MARŨA MA KERĨ KŨRĨ AKORINTHO

1 Nĩ niĩ Paulo, mũtũmwo wa Kristo Jesu kũgerera wendi wa Ngai, na Timotheo+ mũrũ wa Ithe witũ, kũrĩ kĩũngano kĩa Ngai kĩrĩa kĩrĩ Korintho, o hamwe na andũ othe aamũre arĩa marĩ Akaia guothe:+

2 Mũrogĩa na ũtugi mũnene na thayũ kuuma kũrĩ Ngai Ithe witũ na Mwathani Jesu Kristo.

3 Ngai na Ithe wa Mwathani witũ Jesu Kristo arogoocwo,+ o we Ithe witũ ũrĩ tha njororo+ na Ngai mwene ũhoro wothe wa kũũmanĩrĩria,+ 4 ũrĩa ũtũũmagĩrĩria* magerio-inĩ* maitũ mothe+ nĩgetha tũhote kũũmĩrĩria arĩa angĩ+ igerio-inĩ o rĩothe* kũgerera kũũmĩrĩrio kũrĩa twamũkagĩra kuuma kũrĩ Ngai.+ 5 Nĩ gũkorũo o ta ũrĩa mĩnyamaro ĩrĩa tuonaga nĩ ũndũ wa Kristo ĩingĩhĩte thĩinĩ witũ,+ no taguo kũũmĩrĩrio kũrĩa twamũkagĩra kũgerera Kristo kũingĩhĩte. 6 Atĩrĩrĩ, tũngĩcemania na magerio,* tũcemanagia namo nĩguo mũũmĩrĩrio na mũhonokio; na angĩkorũo nĩ tũromĩrĩrio, tũũmagĩrĩrio nĩguo mũũmĩrĩrio, ũndũ ũcio ũkamũteithia gũkirĩrĩria mĩnyamaro o ta ĩrĩa ĩtũkoraga o na ithuĩ. 7 Na kĩĩrĩgĩrĩro kĩrĩa tũkoragwo nakĩo nĩ ũndũ wanyu nĩ kĩrũmu, tũkĩmenyaga atĩ o ũrĩa mũnyitanagĩra harĩ mĩnyamaro, noguo mũkaanyitanĩra harĩ kũũmĩrĩrio.+

8 Tondũ rĩrĩ ariũ a Ithe witũ, tũtikwenda mwage kũmenya ũhoro wĩgiĩ thĩna ũrĩa twacemanirie naguo gĩcigo-inĩ kĩa Asia.+ Twarĩ hatĩka-inĩ nene mũno ĩkĩrĩte ũhoti witũ, ũũ atĩ tũtiarĩ na ũũma kana nĩ tũgũtũũra muoyo.+ 9 Ti itherũ, twaiguaga ta twamũkĩrĩte ituĩro rĩa gĩkuũ. Gwekĩkire ũguo nĩgetha tũtikeĩhoke ithuĩ ene, ĩndĩ twĩhokage Ngai+ ũrĩa ũriũkagia arĩa akuũ. 10 Nĩ aatũhonokirie ũgwati-inĩ ũcio mũnene wa gĩkuũ na no egũtũhonokia, na kĩĩrĩgĩrĩro gitũ kĩrĩ harĩ we atĩ no egũthiĩ na mbere gũtũhonokia.+ 11 O na inyuĩ no mũtũteithie na njĩra ya gũtũthaithanĩrĩra,+ nĩgetha andũ aingĩ macokagie ngatho ithenya ritũ nĩ ũndũ wa ũtugi ũrĩa twamũkagĩra ũrĩ macokio ma mahoya ma andũ aingĩ.*+

12 Tondũ ũndũ ũrĩa twĩrahagĩra nĩ ũyũ, atĩ thamiri citũ nĩ itũrutagĩra ũira atĩ thĩinĩ wa thĩ, na makĩria harĩ inyuĩ, nĩ tũkoretwo na mĩthiĩre mĩega, tũrĩ na ũtheru na wĩhokeku ũrĩa uumanaga na Ngai, ti kũringana na ũũgĩ wa kĩĩmwĩrĩ,+ ĩndĩ nĩ kũringana na ũtugi mũnene wa Ngai. 13 Nĩ gũkorũo tũtiramwandĩkĩra igũrũ rĩgiĩ ũndũ ũngĩ o tiga maũndũ marĩa mũngĩhota gũthoma* na gũtaũkĩrũo, na ndĩrerĩgĩrĩra atĩ nĩ mũgũthiĩ na mbere gũtaũkĩrũo nĩ maũndũ macio biũ,* 14 o ta ũrĩa mũtaũkĩirũo na gĩkĩro kĩna atĩ ithuĩ tũrĩ gĩtũmi kĩanyu gĩa kwĩraha, o ta ũrĩa na inyuĩ mũgaatuĩka gĩtũmi gitũ gĩa kwĩraha hĩndĩ ya mũthenya ũrĩa wa Mwathani witũ Jesu.

15 Nĩ ũndũ wa gũkorũo na ũũma ũcio, nĩ ndendaga kwamba gũka kũrĩ inyuĩ, nĩgetha mũgĩe na ihinda rĩa kerĩ rĩa gũkena;* 16 nĩ gũkorũo ndendaga kũmũceerera ngĩthiĩ Makedonia, na njoke kũrĩ inyuĩ ngiuma Makedonia, na thutha ũcio mũnyumagarie ngĩthiĩ Judea.+ 17 Atĩrĩrĩ, rĩrĩa ndendaga gwĩka ũguo-rĩ, hihi nĩ ndahũthirie ũndũ ũcio? Kana hihi bangaga maũndũ na njĩra ya kĩĩmwĩrĩ, nĩguo ngoiga “Ĩĩ, ĩĩ” ngacoka ngoiga “Aca, aca”? 18 No Ngai nĩ wa kwĩhokeka atĩ maũndũ marĩa tũmwĩraga inyuĩ, tũtiugaga “ĩĩ” tũgacoka tũkoiga “aca.” 19 Nĩ gũkorũo Jesu Kristo Mũrũ wa Ngai, ũrĩa wahunjirio gatagatĩ-inĩ kanyu kũgerera harĩ ithuĩ, ũguo nĩ kuuga, kũgerera harĩ niĩ na Silvano* na Timotheo,+ ndaatuĩkire “ĩĩ” agĩcoka agĩtuĩka “aca,” ĩndĩ “ĩĩ” nĩ ĩtuĩkĩte “ĩĩ” ũhoro-inĩ wake. 20 Tondũ o na ciĩranĩro cia Ngai irĩ nyingĩ atĩa, ituĩkĩte “ĩĩ” kũgerera harĩ we.+ Nĩ ũndũ ũcio, ningĩ kũgerera harĩ we “Ameni” nĩ yugagwo kũrĩ Ngai,+ ĩkamũrehera riri kũgerera harĩ ithuĩ. 21 No ũrĩa wĩkĩraga mũkonde atĩ inyuĩ o hamwe na ithuĩ tũrĩ a Kristo na ũrĩa watũitĩrĩirie maguta nĩ Ngai.+ 22 Ningĩ nĩ atwĩkĩrĩte mũhũũri wake+ na agatũhe ũũma wa* maũndũ marĩa magooka, ũguo nĩ kuuga roho,+ thĩinĩ wa ngoro citũ.

