HOSEA
1 Gĩkĩ nĩkĩo kiugo kĩa Jehova kĩrĩa gĩakinyĩire Hosea* mũrũ wa Beeri matukũ-inĩ ma Uzia,+ Jothamu,+ Ahazu,+ na Hezekia,+ arĩa maarĩ athamaki a Juda,+ na matukũ-inĩ ma Jeroboamu+ mũrũ wa Joashu,+ mũthamaki wa Isiraeli. 2 Rĩrĩa Jehova aambĩrĩirie kwaria kiugo gĩake kũgerera Hosea, Jehova eerire Hosea atĩrĩ: “Thiĩ, ũhikie mũtumia wa ũmaraya na ũgĩe ciana cia ũmaraya, tondũ kũgerera ũmaraya, bũrũri nĩ ũgarũrũkĩte biũ ũgatiga kũrũmĩrĩra Jehova.”+
3 Nĩ ũndũ ũcio agĩthiĩ na akĩhikia Gomeri mwarĩ wa Dibilaimu, nake akĩoha nda na akĩmũciarĩra mwana wa kahĩĩ.
4 Nake Jehova akĩmwĩra atĩrĩ: “Mwĩte Jezireeli,* nĩ gũkorũo thutha wa ihinda inini nĩ ngaaciirithia nyũmba ya Jehu+ nĩ ũndũ wa ciĩko cia ũiti wa thakame cia Jezireeli, na nĩ ngaaniina ũthamaki wa nyũmba ya Isiraeli.+ 5 Mũthenya ũcio nĩ ngoinanga ũta wa Isiraeli Mũkuru-inĩ wa* Jezireeli.”
6 Mũtumia ũcio akĩoha nda rĩngĩ na agĩciara mwana wa kairĩtu. Nake Ngai akĩra Hosea atĩrĩ: “Mwĩte Lo-ruhama,* nĩ gũkorũo ndigũcoka kũiguĩra nyũmba ya Isiraeli tha,+ tondũ hatarĩ nganja nĩ ngaamaingata.+ 7 No nĩ ngaaiguĩra nyũmba ya Juda tha,+ na nĩ ngaamahonokia kũgerera hinya wa Jehova Ngai wao;+ ndikaamahonokia kũgerera ũta kana rũhiũ rwa njora kana mbaara kana mbarathi kana atwarithia a mbarathi.”+
8 Thutha wa gũtigithia Lo-ruhama kuonga, mũtumia ũcio akĩoha nda na agĩciara mwana wa kahĩĩ. 9 Nake Ngai akiuga atĩrĩ: “Mwĩte Lo-ammi,* tondũ inyuĩ mũtirĩ andũ akwa na ndigaatuĩka Ngai wanyu.”
10 “Na mũigana wa andũ* a Isiraeli ũgaatuĩka ta mũthanga wa iria-inĩ, ũrĩa ũtangĩthimĩka kana ũtarĩke.+ Na kũndũ kũrĩa meerirũo atĩrĩ, ‘Inyuĩ mũtirĩ andũ akwa,’+ nĩ makeerũo atĩrĩ, ‘Mũrĩ ariũ a Ngai ũrĩa ũtũũraga muoyo.’+ 11 Nao andũ a Juda na a Isiraeli nĩ magaacokanĩrĩrio hamwe marĩ na ũrũmwe+ na nĩ mageethuurĩra mũtongoria ũmwe na moime bũrũri-inĩ, tondũ mũthenya wa Jezireeli ũgaakorũo ũrĩ mũnene.+
2 “Ĩrai ariũ a ithe wanyu atĩrĩ, ‘Inyuĩ mũrĩ andũ akwa!’*+
Nao aarĩ a ithe wanyu mũmeere, ‘Inyuĩ mũrĩ atumia arĩa maiguĩrĩirũo tha!’*+
2 Thitangai maitũguo; mũthitangei,
Nĩ gũkorũo we ti mũtumia wakwa+ na niĩ ndirĩ mũthuri wake.
Agĩrĩirũo kweheria ũmaraya ũmweherere
Na eherie ũtharia gatagatĩ-inĩ ka nyondo ciake,
3 Kwaga ũguo nĩ ngaamũruta nguo atigwo njaga na ndũme ahaane o ta ũrĩa aahaanaga mũthenya ũrĩa aaciarirũo,
Ndũme ahaane o ta werũ,
Ahaane ta bũrũri ũtarĩ maĩ,
Na ndũme akue nĩ ũndũ wa kũnyota.
4 Na ciana ciake ndigaaciguĩra tha,
Tondũ nĩ ciana cia ũmaraya.
5 Tondũ nyina wao nĩ ahũũrĩte ũmaraya.+
Ũcio wagĩire nda yao nĩ ekĩte maũndũ ma gũconorithia,+ tondũ ooigire atĩrĩ,
‘Nĩ ngũrũmĩrĩra endwa akwa arĩa manyendete mũno,+
O acio maheaga mũgate wakwa na maĩ makwa,
Guoya wakwa wa ngʼondu na gatani yakwa, maguta makwa o na kĩndũ gĩakwa gĩa kũnyua.’
6 Nĩ ũndũ ũcio nĩ ngaahinga njĩra yaku na rũgiri rwa mĩigua;
Na nĩ ngaaka rũthingo rwa ihiga rwa kũmũgirĩrĩria,
Nĩgetha ndakone njĩra ciake.
7 Nĩ agaatengʼeria endwa ake arĩa mamwendete mũno, no ndakaamakinyĩra;+
Nĩ akaamacaria, no ndakaamona.
Nake nĩ akoiga atĩrĩ, ‘Ngũcoka kũrĩ mũthuri wakwa wa mbere,+
Tondũ nĩ ndaikarĩte wega hĩndĩ ĩo gũkĩra ũrĩa ndariĩ rĩu.’+
8 Ndaigana kũmenya atĩ nĩ niĩ ndamũheete ngano,*+ ndibei njerũ,* na maguta,
Na nĩ niĩ ndamũheete betha nyingĩ
Na thahabu, iria maahũthagĩra ũthathaiya-inĩ wa Baali.+
9 ‘Nĩ ũndũ ũcio, nĩ ngaacoka na njoe ngano* yakwa ihinda rĩayo rĩakinya
Na njoe ndibei yakwa njerũ* hĩndĩ ya kĩmera kĩayo,+
Na ndĩmũtunye guoya wakwa wa ngʼondu na gatani yakwa iria ciarĩ cia kũhumbĩra njaga yake.
10 Nĩ ngaaguũria ciĩga ciake cia ũciari akĩĩroragĩrũo nĩ endwa ake arĩa mamwendete mũno,
Na gũtirĩ mũndũ ũkaamũhonokia kuuma guoko-inĩ gwakwa.+
11 Nĩ ngaaniina gĩkeno gĩake gĩothe,
Niine ciathĩ ciake,+ tũrũgamo twake twa mweri, thabatũ ciake, na ciathĩ ciake ciothe iria nyamũre.
12 Nĩ ngaathũkangia mĩthabibũ yake na mĩkũyũ yake, o ĩyo ooigire ũũ ũhoro wayo:
“Ĩno nĩyo marĩhi makwa, marĩa ndaheirũo nĩ endwa akwa arĩa manyendete mũno”;
Nĩ ngaatũma ĩtuĩke mũtitũ,
Nacio nyamũ cia gĩthaka nĩ ikaamĩtambura.
