Ezekieli
13 Na kiugo kĩa Jehova gĩkĩnginyĩra o rĩngĩ ngĩrũo atĩrĩ: 2 “Mũrũ wa mũndũ, ratha ũhoro wa gũũkĩrĩra anabii a Isiraeli,+ wĩre arĩa metungagĩra morathi mao* ũũ,+ ‘Iguai kiugo kĩa Jehova. 3 Jehova Mwathani Ũrĩa Mũnene oigĩte ũũ: “Kaĩ anabii arĩa akĩgu marĩ na haaro-ĩ, o acio marũmagĩrĩra roho wao ene o na gũtarĩ kĩoneki monete!+ 4 Wee Isiraeli, anabii aku mahaanĩte ta mbwe irĩ kũndũ kwanangĩku. 5 Mũtigaathiĩ kũrĩa kũmomokete thingo-inĩ cia mahiga mũgaciake rĩngĩ nĩ ũndũ wa nyũmba ya Isiraeli,+ nĩgetha andũ a Isiraeli makaahota gwĩtiiria mbaara-inĩ hĩndĩ ya mũthenya wa Jehova.”+ 6 “Nĩ monete cioneki cia maheeni na makaratha ũhoro ũtarĩ wa ma, o acio moigaga atĩrĩ, ‘Gĩkĩ nĩkĩo kiugo kĩa Jehova,’ na hĩndĩ ĩyo Jehova we mwene ndamatũmĩte, na mageterera kuona kiugo kĩao gĩkĩhinga.+ 7 Na githĩ ti kĩoneki kĩa maheeni mũkoragwo muonete o na mũkaratha ũhoro ũtarĩ wa ma rĩrĩa mũkuuga atĩrĩ, ‘Gĩkĩ nĩkĩo kiugo kĩa Jehova,’ na hĩndĩ ĩyo gũtirĩ ũndũ niĩ njugĩte?”’
8 “‘Nĩ ũndũ ũcio, Jehova Mwathani Ũrĩa Mũnene oigĩte ũũ: “‘Tondũ nĩ mwarĩtie ũhoro ũtarĩ wa ma na cioneki cianyu nĩ cia maheeni-rĩ, nĩ ngũmũũkĩrĩra,’ ũguo nĩguo Jehova Mwathani Ũrĩa Mũnene oigĩte.”+ 9 Guoko gwakwa nĩ gũũkĩrĩire anabii arĩa monaga cioneki cia maheeni na makaratha ũhoro ũtarĩ wa ma.+ Matigaakorũo gatagatĩ-inĩ ka arata akwa a hakuhĩ; o na matikaandĩkwo ibuku-inĩ rĩa nyũmba ya Isiraeli; ningĩ matigaacoka bũrũri-inĩ wa Isiraeli; na nĩ mũkaamenya atĩ niĩ nĩ niĩ Jehova Mwathani Ũrĩa Mũnene.+ 10 Gĩtũmi kĩa maũndũ macio mothe nĩ tondũ nĩ mahĩtithĩtie andũ akwa makoiga atĩrĩ, “Kũrĩ na thayũ!” na hĩndĩ ĩyo gũtirĩ na thayũ.+ Na rĩrĩa gwakwo rũthingo rũtarĩ na hinya rwa kũhakania, makarũhaka coka.’*+
11 “Ĩra acio mahakaga rũthingo coka atĩ nĩ rũkaagwa. Mbura nene nĩ ĩgooka, mbura ya mbembe nĩ ĩkooira,* na ihuhũkanio nene nĩ ikaarũmomora.+ 12 Na rũthingo rũu rwagwa nĩ mũkoorio atĩrĩ: ‘Coka ũrĩa mwahakĩte ũkĩrĩ ha?’+
13 Nĩ ũndũ ũcio, Jehova Mwathani Ũrĩa Mũnene oigĩte ũũ: ‘Nĩ ngaatũma kũgĩe ihuhũkanio nene nĩ ũndũ wa mangʼũrĩ makwa, na kuure mbura nene nĩ ũndũ wa ũrĩa ndakarĩte, na kũgĩe mbura ya mbembe ĩrehe mwanangĩko nĩ ũndũ wa mathũgũta makwa. 14 Nĩ ngaamomora rũthingo rũu mũhakĩte coka na ndĩrũharaganie rũgwe thĩ, na mũthingi waruo ũguũrio. Rĩrĩa itũũra rĩrĩ rĩkaanangwo, mũgaathirĩra thĩinĩ warĩo; na nĩ mũkaamenya atĩ niĩ nĩ niĩ Jehova.’