23 Ngai nĩ mũira wakwa atĩ njagĩte gũka Korintho tondũ wa kũmũcaĩra. 24 Ti atĩ ithuĩ tũrĩ athani igũrũ rĩa wĩtĩkio wanyu,+ ĩndĩ tũrĩ arutithania wĩra hamwe na inyuĩ nĩgetha mũgĩe na gĩkeno, tondũ mũrũgamĩte nĩ ũndũ wa wĩtĩkio wanyu.

2 Nĩ gũkorũo nĩ nduĩte atĩ ndigũka rĩngĩ kũrĩ inyuĩ na kĩeha. 2 Tondũ ingĩmũiguithia kĩeha-rĩ, nũũ ũngĩgĩkorũo ho wa gũtũma ngene tiga o ũcio njiguithĩtie kĩeha? 3 Ndamwandĩkĩire maũndũ macio nĩguo hĩndĩ ĩrĩa ngooka ndikanaiguithio kĩeha nĩ arĩa njagĩrĩirũo nĩ gũkena nĩo, nĩ gũkorũo ndĩ na ma atĩ kĩrĩa kĩndehagĩra gĩkeno nĩ kĩmũrehagĩra gĩkeno o ro kĩu inyuothe. 4 Nĩ gũkorũo ndamwandĩkĩire ndĩ na thĩna mũnene na ruo rwa ngoro na maithori, ti nĩguo ndĩmũiguithie kĩeha,+ no nĩgetha mũmenye atĩ nĩ ndĩmwendete mũno.

5 Angĩkorũo nĩ harĩ mũndũ ũtũmĩte kũgĩe na kĩeha,+ ti niĩ aiguithĩtie kĩeha, no nĩ inyuĩ inyuothe aiguithĩtie kĩeha na gĩkĩro kĩna—ũhoro-inĩ ũcio ndikwenda kuuga maũndũ maingĩ. 6 Iherithia rĩu andũ aingĩ maherithĩtie mũndũ wa mũthemba ũcio nĩ rĩiganu; 7 rĩu mwagĩrĩirũo kũmuohera na ũtugi na mũmũũmĩrĩrie+ nĩguo ndagatoorio* nĩ kĩeha kĩingĩ.+ 8 Nĩ ũndũ ũcio-rĩ, ndĩramwĩhoya mũmuonie atĩ nĩ mũmwendete.+ 9 Ũndũ ũyũ ningĩ nĩguo watũmire ndĩmwandĩkĩre: nĩguo menye kana nĩ mũkuonania atĩ nĩ mwathĩkaga maũndũ-inĩ mothe. 10 Mũngĩohera mũndũ ũndũ o na ũrĩkũ-rĩ, o na niĩ mũndũ ũcio nĩ ndamuohera. Atĩrĩrĩ, ũndũ o wothe ndanohanĩra (kũngĩkorũo nĩ kũrĩ ũndũ ndanohanĩra) ndawohanĩire nĩ ũndũ wanyu, ndĩ mbere ya Kristo, 11 nĩguo tũtikanahootwo* nĩ Shaitani,+ tondũ tũtirigĩtwo nĩ mawara make.*+

12 Rĩu-rĩ, hĩndĩ ĩrĩa ndakinyire Teroa+ kũhunjia ũhoro ũrĩa mwega wĩgiĩ Kristo na ngĩhingũrĩrũo mũrango thĩinĩ wa Mwathani-rĩ, 13 roho wakwa ndwarĩ na thayũ nĩ ũndũ wa kwaga gũkora mũrũ wa Ithe witũ Tito.+ Nĩ ũndũ ũcio ngiugĩra ariũ a Ithe witũ ũhoro, ngĩthiĩ Makedonia.+

14 No rĩrĩ, tũracokeria Ngai ngatho, o we hingo ciothe ũtũtongoragia thĩinĩ wa kĩrũrũngano gĩa gũkũngũĩra ũhootani tũgwatanĩire na Kristo na kũgerera harĩ ithuĩ agatheremia* mũtararĩko wa ũmenyo wake kũndũ guothe! 15 Tondũ harĩ Ngai ithuĩ tũrĩ mũtararĩko mwega wa Kristo gatagatĩ-inĩ ka arĩa marahonokio na gatagatĩ-inĩ ka arĩa maraniinwo; 16 harĩ acio a thutha, nĩ mũnungo* wa gĩkuũ ũrĩa ũtongoragia gĩkuũ-inĩ,+ na harĩ acio a mbere, nĩ mũtararĩko wa muoyo ũrĩa ũtongoragia muoyo-inĩ. Na nũũ mwagĩrĩru biũ wa gwĩka maũndũ macio? 17 Ithuĩ tũrĩ agĩrĩru, tondũ tũtihũũraga biacara* na kiugo kĩa Ngai+ ta ũrĩa andũ aingĩ mekaga, no twaragia tũrĩ na wĩhokeku wothe ta andũ matũmĩtwo nĩ Ngai, tũrĩ mbere ya Ngai na tũgwatanĩire na Kristo.

3 Kaĩ tũrambĩrĩria kwĩgaathĩrĩria kũrĩ inyuĩ o rĩngĩ? Kana rĩrĩ, kaĩ tũrabatara marũa ma kũgaathĩrĩrio kũrĩ inyuĩ kana kuuma kũrĩ inyuĩ ta ũrĩa andũ angĩ mekaga? 2 Inyuĩ nĩ inyuĩ marũa maitũ,+ marĩa mandĩkĩtwo ngoro-inĩ citũ, makamenyeka, na nĩ marathomwo nĩ andũ othe. 3 Nĩ gũkorũo nĩ muonanĩtio atĩ mũrĩ marũa ma Kristo mandĩkĩtwo nĩ ithuĩ tũrĩ ndungata,+ na matiandĩkĩtwo na rangi no mandĩkĩtwo na roho wa Ngai ũrĩa ũtũũraga muoyo, na matiandĩkĩtwo ihengere-inĩ cia mahiga,+ no mandĩkĩtwo ihengere-inĩ cia nyama, ngoro-inĩ.+

4 Tũrĩ na ũũma wa mũthemba ũcio harĩ Ngai kũgerera Kristo. 5 Ti atĩ ithuĩ ene tũrĩ agĩrĩru biũ a gwĩciria atĩ ũndũ o wothe uumaga kũrĩ ithuĩ, no ũhoro witũ wa gũkorũo tũrĩ agĩrĩru biũ uumaga kũrĩ Ngai,+ 6 o we kũna ũtũtuĩte agĩrĩru biũ nĩguo tũtuĩke ndungata cia kĩrĩkanĩro kĩerũ,+ ti cia watho mwandĩke,+ no nĩ cia roho; nĩ gũkorũo watho ũrĩa mwandĩke ũrehaga gĩkuũ,+ no roho ũrehaga muoyo.+

