EZARA
1 Nĩguo kiugo kĩa Jehova kĩrĩa kĩaaririo nĩ Jeremia+ kĩhingio, mwaka-inĩ wa mbere wa Mũthamaki Kurusu+ wa Perisia, Jehova nĩ aarahũrire roho wa Mũthamaki Kurusu wa Perisia nĩguo amenyithanie ũhoro kũndũ guothe ũthamaki-inĩ wake, ũrĩa ningĩ aandĩkire,+ akiuga atĩrĩ:
2 “Ũũ nĩguo Mũthamaki Kurusu wa Perisia ekuuga, ‘Jehova Ngai wa igũrũ nĩ aheete mothamaki mothe ma thĩ,+ na nĩ anjathĩte ndĩmwakĩre nyũmba thĩinĩ wa Jerusalemu,+ ĩrĩa ĩrĩ Juda. 3 Mũndũ wothe ũrĩ gatagatĩ-inĩ kanyu inyuĩ andũ ake othe, Ngai wake arokorũo hamwe nake, nĩ ambate Jerusalemu, ĩrĩa ĩrĩ Juda, nĩguo agaake rĩngĩ nyũmba ya Jehova Ngai wa Isiraeli, Ngai ũrĩa wa ma o ũcio nyũmba yake yarĩ Jerusalemu.* 4 Mũndũ o wothe ũtũũraga arĩ mũgeni,+ o harĩa hothe angĩkorũo arĩ, nĩ ateithio nĩ arĩa mariganĩtie nake* mamũhe betha na thahabu, indo na mahiũ, o hamwe na magongona ma kwĩyendera nĩ ũndũ wa nyũmba ya Ngai ũrĩa wa ma,+ ĩrĩa yarĩ Jerusalemu.’”
5 Nao arĩa maarĩ atongoria a nyũmba cia maithe ma Juda na Benjamini na athĩnjĩri-Ngai na Alawii—mũndũ wothe roho wake waarahũrirũo nĩ Ngai—makĩĩhaarĩria kwambata gũthiĩ gwaka rĩngĩ nyũmba ya Jehova, ĩrĩa yarĩ Jerusalemu. 6 Arĩa othe maamathiũrũrũkĩirie makĩmanyita mbaru na njĩra ya kũmahe* indo cia betha na thahabu, iheo, mahiũ, na indo ingĩ cia goro, o hamwe na magongona mothe ma kwĩyendera.
7 Ningĩ Mũthamaki Kurusu akĩruta indo cia nyũmba ya Jehova iria Nebukadineza aakuuĩte kuuma Jerusalemu agaciiga nyũmba-inĩ ya ngai yake.+ 8 Mũthamaki Kurusu wa Perisia agĩciruta irũgamĩrĩirũo nĩ Mithiredathu mũigi kĩgĩna, ũrĩa wacitarire na agĩcineana kũrĩ Sheshibaza*+ mũtongoria wa Juda.
9 Na rĩrĩ, indo icio ciatarũo ciarĩ: Ikabu 30 cia thahabu, ikabu 1,000 cia betha, indo ingĩ 29, 10 tũbakũri 30 twa thahabu, tũbakũri 410 twa betha, na indo ingĩ 1,000. 11 Indo ciothe cia thahabu na cia betha ciarĩ 5,400. Nake Sheshibaza agĩciambatia ciothe rĩrĩa andũ arĩa maarĩ ithamĩrio-inĩ+ maarutirũo Babuloni magĩcoka Jerusalemu.
2 Na rĩrĩ, aya nĩo andũ a gĩcigo kĩa bũrũri arĩa mooimire harĩ andũ arĩa maarĩ ithamĩrio,+ arĩa maatwarĩtwo ithamĩrio Babuloni nĩ Mũthamaki Nebukadineza wa Babuloni+ na nĩo thutha-inĩ maacokire Jerusalemu na Juda, o mũndũ agĩcoka itũũra rĩake,+ 2 arĩa mookire hamwe na Zerubabeli,+ Jeshua,+ Nehemia, Seraia, Reelaia, Moridekai, Bilishani, Misipari, Bigivai, Rehumu, na Baana.
Ũyũ nĩguo warĩ mũigana wa arũme Aisiraeli:+ 3 ariũ a Paroshu, 2,172; 4 ariũ a Shefatia, 372; 5 ariũ a Ara,+ 775; 6 ariũ a Pahathu-moabi,+ arĩa maarĩ a ariũ a Jeshua na Joabu, 2,812; 7 ariũ a Elamu,+ 1,254; 8 ariũ a Zatu,+ 945; 9 ariũ a Zakai, 760; 10 ariũ a Bani, 642; 11 ariũ a Bebai, 623; 12 ariũ a Azigadi, 1,222; 13 ariũ a Adonikamu, 666; 14 ariũ a Bigivai, 2,056; 15 ariũ a Adini, 454; 16 ariũ a Ateri, wa Hezekia, 98; 17 ariũ a Bezai, 323; 18 ariũ a Jora, 112; 19 ariũ a Hashumu,+ 223; 20 ariũ a Gibari, 95; 21 ariũ a Bethilehemu, 123; 22 arũme a Netofa, 56; 23 arũme a Anathothi,+ 128; 24 ariũ a Azamavethu, 42; 25 ariũ a Kiriathu-jearimu, Kefira, na Beerothu, 743; 26 ariũ a Rama+ na Geba,+ 621; 27 arũme a Mikimasi, 122; 28 arũme a Betheli na Ai,+ 223; 29 ariũ a Nebo,+ 52; 30 ariũ a Magibishi, 156; 31 ariũ a Elamu ũcio ũngĩ, 1,254; 32 ariũ a Harimu, 320; 33 ariũ a Lodi, Hadidi, na Ono, 725; 34 ariũ a Jeriko, 345; 35 ariũ a Senaa, 3,630.
36 Athĩnjĩri-Ngai maarĩ:+ ariũ a Jedaia+ wa nyũmba ya Jeshua,+ 973; 37 ariũ a Imeri,+ 1,052; 38 ariũ a Pashuru,+ 1,247; 39 ariũ a Harimu,+ 1,017.
40 Alawii maarĩ:+ ariũ a Jeshua na Kadimieli,+ arĩa maarĩ a ariũ a Hodavia, 74. 41 Aini maarĩ:+ ariũ a Asafu,+ 128. 42 Ariũ a arangĩri a ihingo maarĩ:+ ariũ a Shalumu, ariũ a Ateri, ariũ a Talimoni,+ ariũ a Akubu,+ ariũ a Hatita, ariũ a Shobai, othe maarĩ 139.
43 Ndungata cia hekarũ ciarĩ:*+ ariũ a Ziha, ariũ a Hasufa, ariũ a Tabaothu, 44 ariũ a Keroso, ariũ a Siaha, ariũ a Padoni, 45 ariũ a Lebana, ariũ a Hagaba, ariũ a Akubu, 46 ariũ a Hagabu, ariũ a Salimai, ariũ a Hanani, 47 ariũ a Gideli, ariũ a Gahari, ariũ a Reaia, 48 ariũ a Rezini, ariũ a Nekoda, ariũ a Gazamu, 49 ariũ a Uza, ariũ a Pasea, ariũ a Besai, 50 ariũ a Asina, ariũ a Meunimu, ariũ a Nefusimu, 51 ariũ a Bakabuku, ariũ a Hakufa, ariũ a Harihuru, 52 ariũ a Baziluthu, ariũ a Mehida, ariũ a Harasha, 53 ariũ a Barikosi, ariũ a Sisera, ariũ a Tema, 54 ariũ a Nezia, ariũ a Hatifa.
55 Ariũ a ndungata cia Suleimani maarĩ: ariũ a Sotai, ariũ a Soferethu, ariũ a Peruda,+ 56 ariũ a Jaala, ariũ a Darikoni, ariũ a Gideli, 57 ariũ a Shefatia, ariũ a Hatili, ariũ a Pokerethu-hazebaimu, ariũ a Ami.
58 Ndungata ciothe cia hekarũ* o hamwe na ariũ a ndungata cia Suleimani maarĩ 392.
59 Nao aya nĩo maambatire kuuma Teli-mela, Teli-harasha, Kerubu, Adoni, na Imeri, no matiahotire kuonania nyũmba ya maithe mao na kĩhumo kĩao, nĩguo kũmenyeke kana maarĩ Aisiraeli:+ 60 ariũ a Delaia, ariũ a Tobia, ariũ a Nekoda, 652. 61 Na harĩ ariũ a athĩnjĩri-Ngai: ariũ a Habaia, ariũ a Hakozu,+ ariũ a Barizilai, ũrĩa wahikirie mũtumia kuuma harĩ airĩtu a Barizilai+ ũrĩa Mũgileadi na agĩĩtanio na rĩĩtwa rĩao. 62 Acio meethire marĩĩtwa mao rekondi-inĩ nĩguo mamenye ndĩra ciao, no matiamonire, kwoguo makĩaga kwagĩrĩra gũtuĩka athĩnjĩri-Ngai.*+ 63 Ngavana* akĩmeera atĩ matiaagĩrĩirũo kũrĩa indo iria theru mũno+ nginya rĩrĩa hangĩagĩire na mũthĩnjĩri-Ngai ũngĩatuĩririe ũhoro akĩhũthĩra Urimu na Thumimu.+
64 Mũigana wa kĩũngano kĩu gĩothe warĩ 42,360,+ 65 hatatarĩtwo ngombo ciao cia arũme na atumia, iria ciarĩ 7,337; ningĩ nĩ maarĩ na aini 200 arũme na atumia. 66 Maarĩ na mbarathi 736, nyũmbũ 245, 67 ngamĩra 435, ndigiri 6,720.