13 Nĩ ngaamũciirithia nĩ ũndũ wa matukũ marĩa aarutagĩra mĩhianano ya Baali magongona,+
Rĩrĩa eegemagia na icũhĩ na mathaga make na agatengʼerania na endwa ake arĩa mamwendete mũno,
Na akĩriganĩrũo nĩ niĩ,’+ ũguo nĩguo Jehova ekuuga.
14 ‘Nĩ ũndũ ũcio, nĩ ngaamũthaitha,
Ngaamũtongoria ndĩmũtware werũ-inĩ,
Na nĩ ngaaria nginyĩre ngoro yake.
15 Nĩ ngaamũcokeria mĩgũnda yake ya mĩthabibũ kuuma hĩndĩ ĩyo gũthiĩ na mbere,+
Na ndĩmũnengere Mũkuru wa* Akori+ ũtuĩke kĩhingo gĩa kĩĩrĩgĩrĩro;
Nĩ akaanjokeria arĩ kũu o ta ũrĩa eekaga matukũ-inĩ make ma ũnyinyi,
O ta mũthenya ũrĩa ooimire bũrũri wa Misiri.’+
16 Jehova ekuuga atĩrĩ, ‘Na mũthenya ũcio,
Nĩ ũkaanjĩta mũthuri Wakwa, na ndũgaacoka kũnjĩta mwathi Wakwa.’*
17 ‘Nĩ ngeeheria marĩĩtwa ma mĩhianano ya Baali kanua-inĩ gake,+
Na ndĩgaacoka kũririkanwo na marĩĩtwa mayo.+
18 Mũthenya ũcio nĩ ngaarĩkanĩra kĩrĩkanĩro na nyamũ cia gĩthaka nĩ ũndũ wao,+
Na ndĩkanĩre na nyoni cia rĩera-inĩ* na ciũmbe iria itambaga thĩ;+
Nĩ ngeeheria ũta na rũhiũ rwa njora na mbaara thĩinĩ wa bũrũri,+
19 Nĩ ngaakuoya ũtuĩke mũhiki wakwa tene na tene;
Na nĩ ngaatigĩrĩra atĩ nĩ ndagwĩkĩra maũndũ ma ũthingu na ma kĩhooto,
Ma wendo mwĩhokeku na ma tha.+
20 Nĩ ngaatigĩrĩra atĩ nĩ ndagwĩkĩra maũndũ ma wĩhokeku,
Nawe hatarĩ nganja nĩ ũkaamenya Jehova.’+
21 ‘Mũthenya ũcio nĩ ngaacokia ũhoro,’ ũguo nĩguo Jehova ekuuga,
‘Nĩ ngaacokeria igũrũ,
Narĩo igũrũ nĩ rĩgaacokeria thĩ;+
23 Nĩ ngaamũhanda thĩ o ta mbeũ nĩ ũndũ wakwa,+
Na ũcio ũtaaiguĩrĩirũo tha nĩ ngaamũiguĩra tha;*
Andũ arĩa matarĩ akwa* ngaameera ũũ: “Inyuĩ mũrĩ andũ akwa,”+
Nao nĩ makoiga atĩrĩ: “Wee nĩwe Ngai wakwa.”’”+
3 Jehova agĩcoka akĩnjĩra atĩrĩ: “Thiĩ o rĩngĩ wende mũtumia ũcio wendetwo nĩ mũndũrũme ũngĩ, o ũcio wĩkaga ũtharia,+ o ta ũrĩa Jehova endete andũ a Isiraeli+ o na makĩgarũrũkagĩra ngai ingĩ+ na makenda keki cia thabibũ nyũmithie.”*
2 Nĩ ũndũ ũcio, ngĩmũgũra na icunjĩ 15 cia betha na gĩthimi kĩmwe na nuthu kĩa homeri* ya cairi. 3 Na niĩ ngĩmwĩra atĩrĩ: “Ũgũikara ũrĩ wakwa matukũ maingĩ. Ndũkahũũre ũmaraya, na ndũgakome na mũndũrũme ũngĩ, na niĩ ndirĩkomaga nawe.”*
4 Nĩ gũkorũo kwa ihinda iraya* andũ a Isiraeli megũikara matarĩ na mũthamaki,+ mũnene, igongona, matarĩ na gĩtugĩ, na matarĩ na ebodi+ na mĩhianano ya terafimu.*+ 5 Thutha-inĩ andũ a Isiraeli nĩ magaacoka na macarie Jehova Ngai wao+ na Daudi mũthamaki wao,+ na nĩ magaathiĩ makĩinainaga harĩ Jehova na harĩ wega wake ihinda-inĩ rĩa mũthia rĩa matukũ macio.+
4 Thikĩrĩriai kiugo kĩa Jehova, inyuĩ andũ a Isiraeli,
Nĩ gũkorũo Jehova arĩ na ciira na aikari a bũrũri,+
Tondũ gũtirĩ na ũhoro wa ma kana wendo mwĩhokeku kana ũmenyo wĩgiĩ Ngai thĩinĩ wa bũrũri.+
2 Mĩĩhĩtwa ya maheeni, kwaria maheeni+ na ũũragani+
Na ũici na ũtharia+ nĩ itheremete mũno,
Na gĩĩko kĩmwe kĩa ũiti wa thakame kĩrũmagĩrĩrũo nĩ gĩĩko kĩngĩ kĩa ũiti wa thakame.+
3 Nĩkĩo bũrũri ũgaacakaya+
Na aikari othe arĩa marĩ thĩinĩ waguo nĩ makoorũo nĩ hinya;
Nyamũ cia gĩthaka na nyoni cia rĩera-inĩ,*
O na thamaki cia iria-inĩ, nĩ igaathira.
4 “No rĩrĩ, mũndũ o wothe ndakamaciirithie kana amarũnge,+
Tondũ andũ anyu matariĩ ta andũ arĩa maciirithagia mũthĩnjĩri-Ngai.+
5 Nĩ ũndũ ũcio, nĩ ũkaahĩngwo mũthenya barigici,
Na ũkĩhĩngwo, mũnabii o nake nĩ akaahĩngwo, ta arĩ ũtukũ.
Na nĩ ngaakiria* maitũguo.
6 Andũ akwa nĩ magaakirio,* nĩ gũkorũo gũtirĩ na ũmenyo.
Tondũ nĩ ũregete ũmenyo,+
Na niĩ nĩ ngaakũrega ũtige gũtungata ũrĩ mũthĩnjĩri-Ngai wakwa;
Ningĩ tondũ nĩ ũriganĩirũo nĩ watho* wa Ngai waku,+
Niĩ mwene nĩ ngaariganĩrũo nĩ ariũ aku.
7 O ũrĩa moongererekaga, noguo maanjĩhagĩria makĩria.+
Nĩ ngaagarũra riri wao ũtuĩke gĩconoko.*
8 Marĩaga kuumana na mehia ma andũ akwa,
Na magakorokera mahĩtia mao.
