Ezekieli

36 “Nawe mũrũ wa mũndũ-rĩ, ratha ũhoro ũkoniĩ irĩma cia Isiraeli uuge atĩrĩ, ‘Inyuĩ irĩma cia Isiraeli, iguai kiugo kĩa Jehova. 2 Jehova Mwathani Ũrĩa Mũnene oigĩte atĩrĩ: “Thũ yugĩte ũũ igũrũ rĩanyu, ‘Aha! O na kũndũ kũrĩa gũtũũgĩru gwa tene nĩ gũtuĩkĩte gwitũ!’”’+

3 “Nĩ ũndũ ũcio, ratha ũhoro uuge atĩrĩ, ‘Jehova Mwathani Ũrĩa Mũnene oigĩte ũũ: “Tondũ nĩ mamwanangĩte na makamũtharĩkĩra kuuma mĩena yothe, nĩguo mwĩgwatĩrũo nĩ arĩa matigarĩte a ndũrĩrĩ, na andũ maikare makĩaragia ũhoro wanyu makĩmũcambagia-rĩ,+ 4 inyuĩ irĩma cia Isiraeli, iguai kiugo kĩa Jehova Mwathani Ũrĩa Mũnene! Ũũ nĩguo Jehova Mwathani Ũrĩa Mũnene arera irĩma na tũrĩma, tũrũũĩ na mĩkuru, kũndũ kwanangĩku kũrĩa gwatiganĩirio, na matũũra marĩa maatiganĩirio,+ o macio maatahirũo na makĩnyũrũrio nĩ andũ arĩa maatigarire a ndũrĩrĩ iria imathiũrũrũkĩirie;+ 5 Jehova Mwathani Ũrĩa Mũnene arameera atĩrĩ: ‘Kũgerera mwaki wa kĩyo gĩakwa+ nĩ ngwaria ũhoro wa gũũkĩrĩra arĩa maatigarire a ndũrĩrĩ na Edomu yothe, o acio makenaga mũno marĩ na kĩnyũrũri kĩnene+ makiugaga atĩ bũrũri ũcio wakwa nĩ wao, nĩguo maũtunyane na maiye ũrĩithio wakuo.’”’+

6 “Nĩ ũndũ ũcio, ratha ũhoro ũkoniĩ bũrũri wa Isiraeli, na wĩre irĩma na tũrĩma, tũrũũĩ na mĩkuru atĩrĩ, ‘Jehova Mwathani Ũrĩa Mũnene oigĩte ũũ: “Atĩrĩrĩ, ngwaria ndĩ na kĩyo na mangʼũrĩ, tondũ nĩ mũconorithĩtio nĩ ndũrĩrĩ.”’+

7 “Nĩ ũndũ ũcio, Jehova Mwathani Ũrĩa Mũnene oigĩte ũũ: ‘Niĩ mwene nĩ ndoya guoko gwakwa na igũrũ ndehĩta atĩ ndũrĩrĩ iria ithiũrũrũkĩirie o nacio nĩ igaaconorithio.+ 8 No inyuĩ irĩma cia Isiraeli, nĩ mũkaaruta honge na mũgĩe maciaro nĩ ũndũ wa andũ akwa Isiraeli,+ tondũ ica ikuhĩ nĩ megũcoka. 9 Nĩ gũkorũo ndĩ hamwe na inyuĩ, na nĩ ngaamũcokerera, na nĩ mũkaarĩmwo na mũhandwo mbeũ. 10 Nĩ ngaaingĩhia andũ anyu—nyũmba yothe ya Isiraeli, yothe biũ—namo matũũra macio nĩ magaaikarũo,+ nakuo kũndũ kũrĩa kwanangĩku nĩ gũgaakwo rĩngĩ.+ 11 Ti itherũ, nĩ ngaaingĩhia andũ anyu o na mahiũ manyu;+ makaaingĩha na maciarane. Na nĩ ngaatũma mũtũũragwo o ta ũrĩa kwarĩ tene,+ na nĩ ngaatũma mũgaacĩre o na gũkĩra tene;+ na nĩ mũkaamenya atĩ niĩ nĩ niĩ Jehova.+ 12 Nĩ ngaatũma andũ—andũ akwa Isiraeli​—magerere igũrũ rĩanyu, na nĩ makaamwĩgatĩra.+ Mũgaatuĩka igai rĩao, na gũtirĩ hĩndĩ ĩngĩ mũgaatũma maikare matarĩ na ciana.’”+