68 Na rĩrĩ, rĩrĩa maakinyire harĩa nyũmba ya Jehova yarĩ thĩinĩ wa Jerusalemu, amwe arĩa maarĩ atongoria a nyũmba cia maithe mao makĩruta magongona ma kwĩyendera+ nĩ ũndũ wa nyũmba ya Ngai ũrĩa wa ma, nĩguo yakwo rĩngĩ* harĩa yarĩ.+ 69 Kũringana na ũhoti wao, makĩheana kĩgĩna-inĩ kĩa mwako ũcio drakma* 61,000 cia thahabu, mina* 5,000 cia betha,+ na kanjũ 100 cia athĩnjĩri-Ngai. 70 Na athĩnjĩri-Ngai, Alawii, andũ amwe, aini, arangĩri a ihingo, na ndungata cia hekarũ* makĩambĩrĩria gũikara matũũra-inĩ mao, na andũ acio angĩ othe a Isiraeli* makĩambĩrĩria gũikara matũũra-inĩ mao.+
3 Rĩrĩa mweri wa mũgwanja+ wakinyire na Aisiraeli* maarĩ matũũra-inĩ mao, makĩgomana hamwe marĩ kĩndũ kĩmwe kũu Jerusalemu. 2 Jeshua+ mũrũ wa Jehozadaku na athĩnjĩri-Ngai acio angĩ na Zerubabeli+ mũrũ wa Shealitieli+ na ariũ a ithe magĩũkĩra na magĩaka kĩgongona kĩa Ngai wa Isiraeli, nĩgetha marutagĩre magongona ma njino ho, o ta ũrĩa kwandĩkĩtwo thĩinĩ wa Watho wa Musa+ mũndũ wa Ngai ũrĩa wa ma.
3 Nĩ ũndũ ũcio makĩhanda kĩgongona kĩu harĩa kĩarĩ mbere ĩyo, o na gũtuĩka nĩ meetigagĩra andũ a mabũrũri marĩa maamathiũrũrũkĩirie,+ na makĩambĩrĩria kũrutĩra Jehova magongona ma njino ho, magongona ma njino ma rũcinĩ na magongona ma njino ma hwaĩ-inĩ.+ 4 Magĩcoka magĩkũngũĩra Gĩathĩ gĩa Ithũnũ* kũringana na ũrĩa kwandĩkĩtwo,+ na o mũthenya maarutaga magongona ma njino mũigana ũrĩa wabataranagia o mũthenya.+ 5 Thutha ũcio makĩruta igongona rĩa njino rĩrĩa rĩarutagwo hĩndĩ ciothe+ na magongona ma tũrũgamo twa mweri+ na magongona ma ciathĩ ciothe nyamũre+ cia Jehova, o hamwe na magongona marĩa maarutĩirũo Jehova nĩ mũndũ o wothe weyendeire.+ 6 Kuuma mũthenya wa mbere wa mweri wa mũgwanja+ makĩambĩrĩria kũrutĩra Jehova magongona ma njino, o na gũtuĩka mũthingi wa hekarũ ya Jehova ndwathondeketwo.
7 Makĩnengerana mbeca kũrĩ arĩa maaicũhagia mahiga+ na mabundi,+ na irio na gĩa kũnyua na maguta kũrĩ Asidoni na Aturo nĩ ũndũ wa kũrehe mbaũ cia mũtarakwa magereire iria-inĩ kuuma Lebanoni nginya Jopa,+ kũringana na watho ũrĩa maaheetwo nĩ Mũthamaki Kurusu wa Perisia.+
8 Mwaka wa kerĩ kuuma rĩrĩa maacokire nyũmba-inĩ ya Ngai ũrĩa wa ma kũu Jerusalemu mweri-inĩ wa kerĩ, Zerubabeli mũrũ wa Shealitieli, Jeshua mũrũ wa Jehozadaku na ariũ acio angĩ a ithe wao, athĩnjĩri-Ngai na Alawii, na arĩa othe maacokire Jerusalemu kuuma ithamĩrio+ makĩambĩrĩria wĩra ũcio; makĩamũra Alawii arĩa maarĩ na mĩaka 20 gũthiĩ na igũrũ nĩguo matungatage marĩ arũgamĩrĩri a wĩra wa nyũmba ĩyo ya Jehova. 9 Kwoguo Jeshua, ariũ ake na ariũ a ithe, na Kadimieli na ariũ ake, ariũ a Juda, makĩũngana hamwe nĩguo marũgamĩrĩre arĩa maarutaga wĩra nyũmba-inĩ ĩyo ya Ngai ũrĩa wa ma, marĩ hamwe na ariũ a Henadadi,+ ariũ ao na ariũ a ithe, arĩa o nao maarĩ Alawii.
10 Rĩrĩa aaki maakire mũthingi wa hekarũ ya Jehova,+ athĩnjĩri-Ngai makĩĩhumba nguo ciao cia ũthĩnjĩri-Ngai, marĩ na tũrumbeta,+ na Alawii, ariũ a Asafu, marĩ na thani iria ihũũrithanagio, makĩrũgama kũgooca Jehova kũringana na uuge wa Mũthamaki Daudi wa Isiraeli.+ 11 Na makĩambĩrĩria kũina makĩamũkagĩria+ na kũgooca na gũcokeria Jehova ngatho, “tondũ nĩ mwega; wendo wake mwĩhokeku kwerekera Isiraeli ũtũũraga tene na tene.”+ Nao andũ othe makĩanĩrĩra na mũgambo mũnene wa kũgooca Jehova tondũ mũthingi wa nyũmba ya Jehova nĩ waambĩrĩirie gwakwo. 12 Aingĩ a athĩnjĩri-Ngai, Alawii, na arĩa maarĩ atongoria a nyũmba cia maithe mao, nĩo athuri arĩa akũrũ arĩa moonete nyũmba ĩrĩa yarĩ ho mbere ĩyo,+ makĩrĩra na mũgambo mũnene rĩrĩa moonire mũthingi wa nyũmba ĩyo ũgĩakwo, na angĩ aingĩ maanagĩrĩra na mũgambo wao wothe nĩ gũkena.+ 13 Nĩ ũndũ ũcio andũ matingĩahotire gũkũũrana mũgambo wa inegene rĩa gĩkeno na wa kĩrĩro, tondũ andũ maanagĩrĩra mũno nginya mũgambo wao ũkaiguĩka kũndũ kũraihu mũno.
4 Rĩrĩa thũ cia Juda na Benjamini+ ciaiguire atĩ andũ arĩa maacokete kuuma ithamĩrio+ nĩ maraka hekarũ ya Jehova Ngai wa Isiraeli, 2 igĩthiĩ o hĩndĩ ĩyo harĩ Zerubabeli na harĩ arĩa maarĩ atongoria a nyũmba cia maithe mao ikĩmeera ũũ: “Rekei twake hamwe na inyuĩ; tondũ o ta inyuĩ, tũthathayagia* Ngai wanyu+ na nĩ tũkoretwo tũkĩrutĩra Ngai ũcio magongona kuuma matukũ-inĩ ma Mũthamaki Esari-hadoni+ wa Ashuri, ũrĩa watũrehire gũkũ.”+ 3 Ĩndĩ Zerubabeli na Jeshua na arĩa maarĩ atongoria a nyũmba cia maithe ma andũ a Isiraeli magĩciĩra atĩrĩ: “Mũtirĩ na itemi hamwe na ithuĩ harĩ gwaka nyũmba ya Ngai witũ,+ tondũ no ithuĩ tu tũgwakĩra Jehova Ngai wa Isiraeli, o ta ũrĩa Mũthamaki Kurusu o we mũthamaki wa Perisia atwathĩte.”+
4 Nao andũ a bũrũri ũcio no maathiaga na mbere kũũraga andũ a Juda ngoro* magĩtũmaga morũo nĩ hinya nĩguo matige gwaka.+ 5 Makĩhaka ataarani nĩguo mathũkie mĩbango yao+ matukũ-inĩ mothe ma Mũthamaki Kurusu wa Perisia nginya hĩndĩ ya wathani wa Mũthamaki Dario+ wa Perisia. 6 Kĩambĩrĩria-inĩ kĩa wathani wa Ahasuerusu, makĩandĩka marũa ma gũthitanga aikari a Juda na Jerusalemu. 7 Na matukũ-inĩ ma Mũthamaki Aritashashita wa Perisia, Bishilamu, Mithiredathu, Tabeeli, na arĩa angĩ maarĩ nao makĩandĩkĩra mũthamaki Aritashashita marũa; magĩtaũra marũa macio na rũthiomi rwa Kĩaramu,+ makĩmaandĩka na ndemwa cia Kĩaramu.*
8 * Rehumu ũrĩa warĩ mũnene thirikari-inĩ marĩ na Shimushai ũrĩa mwandĩki-watho makĩandĩkĩra Mũthamaki Aritashashita marũa ma gũũkĩrĩra Jerusalemu, makiuga ũũ: 9 (Marũa macio mooimĩte kũrĩ Rehumu ũcio warĩ mũnene thirikari-inĩ marĩ na Shimushai ũrĩa mwandĩki-watho na arĩa angĩ maarĩ nao, atuanĩri ciira na anini a mangavana, andĩki, andũ a Ereku,+ Ababuloni, aikari a Susa,+ nĩo Aelamu,+ 10 na ndũrĩrĩ ingĩ iria Asenapari mũnene ũrĩa mũtĩĩku aatwarĩte ithamĩrio na igĩikara matũũra ma Samaria,+ na andũ arĩa angĩ maikaraga gĩcigo-inĩ kĩa Mũrĩmo wa Rũũĩ,* na rĩu 11 ĩno nĩyo kobĩ ya marũa marĩa maamũtũmĩire.)
