Athamaki wa Mbere

14 Ihinda-inĩ rĩu, Abija mũrũ wa Jeroboamu akĩrwara. 2 Nĩ ũndũ ũcio Jeroboamu akĩra mũtumia wake ũũ: “Ndagũthaitha, ũkĩra ũthiĩ Shilo na wĩtue nĩgetha matikamenye atĩ wĩ mũtumia wa Jeroboamu. Na atĩrĩrĩ, mũnabii Ahija arĩ kũu. Nĩwe waaririe ũhoro wakwa akiuga atĩ nĩ ngũtuĩka mũthamaki wa andũ aya.+ 3 Kuua mĩgate ikũmi, keki njitĩrĩrie kĩndũ, na ndigithũ ya ũũkĩ, ũthiĩ kũrĩ we. Nake nĩ egũkwĩra ũrĩa gũgũthiĩ harĩ kamwana gaka.”

4 Mũtumia wa Jeroboamu agĩgĩka o ta ũrĩa Jeroboamu aamwĩrire. Agĩũkĩra agĩthiĩ Shilo+ na agĩkinya nyũmba-inĩ ya Ahija. Maitho ma Ahija maaikaraga o marorete mbere, na ndaahotaga kuona nĩ gũkũra.

5 No Jehova nĩ eerĩte Ahija atĩrĩ: “Mũtumia wa Jeroboamu nĩ gũka aroka gũtuĩria ũhoro harĩ we wĩgiĩ mũrũwe, nĩ gũkorũo nĩ mũrwaru. Nĩ ngũkwĩra ũrĩa ũkũmwĩra.* Na rĩrĩa arĩkinya, nĩ egwĩtua nĩgetha ndakamenyeke.”

6 Rĩrĩa Ahija aaiguire mũkubio wa mũtumia ũcio akĩingĩra mũromo-inĩ, akiuga ũũ: “Tonya mũtumia wa Jeroboamu. Nĩ kĩĩ kĩratũma wĩtue nĩgetha ndũkamenyeke? Njĩrĩtwo ngũhe ndũmĩrĩri nditũ. 7 Thiĩ wĩre Jeroboamu atĩrĩ, ‘Ũũ nĩguo Jehova Ngai wa Isiraeli oigĩte: “Ndakwarahũrire kuuma gatagatĩ-inĩ ka andũ anyu nĩgetha ngũtue mũtongoria wa gũtongoragia andũ akwa Isiraeli.+ 8 Ngĩcoka ngĩtembũra ũthamaki kuuma nyũmba-inĩ ya Daudi na ngĩũheana kũrĩ wee.+ No ndũigana gũtuĩka ta ndungata yakwa Daudi, o we ũrĩa warũmagia maathani makwa na akanũmĩrĩra na ngoro yake yothe, agekaga o maũndũ marĩa magĩrĩru maitho-inĩ makwa.+ 9 Ĩndĩ wĩkĩte ũũru gũkĩra arĩa othe maarĩ mbere yaku, na ũgĩĩthondekera ngai ĩngĩ na mĩhianano ya cuma* nĩguo ũndakarie,+ na nĩ niĩ ũhutatĩire.+ 10 Nĩ ũndũ ũcio nĩ ngũrehera nyũmba ya Jeroboamu mwanangĩko, na niine* arũme othe* a Jeroboamu, nginya arĩa matarĩ na ũteithio na arĩa matarĩ hinya thĩinĩ wa Isiraeli, na nĩ ngaahaata nyũmba ya Jeroboamu biũ,+ o ta ũrĩa mũndũ eheragia mai nginya magathira mothe! 11 Mũndũ o wothe wa Jeroboamu ũgaakuĩra itũũra-inĩ, akaarĩo nĩ ngui; na mũndũ o wothe ũgaakuĩra werũ-inĩ, akaarĩo nĩ nyoni cia rĩera-inĩ, nĩ gũkorũo Jehova nĩwe uugĩte ũguo.”’

12 “Rĩu ũkĩra ũthiĩ gwaku mũciĩ. Na hĩndĩ ĩrĩa ũgũkinyithia kũgũrũ gwaku itũũra-inĩ, mwana ũcio no gũkua egũkua. 13 Andũ othe a Isiraeli nĩ mekũmũcakaĩra na mamũthike, nĩ gũkorũo nowe wiki thĩinĩ wa famĩlĩ ya Jeroboamu ũgũthikwo mbĩrĩra-inĩ, tondũ nowe tu wa nyũmba ya Jeroboamu Jehova Ngai wa Isiraeli onete kaũndũ kega thĩinĩ wake. 14 Jehova nĩ akeeyarahũrĩra mũthamaki wa Isiraeli ũrĩa ũkaaniina* nyũmba ya Jeroboamu+ kuuma mũthenya ũcio gũthiĩ na mbere, ĩni, o na nginya rĩu. 15 Jehova agaatharĩkĩra Isiraeli o ta ũrĩa ithanjĩ rĩcũgaga maĩ-inĩ, na akaamunya Isiraeli biũ kuuma bũrũri ũyũ mwega ũrĩa aaheire maithe mao ma tene,+ na amahurunje mũrĩmo wa Rũũĩ,*+ tondũ nĩ maathondekire mĩtĩ yao ya kũhoywo,*+ makĩrakaria Jehova. 16 Na nĩ agaatiganĩria andũ a Isiraeli tondũ wa mehia marĩa Jeroboamu ekĩte na agatũma andũ a Isiraeli mehie.”+

