Athamaki wa Kerĩ

2 Rĩrĩa Jehova aarĩ hakuhĩ kuoya Elija+ amũtware igũrũ* thĩinĩ wa kĩhuhũkanio,+ Elija na Elisha+ nĩ mooimire Giligali.+ 2 Elija akĩra Elisha atĩrĩ: “Ndagũthaitha ũikare gũkũ, tondũ Jehova nĩ andũmĩte thiĩ Betheli.” No Elisha akĩmwĩra: “O ta ũrĩa Jehova atũũraga muoyo na o ta ũrĩa wee ũtũũraga muoyo, ndigũgũtiga.” Nĩ ũndũ ũcio magĩikũrũka magĩthiĩ Betheli.+ 3 Nao ariũ a anabii* kũu Betheli magĩthiĩ kũrĩ Elisha makĩmwĩra atĩrĩ: “Hihi nĩ ũĩ atĩ ũmũthĩ Jehova nĩ ekweheria mwathi waku atige gũtuĩka mũtongoria waku?”+ Nake akĩmeera ũũ: “Nĩ njũĩ ũguo. Mwĩkirĩrei.”

4 Nake Elija akĩmwĩra atĩrĩ: “Elisha, ndagũthaitha ũikare gũkũ, tondũ Jehova nĩ andũmĩte thiĩ Jeriko.”+ No we akĩmwĩra atĩrĩ: “O ta ũrĩa Jehova atũũraga muoyo na o ta ũrĩa wee ũtũũraga muoyo, ndigũgũtiga.” Kwoguo magĩthiĩ Jeriko. 5 Nao ariũ a anabii arĩa maarĩ kũu Jeriko magĩthiĩ kũrĩ Elisha makĩmwĩra atĩrĩ: “Hihi nĩ ũĩ atĩ ũmũthĩ Jehova nĩ ekweheria mwathi waku atige gũtuĩka mũtongoria waku?” Nake akĩmeera ũũ: “Nĩ njũĩ ũguo. Mwĩkirĩrei.”

6 Na rĩrĩ, Elija akĩmwĩra atĩrĩ: “Ndagũthaitha ũikare gũkũ, tondũ Jehova nĩ andũmĩte thiĩ Jorodani.” No we akĩmwĩra atĩrĩ: “O ta ũrĩa Jehova atũũraga muoyo na o ta ũrĩa wee ũtũũraga muoyo, ndigũgũtiga.” Nĩ ũndũ ũcio, eerĩ magĩthiĩ na mbere na rũgendo. 7 Na ariũ 50 a anabii o nao magĩthiĩ makĩrũgama o haraihu meroreire acio erĩ marũgamĩte hakuhĩ na Rũũĩ rwa Jorodani. 8 Nake Elija akĩoya nguo yake*+ akĩmĩkũnja na akĩgũtha maĩ, namo makĩgayũkana mwena wa ũmotho na mwena wa ũrĩo, nao eerĩ makĩringa magereire thĩ nyũmũ.+

9 Na rĩrĩ, marĩkia kũringa, Elija akĩra Elisha atĩrĩ: “Hoya ũndũ ũrĩa ũrenda ngwĩkĩre itaneherio harĩ wee.” Nake Elisha akĩmwĩra: “Hihi no nyamũkĩre icunjĩ igĩrĩ+ cia roho waku?”+ 10 Akĩmũcokeria akĩmwĩra: “Ũndũ ũcio wahoya nĩ mũritũ. Angĩkorũo nĩ ũkũnyona ngĩeherio kuuma harĩ wee, ũndũ ũcio wahoya nĩ ũgwĩkĩka; no angĩkorũo ndũkũnyona, ũndũ ũcio ndũgwĩkĩka.”