9 Ũrĩa gũgaathiĩ harĩ andũ acio noguo gũgaathiĩ harĩ mũthĩnjĩri-Ngai;
Nĩ ngaamaciirithia nĩ ũndũ wa njĩra ciao,
Na nĩ ngaamarehithĩria moimĩrĩro ma ciĩko ciao.+
10 Nĩ makaarĩa no matikaahũna.+
Nĩ makaahũũra ũmaraya, no matikaingĩha,+
Tondũ nĩ matigĩte gwĩciria ũhoro wa Jehova.
11 Ũmaraya na ndibei na ndibei njerũ*
Nĩ cieheragia wendi wa gwĩka maũndũ marĩa magĩrĩire.*+
12 Andũ akwa macaragia ũhoro kuuma kũrĩ mĩhianano yao ya mbaũ,
Mageka ũrĩa rũthanju rwao* rũkũmeera meke;
Tondũ roho wa ũmaraya nĩ ũtũmaga mahĩtie njĩra,
Na kũgerera ũmaraya wao makarega gwathĩkĩra Ngai wao.
13 Marutagĩra magongona irĩma igũrũ,+
Na magatogia magongona tũrĩma igũrũ,
Rungu rwa mĩtĩ ya mĩgandi na mĩribina na mũtĩ o wothe mũnene,+
Tondũ kĩĩruru kĩayo nĩ kĩega.
Nĩkĩo aarĩ anyu mahũũraga ũmaraya
Na atumia a ariũ anyu mageka ũtharia.
14 Ndigaaciirithia aarĩ anyu nĩ ũndũ wa ũmaraya wao,
O na atumia a ariũ anyu nĩ ũndũ wa ũtharia wao.
Tondũ nao arũme mathiaga na maraya
Na makaruta magongona hamwe na maraya ma hekarũ;
Andũ ta acio matarĩ na ũtaũku+ nĩ makaaniinwo.
Mũtigathiĩ Giligali+ kana mũthiĩ Bethi-aveni,+
Na mũtikehĩte muuge atĩrĩ, ‘O ta ũrĩa Jehova atũũraga muoyo!’+
16 Tondũ Isiraeli nĩ atuĩkĩte mũremi,+ o ta ngʼombe nemi.
Hihi Jehova rĩu nĩ ekũmarĩithia o ta gatũrũme kũndũ kũrĩ na wariĩ?
17 Efiraimu nĩ anyitanĩte na mĩhianano.+
Tigana nake!
Na athani ake nĩ mendete* gĩconoko mũno.+
19 Rũhuho nĩ rũkaamũkũnja* na mathagu maruo,
Na nĩ magaaconoka nĩ ũndũ wa magongona mao.”
5 “Iguai ũhoro ũyũ, inyuĩ athĩnjĩri-Ngai,+
Tegai matũ, inyuĩ nyũmba ya Isiraeli,
Thikĩrĩriai, inyuĩ nyũmba ya mũthamaki,
Nĩ gũkorũo ituĩro nĩ inyuĩ rĩkoniĩ;
Tondũ inyuĩ mũrĩ mũtego kũu Mizipa
Na neti yambĩtwo kũu Taboru.+
3 Nĩ njũĩ Efiraimu,
Na Isiraeli ndĩhithĩtwo kuuma harĩ niĩ.
Nĩ gũkorũo rĩu, wee Efiraimu, nĩ ũhũũrĩte ũmaraya;
Isiraeli nĩ ĩĩthahĩtie.+
4 Ciĩko ciao itimetĩkagĩria macokerere Ngai wao,
Tondũ kũrĩ na roho wa ũmaraya gatagatĩ-inĩ kao;+
Na matiũĩ Jehova.
5 Mwĩtĩo wa Isiraeli nĩ ũrutĩte ũira mũũru ũmũkoniĩ;*+
Isiraeli na Efiraimu nĩ mahĩngĩtwo nĩ mahĩtia mao,
Na Juda nĩ ahĩngĩtwo hamwe nao.+
6 Maathire gũcaria Jehova marĩ na rũũru rwao rwa ngʼondu na rwa ngʼombe,
No matiamuonire.
Nĩ aamehereire.+
Rĩu mweri* nĩ ũkũmatambura* hamwe na igai rĩao.*
8 Huuhai coro+ kũu Gibea, mũhuuhe karumbeta kũu Rama!+
Ugĩrĩriai mbugĩrĩrio ya mbaara kũu Bethi-aveni+—thutha waku, wee Benjamini!
9 Atĩrĩrĩ wee Efiraimu, nĩ ũgaatuĩka kĩndũ gĩa kũguoyohia mũthenya wa kũherithio.+
Nĩ menyithanĩtie ũrĩa gũkaahaanĩka gatagatĩ-inĩ ka mĩhĩrĩga ya Isiraeli.
10 Anene a Juda matariĩ ta andũ arĩa mathaamagia mũhaka.+
Nĩ ngaamaitĩrĩria mangʼũrĩ makwa ta maĩ.
11 Efiraimu nĩ mũhinyĩrĩrie, akahehenjwo nĩ ituĩro,
Nĩ gũkorũo nĩ eehotorete kũrũmĩrĩra thũ yake.+
12 Nĩ ũndũ ũcio niĩ ndatariĩ ta memenyi harĩ Efiraimu
Na ngahaana ta ũbuthu harĩ nyũmba ya Juda.
13 Rĩrĩa Efiraimu oonire mũrimũ wake, na Juda akĩona kĩronda gĩake,
Efiraimu aathiire Ashuri+ na agĩtũmana kũrĩ mũthamaki mũnene.
No ndaahotire kũmũhonia inyuĩ,
Na ndaahonirie kĩronda kĩanyu.
14 Nĩ gũkorũo ngaahaana ta mũrũthi mwĩthĩ harĩ Efiraimu,
Na haane ta mũrũthi ũrĩ hinya* harĩ nyũmba ya Juda.
Niĩ mwene nĩ ngaamatambura tũcunjĩ tũcunjĩ njoke ndĩthiĩre;+
Nĩ ngaamataha, na gũtirĩ mũndũ ũkaamahonokia.+
15 Nĩ ngaathiĩ na njoke handũ hakwa nginya mone moimĩrĩro ma mahĩtia mao,
Nao nĩ magaacaria ũthiũ wakwa.+
Rĩrĩa magaakorũo na mĩtangĩko, nĩ makaanjetha.”+
6 “Ũkai, nĩ tũcokerere Jehova,
Nĩ gũkorũo nĩ atũtamburĩte tũcunjĩ tũcunjĩ,+ no nĩ egũtũhonia.
Nĩ aatũgũthire, no nĩ ekuoha ironda citũ.
2 Nĩ egũtwĩkĩra hinya thutha wa thikũ igĩrĩ.
Mũthenya wa gatatũ nĩ agaatwarahũra,
Na nĩ tũgaatũũra muoyo tũrĩ mbere yake.
3 Nĩ tũkũmenya, nĩ tũkwĩrutanĩria mũno kũmenya Jehova.
Kuumagara gwake nĩ gwa kwĩhokeka o ta rũcinĩ;
Egũũka kũrĩ ithuĩ o ta mbura ĩgĩitĩka,
O ta mbura ya kũrigĩrĩria ĩrĩa ĩihũgagia thĩ.”
4 “Ngũgwĩka atĩa, wee Efiraimu?