13 “Jehova Mwathani Ũrĩa Mũnene oigĩte atĩrĩ: ‘Tondũ nĩ maramwĩra ũũ, “Inyuĩ mũrĩ bũrũri ũrĩa ũtamburaga andũ, o na ũgatunya ndũrĩrĩ cianyu ciana,”’ 14 ‘nĩ ũndũ ũcio, mũtigaatambura andũ rĩngĩ o na kana mũtũme ndũrĩrĩ cianyu ciikare itarĩ na ciana,’ ũguo nĩguo Jehova Mwathani Ũrĩa Mũnene ekuuga. 15 ‘Ndikaareka mũrumwo rĩngĩ nĩ ndũrĩrĩ o na kana mũnyũrũrio nĩ andũ,+ na inyuĩ mũtigaacoka gũtũma ndũrĩrĩ cianyu ihĩngĩke,’ ũguo nĩguo Jehova Mwathani Ũrĩa Mũnene ekuuga.”

16 Na rĩrĩ, kiugo kĩa Jehova gĩkĩnginyĩra o rĩngĩ ngĩrũo atĩrĩ: 17 “Mũrũ wa mũndũ, rĩrĩa andũ a nyũmba ya Isiraeli maaikaraga bũrũri wao-rĩ, nĩ maatũmire ũgĩe thahu nĩ ũndũ wa njĩra ciao na ciĩko ciao.+ Niĩ ndonaga njĩra ciao itariĩ ta thahu ũrĩa mũtumia agĩaga naguo ihinda-inĩ rĩake rĩa mweri.+ 18 Kwoguo ngĩmaitũrũrĩra mangʼũrĩ makwa tondũ wa thakame ĩrĩa maaitĩte bũrũri-inĩ+ na tondũ nĩ maathahĩtie bũrũri ũcio na mĩhianano yao ĩrĩ magigi.*+ 19 Ngĩmahurunja ndũrĩrĩ-inĩ na ngĩmaharaganĩria mabũrũri-inĩ.+ Ndamatuĩrĩire kũringana na mĩthiĩre yao na kũringana na ciĩko ciao. 20 No rĩrĩa maathiire ndũrĩrĩ-inĩ icio, andũ nĩ maathahirie rĩĩtwa rĩakwa itheru+ na njĩra ya kuuga ũũ igũrũ rĩao, ‘Aya nĩo andũ a Jehova, ĩndĩ no mũhaka mangĩoimire bũrũri-inĩ wake.’ 21 Nĩ ũndũ ũcio, nĩ ngaarũmbũiya rĩĩtwa rĩakwa itheru, o rĩu rĩathahirio nĩ andũ a nyũmba ya Isiraeli ndũrĩrĩ-inĩ kũrĩa maathiire.”+

22 “Nĩ ũndũ ũcio ĩra nyũmba ya Isiraeli ũũ, ‘Jehova Mwathani Ũrĩa Mũnene oigĩte atĩrĩ: “Ndikuoya ikinya nĩ ũndũ wanyu, inyuĩ nyũmba ya Isiraeli, no nĩ ũndũ wa rĩĩtwa rĩakwa itheru, o rĩu mwathahirie ndũrĩrĩ-inĩ kũu mwathiire.”’+ 23 ‘Hatarĩ nganja nĩ ngaatheria rĩĩtwa rĩakwa inene,+ rĩrĩa rĩathahirio ndũrĩrĩ-inĩ, o rĩu mwathahirie gatagatĩ-inĩ gacio; nacio ndũrĩrĩ nĩ ikaamenya atĩ niĩ nĩ niĩ Jehova+ ndarĩkia gũtherio gatagatĩ-inĩ kanyu ikĩĩyonagĩra,’ ũguo nĩguo Jehova Mwathani Ũrĩa Mũnene ekuuga. 24 Nĩ ngaamũruta ndũrĩrĩ-inĩ na ndĩmũcokanĩrĩrie hamwe ndĩmũcokie kuuma mabũrũri-inĩ mothe ndĩmũtware bũrũri-inĩ wanyu.+ 25 Nĩ ngaamũminjaminjĩria maĩ matheru, na nĩ mũgaathera;+ ngaamũtheria thahu wanyu wothe+ na ndĩmũtherie kuumana na mĩhianano ĩyo yanyu yothe ĩrĩ magigi.+ 26 Nĩ ngaamũhe ngoro njerũ+ na njĩkĩre roho mwerũ thĩinĩ wanyu.+ Nĩ ngeeheria ngoro ĩyo nyũmũ ta ihiga+ kuuma mwĩrĩ-inĩ wanyu ndĩmũhe ngoro njororo ta nyama.* 27 Nĩ ngeekĩra roho wakwa thĩinĩ wanyu, na ndũme mũrũmagĩrĩre mawatho makwa,+ na inyuĩ nĩ mũgaathĩkagĩra matuĩro makwa ma ciira na mũkamahingia. 28 Hĩndĩ ĩyo nĩ mũgaatũũra bũrũri-inĩ ũrĩa ndaheire maithe manyu ma tene, na nĩ mũgaatuĩka andũ akwa, na niĩ nduĩke Ngai wanyu.’+

