciarĩirũo no gegũkua.”

15 Nathani agĩcoka akĩinũka gwake mũciĩ.

Na Jehova akĩhũũra mwana ũcio mũtumia wa Uria aaciarĩire Daudi na mũrimũ akĩrwara. 16 Daudi agĩthaitha Ngai ũrĩa wa ma nĩ ũndũ wa kahĩĩ kau. Daudi akĩĩhinga biũ kũrĩa na aathiaga akaraara akomete thĩ.+ 17 Nĩ ũndũ ũcio athuri* a nyũmba yake maathiaga makarũgama harĩa aarĩ na makageria kũmũũkĩria na igũrũ kuuma hau thĩ, no akarega na ndaarĩanagĩra nao. 18 Mũthenya wa mũgwanja kaana kau gagĩkua, no ndungata cia Daudi nĩ cietigagĩra kũmwĩra atĩ kaana kau nĩ gakuĩte. Cioigire ũũ: “Rĩrĩa kaana kau kararĩ muoyo, tũramwaragĩria na ndaratũthikagĩrĩria. Tũngĩkĩmwĩra atĩa atĩ kaana kau nĩ gakuĩte? Ahota gwĩka ũndũ mũũru mũno.”

19 Rĩrĩa Daudi oonire ndungata ciake ikĩheehanĩrĩra, akĩmenya atĩ kaana kau nĩ gakuĩte. Daudi akĩũria ndungata ciake ũũ: “Kaĩ kaana gakuĩte?” Ikĩmũcokeria: “Ĩĩ nĩ gakuĩte.” 20 Nĩ ũndũ ũcio Daudi agĩũkĩra kuuma hau thĩ. Agĩĩthamba, akĩĩhaka maguta,+ agĩcenjia nguo, na agĩthiĩ nyũmba-inĩ+ ya Jehova akĩinamĩrĩra agĩturumithia mũtwe thĩ. Thutha-inĩ agĩthiĩ gwake mũciĩ* na akiuga areherũo irio na akĩrĩa. 21 Ndungata ciake ikĩmũũria ũũ: “Nĩ kĩĩ gĩatũma wĩke ũũ? Rĩrĩa kaana kau kararĩ muoyo, ũrehingĩte na ũgaikara ũkĩrĩraga; no kaana kau gakua, o rĩo wokĩra na warĩa irio.” 22 Nake agĩcokia ũũ: “Rĩrĩa kaana kau kararĩ muoyo, ndĩrehingĩte+ na ngaikara ngĩrĩraga tondũ ndĩreĩraga atĩrĩ, ‘Nũũ ũĩ kana Jehova nĩ ekũnjiguĩra tha na areke kaana kau gatũũre?’+ 23 Rĩu tondũ nĩ gakuĩte-rĩ, ngũkĩĩhinga nĩkĩ? Hihi no hote gũgacokia muoyo?+ Niĩ nĩ niĩ ngaathiĩ kũrĩ ko,+ noko gatingĩcoka kũrĩ niĩ.”+

24 Daudi agĩcoka akĩũmĩrĩria mũtumia wake Bathi-sheba.+ Akĩingĩra kũrĩ we na agĩkoma nake. Thutha wa ihinda, akĩgĩa kahĩĩ na gagĩtwo Suleimani.*+ Na Jehova agĩkenda,+ 25 na agĩtũma ndũmĩrĩri kũgerera mũnabii Nathani+ atĩ kaana kau geetwo Jedidia,* nĩ ũndũ wa Jehova.

26 Joabu agĩthiĩ na mbere gũtharĩkĩra Raba+ kwa Aamoni,+ na agĩtunyana itũũra rĩa ũthamaki.+ 27 Nĩ ũndũ ũcio Joabu agĩtũma atũmwo kũrĩ Daudi makamwĩre ũũ: “Nĩ tharĩkĩire Raba+ na ngatunyana itũũra rĩa maĩ.* 28 Rĩu cokanĩrĩria thigari icio ingĩ na mũũke mwambe hema mũtharĩkĩre itũũra rĩrĩ na mũrĩtunyane. Kwaga ũguo, niĩ nĩ niĩ ngũkorũo ndunyanĩte itũũra rĩrĩ, na nĩ niĩ ngũgaathĩrĩrio.”*

29 Nĩ ũndũ ũcio Daudi agĩcokanĩrĩria thigari ciothe na agĩthiĩ itũũra-inĩ rĩa Raba na akĩrĩtharĩkĩra na akĩrĩtunyana. 30 Na akĩoya thũmbĩ ya Malikamu kuuma mũtwe-inĩ wayo. Ũritũ wa thũmbĩ ĩyo warĩ taranda* ĩmwe ya thahabu hamwe na tũhiga twa goro, na ĩkĩigĩrĩrũo mũtwe-inĩ wa Daudi. Ningĩ akĩoya indo nyingĩ mũno cia gũtahwo+ kuuma itũũra-inĩ rĩu.+ 31 Na agĩkuua andũ arĩa maarĩ itũũra-inĩ rĩu na akĩmaiga marutage wĩra wa kũrenga mahiga, marutage wĩra na indo njũgĩ cia kĩgera na mathanwa ma kĩgera, na mathondekage maturubarĩ. Ũguo nĩguo eekire matũũra mothe ma Aamoni. Thutha ũcio Daudi na thigari ciothe magĩcoka Jerusalemu.