7 Angĩkorũo watho ũrĩa ũrehaga gĩkuũ o ũcio waandĩkĩtwo na ndemwa mahiga-inĩ,+ wokire na riri mũnene nginya ariũ a Isiraeli makĩremwo nĩ kũrora ũthiũ wa Musa nĩ ũrĩa ũthiũ wake warĩ na riri,+ o riri ũcio warĩ ũniinwo-rĩ, 8 nĩ kĩĩ kĩngĩgiria ũtungata wa roho+ ũkorũo na riri mũnene o na makĩria?+ 9 Tondũ angĩkorũo watho ũrĩa ũrehaga ituĩro+ warĩ na riri-rĩ,+ na githĩ ũtungata ũrĩa ũrehaga ũthingu ndũngĩkĩrĩ na riri mũnene o na makĩria!+ 10 Atĩrĩrĩ, o na kĩrĩa hĩndĩ ĩmwe kĩaheetwo riri nĩ kĩaũrĩtwo riri nĩ ũndũ wa riri ũrĩa ũgĩkĩrĩte.+ 11 Tondũ rĩrĩ, angĩkorũo kĩrĩa kĩarĩ kĩniinwo kĩarehetwo na riri-rĩ,+ githĩ kĩrĩa kĩratigara gĩtikĩrĩ na riri mũnene o na makĩria!+

12 Tondũ tũrĩ na kĩĩrĩgĩrĩro kĩu,+ tũrahũthĩra wĩyathi mũnene wa kwaria, 13 na tũtireka ta ũrĩa Musa eekire hĩndĩ ĩrĩa eehumbagĩra ũthiũ na taama+ nĩguo ariũ a Isiraeli matikarore na kinyi mũthia wa kĩrĩa kĩarĩ kĩniinwo. 14 No meciria mao nĩ maaritĩtio.+ Nĩ gũkorũo nginya ũmũthĩ ũyũ, taama ũcio ũtũũraga ũtarĩ mũguũrie hĩndĩ ĩrĩa kĩrĩkanĩro kĩrĩa gĩkũrũ kĩrathomwo,+ tondũ weheragio o kũgerera Kristo.+ 15 Atĩrĩrĩ, nginya ũmũthĩ ũyũ, hĩndĩ ĩrĩa yothe maandĩko ma Musa megũthomwo,+ ngoro ciao ikoragwo ihumbĩrĩtwo na taama.+ 16 No hĩndĩ ĩrĩa mũndũ agarũrũkĩra Jehova,* taama ũcio nĩ weheragio.+ 17 Jehova* nĩwe Roho,+ na harĩa roho wa Jehova* ũrĩ, nĩ hakoragwo na wĩyathi.+ 18 Na rĩrĩa ithuĩ ithuothe tũtarĩ ahumbĩre maitho na taama twenenia riri wa Jehova* ta icicio, nĩ tũgarũragwo nĩguo tũhaanane na mũhianĩre wake kuuma gĩkĩro kĩmwe kĩa riri nginya kĩrĩa kĩngĩ,* o ta ũrĩa tũgarũragwo nĩ Jehova,* o ũcio Roho.*+

4 Gũkĩrĩ ũguo-rĩ, tondũ tũrĩ na ũtungata ũyũ kũgerera tha iria tuoonirio, tũtikuaga ngoro. 2 No nĩ tũreganĩte na maũndũ ma thoni marĩa mehithĩte, tũtithiaga na mĩthiĩre ya wara na tũtiogomagia kiugo kĩa Ngai;+ ĩndĩ na njĩra ya kũmenyithania ũhoro wa ma, tuonanagia atĩ nĩ twagĩrĩire harĩ thamiri cia andũ othe maitho-inĩ ma Ngai.+ 3 Angĩkorũo ũhoro mwega ũrĩa tũhunjagia nĩ mũhumbĩre, ũhumbĩirũo harĩ arĩa maraniinwo, 4 arĩa gatagatĩ-inĩ kao ngai wa mũtabarĩre ũyũ wa maũndũ*+ atumumarĩtie meciria ma arĩa matetĩkĩtie,+ nĩguo ũtheri wa ũhoro ũrĩa mwega ũrĩ riri wĩgiĩ Kristo, o we mũhianĩre wa Ngai,+ ndũkamaarĩre.+ 5 Nĩ gũkorũo tũtirahunjia ũhoro witũ ithuĩ ene, ĩndĩ tũrahunjia ũhoro wĩgiĩ Jesu Kristo atĩ nĩwe Mwathani na atĩ ithuĩ tũrĩ ngombo cianyu nĩ ũndũ wa Jesu. 6 Nĩ ũndũ Ngai nĩwe woigire atĩrĩ: “Nĩ kware ũtheri nduma-inĩ,”+ na nĩ atũmĩte ũtheri warĩre ngoro citũ nĩguo acimũrĩke+ na ũmenyo ũrĩa ũrĩ riri wĩgiĩ Ngai kũgerera ũthiũ wa Kristo.

7 No rĩrĩ, tũrĩ na mũthithũ ũcio+ thĩinĩ wa indo cia rĩũmba,+ nĩgetha hinya ũrĩa ũkĩrĩte wa ndũire ũkorũo ũrĩ wa Ngai no ti kuuma kũrĩ ithuĩ.+ 8 Tũhatĩkagwo mũno na njĩra ciothe, no tũtihingagĩrĩrio tũkaremwo gũthiĩ; tũtukanagĩrũo, no tũtiagaga biũ njĩra ya kuumĩrĩra;*+ 9 tũnyariragwo, no tũtitiganagĩrio;+ tũgũithagio thĩ, no tũtianangagwo.+ 10 Hĩndĩ ciothe mwĩrĩ-inĩ witũ nĩ tũkiragĩrĩria maũndũ ma kũrehe gĩkuũ ta marĩa Jesu aanyamarĩkire namo,+ nĩguo muoyo wa Jesu o naguo wonekage mwĩrĩ-inĩ witũ. 11 Nĩ gũkorũo ithuĩ arĩa tũrĩ muoyo tũngʼethagĩra gĩkuũ hĩndĩ ciothe+ nĩ ũndũ wa Jesu, nĩgetha muoyo wa Jesu o naguo wonekage mĩĩrĩ-inĩ ĩno itũ ya gũkua. 12 Nĩ ũndũ ũcio, gĩkuũ nĩ kĩrutaga wĩra thĩinĩ witũ, no muoyo ũkaruta wĩra thĩinĩ wanyu.

13 Rĩu tondũ tũrĩ na roho o ũmwe wa wĩtĩkio ta ũrĩa kwandĩkĩtwo atĩrĩ: “Nĩ ndonanirie wĩtĩkio, nĩkĩo ndaririe”;+ o na ithuĩ nĩ tuonanagia wĩtĩkio, na nĩkĩo twaragia, 14 tũkĩmenyaga atĩ Ũrĩa wariũkirie Jesu nĩ agaatũriũkia o na ithuĩ hamwe na Jesu na atũtware mbere yake hamwe na inyuĩ.+ 15 Nĩ gũkorũo maũndũ macio mothe mekagwo nĩ ũndũ wanyu, nĩguo kuongerereka kwa ũtugi mũnene kũingĩhe o na makĩria tondũ andũ aingĩ makĩria nĩ maracokeria Ngai ngatho, na njĩra ĩyo makamũgooca.+

16 Nĩ ũndũ ũcio tũtikuaga ngoro, ĩndĩ o na gũtuĩka mũndũ witũ wa na nja athiaga agĩthiraga-rĩ, hatarĩ nganja mũndũ witũ wa na thĩinĩ athiaga akĩerũhagio mũthenya o mũthenya. 17 Tondũ o na gũtuĩka thĩna ũrĩa* tũcemanagia naguo nĩ wa ihinda inini na nĩ mũhũthũ-rĩ, ũtũmaga tũgĩe riri mũnene* ũkĩrĩrĩirie mũno makĩria na wa gũtũũra tene na tene;+ 18 o tũigĩte maitho maitũ harĩ maũndũ marĩa matonekaga, no ti marĩa monekaga.+ Nĩ gũkorũo maũndũ marĩa monekaga nĩ ma ihinda inini, no maũndũ marĩa matonekaga nĩ ma gũtũũra nginya tene na tene.