29 “‘Nĩ ngaamũhonokia kuumana na thahu wanyu wothe na njĩte ngano* ndũme ĩingĩhe, na ndikaamũrehera ngʼaragu.+ 30 Nĩ ngaatũma maciaro ma mũtĩ na maciaro ma mũgũnda maingĩhe, nĩgetha mũtikanaconorithio rĩngĩ ndũrĩrĩ-inĩ nĩ ũndũ wa gũkorũo na ngʼaragu.+ 31 Hĩndĩ ĩyo nĩ mũkaaririkana njĩra cianyu njũru na ciĩko cianyu iria itaarĩ njega, na mwĩthũũre nĩ ũndũ wa mahĩtia manyu na mĩtugo yanyu ĩrĩ magigi.+ 32 No menyai ũndũ ũyũ: Ndireka ũguo nĩ ũndũ wanyu,’+ ũguo nĩguo Jehova Mwathani Ũrĩa Mũnene ekuuga. ‘Ithenya rĩa ũguo, iguai thoni na mũconoke nĩ ũndũ wa njĩra cianyu, inyuĩ nyũmba ya Isiraeli.’

33 “Jehova Mwathani Ũrĩa Mũnene oigĩte ũũ: ‘Mũthenya ũrĩa ngaamũtheria kuumana na mahĩtia manyu mothe, nĩ ngaatũma matũũra manyu maikaragwo,+ nakuo kũndũ kũrĩa kwanangĩku gwakwo rĩngĩ.+ 34 Bũrũri mũtiganĩrie ũrĩa warĩ mũtiganĩrie nĩguo wonagwo nĩ mwĩhĩtũkĩri o wothe nĩ ũkaarĩmwo. 35 Nao andũ nĩ makoiga atĩrĩ: “Bũrũri ũrĩa warĩ mũtiganĩrie ũtuĩkĩte o ta mũgũnda wa Edeni,+ namo matũũra marĩa maarĩ manangĩku, magatiganĩrio na makamomorũo, rĩu marĩ na ũgitĩri na nĩ maratũũrũo.”+ 36 Nacio ndũrĩrĩ iria itigarĩte, o icio imũthiũrũrũkĩirie nĩ ikaamenya atĩ niĩ mwene, Jehova, nĩ njakĩte kũrĩa kwamomoretwo, o na ngahanda kũrĩa gwatiganĩirio. Niĩ mwene, Jehova, nĩ njarĩtie na ngeka ũndũ ũcio.’+

37 “Jehova Mwathani Ũrĩa Mũnene ekuuga ũũ: ‘Ningĩ nĩ ngeetĩkĩria andũ a nyũmba ya Isiraeli manjũrie ndĩmekĩre ũndũ ũyũ: Nĩ ngaatũma andũ ao maingĩhe o ta rũũru. 38 O ta rũũru rwa arĩa aamũre, ta rũũru rwa Jerusalemu* hĩndĩ ya ciathĩ ciakuo,+ ũguo noguo matũũra marĩa maarĩ manangĩku makaaiyũra ndũũru cia andũ;+ na nĩ makaamenya atĩ niĩ nĩ niĩ Jehova.’”