Ngũgwĩka atĩa, wee Juda?
Nĩ gũkorũo wendo wanyu mwĩhokeku ũtariĩ ta matu ma rũcinĩ,
O ta ime rĩrĩa rĩthiraga o na ihenya.
Na matuĩro marĩa ũtuĩrĩirũo magaacangarara o ta ũtheri.+
6 Nĩ gũkorũo niĩ ngenagio nĩ wendo mwĩhokeku,* no ti igongona,
Na ngakenio nĩ ũmenyo wĩgiĩ Ngai, handũ ha magongona magima ma njino.+
7 Ĩndĩ o, o ta andũ, nĩ mathũkĩtie kĩrĩkanĩro.+
Nĩ matigĩte kwĩhokeka harĩ niĩ marĩ kũu.
9 Thiritũ ya athĩnjĩri-Ngai nĩ ta ikundi cia atunyani ciohetie mũndũ.
Moraganaga njĩra-inĩ kũu Shekemu,+
Tondũ mĩtugo yao nĩ ya thoni.
10 Nĩ nyonete ũndũ mũũru mũno thĩinĩ wa nyũmba ya Isiraeli.
11 Makĩria ma ũguo, wee Juda, ihinda rĩa magetha nĩ rĩtuĩtwo nĩ ũndũ waku,
Hĩndĩ ĩrĩa ngaacokanĩrĩria andũ akwa arĩa matahĩtwo ndĩmacokie.”+
7 “Rĩrĩa ndageria kũhonia Isiraeli,
Mahĩtia ma Efiraimu nĩ maguũragio,+
O hamwe na waganu wa Samaria.+
Nĩ gũkorũo mamenyerete maheeni;+
Aici matuaga nyũmba makaingĩra, nacio ikundi cia atunyani igatharĩkĩra nja.+
2 No matiugaga ngoro-inĩ ciao atĩ nĩ ngaaririkana waganu wao wothe.+
Rĩu ciĩko ciao nĩ imarigicĩirie;
Ciĩko icio irĩ mbere ya ũthiũ wakwa.
3 Makenagia mũthamaki na waganu wao,
Na magakenia anene na maheeni mao.
4 Othe nĩ itharia,
Makanaga ta riiko rĩakĩtio nĩ mũrugi wa mĩgate,
Ũrĩa ũtigaga gwakĩrĩria mwaki thutha wa gũkima mũtu nginya rĩrĩa ũrĩimba.
5 Mũthenya wa mũthamaki witũ-rĩ, anene nĩ marwarĩte
—Nĩ marakarĩte nĩ ũndũ wa ndibei.+
Nĩ atambũrũkĩirie anyũrũrania guoko gwake.
6 Nĩ gũkorũo makuhagĩrĩria marĩ na ngoro irakana ta riiko.*
Mũrugi wa mĩgate akomaga ũtukũ wothe;
Rũcinĩ riiko rĩakanaga ta mwaki ũrarĩrĩmbũka.
7 Othe nĩ ahiũ ta riiko,
Na nĩ matamburaga athani* ao.
8 Efiraimu nĩ atukanaga na ndũrĩrĩ.+
Efiraimu ahaana ta keki ya gĩthiũrũrĩ ĩtigĩtwo ĩtarĩ ngarũre.
9 Ageni nĩ marĩĩte hinya wake,+ no we ndamenyaga.
Na njuĩrĩ ciake irĩ na mbuĩ, no we ndonaga.
10 Mwĩtĩo wa Isiraeli nĩ ũrutĩte ũira mũũru ũmũkoniĩ,+
O na kũrĩ ũguo wothe, maticokereire Jehova Ngai wao,+
O na matimũcarĩtie.
11 Efiraimu atariĩ ta ndutura ngĩgu, ĩtarĩ na wĩcirio.*+
Nĩ makaĩire Misiri;+ nĩ mathiĩte Ashuri.+
12 Kũrĩa guothe megũthiĩ, nĩ ngaatambũrũkia neti yakwa igũrũ rĩao.
Ngaamaharũrũkia ta nyoni cia rĩera-inĩ.*
Nĩ ngaamaherithia kũringana na mũkaana ũrĩa waheirũo kĩrĩndĩ kĩao.+
13 Kaĩ marĩ na haaro-ĩ, tondũ nĩ morĩte makanjeherera!
Mwanangĩko ũromakora, tondũ nĩ manjĩhĩirie!
Nĩ ndehaarĩirie kũmakũũra, no nĩ marĩtie maheeni igũrũ rĩakwa.+
14 Matiangaĩire kuuma ngoro-inĩ ciao nĩguo ndĩmateithie,+
O na gũtuĩka maaikaraga makĩrĩraga marĩ marĩrĩ-inĩ mao.
15 O na gũtuĩka nĩ ndamarũngire na ngĩmekĩra hinya moko,
Nĩ manjũkagĩrĩra, makabanga kũnjĩka ũũru.
16 Nĩ maacenjirie mĩthiĩre, no ti harĩ ũndũ mũtũũgĩru makĩria;*
O ta ũta mũregeru, matiarĩ a kwĩhokwo.+
Anene ao makooragwo na rũhiũ rwa njora nĩ ũndũ wa nĩmĩ ciao nemi.
Nĩ ũndũ ũcio nĩ magaatuĩka kĩndũ gĩa kũnyũrũrio bũrũri-inĩ wa Misiri.”+
8 “Ĩkĩra coro kanua-inĩ gaku!+
Thũ ĩroka ta nderi gũũkĩrĩra nyũmba ya Jehova,+
Nĩ gũkorũo nĩ mathũkĩtie kĩrĩkanĩro gĩakwa+ na makagarara watho wakwa.+
2 Mangayagĩra makoiga atĩrĩ, ‘Ngai wakwa, ithuĩ Isiraeli nĩ tũkũũĩ!’+
3 Isiraeli nĩ aregete ũndũ ũrĩa mwega.+
Arothingatwo nĩ thũ.
4 Nĩ mathuurĩte athamaki, no ti kũgerera harĩ niĩ.
Nĩ mathuurĩte anene, no niĩ ndiametĩkĩrire.
5 Njaũ yaku nĩ ĩregetwo, wee Samaria.+
Marakara makwa nĩ marakana kũmerekera.+
Hihi megũtũũra maremetwo nĩ gũikara matarĩ ũcuke* nginya rĩ?
6 Nĩ gũkorũo yumĩte Isiraeli.
Yathondekirũo nĩ bundi, nayo ti Ngai;
Njaũ ĩyo ya Samaria ĩgaathũkangio ĩtuĩke tũcunjĩ.
7 Nĩ gũkorũo marahanda rũhuho,
Na makaagetha rũhuho rũnene.+
Na kĩngĩruta, andũ a kũngĩ* nĩo makaaũmeria.+
8 Isiraeli nĩ makaamerio.+
Rĩu marĩkoragwo gatagatĩ-inĩ ka ndũrĩrĩ,+
Mahaana o ta kĩndũ gĩtangĩendeka.