5 Tondũ nĩ tũĩ atĩ nyũmba itũ ya gũkũ thĩ, nĩyo hema ĩno, ĩngĩtharũrio,*+ nĩ tũkũheo mwako kuuma kũrĩ Ngai, nyũmba ĩtakĩtwo na moko,+ ya gũtũũra tene na tene igũrũ. 2 Nĩ gũkorũo nĩ tũcayaga mũno tũrĩ thĩinĩ wa nyũmba ĩno,* tũkerirĩria mũno kwĩhumba ĩrĩa itũ kuuma* igũrũ,*+ 3 nĩguo rĩrĩa tũkaamĩĩhumba, tũtikanakorũo tũrĩ njaga. 4 Ũrĩa kũrĩ nĩ atĩ, ithuĩ arĩa tũkoragwo thĩinĩ wa hema ĩno nĩ tũcayaga na tũkaritũhĩrũo, tondũ tũtiendaga kũmĩaũra, ĩndĩ no twendaga kwĩhumba ĩyo ĩngĩ,+ nĩguo kĩrĩa gĩkuaga kĩmerio nĩ muoyo.+ 5 Rĩu-rĩ, ũrĩa watũhaarĩirie nĩ ũndũ wa ũndũ ũyũ nĩ Ngai,+ o we watũheire roho ũrĩ ũũma wa* maũndũ marĩa magooka.+

6 Nĩ ũndũ ũcio, tũkoragwo na ũmĩrĩru mũnene hingo ciothe na tũkamenya atĩ ihinda rĩrĩa tũikaraga thĩinĩ wa mwĩrĩ arĩ guo mũciĩ witũ, tũtirĩ harĩ Mwathani,+ 7 nĩ gũkorũo tũthiaga na wĩtĩkio no ti na kuona. 8 No tũkoragwo na ũmĩrĩru mũnene na tũngĩenda gũkorũo tũtarĩ mwĩrĩ-inĩ ũyũ na tũthondeke mũciĩ witũ hamwe na Mwathani.+ 9 Nĩ ũndũ ũcio, o na kũngĩtuĩka atĩ tũgũkorũo mũciĩ hamwe nake kana tũgũkorũo tũtarĩ hamwe nake, muoroto witũ nĩ twĩtĩkĩrĩke nĩwe. 10 Nĩ gũkorũo no mũhaka ithuothe tũkaarũgama* mbere ya gĩtĩ gĩa ciira gĩa Kristo, nĩguo o mũndũ arĩhwo kũringana na maũndũ marĩa akoretwo agĩka arĩ thĩinĩ wa mwĩrĩ, marĩ mega kana marĩ moru.+

11 Nĩ ũndũ ũcio, tondũ nĩ tũĩ gwĩtigĩra Mwathani-rĩ, tũthiaga na mbere kũiguithia andũ, no nĩ tũĩkaine wega* nĩ Ngai. O na kũrĩ ũguo, ndĩrerĩgĩrĩra atĩ nĩ tũĩkaine wega* nginya harĩ thamiri cianyu. 12 Tũtiregaathĩrĩria kũrĩ inyuĩ rĩngĩ, no tũramũhe gĩtũmi gĩa kwĩraha nĩ ũndũ witũ, nĩguo mũhote gũcokeria arĩa merahaga nĩ ũndũ wa maũndũ marĩa monekaga na maitho+ no ti ũndũ wa marĩa marĩ thĩinĩ wa ngoro. 13 Tondũ angĩkorũo nĩ meciria twathũkĩte,+ twathũkĩte nĩ ũndũ wa Ngai; angĩkorũo tũrĩ na meciria mega, tũrĩ namo nĩ ũndũ wanyu. 14 Tondũ wendo ũrĩa Kristo akoragwo naguo nĩ ũtũtindĩkaga, nĩ gũkorũo ũũ nĩguo tuonete, atĩ mũndũ ũmwe nĩ aakuire nĩ ũndũ wa andũ othe;+ kwoguo, othe nĩ maakuĩte. 15 Na aakuire nĩ ũndũ wa andũ othe nĩguo arĩa matũũraga muoyo matigatũũre rĩngĩ nĩ ũndũ wao ene,+ no matũũre nĩ ũndũ wa ũcio wakuire nĩ ũndũ wao na akĩriũkio.

16 Kwoguo-rĩ, kuuma rĩu gũthiĩ na mbere gũtirĩ mũndũ tũĩ kũringana na muonere wa kĩĩmwĩrĩ.+ O na gũtuĩka kũrĩ hĩndĩ tuoĩ Kristo na njĩra ya kĩĩmwĩrĩ, hatarĩ nganja rĩu tũtimũĩ na njĩra ĩyo rĩngĩ.+ 17 Nĩ ũndũ ũcio, mũndũ o wothe angĩkorũo na ũiguano na Kristo, ũcio nĩ kĩũmbe kĩerũ;+ maũndũ marĩa ma tene nĩ maathirire; atĩrĩrĩ, rĩu kũrĩ na maũndũ merũ. 18 No maũndũ mothe moimaga kũrĩ Ngai, o we watũiguithanirie nake we mwene kũgerera Kristo+ na agĩtũhe ũtungata wa ũiguithanio,+ 19 naguo nĩ atĩ Ngai kũgerera Kristo nĩ aaiguithanirie thĩ harĩ we mwene,+ atekũmatarĩra mahĩtia mao,+ na agĩtwĩhokera ndũmĩrĩri ĩrĩa ya ũiguithanio.+

20 Kwoguo-rĩ, ithuĩ tũrĩ mabarũthi+ handũ-inĩ ha Kristo,+ ta Ngai arathaithana kũgerera harĩ ithuĩ. Tũrathaitha andũ ũũ handũ-inĩ ha Kristo: “Ĩtĩkĩrai kũiguithanio na Ngai.” 21 Ũrĩa ũtooĩ mehia,+ aamũtuire mehia* nĩ ũndũ witũ, nĩguo kũgerera harĩ we tũtuĩke ũthingu wa Ngai.+

6 Tũkĩrutithania wĩra hamwe nake-rĩ,+ ningĩ twamũthaitha atĩ mũtikaamũkĩre ũtugi mũnene wa Ngai na mwage kũmenya muoroto waguo.+ 2 Nĩ gũkorũo oigĩte atĩrĩ: “Ihinda rĩrĩa rĩarĩ rĩtĩkĩrĩku, nĩ ndagũthikĩrĩirie, na mũthenya wa ũhonokio nĩ ndagũteithirie.”+ Atĩrĩrĩ, rĩrĩ nĩrĩo ihinda rĩrĩa rĩtĩkĩrĩku makĩria. Atĩrĩrĩ, ũmũthĩ nĩguo mũthenya wa ũhonokio.