11 Na rĩrĩa maathiaga o makĩaragia, o rĩmwe ngaari ya mbarathi yatariĩ ta mwaki, na mbarathi ciatariĩ ta mwaki+ ikĩmatigithũkania eerĩ, na Elija akĩambata igũrũ* thĩinĩ wa kĩhuhũkanio.+ 12 Hĩndĩ ĩyo Elisha eeroragĩra, aakayaga akoiga: “Wũi baba! Wũi baba! Ngaari ya mbarathi ya Isiraeli na atwarithia ake a mbarathi!”+ Rĩrĩa aatigire kũmuona, akĩnyita nguo ciake mwene agĩcitembũra icunjĩ igĩrĩ.+ 13 Thutha ũcio akĩoya nguo*+ ya Elija ĩrĩa yagwĩte kuuma harĩ we na akĩhũndũka, akĩrũgama hũgũrũrũ-inĩ cia Rũũĩ rwa Jorodani. 14 Agĩcoka akĩoya nguo* ya Elija ĩyo yagwĩte kuuma harĩ we akĩgũtha maĩ akiuga ũũ: “Jehova arĩ kũ, o ũcio Ngai wa Elija?” Rĩrĩa aagũthire maĩ macio, makĩgayũkana mwena wa ũmotho na mwena wa ũrĩo, na Elisha akĩringa.+

15 Rĩrĩa ariũ a anabii kũu Jeriko maamuoneire o haraihu, makiuga atĩrĩ: “Roho wa Elija ũrĩ igũrũ rĩa Elisha.”+ Magĩgĩthiĩ kũmũtũnga na makĩinamĩrĩra thĩ mbere yake. 16 Makĩmwĩra atĩrĩ: “Nĩ harĩ andũ 50 marĩ na hinya gatagatĩ-inĩ ka ndungata ciaku. Twagũthaitha ũreke mathiĩ magacarie mwathi waku. No gũkorũo roho wa* Jehova nĩ ũmuoete na igũrũ ũkamũikia kĩrĩma-inĩ kĩmwe kana mũkuru-inĩ ũmwe.+ No we akĩmeera: “Mũtikamatũme.” 17 No o magĩthiĩ na mbere kũmũringĩrĩria nginya agĩconoka, nĩ ũndũ ũcio akĩmeera: “Matũmei.” Nao magĩtũma andũ acio 50, magĩcaria ihinda rĩa thikũ ithatũ no matiamuonire. 18 Rĩrĩa maacokire kũrĩ we, aaikaraga Jeriko.+ Nake akĩmeera atĩrĩ: “Githĩ ndiamwĩrire mũtigathiĩ?”

19 Thutha wa ihinda andũ a itũũra rĩu makĩra Elisha ũũ: “Mwathi wakwa nĩ arona atĩ itũũra rĩrĩ rĩrĩ handũ hega;+ no maĩ ma rĩo nĩ moru, na bũrũri nĩ mũthaatu.”* 20 Nake akiuga: “Ndeherai kabakũri kanini kerũ na mũgekĩre cumbĩ.” Nao makĩmũtwarĩra. 21 Agĩcoka agĩthiĩ harĩa maĩ macio mooimaga na agĩikia cumbĩ thĩinĩ wamo+ akiuga: “Jehova ekuuga atĩrĩ, ‘Nĩ ndahonia maĩ maya. Matigũcoka kũrehe gĩkuũ kana ũhoro wa gũthaata.’”* 22 Na rĩrĩ, maĩ macio nĩ maahonirio nginya ũmũthĩ ũyũ, kũringana na kiugo kĩrĩa kĩaaririo nĩ Elisha.

23 Nake akĩambata kuuma kũu erekeire Betheli. Na rĩrĩa aathiaga njĩra-inĩ, tũmwana tũmwe tũkiuma itũũra-inĩ tũkĩambĩrĩria kũmũnyũrũria+ tũkiugaga atĩrĩ: “Ambata wee kĩhara gĩkĩ! Ambata wee kĩhara gĩkĩ!” 24 Thutha-inĩ akĩĩhũgũra akĩrora tũmwana tũu agĩtũruma na rĩĩtwa rĩa Jehova. Hĩndĩ ĩyo nduba igĩrĩ cia mũgoma+ ikiumĩra mũtitũ-inĩ na igĩtambura ciana 42 harĩ icio tũcunjĩ tũcunjĩ.+ 25 Agĩthiĩ na mbere na rũgendo kuuma kũu erekeire Kĩrĩma-inĩ gĩa Karimeli,+ na kuuma kũu agĩcoka Samaria.