Ezekieli
25 Kiugo kĩa Jehova gĩkĩnginyĩra o rĩngĩ ngĩrũo atĩrĩ: 2 “Mũrũ wa mũndũ, erekeria ũthiũ waku harĩ Aamoni,+ ũrathe ũhoro wa kũmokĩrĩra.+ 3 Uuge ũũ ũhoro-inĩ wĩgiĩ Aamoni, ‘Iguai kiugo kĩa Jehova Mwathani Ũrĩa Mũnene. Jehova Mwathani Ũrĩa Mũnene oigĩte ũũ: “Tondũ nĩ woigire ‘Aha!’ kwerekera handũ hakwa harĩa hatheru rĩrĩa haathahirio, na kwerekera bũrũri wa Isiraeli rĩrĩa watuĩkire kũndũ gũtiganĩrie, na kwerekera nyũmba ya Juda rĩrĩa maatwarirũo ithamĩrio-rĩ, 4 nĩ ndĩrakũneana kũrĩ andũ a mwena wa Irathĩro ũtuĩke kĩndũ kĩao. Nao nĩ magaaka kambĩ ciao* thĩinĩ waku na mambe hema gatagatĩ-inĩ gaku. Makaarĩaga maciaro maku, na makanyua iria rĩaku. 5 Nĩ ngaatũma Raba+ gũtuĩke kũndũ gwa kũrĩithio ngamĩra, naguo bũrũri wa Aamoni ũtuĩke kũndũ gwa kũhurũkwo nĩ ndũũru; na nĩ mũkaamenya atĩ niĩ nĩ niĩ Jehova.”’”
6 “Nĩ gũkorũo Jehova Mwathani Ũrĩa Mũnene oigĩte ũũ: ‘Tondũ nĩ wahũũrire hĩ+ na ũkĩringithia magũrũ maku na ũgĩkenerera bũrũri wa Isiraeli ũrĩ na kĩnyũrũri kĩnene-rĩ,+ 7 nĩ ngaatambũrũkia guoko gwakwa ngũũkĩrĩre ngũneane kũrĩ ndũrĩrĩ nĩguo ũtuĩke kĩndũ gĩa gũtahwo. Nĩ ngaakũniina ngweherie kũrĩ ikundi cia andũ na ngwanange wehere mabũrũri-inĩ.+ Nĩ ngaakũniina, na nĩ ũkaamenya atĩ niĩ nĩ niĩ Jehova.’
8 “Jehova Mwathani Ũrĩa Mũnene oigĩte atĩrĩ: ‘Tondũ Moabi+ na Seiru+ moigĩte ũũ, “Atĩrĩrĩ, nyũmba ya Juda ĩtariĩ o ta ndũrĩrĩ iria ingĩ,” 9 nĩ ngũtũma matũũra marĩa marĩ mũhaka-inĩ wa Moabi mage ũgitĩri, o hamwe na matũũra makuo marĩa mathaka,* na nĩmo Bethi-jeshimothu, Baali-meoni, o na Kiriathaimu.+ 10 Nĩ ngaaneana Amoabi o hamwe na Aamoni matuĩke indo cia andũ a mwena wa Irathĩro,+ nĩguo Aamoni matikanacoke kũririkanwo ndũrĩrĩ-inĩ.+ 11 Na nĩ ngaatuĩra Moabi,+ na nĩ makaamenya atĩ niĩ nĩ niĩ Jehova.’
12 “Jehova Mwathani Ũrĩa Mũnene oigĩte ũũ: ‘Andũ a Edomu nĩ merĩhĩirie harĩ nyũmba ya Juda, na makagĩa na ihĩtia inene nĩ ũndũ wa kwĩrĩhĩria;+ 13 nĩ ũndũ ũcio, Jehova Mwathani Ũrĩa Mũnene oigĩte ũũ: “Ningĩ nĩ ngaatambũrũkia guoko gwakwa njũkĩrĩre Edomu na niine andũ a kuo o hamwe na mahiũ, na nĩ ngaatũma gũtuĩke kũndũ gũtiganĩrie.+ Kuuma Temani o nginya Dedani, nĩ makooragwo na rũhiũ rwa njora.+ 14 ‘Nĩ ngeerĩhĩria harĩ Edomu kũgerera guoko kwa andũ akwa Isiraeli.+ Nao nĩ magaaitũrũra marakara na mathũgũta makwa harĩ Edomu, nĩguo mone ũrĩa niĩ ndĩĩrĩhagĩria,’+ ũguo nĩguo Jehova Mwathani Ũrĩa Mũnene oigĩte.”’
15 “Jehova Mwathani Ũrĩa Mũnene oigĩte ũũ: ‘Afilisti nĩ merutanĩirie kwĩrĩhĩria na kũrehe mwanangĩko marĩ na ũũru ngoro-inĩ tondũ wa rũthũũro rwao rũnene.+ 16 Nĩ ũndũ ũcio, Jehova Mwathani Ũrĩa Mũnene oigĩte ũũ: “Nĩ ngaatambũrũkia guoko gwakwa njũkĩrĩre Afilisti,+ na nĩ ngaaniina Akerethi+ na nyanange aikari a gĩcũa-inĩ arĩa matigarĩte.+ 17 Nĩ ngaamarehera maũndũ manene ma kwĩrĩhĩria ndĩmaherithie ndĩ na marakara, na nĩ makaamenya atĩ niĩ nĩ niĩ Jehova ndamarehera maũndũ macio ma kwĩrĩhĩria.”’”