9 Nĩ gũkorũo nĩ mambatĩte magathiĩ Ashuri,+ o ta ndigiri ya gĩthaka ĩrĩ iki.
Efiraimu nĩ arĩhĩte andũ matuĩke endwa ake.+
10 O na gũtuĩka marĩhaga endwa acio kuuma gatagatĩ-inĩ ka ndũrĩrĩ,
Rĩu nĩ ngũmacokanĩrĩria;
Nĩ mekwambĩrĩria kũnyarirĩka+ nĩ ũndũ wa mũrigo ũrĩa maigĩrĩirũo nĩ mũthamaki na anene.
11 Tondũ Efiraimu nĩ akĩte igongona nyingĩ na ũndũ ũcio ũgatũma ehie.+
Ciatuĩkire igongona ciake cia kwĩhia.+
13 Mandutagĩra magongona marĩ iheo, na makarĩa nyama icio,
No Jehova ndakenagio nĩmo.+
Rĩu nĩ ekũririkana mahĩtia mao na amaherithie nĩ ũndũ wa mehia mao.+
Nĩ magarũrũkĩte magacoka* Misiri.+
14 Isiraeli nĩ ariganĩirũo nĩ Mũũmbi wake+ na nĩ akĩte hekarũ,+
Nake Juda nĩ aingĩhĩtie matũũra make marĩa marĩ na ũgitĩri.+
No nĩ ngaatũma mwaki ũthiĩ matũũra-inĩ macio make,
Na nĩ ũgaacina nyũmba iria ndaya na igũrũ cia o itũũra.”+
9 “Ndũgakene, wee Isiraeli,+
Ndũgakũngũĩre ta ikundi cia andũ.
Tondũ kũgerera ũmaraya nĩ ũtiganĩte na Ngai waku.+
Nĩ wendete mũcara wa ũmaraya ũrĩa wamũkagĩra kĩhuuhĩro-inĩ o gĩothe kĩa ngano.*+
3 Matigaathiĩ na mbere gũtũũra bũrũri-inĩ wa Jehova;+
Handũ ha ũguo, andũ a Efiraimu magaacoka Misiri,
Na nĩ makaarĩa indo iria irĩ thahu marĩ Ashuri.+
Matariĩ ta mũgate wa macakaya;
Andũ arĩa othe marĩũrĩaga nĩ marĩĩthahagia.
Tondũ mũgate wao nĩ wao oiki;
Ndũkaarehwo nyũmba-inĩ ya Jehova.
5 Hihi mũgeeka atĩa mũthenya wa gũcemania,*
Mũthenya wa gĩathĩ kĩa Jehova?
6 Tondũ rĩrĩ, nĩ makoora nĩ ũndũ wa mwanangĩko.+
Misiri nĩ ĩkaamacokanĩrĩria hamwe,+ nayo Memufisi ĩmathike.+
Thabai nĩ ũkeegwatĩra indo ciao cia goro cia betha,
Na hema-inĩ ciao gũgaakorũo na ihinga cia mĩigua.
7 Matukũ ma ituĩro nĩ magaakinya,+
Matukũ ma kũherithio nĩ magaakinya,
Na andũ a Isiraeli nĩ makaamenya.
Mũnabii wao agaakorũo arĩ mũkĩgu, na mũndũ ũrĩa uugaga arĩ na roho agaatuĩka mũgũrũki;
Tondũ mahĩtia manyu nĩ maingĩ, nĩ mũmenetwo mũno.”
8 Mũrangĩri+ wa Efiraimu aakoragwo hamwe na Ngai wakwa.+
No njĩra ciothe cia anabii ake+ rĩu itariĩ ta mĩtego ya mũtegi wa nyoni;
Kũrĩ na rũmena thĩinĩ wa nyũmba ya Ngai wake.
9 Nĩ marikĩire mũno ũũru-inĩ, o ta matukũ-inĩ ma Gibea.+
Nĩ akaaririkana mahĩtia mao na amaherithie nĩ ũndũ wa mehia mao.+
10 “O ta thabibũ irĩ werũ-inĩ, nĩ ndonire Isiraeli.+
O ta ngũyũ cia mbere iria ciambaga kwĩruha cia mũtĩ wa mũkũyũ, nĩ ndonire maithe manyu ma tene.
No nĩ maathiire kũrĩ Baali ya Peori;+
Makĩĩyamũrĩra kĩndũ kĩrĩa gĩa gĩconoko,*+
Na magĩtuĩka kĩndũ kĩrĩ magigi o ta kĩndũ kĩu mendete.
11 Riri wa Efiraimu ũmbũkaga ũgathiĩ o ta nyoni;
Gũtirĩ gũciara, gũtirĩ kũgĩa nda, na gũtirĩ kuoha nda.+
12 O na mangĩrera ciana,
Nĩ ngaatũma morũo nĩcio nginya kwage mũndũ ũgũtigara;+
Rĩrĩa ngaamatiganĩria-rĩ, kaĩ nĩ magaakorũo na haaro-ĩ!+
13 Efiraimu, ahandĩtwo kũndũ gwa kũrĩithia, aatariĩ ta Turo harĩ niĩ;+
Rĩu Efiraimu no mũhaka arute ciana ciake ithiĩ ikooragwo.”
14 Atĩrĩrĩ Jehova, mahe kĩrĩa wagĩrĩirũo kũmahe;
Ũmahe nda ĩrĩa ĩhunaga na nyondo itarĩ iria.*
15 “Waganu wao wothe wekĩirũo Giligali,+ tondũ marĩ kũu nĩ ndamathũrire.
Tondũ wa ciĩko ciao njũru nĩ ngaamaingata moime nyũmba-inĩ yakwa.+
Ndigaacoka kũmenda rĩngĩ;+
Anene ao othe nĩ aremi.
16 Efiraimu nĩ akaahũũrũo.+
Mũri wao nĩ ũkooma, na matikaaruta maciaro.
O na mangĩgaaciara ciana, nĩ ngooraga rũciaro rũu rwao mendete.”
17 Ngai wakwa nĩ akaamarega,
Nĩ gũkorũo nĩ maregete kũmũthikĩrĩria,+
Na magaatuĩka andũ a kũũrũra gatagatĩ-inĩ ka ndũrĩrĩ.+
10 “Isiraeli nĩ mũthabibũ mũũru* ũrĩa ũrutaga maciaro maguo.+
O ũrĩa maciaro make maingĩhaga, noguo ongagĩrĩra igongona ciake;+
O ũrĩa bũrũri wake ũrutaga maciaro mega, noguo itugĩ ciake cia kũhoywo igĩaga riri.+
2 Ngoro yao ĩrĩ na ũhinga;*
Rĩu nĩ mekuonwo marĩ na mahĩtia.
Nĩ harĩ ũrĩa ũkooinanga igongona ciao na anange itugĩ ciao.
3 Rĩu nĩ mekuuga atĩrĩ, ‘Tũtirĩ na mũthamaki,+ nĩ gũkorũo tũtiĩtigĩrĩte Jehova.
Na hihi nĩ atĩa mũthamaki angĩtwĩkĩra?’