3 Ithuĩ tũtitũmaga kũgĩe na ũndũ o na ũmwe wa kũhĩngithia, nĩguo ũtungata witũ ndũkonerũo mahĩtia;+ 4 no tuonanagia na njĩra ciothe atĩ tũrĩ ndungata cia Ngai,+ kũgerera gũkirĩrĩria maũndũ maingĩ, mathĩna, mahinda ma wagi, moritũ,+ 5 kũhũũrũo, kuohwo njera,+ ngũĩ, wĩra mũritũ, kũraara tũtarĩ toro, mahinda ma kwaga irio;+ 6 kũgerera mũtũũrĩre mũtheru, ũmenyo, wetereri,+ ũtugi,+ roho mũtheru, wendo ũtarĩ ũhinga,+ 7 kwaragia ma, hinya wa Ngai;+ kũgerera matharaita ma ũthingu+ guoko-inĩ kwa ũrĩo* na kwa ũmotho,* 8 kũgerera riri na kwagĩrũo gĩtĩo, kũmenererio na kũgaathĩrĩrio. Tuonagwo tũrĩ andũ a maheeni no twaragia ma, 9 tuonagwo ta tũtoĩkaine no nĩ tũĩkaine, tũkonwo ta tũrakua* no tũrĩ o muoyo,+ ta tũherithĩtio no tũtineanĩtwo harĩ gĩkuũ,+ 10 tuonagwo ta tũrĩ na kĩeha no tũkoragwo tũkenete hingo ciothe, ta tũrĩ athĩni no tũtongagia andũ aingĩ, tũkonwo ta tũtarĩ kĩndũ no tũkoragwo na indo ciothe.+

11 Tũhingũrĩte tũnua twitũ tũmwarĩrie* inyuĩ Akorintho, na tũkahingũra ngoro citũ biũ. 12 Tũtihingĩrĩirie* wendo witũ harĩ inyuĩ,+ no inyuĩ nĩ mũhingĩrĩirie wendo wanyu muororo harĩ ithuĩ. 13 Nĩ ũndũ ũcio—ndĩraria na inyuĩ ta mũrĩ ciana ciakwa—o na inyuĩ hingũrai ngoro cianyu biũ.*+

14 Mũtikohanio* ũrĩa gũtagĩrĩire icoki-inĩ rĩmwe na andũ matarĩ etĩkia.+ Tondũ rĩrĩ, nĩ ngwatanĩro ĩrĩkũ ĩkoragwo ho gatagatĩ ka ũthingu na uuni-watho?+ Kana rĩrĩ, gũkoragwo na ũiguano ũrĩkũ gatagatĩ ka ũtheri na nduma?+ 15 Makĩria ma ũguo-rĩ, gũkoragwo na ũiguano ũrĩkũ gatagatĩ ga Kristo na Beliari?*+ Kana rĩrĩ, nĩ ũndũ ũrĩkũ mũndũ mwĩtĩkia* manyitanagĩra* na mũndũ ũtarĩ mwĩtĩkia?+ 16 Ningĩ gũkoragwo na ũiguano ũrĩkũ gatagatĩ ka hekarũ ya Ngai na mĩhianano?+ Nĩ gũkorũo ithuĩ tũrĩ hekarũ ya Ngai ũrĩa ũtũũraga muoyo;+ o ta ũrĩa Ngai ooigire atĩrĩ: “Nĩ ndĩikaranagia nao+ na thiage ndĩ gatagatĩ-inĩ kao, na nĩ ngaatuĩka Ngai wao, nao matuĩke andũ akwa.”+ 17 “‘Nĩ ũndũ ũcio-rĩ, umai gatagatĩ-inĩ kao, na mwĩyamũranie nao,’ ũguo nĩguo Jehova* ekuuga, ‘ningĩ mũtige kũhutia kĩndũ gĩtarĩ gĩtheru’”;+ “‘na nĩ ngũmwamũkĩra.’”+ 18 “‘Na nĩ ngũtuĩka ithe wanyu,+ na inyuĩ mũtuĩke ariũ na aarĩ akwa,’+ ũguo nĩguo Jehova* Mwene-Hinya-Wothe ekuuga.”

7 Nĩ ũndũ ũcio inyuĩ endwa akwa-rĩ, tondũ tũrĩ na ciĩranĩro icio,+ nĩ twĩtheriei ũndũ o wothe ũrĩa ũngĩthahia mwĩrĩ na roho,+ tũgĩtũmaga ũtheru witũ ũkinyanĩre ũhoro-inĩ wa gwĩtigĩra Ngai.

2 Tũhei mweke ngoro-inĩ cianyu.+ Gũtirĩ mũndũ tũhĩtĩirie, gũtirĩ mũndũ tũthũkĩtie, na gũtirĩ mũndũ tũheenetie nĩguo twĩgune.+ 3 Ndiroiga ũguo nĩgetha ndĩmũtuĩre. Nĩ gũkorũo ndanoiga atĩ mũrĩ ngoro-inĩ citũ nĩguo tũkue hamwe na tũtũũre muoyo hamwe. 4 Ndĩ na wĩyathi mũnene wa kwaria na inyuĩ. Nĩ ndĩrahaga mũno nĩ ũndũ wanyu. Nĩ nyũmĩrĩirio mũno; nĩ njiyũrĩrĩirũo nĩ gĩkeno mĩnyamaro-inĩ itũ yothe.+

5 Atĩrĩrĩ, hĩndĩ ĩrĩa twakinyire Makedonia-rĩ,+ mĩĩrĩ itũ ndĩagĩire* na ũhurũko, no twathiire o na mbere gũthĩnio na njĩra ciothe—nja kwarĩ na ngũĩ, na thĩinĩ kwarĩ na guoya. 6 Ĩndĩ Ngai, o we ũũmagĩrĩria arĩa makuĩte ngoro,+ nĩ aatũmĩrĩirie kũgerera gũkorũo kuo gwa Tito; 7 na to gũkorũo kuo gwake gwiki no nginya nĩ ũndũ wa ũrĩa oomĩrĩirio nĩ ũndũ wanyu, o ta ũrĩa aatũreheire ũhoro wanyu atĩ nĩ mũrerirĩria kũnyona, atĩ mũrĩ na kĩeha kĩingĩ, na atĩ nĩ mũratangĩka mũno* nĩ ũndũ wakwa; nĩ ũndũ ũcio ngĩkena o na makĩria.

