Ezekieli
11 Ningĩ roho ũkĩnjoya na igũrũ ũkĩndwara kĩhingo-inĩ kĩa mwena wa irathĩro kĩa nyũmba ya Jehova, kĩhingo kĩrĩa kĩrorete irathĩro.+ Na hau itonyero-inĩ rĩa kĩhingo kĩu ngĩona arũme 25, na gatagatĩ-inĩ kao haarĩ Jaazania mũrũ wa Azuri na Pelatia mũrũ wa Benaia, arĩa maarĩ anene a andũ.+ 2 Nake akĩnjĩra atĩrĩ: “Mũrũ wa mũndũ, aya nĩo arũme arĩa marabanga maũndũ moru na makaheana motaaro mahĩtanu thĩinĩ wa* itũũra rĩrĩ. 3 Maroiga atĩrĩ, ‘Githĩ rĩrĩ tirĩo ihinda rĩa gwaka nyũmba?+ Itũũra* nĩrĩo nyũngũ ya kũrugĩra,*+ na ithuĩ nĩ ithuĩ nyama.’
4 “Nĩ ũndũ ũcio-rĩ, ratha ũhoro wa kũmokĩrĩra. Marathĩre, mũrũ wa mũndũ.”+
5 Hĩndĩ ĩyo roho wa Jehova ũgĩũka igũrũ rĩakwa,+ nake Ngai akĩnjĩra ũũ: “Uga atĩrĩ, ‘Jehova oigĩte ũũ: “Ũndũ ũcio muugĩte nĩ wa ma, inyuĩ andũ a nyũmba ya Isiraeli, na nĩ njũĩ ũrĩa mũreciria.* 6 Nĩ mũtũmĩte andũ aingĩ makue thĩinĩ wa itũũra rĩrĩ, na mũgatũma barabara ciarĩo ciyũre andũ akuũ.”’”+ 7 “Nĩ ũndũ ũcio Jehova Mwathani Ũrĩa Mũnene oigĩte ũũ: ‘Ciimba iria mũhurunjĩte thĩinĩ wa itũũra rĩrĩ nĩcio nyama, na itũũra rĩrĩ nĩrĩo nyũngũ ya kũrugĩra.+ No inyuĩ nĩ mũkeherio thĩinĩ warĩo.’”
8 “Jehova Mwathani Ũrĩa Mũnene oigĩte ũũ: ‘Inyuĩ nĩ mwĩtigĩrĩte rũhiũ rwa njora,+ na rũhiũ rũu rwa njora nĩruo ngaamũrehera rũmũũkĩrĩre. 9 Nĩ ngaamũruta thĩinĩ wa itũũra rĩrĩ ndĩmũneane moko-inĩ ma andũ a kũngĩ na ndĩmũherithie.+ 10 Mũkooragwo na rũhiũ rwa njora.+ Ngaamũherithĩria mũhaka-inĩ wa Isiraeli,+ na nĩ mũkaamenya atĩ niĩ nĩ niĩ Jehova.+ 11 Itũũra rĩrĩ rĩtigatuĩka nyũngũ ya kũrugĩra harĩ inyuĩ, na inyuĩ mũtigaakorũo mũrĩ nyama thĩinĩ warĩo; ngaamũherithĩria mũhaka-inĩ wa Isiraeli, 12 na nĩ mũkaamenya atĩ niĩ nĩ niĩ Jehova. Nĩ gũkorũo mũtiarũmĩrĩire mawatho makwa na mũtiahingirie matuĩro makwa,+ no mwekire kũringana na matuĩro ma ndũrĩrĩ iria imũthiũrũrũkĩirie.’”+
13 Rĩrĩa ndarĩkirie kũratha, Pelatia mũrũ wa Benaia agĩkua, na niĩ ngĩĩgũithia ngĩturumithia ũthiũ thĩ na ngĩanĩrĩra na mũgambo mũnene ngiuga ũũ: “Hĩ, atĩrĩrĩ wee Jehova Mwathani Ũrĩa Mũnene! Hihi nĩ ũkũniina arĩa matigarĩte thĩinĩ wa Isiraeli?”+
