Athamaki wa Mbere

16 Thutha ũcio uuge wa Jehova kwerekera Baasha ũgĩũka kũrĩ Jehu+ mũrũ wa Hanani,+ akiuga atĩrĩ: 2 “Ndakwarahũrire kuuma rũkũngũ-inĩ na ngĩgũtua mũtongoria wa gũtongoragia andũ akwa Isiraeli,+ ĩndĩ ũgĩthiĩ na mbere kũrũmĩrĩra mĩthiĩre ya Jeroboamu na ũgĩtũma andũ akwa Isiraeli mehie nginya makĩndakaria nĩ ũndũ wa mehia mao.+ 3 Nĩ ũndũ ũcio nĩ ngaahaata Baasha na nyũmba yake biũ, na ngaatua nyũmba yake o ta nyũmba ya Jeroboamu+ mũrũ wa Nebati. 4 Mũndũ o wothe wa Baasha ũgaakuĩra itũũra-inĩ, akaarĩo nĩ ngui; na mũndũ o wothe wake ũgaakuĩra werũ-inĩ akaarĩo nĩ nyoni cia rĩera-inĩ.”

5 Ha ũhoro wa maũndũ macio mangĩ megiĩ Baasha, ũrĩa eekire o na hinya wake, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli? 6 Thutha ũcio Baasha akĩhurũkio hamwe na maithe make ma tene na agĩthikwo Tiriza;+ na mũrũwe Ela agĩtuĩka mũthamaki ithenya rĩake. 7 Ningĩ uuge wa Jehova ũgĩũka kwerekera Baasha na nyũmba yake, kũgerera mũnabii Jehu mũrũ wa Hanani, nĩ tondũ wa maũndũ mothe moru marĩa eekire maitho-inĩ ma Jehova akĩmũrakaria kũgerera wĩra wa moko make, akĩhaana o ta nyũmba ya Jeroboamu, na ningĩ nĩ tondũ wa kũmũũraga.*+

8 Mwaka-inĩ wa 26 wa Mũthamaki Asa wa Juda, Ela mũrũ wa Baasha agĩtuĩka mũthamaki wa Isiraeli thĩinĩ wa Tiriza, na aathanire mĩaka ĩĩrĩ. 9 Zimuri ndungata yake, mũnene wa nuthu ya mbũtũ yake ya ngaari cia mbarathi, akĩbanga njama ya kũmũũkĩrĩra rĩrĩa aarĩ Tiriza akĩnyua na arĩ mũrĩĩu nyũmba-inĩ ya Ariza, ũrĩa warũgamagĩrĩra andũ a nyũmba yake kũu Tiriza. 10 Zimuri aatonyire akĩmũtharĩkĩra+ na akĩmũũraga mwaka-inĩ wa 27 wa Mũthamaki Asa wa Juda, na agĩtuĩka mũthamaki ithenya rĩake. 11 Hĩndĩ ĩrĩa aatuĩkire mũthamaki, rĩrĩa aaikarĩire gĩtĩ gĩake kĩa ũnene, o rĩo akĩniina nyũmba yothe ya Baasha. Ndaigana kũhonokia mũndũrũme o na ũmwe,* harĩ andũ arĩa meetainwo nake* kana harĩ arata ake. 12 Nĩ ũndũ ũcio Zimuri akĩniina nyũmba yothe ya Baasha, kũringana na uuge wa Jehova ũrĩa aarĩtie kwerekera Baasha kũgerera mũnabii Jehu.+ 13 Gwathiire ũguo nĩ ũndũ wa mehia marĩa mothe Baasha na mũrũwe Ela meekĩte, na mehia marĩa o maatũmire andũ a Isiraeli mehie na njĩra ya kũrakaria Jehova Ngai wa Isiraeli nĩ ũndũ wa mĩhianano yao ĩtarĩ kĩene.+ 14 Ha ũhoro wa maũndũ macio mangĩ megiĩ Ela, ũrĩa wothe eekire, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli?

15 Mwaka-inĩ wa 27 wa Mũthamaki Asa wa Juda, Zimuri agĩtuĩka mũthamaki thikũ mũgwanja thĩinĩ wa Tiriza rĩrĩa thigari ciaambĩte hema nĩgetha ciũkĩrĩre itũũra rĩa Gibethoni+ rĩrĩa rĩarĩ rĩa Afilisti. 16 Thutha wa ihinda thigari icio ciaambĩte hema ikĩigua gũkĩrũo atĩrĩ: “Zimuri nĩ abangĩte njama na ningĩ nĩ oragĩte mũthamaki.” Nĩ ũndũ ũcio, mũthenya ũcio andũ othe a Isiraeli magĩtua Omuri,+ mũnene wa mbũtũ, mũthamaki wa Isiraeli marĩ kũu kambĩ-inĩ. 17 Omuri na andũ othe a Isiraeli arĩa maarĩ hamwe nake makĩambata kuuma Gibethoni magĩthiĩ makĩrigicĩria itũũra rĩa Tiriza. 18 Rĩrĩa Zimuri oonire atĩ itũũra rĩu nĩ rĩatunyanwo, agĩthiĩ agĩtonya nyũmba-inĩ ndaya na igũrũ ĩrĩ na ũgitĩri thĩinĩ wa nyũmba ya mũthamaki na akĩmĩcina arĩ kũu thĩinĩ, na agĩkua.+ 19 Gwathiire ũguo nĩ tondũ wa mehia make marĩa eekĩte na njĩra ya gwĩka maũndũ moru maitho-inĩ ma Jehova nĩ ũndũ wa kũrũmĩrĩra mĩthiĩre ya Jeroboamu na nĩ ũndũ wa mehia marĩa aatũmire andũ a Isiraeli mehie.+ 20 Ha ũhoro wa maũndũ macio mangĩ megiĩ Zimuri na njama yake, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli?