“Kũrĩ Mũthamaki Aritashashita, kuuma kũrĩ ndungata ciaku iria cikaraga gĩcigo-inĩ kĩa Mũrĩmo wa Rũũĩ: Atĩrĩrĩ, 12 reke mũthamaki amenye atĩ Ayahudi arĩa mookire gũkũ moimĩte kũrĩ wee nĩ makinyĩte Jerusalemu. Na rĩu nĩ gwaka maraka rĩngĩ itũũra rĩu iremi na rĩaganu, na nĩ kũrĩkia mararĩkia thingo+ na gũthondeka rĩngĩ mĩthingi yarĩo. 13 Reke rĩu mũthamaki amenye atĩ itũũra rĩu rĩngĩakwo rĩngĩ na thingo ciarĩo irĩke, matirĩrutaga igooti, marĩhi,+ na igooti rĩa barabara, na ũndũ ũcio ũgũtũma kĩgĩna kĩa athamaki kĩnyihe. 14 Tondũ tũrĩaga cumbĩ wa nyũmba ya mũthamaki* na tũtingĩenda kuona maũndũ ma mũthamaki magĩthũkio-rĩ, nĩkĩo twatũmana nĩguo mũthamaki amenye ũndũ ũcio, 15 nĩguo gwĩkwo ũthuthuria mabuku-inĩ marĩa maandĩkĩtwo ũhoro wa maithe manyu ma tene.+ Nĩ ũkuona mabuku-inĩ macio atĩ rĩu nĩ itũũra iremi, na rĩkaga maũndũ moru harĩ athamaki na icigo iria ingĩ, na thĩinĩ warĩo kũrĩ na andũ kuuma o tene matũire macogagĩra andũ mokĩrĩre wathani. Na nĩkĩo itũũra rĩu rĩaanangirũo.+ 16 Tũramenyithia mũthamaki atĩ itũũra rĩrĩ rĩngĩakwo rĩngĩ na thingo ciarĩo irĩke, ndũkahota gwatha* gĩcigo kĩa Mũrĩmo wa Rũũĩ.”+
17 Mũthamaki agĩtũmana kũrĩ Rehumu ũcio warĩ mũnene thirikari-inĩ marĩ na Shimushai ũrĩa mwandĩki-watho na arĩa angĩ maarĩ nao aikari a Samaria na andũ arĩa angĩ maarĩ gĩcigo-inĩ kĩa Mũrĩmo wa Rũũĩ:
“Amũkĩrai ngeithi! Na atĩrĩrĩ, 18 marũa marĩa mwatũtũmĩire nĩ marathomirũo na njĩra ĩrataũkĩka wega* mbere yakwa. 19 Nĩ ndĩrarutire watho na ũthuthuria ũrekwo, kũroneka atĩ itũũra rĩu rĩkoretwo rĩgĩũkĩrĩra athamaki kuuma o tene, na rĩgakorũo na ũremi na ũregani.+ 20 Nĩ kwarĩ athamaki maarĩ hinya thĩinĩ wa Jerusalemu, arĩa maathaga gĩcigo gĩothe kĩa Mũrĩmo wa Rũũĩ, na nĩ maarĩhagwo igooti, marĩhi, na igooti rĩa barabara. 21 Rĩu rutai watho andũ acio matige gwaka, nĩguo itũũra rĩu rĩtigakwo rĩngĩ nginya rĩrĩa ngaaheana watho. 22 Menyererai mũtikahũthie ũndũ ũyũ mwage kuoya ikinya, nĩguo maũndũ ma mũthamaki matigathũkio makĩria.”+
23 Na rĩrĩa kobĩ ya marũa macio mooimĩte kũrĩ Mũthamaki Aritashashita yathomirũo mbere ya Rehumu na Shimushai ũrĩa mwandĩki-watho na arĩa angĩ maarĩ nao, magĩthiĩ Jerusalemu o na ihenya kũrĩ Ayahudi na makĩhũthĩra hinya kũrũgamia wĩra wao. 24 Na hĩndĩ ĩyo nĩrĩo wĩra wa gwaka nyũmba ya Ngai, ĩrĩa yarĩ Jerusalemu warũgamire; na ũkĩrũgama o ũguo nginya mwaka wa kerĩ wa wathani wa Mũthamaki Dario wa Perisia.+
5 Nake mũnabii Hagai+ na mũnabii Zekaria+ mũcũkũrũ wa* Ido+ makĩratha ũhoro kũrĩ Ayahudi arĩa maarĩ Juda na Jerusalemu, thĩinĩ wa rĩĩtwa rĩa Ngai wa Isiraeli, o we warĩ igũrũ rĩao. 2 Hĩndĩ ĩyo nĩrĩo Zerubabeli+ mũrũ wa Shealitieli na Jeshua+ mũrũ wa Jehozadaku maacokereire rĩngĩ gwaka nyũmba ya Ngai,+ ĩrĩa yarĩ Jerusalemu; na anabii acio a Ngai maarĩ hamwe nao na makĩmateithĩrĩria.+ 3 Hĩndĩ ĩyo Tatenai ngavana wa gĩcigo kĩa Mũrĩmo wa Rũũĩ* na Shetharu-bozenai na arĩa angĩ maarĩ nao magĩũka kũrĩ o makĩmoria atĩrĩ: “Nũũ ũmũhete watho wa gwaka nyũmba ĩno na wa kũrĩkia mwako ũyũ?”* 4 Magĩcoka makĩmoria ũũ: “Andũ arĩa maraka mwako ũyũ metagwo atĩa?” 5 Ĩndĩ Ngai nĩ aaroraga* athuri acio a Ayahudi,+ na andũ acio matiahotire kũmarũgamia nginya rĩrĩa riboti ĩngĩatũmirũo kũrĩ Dario nake acokie marũa megiĩ ũndũ ũcio.
6 Ĩno nĩyo kobĩ ya marũa marĩa maatũmirũo kũrĩ Mũthamaki Dario nĩ Tatenai ngavana wa gĩcigo kĩa Mũrĩmo wa Rũũĩ na Shetharu-bozenai na arĩa angĩ maarĩ nao, anini a ngavana a gĩcigo kĩa Mũrĩmo wa Rũũĩ; 7 magĩkĩmũtũmĩra riboti, na ũũ nĩguo maandĩkire:
“Kũrĩ Mũthamaki Dario:
“Ũrogĩa na thayũ! 8 Reke mũthamaki amenye atĩ nĩ tũthiĩte gĩcigo kĩa Juda nyũmba-inĩ ya Ngai ũrĩa mũnene, na nĩ gwakwo ĩrakwo na mahiga manene, nacio thingo igekĩrũo mbaũ. Wĩra ũcio ũrarutwo na kĩyo kĩnene nĩ andũ acio na nĩ ũrathiĩ na mbere nĩ ũndũ wa kĩyo kĩao. 9 Tũracoka tũroria athuri* a Ayahudi atĩrĩ: ‘Nũũ ũmũhete watho wa gwaka nyũmba ĩno na wa kũrĩkia mwako ũyũ?’*+ 10 Tũracoka tũramoria marĩĩtwa mao nĩguo tũkũmenyithie, nĩgetha twandĩke marĩĩtwa ma arũme arĩa maratongoria wĩra ũcio.
11 “Ũyũ nĩguo ũndũ ũrĩa maratwĩrire: ‘Ithuĩ tũrĩ ndungata cia Ngai wa igũrũ na thĩ, na tũraaka rĩngĩ nyũmba ĩrĩa yaakirũo mĩaka mĩingĩ mĩhĩtũku, ĩrĩa yaakirũo na ĩkĩrĩkio nĩ mũthamaki ũmwe mũnene, wa Isiraeli.+ 12 O na kũrĩ ũguo, tondũ maithe maitũ nĩ maarakaririe Ngai wa igũrũ,+ nĩ aamaneanire guoko-inĩ kwa Mũthamaki Nebukadineza+ wa Babuloni, o ũcio Mũkalidei, ũrĩa wamomorire nyũmba ĩno+ na agĩtwara andũ ithamĩrio Babuloni.+ 13 Ĩndĩ mwaka-inĩ wa mbere wa Mũthamaki Kurusu wa Babuloni, Mũthamaki Kurusu nĩ aaheanire watho wa gwaka rĩngĩ nyũmba ĩno ya Ngai.+ 14 Ningĩ Mũthamaki Kurusu nĩ aarutire kuuma hekarũ-inĩ ya Babuloni indo cia thahabu na cia betha cia nyũmba ya Ngai iria Nebukadineza ooete kuuma hekarũ-inĩ thĩinĩ wa Jerusalemu agacitwara hekarũ-inĩ ya Babuloni.+ Ikĩnengerũo mũndũ wĩtagwo Sheshibaza,*+ ũrĩa Kurusu aatuire ngavana.+ 15 Kurusu akĩmwĩra atĩrĩ: “Oya indo ici. Ũthiĩ ũciige hekarũ-inĩ ĩrĩa ĩrĩ thĩinĩ wa Jerusalemu, na nyũmba ya Ngai yakwo rĩngĩ harĩa yarĩ.”+ 16 Nake Sheshibaza ũcio agĩũka, na agĩaka mĩthingi ya nyũmba ya Ngai,+ ĩrĩa ĩrĩ Jerusalemu; na ĩkoretwo ĩgĩakwo kuuma hĩndĩ ĩyo nginya rĩu, no ndĩrĩ ĩrarĩkio.’+
17 “Na rĩrĩ, angĩkorũo mũthamaki nĩ ekuona arĩ wega, nĩ gwĩkwo ũthuthuria kũrĩa kũigagwo kĩgĩna nyũmba-inĩ ya mũthamaki kũu Babuloni, nĩguo kũmenyeke kana Mũthamaki Kurusu nĩ aaheanĩte watho wa gwaka rĩngĩ nyũmba ĩyo ya Ngai thĩinĩ wa Jerusalemu;+ na reke itua rĩa mũthamaki rĩgiĩ ũndũ ũcio rĩtũmwo kũrĩ ithuĩ.”