8 Tondũ o na gũtuĩka nĩ ndamwĩkĩrire kĩeha marũa-inĩ makwa,+ ndiĩriraga nĩ gwĩka ũguo. O na gũtuĩka kĩambĩrĩria-inĩ nĩ nderirire ũndũ ũcio (nĩ gũkorũo marũa macio nĩ maamwĩkĩrire kĩeha, o na gũtuĩka no kwa ihinda inini), 9 rĩu nĩ ngenaga, ti tondũ nĩ mwagĩire na kĩeha, ĩndĩ nĩ tondũ kĩeha kĩu nĩ gĩatũmire mwĩrire. Nĩ gũkorũo mwagĩire na kĩeha na njĩra ya ũngai, na kwoguo gũtirĩ ũũru muoonire nĩ ũndũ witũ. 10 Nĩ gũkorũo kũgĩa na kĩeha na njĩra ya ũngai gũtũmaga mũndũ ahere mehia na ahonokio, akaga kwĩriraga ũndũ-inĩ o na ũmwe;+ no kĩeha gĩa gũkũ thĩ kĩrehaga gĩkuũ. 11 Tondũ rĩrĩ, githĩ mũtikĩonete ũrĩa kĩeha kĩu mũgĩĩte na njĩra ya ũngai gĩtũmĩte mũgĩe na kĩyo kĩnene, mwĩyehererie mahĩtia, mũrakario nĩ maũndũ moru, mũgĩe na guoya, mũgĩe na wendi mũnene, mũgĩe na kĩyo, na mũrũnge mahĩtia!+ Nĩ muoonanirie na njĩra ciothe atĩ mũrĩ atheru* ũndũ-inĩ ũcio. 12 O na gũtuĩka nĩ ndamwandĩkĩire, ndiandĩkire nĩ ũndũ wa mũndũ ũrĩa wehĩtie,+ o na kana nĩ ũndũ wa ũrĩa wehĩirio, ĩndĩ ndamwandĩkĩire nĩgetha kĩyo kĩanyu nĩ ũndũ witũ kĩoneke gatagatĩ-inĩ kanyu maitho-inĩ ma Ngai. 13 Nĩkĩo tũũmĩrĩirio.

No makĩria ma kũũmĩrĩrio, ithuĩ nĩ twakenire o na makĩria nĩ ũndũ wa gĩkeno gĩa Tito, nĩ gũkorũo inyuothe nĩ mwacanjamũrire roho wake. 14 Tondũ angĩkorũo nĩ ndĩrahĩte harĩ we nĩ ũndũ wanyu-rĩ, ndiconokete; no rĩrĩ, o ta ũrĩa maũndũ marĩa mothe twamwĩrire inyuĩ maarĩ ma ma, noguo kwĩraha gwitũ harĩ Tito gũtuĩkĩte kwa ma. 15 Ningĩ, wendo wake muororo harĩ inyuĩ nĩ mũnene aririkana wathĩki wanyu inyuothe,+ ũrĩa mwamwamũkĩrire mũrĩ na guoya na mũkĩinainaga. 16 Nĩ ngenaga atĩ maũndũ-inĩ mothe no ngorũo na mwĩhoko harĩ inyuĩ.*

8 Rĩu ariũ a Ithe witũ-rĩ, tũkwenda mũmenye ũhoro wa ũtugi mũnene wa Ngai ũrĩa ciũngano cia Makedonia cionetio.+ 2 Hĩndĩ ĩrĩa maarĩ na igerio inene rĩa mĩnyamaro, gĩkeno kĩao kĩnene na ũthĩni wao mũkĩru nĩ ciatũmire ũtonga wa ũtaana wao wongerereke.* 3 Tondũ niĩ ndĩ mũira atĩ meekire ũguo kũringana na ũhoti wao,+ o na makĩria ma ũhoti wao,+ 4 na magĩtũthaitha mũno meyendeire nĩguo maheo mweke wa kũheana na ũtugi, manyite itemi ũtungata-inĩ wa gũteithia arĩa aamũre.+ 5 Na matiekire o ũrĩa twerĩgĩrĩire tu, no maambire kwĩheana kũrĩ Mwathani na kũrĩ ithuĩ kũgerera wendi wa Ngai. 6 Nĩ ũndũ ũcio tũgĩĩkĩra Tito ngoro+ atĩ o ta ũrĩa aambĩrĩirie wĩra ũcio gatagatĩ-inĩ kanyu, arĩkĩrĩrie ũndũ ũcio wanyu wa kũheana na ũtugi. 7 O na kũrĩ ũguo, o ta ũrĩa mũkoragwo mũingĩhĩirũo nĩ maũndũ mothe, harĩ wĩtĩkio na kiugo na ũmenyo na kĩyo kĩingĩ na harĩ wendo witũ kũmwerekera inyuĩ, mũroingĩhĩrũo nginya ũhoro-inĩ ũcio wa kũheana na ũtugi.+

8 Ti kũmwatha ndĩramwatha ngiuga ũguo, no ndĩramũmenyithia ũhoro wa kĩyo kĩa arĩa angĩ na kũgeria kana wendo wanyu nĩ wa ma. 9 Tondũ nĩ mũĩ ũhoro wa ũtugi mũnene wa Mwathani witũ Jesu Kristo, atĩ o na gũtuĩka aarĩ mũtongu, aatuĩkire mũthĩni nĩ ũndũ wanyu,+ nĩgetha mũtonge kũgerera ũthĩni wake.

10 Na ũndũ-inĩ ũcio nĩ ngũheana mawoni makwa:+ Ũndũ ũyũ nĩ ũkũmũguna, tondũ mwaka ũmwe mũthiru nĩ mwaambĩrĩirie ũndũ ũcio na makĩria mũkĩonania wendi wanyu wa kũũruta. 11 Kwoguo-rĩ, kĩrĩkiei ũndũ ũrĩa mwaambĩrĩirie gwĩka, nĩgetha wendi wanyu wa kũwĩka ũrĩke kũringana na kĩrĩa mũrĩ nakĩo. 12 Tondũ rĩrĩ, angĩkorũo o mbere harĩ na wendi, ũndũ ũcio nĩ wĩtĩkĩrĩkĩte makĩria kũringana na kĩrĩa mũndũ arĩ nakĩo,+ no ti kũringana na kĩrĩa atarĩ nakĩo. 13 Nĩ gũkorũo ndikwenda kũhũthĩria arĩa angĩ, no inyuĩ ndĩmũritũhĩrie; 14 ĩndĩ na njĩra ya kũiganania, kũingĩhĩrũo kwanyu ihinda-inĩ rĩrĩ gũteithĩrĩrie wagi wao, nĩgetha kũingĩhĩrũo kwao gũteithĩrĩrie kũnyihĩrũo kwanyu, nĩguo kũgĩe na ũigananĩru. 15 O ta ũrĩa kwandĩkĩtwo ũũ: “Mũndũ ũrĩa ũrĩ na nyingĩ ndaagĩire na nyingĩ mũno, nake ũrĩa ũrĩ na nini ndaagĩire na nini mũno.”+

16 Nĩ tũracokeria Ngai ngatho nĩ ũndũ wa gwĩkĩra kĩyo o ta kĩu gĩa kũmũtangĩkĩra thĩinĩ wa ngoro ya Tito,+ 17 tondũ ti itherũ nĩ aamũkĩrire wega ũndũ ũrĩa twamwĩkĩrire ngoro eke, no nĩ ũndũ wa ũrĩa arĩ na wendi mũnene, egũka kũrĩ inyuĩ eyendeire. 18 No tũkũmũtũma hamwe na mũrũ wa Ithe witũ ũrĩa ngumo yake maũndũ-inĩ megiĩ ũhoro ũrĩa mwega ĩtheremete ciũngano-inĩ ciothe. 19 Na to ũguo tu, no ningĩ nĩ aamũrirũo nĩ ciũngano athiage hamwe na ithuĩ rĩrĩa tũraceerera ciũngano tũkĩheana kĩheo gĩkĩ kĩa ũtugi nĩguo Mwathani agoocwo na tuonanie wendi witũ wa gũteithia. 20 Nĩ ũndũ ũcio nĩ tũrethema hatigakorũo mũndũ o na ũrĩkũ ũngĩtuonera mahĩtia ũhoro-inĩ wĩgiĩ mũhothi ũcio wa ũtaana twĩhokeirũo kũheana.+ 21 Nĩ gũkorũo ‘tũrũmbũyagia maũndũ mothe na wĩhokeku, to maitho-inĩ ma Jehova* no nĩ nginya maitho-inĩ ma andũ.’+