14 Kiugo kĩa Jehova gĩkĩnginyĩra o rĩngĩ ngĩrũo atĩrĩ: 15 “Mũrũ wa mũndũ, ariũ a ithe wanyu, o acio marĩ na kĩhooto gĩa gũcokia igai rĩanyu, hamwe na nyũmba yothe ya Isiraeli, merĩtwo ũũ nĩ aikari a Jerusalemu: ‘Ikarai haraihu na Jehova. Bũrũri ũyũ nĩ witũ; nĩ tũheetwo ũtuĩke witũ.’ 16 Nĩ ũndũ ũcio meere atĩrĩ: ‘Jehova Mwathani Ũrĩa Mũnene oigĩte ũũ: “O na gũtuĩka nĩ ndĩmatwarĩte kũndũ kũraya gatagatĩ-inĩ ka ndũrĩrĩ na ngamahurunja mabũrũri-inĩ mangĩ,+ gwa kahinda kanini nĩ ngaatuĩka handũ hatheru harĩ o marĩ mabũrũri-inĩ macio mathiĩte.”’+
17 “Nĩ ũndũ ũcio meere atĩrĩ: ‘Jehova Mwathani Ũrĩa Mũnene oigĩte ũũ: “Ningĩ nĩ ngaamũngania kuuma harĩ ikundi icio cia andũ na ndĩmũcokanĩrĩrie kuuma mabũrũri-inĩ marĩa mũhurunjũkĩte, na nĩ ngaamũhe bũrũri wa Isiraeli.+ 18 Na nĩ magaacoka kuo na meherie indo ciothe irĩ magigi kuo, o na mĩtugo yothe ĩrĩ magigi.+ 19 Ningĩ nĩ ngaamahe ngoro ĩrĩ na ũrũmwe,*+ na njĩkĩre roho mwerũ thĩinĩ wao;+ na nĩ ngeeheria ngoro ĩyo nyũmũ ta ihiga kuuma mĩĩrĩ-inĩ yao+ ndĩmahe ngoro njororo ta nyama,*+ 20 nĩgetha marũmagĩrĩre mawatho makwa na makarũmia matuĩro makwa o na makamathĩkĩra. Hĩndĩ ĩyo nĩ magaatuĩka andũ akwa, na niĩ nĩ ngaatuĩka Ngai wao.”’
21 “‘“No arĩa matuĩte na ngoro ciao gũthiĩ na mbere na maũndũ mao marĩ magigi na mĩtugo yao ĩrĩ magigi-rĩ, nĩ ngaamarehera moimĩrĩro ma njĩra yao igũrũ rĩa mũtwe wao,” ũguo nĩguo Jehova Mwathani Ũrĩa Mũnene oigĩte.’”
22 Hĩndĩ ĩyo akerubi makĩambararia mathagu mao, na magũrũ ma ngaari maarĩ hakuhĩ nao,+ naguo riri wa Ngai wa Isiraeli warĩ igũrũ rĩao.+ 23 Ningĩ riri ũcio wa Jehova+ ũkĩambata kuuma itũũra-inĩ rĩu ũgĩthiĩ igũrũ rĩa kĩrĩma kĩrĩa kĩarĩ mwena wa irathĩro wa itũũra rĩu.+ 24 Roho ũgĩcoka ũkĩnjoya na igũrũ kũgerera kĩoneki kĩoimanĩte na roho wa Ngai, ũkĩndwara kũrĩ andũ arĩa maatwarĩtwo ithamĩrio bũrũri wa Kalidei. Kĩoneki kĩu ndonete gĩgĩcoka gĩkĩnjeherera. 25 Na ngĩambĩrĩria kwĩra andũ acio maatwarĩtwo ithamĩrio maũndũ mothe marĩa Jehova aanyonetie.