6 Hĩndĩ ĩyo nĩrĩo Mũthamaki Dario aarutire watho, na gũgĩĩkwo ũthuthuria nyũmba-inĩ ya kũiga mĩthithũ* kũrĩa indo cia bata ciaigagwo kũu Babuloni. 2 Na gũkĩoneka gĩkũnjo nyũmba-inĩ njirigĩre thĩinĩ wa itũũra rĩa Ekibatana, gĩcigo kĩa bũrũri wa Media, na ndũmĩrĩri ĩno nĩyo yaandĩkĩtwo gĩkũnjo-inĩ kĩu:
3 “Mwaka-inĩ wa mbere wa Mũthamaki Kurusu, Mũthamaki Kurusu nĩ aarutire watho ũyũ wĩgiĩ nyũmba ya Ngai thĩinĩ wa Jerusalemu:+ ‘Nyũmba ĩyo nĩ yakwo rĩngĩ, nĩgetha marutagĩre magongona ho, na mĩthingi yayo yakwo; ũraihu wa nyũmba ĩyo ũkorũo ũrĩ mĩkono 60,* naguo wariĩ wayo mĩkono 60,+ 4 ĩkorũo na mahiga manene mĩhari ĩtatũ na mbaũ mũhari ũmwe;+ na mahũthĩro marĩhwo kuuma nyũmba-inĩ ya mũthamaki.+ 5 Ningĩ, indo cia thahabu na betha cia nyũmba ya Ngai iria Nebukadineza ooete hekarũ-inĩ ĩrĩa yarĩ Jerusalemu agacirehe Babuloni+ icokio, nĩgetha ciigwo harĩa ciagĩrĩirũo gũkorũo hekarũ-inĩ thĩinĩ wa Jerusalemu na ciigwo nyũmba-inĩ ya Ngai.’+
6 “Kwoguo-rĩ, wee Tatenai ngavana wa gĩcigo kĩa Mũrĩmo wa Rũũĩ,* Shetharu-bozenai, na acio angĩ mũrĩ nao, anini a ngavana a gĩcigo kĩa Mũrĩmo wa Rũũĩ+—ikarai kũraya na kũu. 7 Mũtikaingĩrĩre wĩra wa nyũmba ĩyo ya Ngai. Ngavana wa Ayahudi o hamwe na athuri a Ayahudi nĩ megwaka rĩngĩ nyũmba ĩyo ya Ngai o harĩa yarĩ. 8 Ningĩ-rĩ, nĩ ndaruta watho wĩgiĩ ũrĩa mũgwĩka harĩ athuri acio a Ayahudi nĩguo maake rĩngĩ nyũmba ĩyo ya Ngai: Kuuma kĩgĩna-inĩ kĩa mũthamaki,+ kuuma harĩ mbeca cia igooti iria ciũnganagio gĩcigo kĩa Mũrĩmo wa Rũũĩ, mahũthĩro magĩrĩirũo kũnengerũo athuri acio na ihenya nĩguo mathiĩ na mbere matekũhĩngĩcĩka.+ 9 Na kĩrĩa gĩothe mekũbatara, tũtegwa+ o hamwe na ndũrũme+ na tũgondu,+ cia kũrutĩra Ngai wa igũrũ magongona ma njino, ngano,+ cumbĩ,+ ndibei,+ na maguta,+ o ta ũrĩa athĩnjĩri-Ngai arĩa marĩ Jerusalemu mariugaga, manengagĩrũo indo icio mũthenya o mũthenya itekwaga, 10 nĩgetha hĩndĩ ciothe marutage magongona marĩa makenagia Ngai wa igũrũ na makahoera ũtũũro wa mũthamaki o na wa ariũ ake.+ 11 Ningĩ nĩ ndaruta watho atĩ mũndũ o na ũrĩkũ ũgũkararia watho ũyũ, rũbaũ rũkũũrũo nyũmba-inĩ yake na rũrũgamio ohererũo harĩ ruo,* nayo nyũmba yake ĩtuuo kĩoro kĩa mũingĩ* nĩ ũndũ wa kuuna watho ũcio. 12 Nake Ngai ũrĩa ũtũmĩte rĩĩtwa rĩake rĩkorũo kũu+ aroeheria mũthamaki o wothe o na andũ arĩa mangĩoya guoko na igũrũ maregane na watho ũyũ na mathũkangie nyũmba ĩyo ya Ngai, ĩrĩa ĩrĩ Jerusalemu. Niĩ Dario, nĩ niĩ ndaruta watho ũyũ. Nĩ ũhingio o na ihenya.”
13 Nake Tatenai ngavana wa gĩcigo kĩa Mũrĩmo wa Rũũĩ, Shetharu-bozenai,+ na acio angĩ maarĩ nao, makĩhingia o na ihenya maũndũ marĩa mothe maathanĩtwo nĩ Mũthamaki Dario. 14 Nao athuri a Ayahudi magĩthiĩ na mbere gwaka na gũtwarithia wĩra ũcio na mbere,+ magĩĩkĩrũo hinya nĩ ũrathi wa mũnabii Hagai+ na Zekaria+ mũcũkũrũ wa* Ido; magĩkĩrĩkia kũmĩaka nĩ ũndũ wa watho wa Ngai wa Isiraeli+ na nĩ ũndũ wa watho wa Kurusu,+ na Dario+ na Mũthamaki Aritashashita+ wa Perisia. 15 Maarĩkirie nyũmba ĩyo mũthenya wa gatatũ wa mweri wa Adari,* mwaka-inĩ wa gatandatũ wa wathani wa Mũthamaki Dario.
16 Thutha ũcio Aisiraeli, athĩnjĩri-Ngai, Alawii,+ na andũ acio angĩ mooimĩte ithamĩrio makĩrugũria* nyũmba ĩyo ya Ngai marĩ na gĩkeno. 17 Na nĩ ũndũ wa kũrugũria nyũmba ĩyo ya Ngai, makĩruta ndegwa 100, ndũrũme 200, tũgondu 400, na thenge 12 irĩ igongona rĩa mehia nĩ ũndũ wa Aisiraeli othe, kũringana na mũigana wa mĩhĩrĩga ya Isiraeli.+ 18 Na magĩthuura athĩnjĩri-Ngai kũringana na ikundi ciao na Alawii kũringana na ikundi ciao cia ũtungata wa Ngai thĩinĩ wa Jerusalemu,+ o ta ũrĩa kwandĩkĩtwo ibuku-inĩ rĩa Musa.+
19 Na andũ acio arĩa mooimĩte ithamĩrio magĩkũngũĩra Pasaka mũthenya wa 14 wa mweri wa mbere.+ 20 Na athĩnjĩri-Ngai, na Alawii hatarĩ o na ũmwe watigĩrĩirũo, nĩ meetheretie,+ kwoguo othe matiarĩ na thahu; magĩthĩnja nyamũ ya igongona rĩa Pasaka nĩ ũndũ wa andũ acio othe mooimĩte ithamĩrio, na nĩ ũndũ wa athĩnjĩri-Ngai arĩa angĩ, na nĩ ũndũ wao ene. 21 Nao Aisiraeli acio mooimĩte ithamĩrio makĩmĩrĩa, o hamwe na mũndũ wothe wanyitanĩire nao na akeyamũrania na mĩtugo ĩrĩ thahu ya ndũrĩrĩ cia bũrũri ũcio nĩguo athathayie* Jehova Ngai wa Isiraeli.+ 22 Ningĩ ihinda rĩa thikũ mũgwanja magĩkũngũĩra Gĩathĩ kĩa Mĩgate Ĩtarĩ Mĩimbie+ makenete, tondũ Jehova nĩ aatũmĩte makene na agatũma metĩkĩrĩke ngoro-inĩ ya mũthamaki wa Ashuri,+ na akamanyita mbaru* wĩra-inĩ ũcio wa nyũmba ya Ngai ũrĩa wa ma, o we Ngai wa Isiraeli.