4 Maragia ciugo cia tũhũ, makehĩta mĩĩhĩtwa ya maheeni,+ na makagĩa na irĩkanĩro;
Nĩ ũndũ ũcio ituĩro rĩrĩa riumagĩra, rĩtariĩ ta mĩmera ĩrĩ thumu ĩmerete mĩtaro-inĩ ya mũgũnda.+
5 Aikari a Samaria nĩ makaamaka nĩ ũndũ wa mũhianano wa njaũ wa Bethi-aveni.+
Andũ aguo nĩ makaaũcakaĩra,
O hamwe na athĩnjĩri-ngai a ngai ngʼeni arĩa maakenaga nĩ ũndũ waguo na riri waguo,
Nĩ gũkorũo nĩ ũkaameherera ũtwarũo ithamĩrio.
6 Ũgaatwarũo Ashuri ũtuĩke kĩheo kĩa mũthamaki mũnene.+
Efiraimu nĩ agaaconorithio,
Na Isiraeli nĩ ĩgaaconoka nĩ ũndũ wa ũtaaro ũrĩa yarũmĩrĩire.+
7 Hatarĩ nganja Samaria na mũthamaki wakuo nĩ makaaniinwo,*+
O ta karũhonge gakohokete karĩ igũrũ rĩa maĩ.
8 Kũndũ kũrĩa gũtũũgĩru kwa Bethi-aveni,+ o kuo mehia ma Isiraeli,+ nĩ gũkaaniinwo.+
Mĩigua na ria nĩ ikaamera igongona-inĩ ciao.+
Andũ makeera irĩma atĩrĩ, ‘Tũhumbĩrei!’
O na tũrĩma matwĩre atĩrĩ, ‘Tũgwĩrei!’+
9 Kuuma matukũ-inĩ ma Gibea ũtũũrĩte wĩhagia,+ wee Isiraeli.
Nĩ makĩrĩrĩirie marĩ kũu.
Mbaara ndĩakinyĩire* andũ arĩa matarĩ athingu kũu Gibea.
10 Ningĩ nĩ ngaamaherithia rĩrĩa ngenda.
Na ikundi cia andũ nĩ igaacokanĩrĩra imokĩrĩre,
Rĩrĩa makoohererũo mehia mao merĩ.*
11 Efiraimu aarĩ mori ĩmenyeretio ĩrĩa yeendete kũhũũra ngano,
Na kwoguo ndiigana kuoherera icoki ngingo-inĩ yake thaka.
Rĩu nĩ ngũtũma mũndũ atwarithie* Efiraimu.+
Juda nĩ agaacimba; Jakubu nĩ akaamũhũũrĩra hianyũ.*
12 Mwĩhandĩrei mbeũ kũringana na ũthingu na mũgethe wendo mwĩhokeku.
Mwĩcimbĩrei mũgũnda ũtarĩ mũrĩme+
Rĩrĩa kũrĩ na ihinda rĩa gũcaria Jehova,+
Nginya rĩrĩa agooka na amũrute kũringana na ũthingu.+
13 No inyuĩ mũcimbĩte waganu,
Mũgethete maũndũ matarĩ ma ũthingu,+
Na nĩ mũrĩĩte maciaro ma maheeni;
Nĩ gũkorũo mwĩhokete njĩra yanyu ene,
Mũkehoka njamba cianyu nyingĩ cia ita.
14 Mbugĩrĩrio ya mbaara nĩ ĩgookĩrĩra andũ aku,
Na matũũra maku marĩa marĩ na ũgitĩri nĩ makaanangwo mothe,+
O ta mwanangĩko ũrĩa warehirũo nĩ Shalimani wa nyũmba ya Arabeli,
Mũthenya wa mbaara rĩrĩa manyina ma twana maabacanirio magĩtuĩka tũcunjĩ hamwe na twana twao.
15 Ũguo nĩguo ũgeekwo, wee Betheli,+ nĩ ũndũ wa waganu waku mũingĩ.
Ti itherũ, mũthamaki wa Isiraeli akaaniinwo* rũcinĩ gũgĩkĩa.”+
Magĩgĩthiĩ na mbere kũrutĩra mĩhianano ya Baali magongona+
Na kũrutĩra mĩhianano ya gwacũhio magongona.+
3 Ĩndĩ nĩ niĩ ndarutire Efiraimu gwĩtwara,+ ndĩmanyitĩte na moko makwa;+
Na matiamenyire atĩ nĩ niĩ ndamahonetie.
4 Ndaikaraga ngĩmagucagia na mĩkwa ya andũ,* ngamagucia na mĩhĩndo ya wendo;+
Na harĩ o ndatariĩ ta mũndũ ũreheria icoki thĩa-inĩ ciao,
Na nĩ ndatwaragĩra o ũmwe wao irio na njĩra ya wendo.
5 Matigaacoka bũrũri-inĩ wa Misiri, no Ashuri nĩyo ĩgaatuĩka mũthamaki wao,+
Tondũ nĩ maaregire kũnjokerera.+
6 Na rũhiũ rwa njora nĩ rũkaabĩrĩrĩka rũũkĩrĩre matũũra mao+
Na rwanange mĩgamba yao na rũmatambure nĩ ũndũ wa njama ciao.+
7 Andũ akwa mehotorete gũkorũo matarĩ ehokeku harĩ niĩ.+
O na gũtuĩka nĩ maametire mokĩre na igũrũ,* gũtirĩ mũndũ ũũkĩraga.
8 Ingĩkĩhota atĩa gũgũtiganĩria, wee Efiraimu?+
Ingĩkĩhota atĩa gũkũneana, wee Isiraeli?
Ingĩkĩhota atĩa gũgwĩka ta Adima?
Ingĩkĩhota atĩa gũgũtua ta Zeboimu?+
9 Ndigaaitũrũra marakara makwa mahiũ.
Ndikaananga Efiraimu rĩngĩ,+
Nĩ gũkorũo niĩ ndĩ Ngai no ndirĩ mũndũ,
O niĩ Ũrĩa Mũtheru gatagatĩ-inĩ kanyu;
Na ndigooka harĩ inyuĩ ndĩ na mangʼũrĩ.
10 Nĩ makaarũmĩrĩra Jehova, nake nĩ akaararama ta mũrũthi;+
Rĩrĩa akaararama, ariũ ake magooka makĩinainaga kuuma mwena wa ithũĩro.+
11 Makaainaina o ta nyoni makiuma Misiri,
Mainaine o ta ndutura makiuma bũrũri wa Ashuri;+
Na nĩ ngaatũma maikarage nyũmba-inĩ ciao,” ũguo nĩguo Jehova ekuuga.+
12 “Efiraimu andigicĩirie na maheeni,
Nayo nyũmba ya Isiraeli ĩkandigicĩria na maũndũ matarĩ ma ma.+
Ĩndĩ Juda no atwaranaga na Ngai,
Na nĩ mwĩhokeku harĩ Ũrĩa Mũtheru Mũno.”+
12 “Efiraimu arĩaga rũhuho.
Ahanyũkagia rũhuho rwa mwena wa irathĩro mũthenya wothe.
Nĩ aingĩhagia maheeni na maũndũ ma ũhinya.