15 “‘Rĩrĩa ngaaitũrũra biũ mangʼũrĩ makwa harĩ rũthingo rũu na harĩ arĩa maarũhakire coka, nĩ ngaamwĩra atĩrĩ: “Rũthingo rũu rũtirĩ ho, o nao arĩa maarũhakire coka matirĩ ho.+ 16 Anabii a Isiraeli matirĩ ho rĩngĩ, o acio marathagĩra Jerusalemu ũhoro na makamĩonera cioneki cia thayũ, o na gũtarĩ thayũ,”’+ ũguo nĩguo Jehova Mwathani Ũrĩa Mũnene oigĩte.
17 “No wee mũrũ wa mũndũ-rĩ, erekeria ũthiũ waku harĩ airĩtu a andũ anyu arĩa metungagĩra morathi mao, na ũrathe ũhoro wa kũmokĩrĩra. 18 Ũmeere atĩrĩ, ‘Jehova Mwathani Ũrĩa Mũnene oigĩte ũũ: “Kaĩ mũrĩ na haaro-ĩ, inyuĩ atumia arĩa mũtumaga tũmĩkwa twa moko mothe* na mũgathondeka itambaya cia kuohwo mĩtwe ya andũ a mĩthemba yothe nĩguo mũtege mĩoyo ya andũ! Hihi mũtegaga mĩoyo ya andũ akwa na mũkageria kũhonokia mĩoyo yanyu? 19 Hihi mũkũnjambithia harĩ andũ akwa nĩ ũndũ wa ngundi cigana ũna cia cairi na cienyũ cia mĩgate,+ mũkooraga arĩa matagĩrĩire kũũragwo na mũkahonokia arĩa matagĩrĩire gũtũũra muoyo, na mũgekaga ũguo na njĩra ya kũheenia andũ akwa arĩa mathikagĩrĩria maheeni manyu?”’+
20 “Nĩ ũndũ ũcio, Jehova Mwathani Ũrĩa Mũnene oigĩte ũũ: “Nĩ ngookĩrĩra tũmĩkwa twanyu, inyuĩ atumia aya, o tũu mũhũthagĩra gũtega andũ ta marĩ nyoni, na nĩ ngaatua tũmĩkwa tũu kuuma moko-inĩ manyu na ndekererie acio mũratega ta nyoni. 21 Nĩ ngaatembũranga itambaya cianyu na honokie andũ akwa kuuma guoko-inĩ kwanyu, na matigaacoka gũtuĩka kĩndũ kĩanyu gĩa gũtega rĩngĩ; na nĩ mũkaamenya atĩ niĩ nĩ niĩ Jehova.+ 22 Nĩ gũkorũo nĩ mũtũmĩte mũndũ ũrĩa mũthingu orũo nĩ hinya nĩ ũndũ wa maheeni manyu+ o na gũtuĩka niĩ ndiareheire mũndũ ũcio mĩtangĩko,* na nĩ mwĩkĩrĩte hinya moko ma ũrĩa mwaganu+ nĩgetha ndagatigane na mĩthiĩre yake mĩũru, atũũre muoyo.+ 23 Nĩ ũndũ ũcio, inyuĩ atumia mũtigaacoka kuona cioneki cia maheeni kana mũragũrie;+ na nĩ ngaahonokia andũ akwa kuuma guoko-inĩ kwanyu, na nĩ mũkaamenya atĩ niĩ nĩ niĩ Jehova.’”