17 Nĩ ũndũ ũcio mũtumia wa Jeroboamu agĩũkĩra na agĩĩthiĩra na agĩkinya Tiriza. Na rĩrĩa aakuhĩrĩirie itonyero-inĩ rĩa nyũmba, kamwana kau gagĩkua. 18 Kwoguo magĩgathika, na andũ othe a Isiraeli magĩgacakaĩra, o ta ũrĩa Jehova ooigĩte kũgerera ndungata yake mũnabii Ahija.

19 Namo maũndũ macio mangĩ megiĩ Jeroboamu, ũrĩa aarũire mbaara+ na ũrĩa aathamakire, mandĩkĩtwo ibuku-inĩ rĩa maũndũ ma mahinda ma athamaki a Isiraeli. 20 Na ihinda rĩrĩa* Jeroboamu aathanire rĩarĩ mĩaka 22, thutha ũcio akĩhurũkio hamwe na maithe make ma tene;+ na mũrũwe Nadabu agĩtuĩka mũthamaki ithenya rĩake.+

21 Ihinda-inĩ o rĩu, Rehoboamu mũrũ wa Suleimani nĩ aatuĩkĩte mũthamaki wa Juda. Rehoboamu aarĩ na mĩaka 41 rĩrĩa aatuĩkire mũthamaki, na agĩthamaka mĩaka 17 thĩinĩ wa Jerusalemu, itũũra rĩrĩa Jehova aathuurĩte+ kuuma mĩhĩrĩga-inĩ yothe ya Isiraeli rĩtuĩke handũ ha kũiga rĩĩtwa rĩake.+ Nyina wa Rehoboamu eetagwo Naama ũrĩa Mũamoni.+ 22 Na andũ a Juda nĩ meekaga maũndũ moru maitho-inĩ ma Jehova,+ na nĩ ũndũ wa mehia marĩa meekire makĩmũrakaria o na gũkĩra ũrĩa maithe mao ma tene maamũrakaririe.+ 23 O nao maaikarire o makĩĩyakagĩra kũndũ gũtũũgĩru, itugĩ cia kũhoywo, mĩtĩ ya kũhoywo*+ karĩma-inĩ o gothe karaihu+ na rungu rwa mũtĩ o wothe mũruru.+ 24 Ningĩ nĩ kwarĩ na arũme arĩa maahũũraga ũmaraya hekarũ-inĩ thĩinĩ wa bũrũri ũcio.+ Meekire maũndũ marĩa mothe marĩ magigi ma ndũrĩrĩ iria Jehova aaingatire ciehere mbere ya Aisiraeli.

25 Mwaka-inĩ wa gatano wa Mũthamaki Rehoboamu, Mũthamaki Shishaka+ wa Misiri akĩambata gũũkĩrĩra Jerusalemu.+ 26 Akĩoya mĩthithũ ya nyũmba ya Jehova na mĩthithũ ya nyũmba ya mũthamaki.+ Akĩoya indo ciothe, nginya ngo ciothe cia thahabu iria Suleimani aathondekete.+ 27 Nĩ ũndũ ũcio Mũthamaki Rehoboamu agĩthondeka ngo cia gĩcango nĩgetha icoke ithenya rĩa icio, na agĩciĩhokera anene a arangĩri,* arĩa maarangagĩra mũromo wa nyũmba ya mũthamaki. 28 Rĩrĩa rĩothe mũthamaki aathiaga nyũmba-inĩ ya Jehova, arangĩri acio maathiaga magacikuua, thutha ũcio magacicokia kanyũmba-inĩ ka arangĩri.

29 Namo maũndũ macio mangĩ megiĩ Rehoboamu, ũrĩa wothe eekire, na githĩ ti maandĩke ibuku-inĩ rĩa maũndũ ma mahinda ma athamaki a Juda?+ 30 Na gwatũire mbaara gatagatĩ-inĩ ka Rehoboamu na Jeroboamu.+ 31 Thutha ũcio Rehoboamu akĩhurũkio hamwe na maithe make ma tene na agĩthikwo hamwe na maithe make ma tene Itũũra-inĩ rĩa Daudi.+ Nyina eetagwo Naama ũrĩa Mũamoni.+ Na mũrũwe Abijamu*+ agĩtuĩka mũthamaki ithenya rĩake.