7 Thutha wa maũndũ macio, hĩndĩ ya wathani wa Mũthamaki Aritashashita+ wa Perisia, Ezara*+ agĩcoka Jerusalemu. Aarĩ mũrũ wa Seraia,+ mũrũ wa Azaria, mũrũ wa Hilikia,+ 2 mũrũ wa Shalumu, mũrũ wa Zadoku, mũrũ wa Ahitubu, 3 mũrũ wa Amaria, mũrũ wa Azaria,+ mũrũ wa Meraiothu, 4 mũrũ wa Zerahia, mũrũ wa Uzi, mũrũ wa Buki, 5 mũrũ wa Abishua, mũrũ wa Finehasi,+ mũrũ wa Eliazaru,+ mũrũ wa Haruni+ mũnene wa athĩnjĩri-Ngai. 6 Ezara ũcio agĩũka kuuma Babuloni. Aarĩ mwandĩki* woĩ Watho wa Musa wega,*+ ũrĩa Jehova Ngai wa Isiraeli aaheanĩte. Mũthamaki akĩmũhe kĩrĩa gĩothe aahoire, tondũ guoko kwa Jehova Ngai wake kwarĩ igũrũ rĩake.
7 Aisiraeli amwe, athĩnjĩri-Ngai, Alawii,+ aini,+ arangĩri a ihingo,+ na ndungata cia hekarũ,*+ makĩambata Jerusalemu mwaka-inĩ wa mũgwanja wa Mũthamaki Aritashashita. 8 Nake Ezara agĩũka Jerusalemu mweri-inĩ wa gatano, mwaka-inĩ wa mũgwanja wa mũthamaki ũcio. 9 Aambĩrĩirie rũgendo rwake rwa kuuma Babuloni mũthenya wa mbere wa mweri wa mbere, na agĩkinya Jerusalemu mũthenya wa mbere wa mweri wa gatano, tondũ guoko kwega kwa Ngai wake kwarĩ igũrũ rĩake.+ 10 Ezara nĩ aahaarĩirie ngoro yake* nĩguo athuthurie Watho wa Jehova na aũrũmĩrĩre,+ na arutane maathani na matuĩro maguo thĩinĩ wa Isiraeli.+
11 Ĩno nĩ kobĩ ya marũa marĩa Mũthamaki Aritashashita aaheire Ezara ũcio warĩ mũthĩnjĩri-Ngai na mwandĩki,* na warĩ na ũmenyeru harĩ kwĩruta* maathani ma Jehova na mawatho marĩa aaheete Isiraeli:
12 * “Aritashashita,+ mũthamaki wa athamaki, kũrĩ Ezara mũthĩnjĩri-Ngai, mwandĩki* wa Watho wa Ngai wa igũrũ: Ũrogĩa na thayũ mũingĩ. Na rĩu-rĩ, 13 nĩ ndaruta watho atĩ mũndũ wothe wa andũ a Isiraeli ũrĩ rungu rwa wathani wakwa, o hamwe na athĩnjĩri-Ngai ao na Alawii ũrenda gũthiĩ Jerusalemu hamwe nawe, nĩ athiĩ.+ 14 Tondũ ũratũmwo nĩ mũthamaki na ataarani ake mũgwanja nĩguo ũgathuthurie kana Watho wa Ngai waku, ũrĩa ũrĩ guoko-inĩ gwaku, nĩ ũrarũmĩrĩrũo thĩinĩ wa Juda na Jerusalemu, 15 na woe betha na thahabu iria mũthamaki na ataarani ake maheanĩte meyendeire kũrĩ Ngai wa Isiraeli, ũrĩa gĩikaro gĩake kĩrĩ Jerusalemu, 16 o hamwe na betha na thahabu ciothe iria ũkwamũkĩra* kuuma gĩcigo-inĩ gĩothe kĩa Babuloni, na kĩheo kĩrĩa andũ na athĩnjĩri-Ngai mekũheana meyendeire harĩ nyũmba ya Ngai wao, ĩrĩa ĩrĩ Jerusalemu.+ 17 Na ũhũthĩre mbeca icio o na ihenya kũgũra ndegwa,+ ndũrũme,+ tũgondu,+ o hamwe na indo iria irutagwo hamwe nacio, nĩcio magongona ma mũtu+ na magongona ma ndibei,+ na ũcitware kĩgongona-inĩ kĩrĩa kĩrĩ thĩinĩ wa nyũmba ya Ngai waku kũu Jerusalemu.
18 “Na ũndũ ũrĩa ũngĩ wee na ariũ a ithe wanyu mũkuona wagĩrĩire, no mũwĩke mũkĩhũthĩra betha na thahabu iria igũtigara, kũringana na wendi wa Ngai wanyu. 19 Na indo iria ciothe ũkũheo nĩ ũndũ wa ũtungata wa nyũmba ya Ngai waku, ũcitware mbere ya Ngai kũu Jerusalemu.+ 20 Na kĩrĩa kĩngĩ kĩngĩendekana nyũmba-inĩ ya Ngai waku kĩrĩa kĩrabatarania ũneane, ũkĩneane kuuma kĩgĩna-inĩ kĩa mũthamaki.+
21 “Niĩ, Mũthamaki Aritashashita, nĩ ndaruta watho kũrĩ aigi kĩgĩna othe a gĩcigo kĩa Mũrĩmo wa Rũũĩ,* atĩ kĩrĩa gĩothe mũngĩtio nĩ Ezara+ mũthĩnjĩri-Ngai o we mwandĩki* wa Watho wa Ngai wa igũrũ, mũmũhe na ihenya, 22 o nginya taranda* 100 cia betha, ngano ithimi 100 cia kori,* ndibei ithimi 100 cia mbathi,*+ maguta ithimi 100 cia mbathi,+ na cumbĩ+ aheo ategũthimĩrũo. 23 Ũndũ wothe wathanĩtwo nĩ Ngai wa igũrũ nĩ wĩkwo na kĩyo nĩ ũndũ wa nyũmba ya Ngai wa igũrũ,+ nĩguo ndakarakarĩre andũ arĩa marĩ rungu rwa wathani wa mũthamaki o na ariũ ake.+ 24 Ningĩ mũmenye atĩ mũtiĩtĩkĩrĩtio gwĩtia igooti o rĩothe, marĩhi,+ kana igooti rĩa barabara kuuma kũrĩ athĩnjĩri-Ngai, Alawii, aini,+ aikaria a mĩrango, ndungata cia hekarũ,*+ na aruti a wĩra a nyũmba ĩyo ya Ngai.
25 “Nawe Ezara, kũringana na ũũgĩ ũrĩa wĩ naguo kuuma kũrĩ Ngai waku,* thuura aciirithania na atuanĩri ciira nĩguo maciirithagie andũ othe arĩa marĩ gĩcigo-inĩ kĩa Mũrĩmo wa Rũũĩ, arĩa othe moĩ mawatho ma Ngai waku; na ũrĩa wothe ũtoĩ mawatho macio ũmũrute.+ 26 Na mũndũ o wothe ũngĩaga gwathĩkĩra Watho wa Ngai waku na watho wa mũthamaki agĩrĩire gũtuĩrũo o rĩo, o na akorũo nĩ kũũragwo ekũũragwo, kũingatwo, kana gũikio njera.”
27 Jehova Ngai wa maithe maitũ ma tene arogoocwo, o we wĩkĩrĩte ngoro-inĩ ya mũthamaki ũhoro wa gũthakaria nyũmba ya Jehova ĩrĩa ĩrĩ Jerusalemu!+ 28 Na nĩ anyonetie wendo mwĩhokeku mbere ya mũthamaki+ na ataarani ake+ na anene othe arĩa marĩ hinya a mũthamaki. Nĩ ũndũ ũcio ngĩgĩa na ũcamba* tondũ guoko kwa Jehova Ngai wakwa kwarĩ igũrũ rĩakwa, na ngĩcokanĩrĩria arũme arĩa maatongoragia* thĩinĩ wa Isiraeli nĩguo twambate hamwe nao.
8 Na rĩrĩ, aya nĩo maarĩ atongoria a nyũmba cia maithe mao na rekondi ya arĩa maandĩkithĩtio kũringana na ndĩra ciao, arĩa maambatire hamwe na niĩ kuuma Babuloni hĩndĩ ya wathani wa Mũthamaki Aritashashita:+ 2 kuuma harĩ ariũ a Finehasi,+ nĩ Gerishomu: kuuma harĩ ariũ a Ithamaru,+ nĩ Danieli; kuuma harĩ ariũ a Daudi, nĩ Hatushu; 3 kuuma harĩ ariũ a Shekania, wa ariũ a Paroshu, nĩ Zekaria; na hamwe nake haarĩ na arũme 150 maandĩkithĩtio; 4 kuuma harĩ ariũ a Pahathu-moabi,+ nĩ Elieho-enai mũrũ wa Zerahia, na hamwe nake arũme 200; 5 kuuma harĩ ariũ a Zatu,+ nĩ Shekania mũrũ wa Jahazieli, na hamwe nake arũme 300; 6 kuuma harĩ ariũ a Adini,+ nĩ Ebedi mũrũ wa Jonathani, na hamwe nake arũme 50; 7 kuuma harĩ ariũ a Elamu,+ nĩ Jeshaia mũrũ wa Athalia, na hamwe nake arũme 70; 8 kuuma harĩ ariũ a Shefatia,+ nĩ Zebadia mũrũ wa Mikaeli, na hamwe nake arũme 80; 9 kuuma harĩ ariũ a Joabu, nĩ Obadia mũrũ wa Jehieli, na hamwe nake arũme 218; 10 kuuma harĩ ariũ a Bani, nĩ Shelomithu mũrũ wa Josifia, na hamwe nake arũme 160; 11 kuuma harĩ ariũ a Bebai,+ nĩ Zekaria mũrũ wa Bebai, na hamwe nake arũme 28; 12 kuuma harĩ ariũ a Azigadi,+ nĩ Johanani mũrũ wa Hakatani, na hamwe nake arũme 110; 13 kuuma harĩ ariũ a Adonikamu,+ arĩa maarĩ a mũico, na marĩĩtwa mao nĩmo maya: Elifeleti, Jeieli, na Shemaia, na hamwe nao arũme 60; 14 na kuuma harĩ ariũ a Bigivai,+ nĩ Uthai na Zabudu, na hamwe nao arũme 70.
