Marũa ma Mbere Kũrĩ Athesalonike
2 Ariũ a Ithe witũ, inyuĩ ene nĩ mũĩ wega atĩ, iceera ritũ kwanyu rĩarĩ na moimĩrĩro.+ 2 Tondũ o na gũtuĩka rĩrĩa twarĩ Filipi nĩ twambire kũnyarirũo na kwagĩrũo gĩtĩo-rĩ,+ o ta ũrĩa mũĩ, kũgerera ũteithio wa Ngai witũ nĩ twagĩire na ũcamba* wa kũmũhunjĩria ũhoro ũrĩa mwega wa Ngai+ o na kũrĩ na ũkararia mũingĩ.* 3 Nĩ gũkorũo ũtaaro ũrĩa tũheanaga nduumanĩte na ihĩtia kana ũndũ ũtarĩ mũtheru kana maheeni, 4 no o ta ũrĩa Ngai atwĩtĩkĩrĩte agatwĩhokera ũhoro ũrĩa mwega, tũtiaragia tũkenie andũ, ĩndĩ twaragia nĩguo tũkenie Ngai, o we ũthuthuragia ngoro citũ.+
5 Atĩrĩrĩ, nĩ mũĩ atĩ tũtirĩ twahũthĩra mĩario ya kĩgaathi kana tũgĩĩtua tũrĩ na muoroto wa kwĩguna;+ Ngai nĩ mũira! 6 Ningĩ tũtiĩcaragĩria riri kuuma kũrĩ andũ, harĩ inyuĩ o na kana harĩ andũ angĩ, o na gũtuĩka no tũtuĩke mũrigo mũritũ harĩ inyuĩ tũrĩ atũmwo a Kristo.+ 7 Handũ ha ũguo, twatuĩkire ahooreri tũrĩ gatagatĩ-inĩ kanyu, o ta ũrĩa mũtumia ũrongithia arũmbũyagia* ciana ciake na wororo. 8 Nĩ ũndũ ũcio, tondũ wa wendo witũ muororo kũmwerekera, twehotorete* kũmũhe, to ũhoro ũrĩa mwega wa Ngai ĩndĩ nĩ nginya mĩoyo itũ,+ nĩ gũkorũo nĩ twamwendire mũno.+
9 Ti itherũ ariũ a Ithe witũ nĩ mũraririkana wĩra witũ mũritũ na wa mĩnoga. Twarutaga wĩra ũtukũ na mũthenya, nĩguo tũtigatuĩke mũrigo mũritũ harĩ mũndũ o na ũmwe wanyu+ tũkĩmũhunjĩria ũhoro ũrĩa mwega wa Ngai. 10 Inyuĩ mũrĩ aira, o nake Ngai nĩ mũira, wa ũrĩa twarĩ ehokeku na athingu na tũtaarĩ na ũcuke kũmwerekera inyuĩ mwĩtĩkĩtie. 11 Nĩ mũĩ wega atĩ twaikaraga tũkĩmũtaaraga na tũkĩmũũmagĩrĩria, na tũkĩrutagĩra o ũmwe wanyu ũira,+ o ta ũrĩa ithe wa ciana+ ekaga ciana ciake, 12 nĩguo mũtũũre mũthiaga na mĩthiĩre ĩrĩa yaganĩrĩire na Ngai,+ o we ũramwĩta harĩ Ũthamaki+ na riri wake.+
13 Ningĩ nĩkĩo tũcokagĩria Ngai ngatho tũtegũtigithĩria,+ tondũ rĩrĩa mwaamũkĩrire kiugo kĩa Ngai, kĩrĩa mwaiguire kuuma kũrĩ ithuĩ, mũtiagĩtĩkĩrire ta arĩ kiugo kĩa andũ, ĩndĩ mwagĩtĩkĩrire o ta ũrĩa gĩtariĩ na ma, kĩrĩ kiugo kĩa Ngai, kĩrĩa kĩrutaga wĩra thĩinĩ wanyu inyuĩ etĩkia. 14 Nĩ gũkorũo inyuĩ ariũ a Ithe witũ, nĩ mwatuĩkire a kwĩgerekania na ciũngano cia Ngai iria irĩ ũiguano na Kristo Jesu thĩinĩ wa Judea, tondũ nĩ mwanyamarĩkire moko-inĩ ma andũ a bũrũri wanyu+ na maũndũ o marĩa nao maranyamarĩka namo moko-inĩ ma Ayahudi, 15 arĩa mooragire nginya Mwathani Jesu+ na anabii na magĩtũnyarira.+ Makĩria ma ũguo-rĩ, matikenagia Ngai, ĩndĩ mareganaga na maũndũ marĩa magunaga andũ othe, 16 makĩgeragia gũtũgiria kwarĩria andũ a ndũrĩrĩ nĩguo mahonokio.+ Na njĩra ĩyo hĩndĩ ciothe nĩ maiyũragia gĩthimi kĩa mehia mao. No rĩu mangʼũrĩ make nĩ mamakinyĩire.+
17 No rĩrĩa twatigithanĩtio na* inyuĩ ariũ a Ithe witũ gwa kahinda kanini (mĩĩrĩ, no ti ngoro), nĩ ũndũ wa wendi witũ mũnene-rĩ, nĩ twerutanĩirie ũrĩa wothe tũngĩahotire nĩguo tũmuone ũthiũ kwa ũthiũ.* 18 Na nĩ ũndũ ũcio nĩ tweendaga gũka kũrĩ inyuĩ, na niĩ Paulo, ngĩgeria gũka, na ti riita rĩmwe no nĩ merĩ; no Shaitani agĩtũhingĩra njĩra. 19 Tondũ-rĩ, kaĩ kĩĩrĩgĩrĩro gitũ arĩ kĩrĩkũ, kana gĩkeno kana thũmbĩ itũ ya gĩkeno tũrĩ mbere ya Mwathani Jesu hĩndĩ ya gũkorũo kuo gwake? Na githĩ ti inyuĩ?+ 20 Inyuĩ kũna nĩ inyuĩ riri na gĩkeno gitũ.