21 Hĩndĩ ĩyo nĩrĩo andũ a Isiraeli maagayũkanire ikundi igĩrĩ. Gĩkundi kĩmwe kĩa andũ acio gĩgĩtuĩka arũmĩrĩri a Tibini mũrũ wa Ginathu, na meendaga kũmũtua mũthamaki, nakĩo gĩkundi kĩu kĩngĩ gĩkĩrũmĩrĩra Omuri. 22 No andũ arĩa maarũmagĩrĩra Omuri magĩtooria andũ arĩa maarũmagĩrĩra Tibini mũrũ wa Ginathu. Nĩ ũndũ ũcio Tibini agĩkua, nake Omuri agĩtuĩka mũthamaki.

23 Mwaka-inĩ wa 31 wa Mũthamaki Asa wa Juda, Omuri agĩtuĩka mũthamaki wa Isiraeli, na aathanire mĩaka 12. Thĩinĩ wa Tiriza aathanire mĩaka ĩtandatũ. 24 Akĩgũra kĩrĩma gĩa Samaria kuuma kũrĩ Shemeri na taranda* igĩrĩ cia betha, na agĩaka itũũra kĩrĩma-inĩ kĩu. Na itũũra rĩu aakire akĩrĩĩta Samaria,*+ akĩrĩĩtania na Shemeri mwene* kĩrĩma kĩu. 25 Omuri agĩthiĩ na mbere gwĩka maũndũ moru maitho-inĩ ma Jehova, na aarĩ mũũru gũkĩra arĩa othe maarĩ mbere yake.+ 26 Akĩrũmĩrĩra mĩthiĩre yothe ya Jeroboamu mũrũ wa Nebati na mehia marĩa aatũmire andũ a Isiraeli mehie na njĩra ya kũrakaria Jehova Ngai wa Isiraeli nĩ ũndũ wa mĩhianano yao ĩtarĩ kĩene.+ 27 Ha ũhoro wa maũndũ macio mangĩ megiĩ Omuri, ũrĩa eekire o na ciĩko ciake irĩ hinya, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli? 28 Thutha ũcio Omuri akĩhurũkio hamwe na maithe make ma tene na agĩthikwo Samaria; na mũrũwe Ahabu+ agĩtuĩka mũthamaki ithenya rĩake.

29 Ahabu mũrũ wa Omuri aatuĩkire mũthamaki wa Isiraeli mwaka-inĩ wa 38 wa Mũthamaki Asa wa Juda, na Ahabu mũrũ wa Omuri aathanire Isiraeli thĩinĩ wa Samaria+ mĩaka 22. 30 Ahabu mũrũ wa Omuri aarĩ mũũru maitho-inĩ ma Jehova gũkĩra arĩa othe maarĩ mbere yake.+ 31 Na nĩ ũndũ wa kuona ta arĩ ũndũ mũnini kũrũmĩrĩra mehia ma Jeroboamu+ mũrũ wa Nebati, ningĩ nĩ aahikirie Jezebeli+ mwarĩ wa Ethibaali, mũthamaki wa Asidoni,+ na akĩambĩrĩria gũtungatĩra Baali+ na kũmũinamĩrĩra. 32 Makĩria ma ũguo, agĩakĩra Baali kĩgongona nyũmba-inĩ* ya Baali+ ĩrĩa aakĩte Samaria. 33 Ningĩ Ahabu agĩthondeka mũtĩ wa kũhoywo.*+ Ahabu eekire maũndũ maingĩ ma kũrakaria Jehova Ngai wa Isiraeli gũkĩra athamaki othe a Isiraeli arĩa maarĩ mbere yake.

34 Matukũ-inĩ make, Hieli Mũbetheli nĩ aakire itũũra rĩa Jeriko rĩngĩ. Agĩkĩũrũo nĩ Abiramu irigithathi rĩake nĩ ũndũ wa gwaka mũthingi warĩo, na akĩũrũo nĩ Segubu kĩhinga nda gĩake nĩ ũndũ wa gwaka mĩrango yarĩo, kũringana na uuge wa Jehova kũgerera Joshua mũrũ wa Nuni.+