15 Ngĩkĩmacokanĩrĩria rũũĩ-inĩ rũrĩa rũthiĩte Ahava,+ na tũkĩamba hema hau thikũ ithatũ. No rĩrĩa ndathuthuririe andũ acio o na athĩnjĩri-Ngai, ndionire Mũlawii o na ũmwe. 16 Nĩ ũndũ ũcio ngĩtũmanĩra Eliezeri, Arieli, Shemaia, Elinathani, Jaribu, Elinathani, Nathani, Zekaria na Meshulamu, arĩa maarĩ atongoria, o hamwe na Joiaribu na Elinathani, arĩa maarĩ arutani. 17 Ngĩcoka ngĩmahe watho ũkoniĩ Ido mũtongoria wa kũndũ gwĩtagwo Kasifia. Ngĩmeera meere Ido na ariũ a ithe, ndungata cia hekarũ* iria ciarĩ Kasifia, matũrehere andũ a gũtungata nyũmba-inĩ ya Ngai witũ. 18 Na tondũ guoko kwega kwa Ngai witũ kwarĩ hamwe na ithuĩ, makĩrehe mũndũ mũũgĩ kuuma harĩ ariũ a Mahili+ mũcũkũrũ wa* Lawii mũriũ wa Isiraeli, nĩwe Sherebia,+ marĩ na ariũ ake na ariũ a ithe, arũme 18; 19 na Hashabia, marĩ hamwe na Jeshaia kuuma harĩ Amerari,+ ariũ a ithe na ariũ ao, arũme 20. 20 Na nĩ haarĩ andũ 220 kuuma harĩ ndungata cia hekarũ,* arĩa Daudi na anene maaheanĩte matungatage hamwe na Alawii, arĩa othe maagwetetwo na marĩĩtwa.
21 Thutha ũcio ngĩra andũ mehinge kũrĩa hau rũũĩ-inĩ rwa Ahava, twĩnyihie mbere ya Ngai witũ, nĩguo tũhoe ũtongoria wake nĩ ũndũ wa rũgendo rwitũ, nĩ ũndũ witũ na ciana citũ o na indo citũ ciothe. 22 Nĩ ndaconokire ngĩaga kwĩra mũthamaki atũhe thigari na atwarithia a mbarathi a gũtũgitĩra tũrĩ rũgendo-inĩ, tondũ twerĩte mũthamaki ũũ: “Guoko kwega kwa Ngai witũ gũkoragwo hamwe na arĩa othe mamũcaragia,+ no hinya wake na marakara make cierekagĩrio harĩ arĩa othe mamũtiganagĩria.”+ 23 Nĩ ũndũ ũcio tũkĩĩhinga na tũkĩhoya Ngai witũ igũrũ rĩgiĩ ũndũ ũcio, nake agĩthikĩrĩria mathaithana maitũ.+
24 Hĩndĩ ĩyo ngĩamũra anene 12 a athĩnjĩri-Ngai, nĩo Sherebia na Hashabia,+ hamwe na ariũ ikũmi a ithe wao. 25 Ngĩcoka ngĩmathimĩra betha na thahabu o na indo, mũhothi ũrĩa mũthamaki na ataarani ake na anene ake na Aisiraeli othe arĩa maarĩ hau maahothete nĩ ũndũ wa nyũmba ya Ngai witũ.+ 26 Nĩ ũndũ ũcio ngĩmathimĩra na ngĩmanengera taranda* 650 cia betha, indo cia betha 100 cia thogora wa taranda 2, taranda 100 cia thahabu, 27 tũbakũri 20 twa thahabu twa thogora wa dariki* 1,000, na indo 2 cia gĩcango kĩrĩa kĩega cia rangi mũtune ũrahenia, cia kwĩrirĩrio o ta thahabu.
28 Ngĩcoka ngĩmeera atĩrĩ: “Inyuĩ mũrĩ atheru harĩ Jehova,+ o na indo icio nĩ theru, na betha na thahabu icio nĩ magongona ma kwĩyendera harĩ Jehova Ngai wa maithe manyu ma tene. 29 Cigitĩrei wega o nginya rĩrĩa mũgaacithima mbere ya anene a athĩnjĩri-Ngai na Alawii na anene a nyũmba cia maithe ma andũ a Isiraeli thĩinĩ wa Jerusalemu,+ tũnyũmba-inĩ twa* nyũmba ya Jehova.” 30 Nao athĩnjĩri-Ngai na Alawii acio makĩoya betha na thahabu na indo icio maathimĩirũo, nĩgetha macitware Jerusalemu nyũmba-inĩ ya Ngai witũ.
31 Thutha-inĩ tũkiumagara kuuma rũũĩ-inĩ rwa Ahava+ mũthenya wa 12 wa mweri wa mbere+ nĩguo tũthiĩ Jerusalemu, na guoko kwa Ngai witũ kwarĩ hamwe na ithuĩ, na agĩtũhonokia kuuma harĩ guoko gwa thũ o na kuuma harĩ arĩa mehithagĩra andũ njĩra-inĩ makamatharĩkĩra. 32 Kwoguo tũgĩũka Jerusalemu+ na tũgĩikara kuo thikũ ithatũ. 33 Na mũthenya wa kana tũgĩthima betha na thahabu na indo icio thĩinĩ wa nyũmba ya Ngai witũ+ na tũgĩcinengerana kũrĩ Meremothu+ mũrũ wa Urija ũrĩa mũthĩnjĩri-Ngai, na aarĩ hamwe na Eliazaru mũrũ wa Finehasi, hamwe na Jozabadu+ mũrũ wa Jeshua na Noadia mũrũ wa Binui, arĩa maarĩ Alawii.+ 34 Indo ciothe igĩtarũo na igĩthimwo, na ũritũ wacio wothe ũkĩandĩkwo. 35 Acio maatahĩtwo, arĩa mooimire ithamĩrio, makĩruta magongona ma njino kũrĩ Ngai wa Isiraeli, ndegwa 12+ nĩ ũndũ wa Aisiraeli othe, ndũrũme 96,+ tũtũrũme 77, na thenge 12+ irĩ ta igongona rĩa mehia; icio ciothe ciarĩ igongona rĩa njino harĩ Jehova.+
36 Tũgĩcoka tũkĩmenyithia atongoria* arĩa maarĩ rungu rwa mũthamaki o na mangavana a gĩcigo kĩa Mũrĩmo wa Rũũĩ*+ mawatho marĩa mũthamaki aathanĩte,+ nao magĩteithĩrĩria andũ na nyũmba ya Ngai ũrĩa wa ma.+
9 Na rĩrĩa maũndũ macio maarĩkire, anene magĩũka kũrĩ niĩ makĩnjĩra atĩrĩ: “Andũ a Isiraeli na athĩnjĩri-Ngai o hamwe na Alawii matiĩyamũranĩtie na andũ a mabũrũri na mĩtugo yao ĩrĩ magigi,+ ya Akanaani, Ahiti, Aperizi, Ajebusi, Aamoni, Amoabi, Amisiri,+ na Aamori.+ 2 Nĩ moete airĩtu amwe ao magatuĩka atumia ao na atumia a ariũ ao.+ Na rĩrĩ, andũ acio, o acio rũciaro* rwamũre,+ nĩ metukanĩtie na andũ a mabũrũri.+ Anene o hamwe na atongoria nĩo me mũhari-inĩ wa mbere harĩ wagi ũcio wa wĩhokeku.”