22 Makĩria ma ũguo, tũramatũma hamwe na mũrũ wa Ithe witũ ũngĩ ũrĩa tũgeretie maita maingĩ tũkona atĩ nĩ arĩ kĩyo maũndũ-inĩ maingĩ, no rĩu arĩ na kĩyo kĩnene makĩria nĩ ũndũ wa mwĩhoko wake mũnene harĩ inyuĩ. 23 No rĩrĩ, angĩkorũo nĩ harĩ kĩũria o gĩothe kĩgiĩ Tito, ũcio nĩ mũthiritũ wakwa* na mũrutithania wĩra hamwe na niĩ nĩguo mũgunĩke; kana angĩkorũo nĩ harĩ ciũria ciĩgiĩ ariũ a Ithe witũ, acio nĩ atũmwo a ciũngano na riri wa Kristo. 24 Hakĩrĩ ũguo-rĩ, onaniai ũira wa wendo wanyu harĩ o,+ na muonie ciũngano kĩrĩa gĩatũmire twĩrahe nĩ ũndũ wanyu.

9 Rĩu-rĩ, ha ũhoro wa ũtungata ũrĩa ũheagwo arĩa aamũre,+ ndikuona bata wa kũmwandĩkĩra, 2 nĩ gũkorũo nĩ njũĩ wendi wanyu ũrĩa ũtũmaga ndĩĩrahe harĩ andũ a Makedonia, atĩ andũ a Akaia makoretwo mehaarĩirie mwaka mũgima rĩu, na kĩyo kĩanyu nĩ kĩrurumũrĩte aingĩ ao. 3 No rĩu ndĩratũma ariũ acio a Ithe witũ, nĩguo kwĩraha gwitũ nĩ ũndũ wanyu gũtigatuĩke gwa tũhũ ũhoro-inĩ ũcio na nĩguo mũkorũo mwĩhaarĩirie kũna, o ta ũrĩa ndoigire atĩ nĩ mũgũkorũo mwĩhaarĩirie. 4 Korũo andũ a Makedonia no moke hamwe na niĩ na tũkore mũtehaarĩirie-rĩ, to ithuĩ tũngĩconoka nĩ ũndũ wa ũrĩa tũmwĩhokete, ĩndĩ o na inyuĩ no mũconoke. 5 Nĩ ũndũ ũcio ndonire hagĩrĩire njĩkĩre ngoro ariũ a Ithe witũ acio moke kũrĩ inyuĩ o mbere, mahaarĩrie kabere kĩheo kĩa ũtaana kĩrĩa mweranĩire, nĩguo gĩkorũo kĩhaarĩirio kĩrĩ kĩheo kĩa ũtaana, no ti kĩndũ gĩa kũringĩrĩrio.

6 No ũhoro-inĩ ũcio-rĩ, mũndũ ũrĩa ũhandaga tũnini, akaagetha o tũnini, nake ũrĩa ũhandaga nyingĩ akaagetha nyingĩ.+ 7 O mũndũ nĩ eke o ta ũrĩa atuĩte ngoro-inĩ yake, no ti atekwenda* kana ta arĩ kũringĩrĩrio,+ nĩ gũkorũo Ngai endete mũndũ ũheanaga akenete.+

8 Makĩria ma ũguo, Ngai no ahote gũtũma mũingĩhĩrũo nĩ ũtugi wake mũnene wothe, nĩguo hingo ciothe mũkoragwo na kĩrĩa gĩothe mũbataraga, na ningĩ mũgĩe na ũingĩ wa kĩrĩa kĩbataranagia nĩ ũndũ wa wĩra o wothe mwega.+ 9 (O ta ũrĩa kwandĩkĩtwo ũũ: “Nĩ aheanĩte na gĩkĩro kĩnene;* nĩ aheete andũ arĩa athĩni. Ũthingu wake ũtũũraga tene na tene.”+ 10 Rĩu-rĩ, Ũrĩa ũheaga mũhandi mbegũ kwa ũingĩ na akaheana mũgate wa kũrĩa, nĩ ekũmũhe na amuongerere mbegũ cia kũhanda, na aingĩhie magetha ma ũthingu wanyu.) 11 Maũndũ-inĩ mothe nĩ mũtongagio nĩ ũndũ wa ũtaana wa mĩthemba yothe, na ũndũ ũcio nĩ ũtũmaga Ngai acokerio ngatho kũgerera harĩ ithuĩ; 12 tondũ wĩra ũyũ wa gũtungatĩra mũingĩ to wa kũhe arĩa aamũre mabataro mao wega,+ no ningĩ nĩ ũtũmaga kũgĩe na ũtonga wa ngatho nyingĩ kũrĩ Ngai. 13 Kũgerera ũira ũrĩa ũrutagwo nĩ ũtungata ũyũ wa kũheana ũteithio, nĩ magoocaga Ngai tondũ inyuĩ nĩ mwathĩkagĩra ũhoro ũrĩa mwega wĩgiĩ Kristo, o ta ũrĩa mũhunjĩtie mũingĩ-inĩ, na tondũ mũkoragwo mũrĩ ataana na mĩhothi yanyu harĩ o, na harĩ andũ othe.+ 14 Na kũgerera mathaithana mao nĩ ũndũ wanyu, nĩ monanagia wendo wao harĩ inyuĩ tondũ wa ũrĩa mũingĩhĩirũo nĩ ũtugi mũnene wa Ngai.

15 Ngai arocokerio ngatho nĩ ũndũ wa kĩheo gĩake kĩrĩa aaheanire o ũguo tũhũ, o kĩu gĩtangĩhota gũtaarĩrio.

10 Rĩu-rĩ, niĩ Paulo, ndamũthaitha kũgerera ũhooreri na ũtugi wa Kristo,+ o na gũtuĩka ndikoragwo na hinya rĩrĩa ndĩ hamwe na inyuĩ ũthiũ kwa ũthiũ,+ no ngoragwo na ũcamba kũmwerekera hĩndĩ ĩrĩa itarĩ hamwe na inyuĩ.+ 2 Ndamũthaitha atĩ hĩndĩ ĩrĩa ngaakorũo hamwe na inyuĩ, mũtigatũme ngaakorũo na ũcamba wa kuoya ikinya irũmu rĩrĩa ndĩrerĩgĩrĩra kuoera andũ amwe arĩa monaga ta tũthiaga na njĩra ya kĩĩmwĩrĩ. 3 Tondũ o na gũtuĩka tũthiaga na mwĩrĩ, tũtirũaga mbaara kũringana na ũrĩa tũtariĩ thĩinĩ wa mwĩrĩ. 4 Tondũ matharaita ma mbaara itũ ti ma kĩĩmwĩrĩ,+ no nĩ marĩ hinya nĩ ũndũ wa Ngai,+ wa gũtharũria maũndũ marĩa marũmĩte mũno. 5 Nĩ gũkorũo nĩ gũtharũria tũratharũria mĩĩcirĩrie na ũndũ o wothe mũtũũgĩru ũrĩa ũreganaga na ũmenyo wa Ngai,+ na tũkanyita meciria mothe mĩgwate nĩguo mathĩkagĩre Kristo; 6 na nĩ twĩhaarĩirie kũherithania nĩ ũndũ wa gĩĩko o gĩothe gĩtarĩ kĩa wathĩki,+ hĩndĩ ĩrĩa wathĩki wanyu ũrĩkinyanĩra.