Marĩkanagĩra kĩrĩkanĩro na Ashuri+ na magatwara maguta Misiri.+
2 Jehova arĩ na ciira na Juda;+
Nĩ akaaherithia Jakubu kũringana na mĩthiĩre yake,
Na nĩ akaamũrĩha kũringana na ciĩko ciake.+
3 Nĩ aanyitire mũrũ wa nyina ndiira arĩ thĩinĩ wa nda ya nyina,+
Na akĩgiana na Ngai akĩhũthĩra hinya wake.+
4 Aaikarire akĩgianaga na mũraika na agĩtooria.
Akĩrĩra na akĩmũthaitha amũrathime.”+
Ngai aamũkorire Betheli, na kũu nĩkuo aaririe na ithuĩ,+
6 “Nĩ ũndũ ũcio, cokerera Ngai waku,+
Tũũria wendo mwĩhokeku o na kĩhooto,+
Na hingo ciothe wĩrĩgagĩrĩre Ngai waku.
7 No guoko-inĩ kwa mũhũũri biacara kũrĩ na ratiri cia maheeni;
Nĩ endete gũtunyana.+
Na harĩ wĩra wakwa wothe wa mĩnoga, matingĩona ũndũ o wothe mũũru kana mehia.’
9 No niĩ nĩ niĩ Jehova Ngai waku kuuma rĩrĩa warĩ bũrũri-inĩ wa Misiri.+
Nĩ ngaatũma ũtũũrage thĩinĩ wa hema o rĩngĩ
O ta matukũ-inĩ ma ihinda rĩrĩa rĩtuĩtwo.*
11 Thĩinĩ wa Gileadi nĩ gũkoretwo na maheeni*+ o na maũndũ matarĩ ma ma.
Thĩinĩ wa Giligali nĩ marutĩte ndegwa magongona,+
Na igongona ciao itariĩ ta hĩba cia mahiga irĩ mĩtaro-inĩ ya mũgũnda.+
12 Jakubu nĩ oorire agĩthiĩ gĩcigo-inĩ kĩa* Aramu;*+
Isiraeli+ aatungatire kũu nĩguo agĩe na mũtumia,+
Na akĩrangĩra ngʼondu nĩguo agĩe na mũtumia.+
14 Efiraimu nĩ arakarĩtie Ngai mũno;+
Mahĩtia make ma ũiti wa thakame megũikara igũrũ rĩake;
Mwathani wake nĩ akaamũrĩha nĩ ũndũ wa gĩconoko kĩrĩa aamũreheire.”+
13 “Efiraimu aaragia, andũ makainaina;
Aarĩ mũtĩĩku thĩinĩ wa Isiraeli.+
No nĩ aagĩire na mahĩtia ũhoro-inĩ wĩgiĩ Baali+ na agĩkua.
2 Rĩu nĩ kuongerera mongagĩrĩra mehia mao
Na magathondeka mĩhianano ya cuma* makĩhũthĩra betha ciao;+
Mathondekaga mĩhianano na njĩra ya ũũgĩ, yothe ĩrĩ wĩra wa mabundi.
Moigaga ũũ ũhoro-inĩ wayo, ‘Andũ arĩa marutaga magongona nĩ mamumunye njaũ icio.’+
3 Nĩ ũndũ ũcio magaatuĩka ta matu ma rũcinĩ,
Ta ime rĩrĩa rĩthiraga tene,
Ta mahuti marĩa mombũragwo nĩ kĩhuhũkanio kuuma kĩhuuhĩro-inĩ,
Na matuĩke ta ndogo ĩrĩa yumagĩra irima-inĩ rĩrĩ nyũmba igũrũ.
4 No niĩ nĩ niĩ Jehova Ngai waku kuuma rĩrĩa warĩ bũrũri-inĩ wa Misiri;+
Gũtirĩ Ngai ũngĩ woĩ tiga niĩ,
Na gũtirĩ mũhonokia ũngĩ tiga niĩ.+
5 Nĩ ndakũĩ ũrĩ werũ-inĩ,+ bũrũri-inĩ ũrĩa ũtoiraga mbura.
6 Kũndũ kwao gwa kũrĩithia nĩ gwatũmire mahũne,+
Makĩhũna nacio ngoro ciao ikĩgĩa mwĩtĩo.
Nĩ ũndũ ũcio makĩriganĩrũo nĩ niĩ.+
7 Ngaahaana ta mũrũthi mwĩthĩ harĩ o,+
Haane ta ngarĩ yohetie njĩra-inĩ.
8 Ngaamoimĩrĩra ta nduba yũrĩtwo nĩ twana twayo,
Na nĩ ngaatarũra gĩthũri kĩao.*
Ngaamatambura ta mũrũthi marĩ kũu;
Nyamũ ya gĩthaka nĩ ĩkaamatinangia tũcunjĩ tũcunjĩ.
9 Nĩ ĩgaakwananga, wee Isiraeli,
Tondũ nĩ wanjũkĩrĩire, ũgĩũkĩrĩra mũteithia waku.
10 Mũthamaki waku akĩrĩ ha, nĩgetha akũhonokie matũũra-inĩ maku mothe,+
O na athani* aku, arĩa woigire atĩrĩ ũhoro-inĩ wao,
‘Ta he mũthamaki na ũhe anene’?+
12 Mahĩtia ma Efiraimu nĩ mohetwo;*
Mehia make nĩ maigĩtwo.
13 Nĩ akaanyitwo nĩ ruo ta rwa mũtumia akĩgĩa mwana.
Ĩndĩ we nĩ mwana ũtarĩ mũũgĩ;
Ndeyumagĩria rĩrĩa ihinda rĩa gũciarũo rĩakinya.
Mboora* ciaku irĩ ha, wee Gĩkuũ?+
Ũhoti waku wa kwananga ũrĩ ha, wee Mbĩrĩra?+
Ũcayanĩri nĩ ũkũhithwo kuuma maitho-inĩ makwa.
15 O na angĩgaacĩra gatagatĩ-inĩ ka mathanjĩ,
Rũhuho rwa mwena wa irathĩro nĩ rũgooka, o ruo rũhuho rwa Jehova,
Rũũke ruumĩte werũ-inĩ, nĩgetha rũhũithie gĩthima gĩake na rũniarithie itherũkĩro rĩake.
Ũcio nĩ agaataha kũrĩa kĩgĩna kĩigagwo oe indo ciake ciothe cia goro.+
16 Samaria nĩ akooneka atĩ arĩ na mahĩtia,+ tondũ nĩ aremeire Ngai wake.+
Makooragwo na rũhiũ rwa njora,+
Ciana ciao ikaabacanio ituĩke tũcunjĩ,
Na atumia ao arĩa marĩ na nda matarũrũo nda ciao.”
14 “Cokerera Jehova Ngai waku, wee Isiraeli,+
Nĩ gũkorũo nĩ ũhĩngĩkĩte nĩ ũndũ wa mahĩtia maku.
2 Cokerera Jehova na ciugo ici,
Ũmwĩre atĩrĩ, ‘Tuohere mahĩtia maitũ+ na wĩtĩkĩre ũndũ ũrĩa mwega,
Na ithuĩ nĩ tũgũkũrutĩra igongona rĩa gũkũgooca rĩa mĩromo itũ+ o ta ũrĩa tũngĩkũrutĩra tũtegwa.*
3 Ashuri ndĩgaatũhonokia.+
Tũtigũtwarithia mbarathi,+
Na tũtigũcoka kwĩra wĩra wa moko maitũ atĩrĩ, “Wee ũrĩ Ngai witũ!”