3 Na rĩrĩa ndaiguire ũguo, ngĩtembũra nguo yakwa na kagooti gakwa gatarĩ moko na ngĩmunya njuĩrĩ imwe cia mũtwe wakwa o na nderu, na ngĩikara thĩ nĩ kũmaka. 4 Na andũ arĩa othe maarĩ na wĩtigĩri harĩ* ciugo cia Ngai wa Isiraeli magĩcokanĩrĩra harĩa ndarĩ nĩ ũndũ wa wagi ũcio wa wĩhokeku wa andũ acio mooimĩte ithamĩrio, o hĩndĩ ĩyo ndaikarĩte thĩ ndĩ mũmaku o nginya hĩndĩ ya kũruta igongona rĩa mũtu rĩa hwaĩ-inĩ.+
5 Na hĩndĩ ya kũruta igongona rĩa mũtu rĩa hwaĩ-inĩ,+ ngĩũkĩra ngiuma harĩa ndaikarĩte ndĩthikĩire, nguo yakwa o na kagooti gakwa gatarĩ moko irĩ ndembũku, na ngĩturia maru, ngĩtambũrũkia moko makwa na igũrũ kũrĩ Jehova Ngai wakwa. 6 Na ngiuga ũũ: “Wee Ngai wakwa, nĩ ndĩraigua thoni na ngaconoka kũroria ũthiũ wakwa na igũrũ kũrĩ we, wee Ngai wakwa, nĩ gũkorũo mehia maitũ nĩ mongererekete mũno igũrũ rĩa mĩtwe itũ namo mahĩtia maitũ makaingĩha magakinya o igũrũ.+ 7 Kuuma o matukũ-inĩ ma maithe maitũ ma tene nginya ũmũthĩ mehia maitũ makoretwo marĩ maingĩ;+ na nĩ ũndũ wa mehia maitũ, ithuĩ, athamaki aitũ, na athĩnjĩri-Ngai aitũ nĩ tũneanĩtwo guoko-inĩ kwa athamaki a mabũrũri, tũkaneanwo kũrĩ rũhiũ rwa njora,+ tũgatwarũo ithamĩrio,+ tũgatahwo,+ na tũgaconorithio, o ta ũrĩa kũrĩ mũthenya wa ũmũthĩ.+ 8 No rĩu kwa ihinda inyinyi, Jehova Ngai witũ nĩ atwĩtĩkĩrĩte na njĩra ya kũreka kũgĩe na andũ megũtigara na agatũhe handũ harĩ na ũgitĩri thĩinĩ wa handũ hake harĩa hatheru,+ nĩguo ũtũme maitho maitũ macangarare, wee Ngai witũ, na ũtũhe ũhurũko wa ihinda inyinyi kuuma ũkombo-inĩ witũ. 9 Nĩ gũkorũo o na gũtuĩka tũrĩ ngombo,+ Ngai witũ ndatũtiganĩirie ũkombo-inĩ witũ; no nĩ atuonetie wendo wake mwĩhokeku mbere ya athamaki a Perisia,+ agatwarahũra nĩguo tũrũgamie nyũmba ya Ngai witũ+ na tũcokererie kũrĩa yanangĩkĩte na atũhe rũthingo rwa ihiga* thĩinĩ wa Juda na Jerusalemu.
10 “No rĩu Ngai witũ-rĩ, nĩ atĩa tũngiuga thutha wa maũndũ macio? Nĩ gũkorũo nĩ tũtiganĩte na maathani maku, 11 marĩa watũheire kũgerera ndungata ciaku anabii, ũkiuga ũũ: ‘Bũrũri ũrĩa mũrathiĩ kwĩgwatĩra ti mũtheru nĩ ũndũ wa thahu wa andũ a mabũrũri, tondũ wa mĩtugo yao ĩrĩ magigi ĩrĩa maiyũrĩtie kuo kuuma gĩturi kĩmwe nginya kĩrĩa kĩngĩ nĩ ũndũ wa gũkorũo marĩ na thahu.+ 12 Nĩ ũndũ ũcio, mũtikananeane airĩtu anyu mahikio nĩ ariũ ao, o na kana mwĩtĩkĩrie airĩtu ao mahikio nĩ ariũ anyu;+ na mũtikanacarie thayũ wao o na kana ũgaacĩru wao,+ nĩgetha mũgĩe na hinya na mũrĩe indo njega cia bũrũri ũcio na mũwĩgwatĩre nĩ ũndũ wa ariũ anyu tene na tene.’ 13 Na thutha wa maũndũ mothe marĩa matũkorete nĩ ũndũ wa ciĩko citũ njũru na mahĩtia maitũ manene-rĩ—nĩ gũkorũo wee Ngai witũ ndũtwĩkĩte kũringana na mehia maitũ,+ na nĩ ũtwĩtĩkĩrĩtie ithuĩ tũrĩ gũkũ tũhonoke+— 14 hihi nĩ twagĩrĩirũo kuuna maathani maku o rĩngĩ na tũthondeke ũiguano wa kũhikanagia na andũ arĩa mekaga maũndũ macio marĩ magigi?+ Na githĩ to ũtũrakarĩre na ũtũniine biũ, kwage mũndũ o na ũmwe witũ ũgũtigara? 15 Wee Jehova Ngai wa Isiraeli, ũrĩ mũthingu,+ nĩ gũkorũo nĩ tũhonokete tũrĩ matigari nginya mũthenya ũyũ. Tũrĩ haha mbere yaku na mehia maitũ, tondũ tũtingĩhota kũrũgama mbere yaku nĩ ũndũ wa maũndũ macio.”+
10 Rĩrĩa Ezara aahoyaga+ akiumbũraga mehia, akĩrĩraga akomete aturumithĩtie mũtwe thĩ mbere ya nyũmba ya Ngai ũrĩa wa ma, kĩrĩndĩ kĩnene kĩa andũ a Isiraeli kĩa arũme, atumia, o na ciana gĩgĩcokanĩrĩra harĩ we, tondũ andũ nĩ maarĩraga mũno. 2 Nake Shekania mũrũ wa Jehieli+ wa ariũ a Elamu+ akĩra Ezara atĩrĩ: “Nĩ twagĩte wĩhokeku harĩ Ngai witũ nĩ ũndũ wa kũhikia* atumia a kũngĩ kuuma kũrĩ andũ a bũrũri.+ O na kũrĩ ũguo, no kũrĩ na kĩĩrĩgĩrĩro harĩ Isiraeli. 3 Rĩu rekei tũgĩe na kĩrĩkanĩro hamwe na Ngai witũ+ nĩgetha tũingate atumia acio othe hamwe na ciana iria maciarĩte, kũringana na uuge wa Jehova na wa arĩa metigagĩra* rĩathani rĩa Ngai witũ.+ Rekei twĩke kũringana na Watho. 4 Ũkĩra, tondũ wee nĩwe wĩhokeirũo ũndũ ũcio, na ithuĩ tũrĩ hamwe nawe. Gĩa na hinya na woe ikinya.”
5 Hĩndĩ ĩyo Ezara agĩũkĩra na akĩra anene a athĩnjĩri-Ngai, Alawii, na Aisiraeli othe mehĩte mwĩhĩtwa wa gwĩka maũndũ mothe marĩa mooigĩtwo.+ Kwoguo makĩĩhĩta mwĩhĩtwa. 6 Ezara agĩgĩũkĩra hau mbere ya nyũmba ya Ngai ũrĩa wa ma agĩthiĩ kanyũmba-inĩ ka* Jehohanani mũrũ wa Eliashibu. O na gũtuĩka nĩ aathiire kũu, ndaigana kũrĩa irio kana kũnyua maĩ, nĩ gũkorũo nĩ aacakayaga tondũ wa wagi wa wĩhokeku wa andũ acio maarĩ ithamĩrio.+
7 Magĩcoka makĩanĩrĩra Juda na Jerusalemu guothe atĩ andũ acio othe mooimĩte ithamĩrio macemanie Jerusalemu; 8 na kũringana na itua rĩa anene na athuri, mũndũ o wothe ũngĩaregire gũka ihinda-inĩ rĩa thikũ ithatũ, aangĩatunyirũo indo ciake ciothe, na aingatwo kuuma kĩũngano-inĩ kĩa andũ acio maarĩ ithamĩrio.+ 9 Nĩ ũndũ ũcio arũme othe a Juda na Benjamini magĩcemania Jerusalemu mĩthenya ĩyo ĩtatũ ĩtanathira, mweri wa kenda, mũthenya wa 20 wa mweri ũcio. Andũ othe maaikarĩte nja ya nyũmba ya Ngai ũrĩa wa ma, makĩinainaga nĩ ũndũ wa ũndũ ũcio na nĩ ũndũ wa mbura nene ĩrĩa yarĩ kuo.
10 Ezara ũcio mũthĩnjĩri-Ngai agĩcoka agĩũkĩra akĩmeera ũũ: “Nĩ mwagĩte wĩhokeku nĩ ũndũ wa kũhikia atumia a kũngĩ,+ na kwoguo mũkongerera mehia ma Isiraeli. 11 Rĩu umbũrai mehia kũrĩ Jehova Ngai wa maithe manyu ma tene na mwĩke wendi wake. Mwĩyamũraniei na andũ a bũrũri na kuuma harĩ atumia aya a kũngĩ.”+ 12 Nĩ ũndũ ũcio kĩũngano kĩu gĩothe gĩgĩcokia ũũ na mũgambo mũnene: “Nĩ tũgwĩka o ta ũguo woiga. 13 O na kũrĩ ũguo, andũ aya nĩ aingĩ, na nĩ ihinda rĩa mbura. Andũ matingĩhota kũrũgama nja, na ũndũ ũyũ ndũkuoya mũthenya ũmwe kana ĩĩrĩ, tondũ nĩ tũremete na njĩra nene mũno ũhoro-inĩ ũcio. 14 Kwoguo, twagũthaitha ũreke anene marũgamĩrĩre kĩũngano gĩothe;+ na ũreke arĩa othe mahikĩtie atumia a kũngĩ thĩinĩ wa matũũra maitũ moke ihinda rĩrĩa rĩamũrĩtwo, marĩ hamwe na athuri na aciirithania a itũũra o itũũra, nginya tweherie marakara manene ma Ngai witũ kuuma harĩ ithuĩ ũhoro-inĩ ũcio.”
