Rwĩmbo rwa Suleimani
8 “Na arĩ korũo ũhaana ta mũrũ wa maitũ,
O ũcio woongire nyondo cia maitũ!
Hĩndĩ ĩyo, ingĩgũkora nja no ngũmumunye,+
Na gũtirĩ mũndũ ũngĩnyarara.
Ingĩkũhe ndibei ĩĩkĩrĩtwo mahuti maranunga wega ũnyue,
Ngũhe ngogoyo ya makomamanga.
3 Guoko gwake kwa ũmotho kũngĩkorũo rungu rwa mũtwe wakwa,
Nakuo guoko gwake kwa ũrĩo kũũhĩmbĩrie.+
4 Inyuĩ airĩtu* a Jerusalemu, nĩ ndamwĩhĩtithia:
Mũtikagerie gũũkĩria kana kwarahũra wendo thĩinĩ wakwa nginya ũrĩĩyarahũra guo mwene.”+
5 “Nũũ ũyũ ũrambata kuuma werũ-inĩ,
Etiiranĩtie na mwendwa wake?”
“Rungu rwa mũtĩ wa ĩpũ nĩho ndakwarahũrire.
Hau nĩho maitũguo aanyitĩirũo nĩ ruo agĩgũciara.
Ũcio wagũciarire-rĩ, hau nĩho aanyitĩirũo nĩ ruo rwa gũciara.
6 Njiga ngoro-inĩ yaku o ta mũhũũri,
O ta mũhũũri guoko-inĩ gwaku,
Nĩ gũkorũo wendo ũrĩ hinya o ta gĩkuũ,+
Na wĩrutĩri wa ngoro yothe ndũhootekaga o ta Mbĩrĩra.*
Nĩnĩmbĩ ciaguo nĩ mwaki ũrakana, rũrĩrĩmbĩ rwa Ja.*+
O na mũndũ angĩruta ũtonga ũrĩa wothe ũrĩ thĩinĩ wa nyũmba yake nĩ ũndũ wa wendo,
No kũnyararũo ũngĩnyararũo* biũ.”
8 “Tũrĩ na mwarĩ wa maitũ mũnini,+
Na ndarĩ nyondo.
Tũgeeka atĩa nĩ ũndũ wa mwarĩ wa maitũ
Mũthenya ũrĩa akoorio?”
9 “Angĩkorũo we nĩ rũthingo,
Tũgaaka karũthingo ka betha igũrũ rĩake,
No angĩkorũo we nĩ mũrango,
Tũkaamũhingĩrĩria na rũbaũ rwa mũtarakwa.”
10 “Niĩ ndĩ rũthingo,
Nacio nyondo ciakwa itariĩ ta nyũmba ndaya na igũrũ.
Nĩ ũndũ ũcio, maitho-inĩ make niĩ nduĩkĩte
O ta mũndũ wonete thayũ.
11 Suleimani aarĩ na mũgũnda wa mĩthabibũ+ Baali-hamoni.
Akĩĩhokera mũgũnda ũcio wa mĩthabibũ andũ a kũũmenyagĩrĩra.
O ũmwe wao aamũtwaragĩra icunjĩ ngiri cia betha kuumana na maciaro maguo.
12 Niĩ ndĩ na mũgũnda wakwa wa mĩthabibũ, na nĩ wakwa.
Icunjĩ icio ngiri cia betha nĩ ciaku,* wee Suleimani,
Na icunjĩ magana merĩ nĩ cia arĩa mamenyagĩrĩra maciaro maguo.”
13 “Atĩrĩrĩ wee ũikaraga mĩgũnda-inĩ,+
Arata nĩ marenda kũigua mũgambo waku.
Reke o na niĩ ndĩũigue.”+
14 “Hiũha, wee mwendwa wakwa,
Na ũtengʼere o ta thiya+
Kana gathwariga
Irĩma-inĩ cia mahuti marĩa manungaga wega.”