Tondũ wee nĩwe wonanagia tha kũrĩ mwana ũrĩa ũtarĩ ithe.’+
4 Nĩ ngaamahonia na matigaacoka gũkorũo matarĩ ehokeku rĩngĩ.+
5 Ngaatuĩka ta ime harĩ Isiraeli;
Agaacanũka o ta ihũa rĩa itoka
Na atware mĩri yake na thĩ o ta mĩtĩ ya Lebanoni.
6 Honge ciake nĩ igaatherema,
Riri wake ũgaakorũo ũtariĩ ta wa mũtĩ wa mũtamaiyũ,
Na mũtararĩko wake ũkorũo ũtariĩ ta wa Lebanoni.
7 Nĩ magaatũũra rĩngĩ kĩĩruru-inĩ gĩake.
Nĩ makaahanda ngano* na marute kĩro o ta mũthabibũ.+
Ngumo yake* ĩgaakorũo ĩtariĩ ta ndibei ya Lebanoni.
8 Efiraimu nĩ akooria atĩrĩ, ‘Ndĩ na ũhoro ũrĩkũ ũngĩ na mĩhianano?’+
Nĩ ngaamũcokeria na ndĩmũmenyerere.+
Ngaakorũo ndariĩ ta mũtĩ mũruru wa mũthengera.
Maciaro maku makoimaga harĩ niĩ.”
9 Hihi nũũ ũrĩ na ũũgĩ? Nĩ agĩtaũkĩrũo nĩ maũndũ macio.
Nũũ ũrĩ na ũtaũku? Nĩ akĩmamenye.
Nĩ gũkorũo njĩra cia Jehova nĩ nũngĩrĩru,+
Na andũ arĩa athingu nĩ marĩgeraga thĩinĩ wacio;
No andũ arĩa ehia nĩ marĩhĩngagwo njĩra-inĩ icio.
Nĩ rĩĩtwa Hoshaia rĩkuhĩhĩtio, na riugĩte “Ahonoketio nĩ Ja; Ja Nĩ Ahonoketie.”
Rĩĩtwa rĩu riugĩte “Ngai nĩ Akaahanda Mbeũ.”
Kana “Kĩanda-inĩ kĩa.”
Rĩĩtwa rĩu riugĩte “Ũtaiguĩrĩirũo Tha.”
Rĩĩtwa rĩu riugĩte “Ti Andũ Akwa.”
Ũkk., “ariũ.”
Rora Ho 1:9 kohoro ka magũrũ-inĩ.
Rora Ho 1:6 kohoro ka magũrũ-inĩ.
Kana “cairi.”
Kana “ndibei ya mũhihano.”
Kana “cairi.”
Kana “ndibei yakwa ya mũhihano.”
Kana “Kĩanda kĩa.”
Kana “Baali wakwa.”
Kana “nyoni cia igũrũ.”
Kana “ngaareka matũũre.”
Kana “cairi.”
Kana “ndibei ya mũhihano.”
Rĩĩtwa rĩu riugĩte “Ngai nĩ Akaahanda Mbeũ.”
Rora Ho 1:6 kohoro ka magũrũ-inĩ.
Rora Ho 1:9 kohoro ka magũrũ-inĩ.
Icio nĩ iria ciahũthagĩrũo harĩ ũthathaiya wa maheeni.
Homeri ĩmwe yaiganaine na lita 220. Rora Ũhoro Muongerere B14.
Kana “na ũguo noguo ndĩrĩkaga gũkwerekera.”
Ũkk., “matukũ maingĩ.”
Kana “ngai cia mũciĩ.”
Kana “nyoni cia igũrũ.”
Kana “ngaaniina.”
Kana “makaaniinwo.”
Kana “ũrutani.”
Kana hihi, “Nĩ makũũranĩtie riri wakwa mwene na gĩconoko.”
Kana “ndibei ya mũhihano.”
Ũkk., “Nĩ cieheragia ngoro.”
Kana “rũthanju rwao rwa mũragũri.”
Kana “njohi ya ngano.”
Ũkk., “ngo ciake nĩ ciendete.”
Kana “nĩ rũkaamũhaata rũmweherie.”
Kana “nĩ meingĩrĩtie.”
Kana “nĩ ngaamaherithia.”
Ũkk., “kwerekera ũthiũ wake.”
No kũhoteke nĩ ciana iciarĩtwo nĩ atumia a kũngĩ kwoguo igakorũo ciamũranĩtio na Ngai.
Nĩ mweri wa thikũ.
Kana hihi, “Ihinda-inĩ rĩa mweri ũmwe nĩ megũtamburũo.”
Kana “mĩgũnda yao.”
Kana “mũrũthi mwĩthĩ wa njamba.”
Kana “tha.”
Kana hihi, “Nĩ gũkorũo ngoro ciao ihaana ta riiko hĩndĩ ĩrĩa marakuhĩrĩria marĩ na mawara mao.
Ũkk., “aciirithania.”
Ũkk., “ĩtarĩ ngoro.”
Kana “nyoni cia igũrũ.”
Kana “cairi.”
Kana “ndibei ya mũhihano.”
Ũguo nĩ kuuga, ti harĩ mũthemba wa ũthathaiya mwega makĩria.
Kana “metheretie.”
Kana “cairi.”
Kana “cairi.”
Kana “irũgamĩte.”
Kana “ageni.”
Kana “ũrutani.”
Kana hihi, “Nĩ magaacoka.”
Kana “cairi.”
Kana “ndibei ya mũhihano.”
Kana “iruga rĩanyu rĩamũre.”
Kana “ngai ĩrĩa ya gĩconoko.”
Kana “hohu.”
Kana hihi, “ũratherema.”
Kana “nĩ ndenderũ; nĩ nyoroku.”
Ũkk., “magaakirio.”
Kana “ndĩaniinire biũ.”
Ũguo nĩ kuuga, rĩrĩa magaakuua iherithia rĩao ta icoki.
Kana “aigĩrĩre matandĩko igũrũ rĩa.”
Kana “harũ.”
Ũkk., “agaakirio.”
Acio nĩ anabii na andũ angĩ arĩa maatũmagwo kũruta Aisiraeli.
Kana “mĩkwa ya ũtugi,” o ta ĩrĩa ya mũciari.
Ũguo nĩ kuuga, harĩ mũthemba wa ũthathaiya mwega makĩria.
Ũkk., “nĩ ũhiũhĩte.”
Kana “nĩrĩo rĩĩtwa rĩrĩa aririkanagwo narĩo.”
Kana hihi, “ma gĩathĩ.”
Kana “maũndũ marĩ kĩriga.”
Ũkk., “mũgũnda-inĩ wa.”
Kana “Siria.”
Kana “mĩhianano ya gũtwekio.”
Ũkk., “harĩa ngoro yao ĩhingĩirũo.”
Ũkk., “atuanĩri ciira.”
Kana “maigĩtwo.”
Kana “Sheoli,” ũguo nĩ kuuga, mbĩrĩra ya mũhaano kũrĩa akuũ makomete. Rora Ũthathaũri wa Ciugo.
Nĩ mĩguĩ ta ya njũkĩ.
Ũkk., “nĩ tũgũkũrutĩra tũtegwa twa mĩromo itũ.”
Kana “cairi.”
Ũkk., “Kĩririkano gĩake.”