15 Ĩndĩ Jonathani mũrũ wa Asaheli, na Jahazeia mũrũ wa Tikiva makĩregana na ũndũ ũcio, na Meshulamu na Shabethai+ arĩa maarĩ Alawii makĩmanyita mbaru. 16 No andũ acio mooimĩte ithamĩrio magĩka ũndũ ũcio waiguithanĩirio; na Ezara ũcio mũthĩnjĩri-Ngai na arĩa maarĩ ciongo cia famĩlĩ cia nyũmba cia maithe mao, arĩa othe maagwetirũo na marĩĩtwa, magĩcemania handũ mwanya mũthenya wa mbere wa mweri wa ikũmi nĩguo marĩrĩrie ũndũ ũcio; 17 na gũkinyĩria mũthenya wa mbere wa mweri wa mbere makĩrĩkia gũthuthuria arũme othe arĩa maahikĩtie atumia a kũngĩ. 18 Na nĩ kuoonekire atĩ amwe harĩ ariũ a athĩnjĩri-Ngai nĩ maahikĩtie atumia a kũngĩ:+ kuuma harĩ ariũ a Jeshua+ mũrũ wa Jehozadaku na ariũ a ithe, Maaseia, Eliezeri, Jaribu, na Gedalia. 19 No nĩ mooigire nĩ mekũingata atumia ao, na tondũ nĩ maahĩtĩtie, nĩ maarutire ndũrũme ĩmwe kuuma harĩ rũũru nĩ ũndũ wa mehia mao.+
20 Kuuma harĩ ariũ a Imeri,+ maarĩ Hanani na Zebadia; 21 na kuuma harĩ ariũ a Harimu,+ nĩ Maaseia, Elija, Shemaia, Jehieli, na Uzia; 22 na kuuma harĩ ariũ a Pashuru,+ nĩ Elioenai, Maaseia, Ishumaeli, Nethaneli, Jozabadu, na Eleasa. 23 Na kuuma harĩ Alawii, maarĩ Jozabadu, Shimei, Kelaia (nĩwe Kelita), Pethahia, Juda, na Eliezeri; 24 na kuuma harĩ aini, nĩ Eliashibu; na kuuma harĩ arangĩri a ihingo, nĩ Shalumu, Telemu, na Uri.
25 Na harĩ Isiraeli, kuuma harĩ ariũ a Paroshu,+ maarĩ Ramia, Izia, Malikija, Mijamini, Eliazaru, Malikija, na Benaia; 26 na kuuma harĩ ariũ a Elamu,+ nĩ Matania, Zekaria, Jehieli,+ Abudi, Jeremothu, na Elija; 27 na kuuma harĩ ariũ a Zatu,+ nĩ Elioenai, Eliashibu, Matania, Jeremothu, Zabadi, na Aziza; 28 na kuuma harĩ ariũ a Bebai,+ nĩ Jehohanani, Hanania, Zabai, na Athilai; 29 na kuuma harĩ ariũ a Bani, nĩ Meshulamu, Maluku, Adaia, Jashubu, Sheali, na Jeremothu; 30 na kuuma harĩ ariũ a Pahathu-moabi,+ nĩ Adina, Kelali, Benaia, Maaseia, Matania, Bezaleli, Binui, na Manase; 31 na kuuma harĩ ariũ a Harimu,+ nĩ Eliezeri, Ishija, Malikija,+ Shemaia, Shimeoni, 32 Benjamini, Maluku, na Shemaria; 33 kuuma harĩ ariũ a Hashumu,+ nĩ Matenai, Matata, Zabadi, Elifeleti, Jeremai, Manase, na Shimei; 34 kuuma harĩ ariũ a Bani, nĩ Maadai, Amuramu, Ueli, 35 Benaia, Bedeia, Keluhi, 36 Vania, Meremothu, Eliashibu, 37 Matania, Matenai, Jaasu; 38 na kuuma harĩ ariũ a Binui, nĩ Shimei, 39 Shelemia, Nathani, Adaia, 40 Makinadebai, Shashai, Sharai, 41 Azareli, Shelemia, Shemaria, 42 Shalumu, Amaria, na Jusufu; 43 na kuuma harĩ ariũ a Nebo, nĩ Jeieli, Matithia, Zabadi, Zebina, Jadai, Joeli, na Benaia. 44 Acio othe nĩ maahikĩtie atumia a kũngĩ,+ na makĩingata atumia acio, hamwe na ariũ ao.+
Kana hihi, “ũrĩa ũrĩ Jerusalemu.”
Ũkk., “andũ a kũndũ gwake.”
Ũkk., “magĩĩkĩra moko mao hinya na.”
Kana “Anethini maarĩ.” Ũkk., “Arĩa maheanĩtwo.”
Kana “Anethini.” Ũkk., “Arĩa maheanĩtwo.”
Kana “makĩeherio harĩ ũthĩnjĩri-Ngai nĩ ũndũ wa kuonwo marĩ na thahu.”
Kana “Tirishatha,” rĩĩtwa rĩa Kĩperisia rĩaheagwo ngavana wa gĩcigo kĩa bũrũri.
Kana “ĩrũgamio.”
Yaiganaine na dariki ya thahabu ya Perisia ya ngiramu 8.4. Drakma ĩyo tiyo ĩrĩa ĩgwetetwo Maandĩko-inĩ ma Kĩngiriki. Rora Ũhoro Muongerere B14.
Mina ĩmwe Maandĩko-inĩ ma Kĩhibirania yaiganaine na ngiramu 570. Rora Ũhoro Muongerere B14.
Kana “Anethini.” Ũkk., “arĩa maheanĩtwo.”
Ũkk., “Isiraeli yothe.”
Ũkk., “ariũ a Isiraeli.”
Kana “Ciikaro cia Ihinda Inini.”
Ũkk., “tũcaragia.”
Ũkk., “kũniina moko mao hinya.”
Kana hihi, “maandĩkirũo na Kĩaramu magĩcoka magĩtaũrũo.”
Kana “a Gĩcigo Kĩrĩa Gĩtuĩkanĩtie Farati.”
Kana “twamũkagĩra mũcara kuuma nyũmba ya mũthamaki.”
Ũkk., “ndũkaagĩa na igai.”
Kana hihi, “nĩ marataũrirũo na marathomwo.”
Kana “mwana wa mwana wa.”
Kana “wa Gĩcigo Kĩrĩa Gĩtuĩkanĩtie Farati.”
Kana “itugĩ ici.”
Ũkk., “riitho rĩa Ngai wao rĩarĩ igũrũ rĩa.”
Athuri arĩa meehokeirũo maũndũ.
Kana “itugĩ ici.”
Ũkk., “nyũmba-inĩ ya rekondi.”
Nĩ ta mita 26.7 (fiti 87.6). Rora Ũhoro Muongerere B14.
Kana “wa Gĩcigo Kĩrĩa Gĩtuĩkanĩtie Farati.”
Kana “acuurio harĩ ruo.”
Kana hihi, “mborera; hĩba ya mai.”
Kana “mwana wa mwana wa.”
Rora Ũhoro Muongerere B15.
Kana “makĩamũra.”
Ũkk., “acarie.”
Ũkk., “agekĩra moko mao hinya.”
Rĩĩtwa rĩu riugĩte “Ũteithio.”
Kana “mwandĩki-watho.”
Kana “Aarĩ mwandĩki warĩ na ũũgĩ mũingĩ.”
Kana “Anethini.” Ũkk., “arĩa maheanĩtwo.”
Kana “nĩ aatuĩte na ngoro yake.”
Kana “mwandĩki-watho.”
Kana “mwandĩki wa ciugo cia.”
Kana “mwandĩki-watho.”
Ũkk., “ũkuona.”
Kana “a Gĩcigo Kĩrĩa Gĩtuĩkanĩtie Farati.”
Kana “mwandĩki-watho.”
Taranda ĩmwe yaiganaine na kilo 34.2. Rora Ũhoro Muongerere B14.
Kori ĩmwe yaiganaine na lita 220. Rora Ũhoro Muongerere B14.
Mbathi ĩmwe yaiganaine na lita 22. Rora Ũhoro Muongerere B14.
Kana “Anethini.” Ũkk., “arĩa maheanĩtwo.”
Ũkk., “kũringana na ũũgĩ ũrĩa ũrĩ guoko-inĩ gwaku wa Ngai waku.”
Kana “ngĩĩhe hinya.”
Ũkk., “ciongo.”
Kana “Anethini.” Ũkk., “arĩa maheanĩtwo.”
Kana “mwana wa mwana wa.”
Kana “Anethini.” Ũkk., “arĩa maheanĩtwo.”
Taranda ĩmwe yaiganaine na kilo 34.2. Rora Ũhoro Muongerere B14.
Dariki yarĩ mbeca ya Perisia ya thahabu. Rora Ũhoro Muongerere B14.
Kana “nyũmba-inĩ cia kũrĩĩra cia.”
Kiugo kĩrĩa kĩhũthĩrĩtwo maandĩko-inĩ ma tene nĩ gĩa Kĩperisia na kiugĩte “arangĩri a gĩcigo kĩa mũthamaki,” haha hakĩonania ũhoro wĩgiĩ mangavana a icigo cia Ũthamaki wa Perisia.
Kana “a Gĩcigo Kĩrĩa Gĩtuĩkanĩtie Farati.”
Ũkk., “mbeũ.”
Ũkk., “arĩa maainainaga nĩ ũndũ wa.”
Kana “rũthingo rwa ũgitĩri.”
Kana “na njĩra ya kũingĩria nyũmba-inĩ citũ.”
Ũkk., “arĩa mainainaga nĩ ũndũ wa.”
Kana “nyũmba-inĩ ya kũrĩĩra ya.”