7 Inyuĩ mũroraga maũndũ kũringana na ũrĩa monekaga na igũrũ. Angĩkorũo nĩ harĩ mũndũ o wothe wĩtĩkĩtie biũ atĩ we nĩ wa Kristo, nĩ ecirie o rĩngĩ ũndũ ũyũ wa ma: O ta ũrĩa we arĩ wa Kristo no taguo o na ithuĩ tũrĩ ake. 8 Nĩ gũkorũo o na ingĩĩraha mũno nĩ ũndũ wa wathani ũrĩa Mwathani aatũheire wa kũmwaka inyuĩ no ti wa kũmũmomora,+ ndingĩconorithio. 9 Tondũ ndikwenda kuoneka ta ndageragia kũmũmakia kũgerera marũa makwa. 10 Nĩ gũkorũo moigaga atĩrĩ: “Marũa make nĩ marĩ ũritũ na hinya mũnene, no hĩndĩ ĩrĩa we mwene arĩ hamwe na ithuĩ ndakoragwo na hinya o na ciugo ciake nĩ cia tũhũ.” 11 Mũndũ ta ũcio nĩ amenye atĩ ũrĩa tuugaga* marũa-inĩ tũtarĩ hamwe na inyuĩ, ningĩ nĩ tũkaawĩka* rĩrĩa tũgooka.+ 12 Nĩ gũkorũo tũtigeragia kwĩiganania kana kwĩringithania na andũ amwe arĩa megaathagĩrĩria.+ No hĩndĩ ĩrĩa methima na o ene na makeringithania o nao ene, matikoragwo na ũtaũku.+

13 No rĩrĩ, tũtikwĩraha nja ya mĩhaka ĩrĩa tũgaĩirũo, o tiga thĩinĩ wa mũhaka wa gĩcigo kĩrĩa Ngai atũthimĩire,* agatũma gĩkinye nginya kũrĩ inyuĩ.+ 14 Atĩrĩrĩ, ti mĩhaka itũ tũrakĩra ta tũtaakinyĩte kũrĩ inyuĩ, nĩ gũkorũo nĩ ithuĩ twarĩ a mbere gũka nginya kũrĩ inyuĩ tũrĩ na ũhoro ũrĩa mwega wĩgiĩ Kristo.+ 15 Aca, tũtireraha nja ya mĩhaka ĩrĩa tũgaĩirũo, atĩ twĩrahagĩre wĩra wa mũndũ ũngĩ, no tũrerĩgĩrĩra atĩ o ũrĩa wĩtĩkio wanyu ũgũthiĩ na mbere kuongerereka, maũndũ marĩa tũhingĩtie nĩ mekuongerereka, o thĩinĩ wa gĩcigo kĩrĩa tũgaĩirũo. Na ithuĩ nĩ tũkũingĩhĩrũo o na makĩria, 16 nĩguo tũhunjie ũhoro ũrĩa mwega mabũrũri-inĩ marĩa marĩ mbere ya kwanyu, nĩgetha tũtikerahagĩre maũndũ marĩa mahingĩtio gĩcigo-inĩ kĩa mũndũ ũngĩ. 17 “No mũndũ ũrĩa ũkwĩraha, nĩ erahe nĩ ũndũ wa Jehova.”*+ 18 Nĩ gũkorũo mũndũ ũrĩa wĩgaathagĩrĩria tiwe wĩtĩkĩrĩkaga,+ no nĩ ũrĩa Jehova* agaathagĩrĩria.+

11 Na arĩ korũo no mũkirĩrĩrie ũrimũ mũnini ũrĩa ndĩ naguo. No ũrĩa kũrĩ nĩ atĩ nĩ mũrangirĩrĩria! 2 Nĩ gũkorũo ndĩ na ũiru nĩ ũndũ wanyu, na nĩ ũiru wa ũngai,* tondũ niĩ mwene nĩ ndatũmire mũgĩe kĩrĩko gĩa gũkaahikio nĩ mũthuri ũmwe, nĩguo ngaamũneana mũrĩ ta mũirĩtu gathirange na mũtheru kũrĩ Kristo.+ 3 No ndĩ na guoya atĩ, o ta ũrĩa nyoka yaheenereirie Hawa na wara wayo,+ meciria manyu mahota gũthũkio mũtigane na wĩhokeku na ũtheru ũrĩa wagĩrĩire Kristo.+ 4 Nĩ gũkorũo ũrĩa kũrĩ nĩ atĩ, mũndũ angĩũka ahunjie ũhoro wa Jesu ũngĩ tiga ũrĩa twahunjirie ũhoro wake, kana mwamũkĩre roho ũngĩ tiga ũrĩa mwaamũkĩrire, kana ũhoro mwega ũngĩ tiga ũrĩa mwetĩkĩrire,+ nĩ mwamũkagĩra mũndũ ta ũcio na ihenya. 5 Tondũ nguona atĩ ndikĩrĩtwo ũndũ-inĩ o na ũmwe nĩ atũmwo acio anyu ega mũno.+ 6 No o na angĩkorũo ndirĩ ũhoti mwega wa kwaria,+ hatarĩ nganja nĩ ngoragwo na ũmenyo; ti itherũ nĩ twamuonirie wega ũndũ ũcio na njĩra ciothe maũndũ-inĩ mothe.

7 Kana hihi nĩ mehia ndekire ndenyihia nĩgetha inyuĩ mũtũũgĩrio, tondũ nĩ ndamũhunjĩirie ũhoro ũrĩa mwega wa Ngai ngenete itekũmũrĩhia?+ 8 Nĩ gũtunya ndatunyire ciũngano iria ingĩ na njĩra ya gwĩtĩkĩra ũteithio wao nĩguo ndĩmũtungatĩre.+ 9 No rĩrĩ, rĩrĩa ndarĩ hamwe na inyuĩ na ngĩgĩa na mabataro, ndiatuĩkire mũrigo harĩ mũndũ o na ũrĩkũ, nĩ gũkorũo ariũ a Ithe witũ arĩa mookire kuuma Makedonia nĩ maaheire mabataro makwa na ũingĩ.+ Ĩni, nĩ ndegirĩrĩirie na njĩra ciothe ndigatuĩke mũrigo harĩ inyuĩ na no ngũthiĩ na mbere gwĩka ũguo.+ 10 O ta ũrĩa ũhoro wa ma wa Kristo ũrĩ thĩinĩ wakwa, ndigũtiga kwĩrahĩra ũndũ ũcio+ icigo-inĩ cia Akaia. 11 Nĩkĩ? Hihi nĩ tondũ ndimwendete inyuĩ? Ngai nĩ oĩ atĩ nĩ ndĩmwendete.

12 Ĩndĩ no ngũthiĩ na mbere gwĩka ũrĩa ndĩreka,+ nĩgetha njeherie kĩĩgwatio kĩa arĩa maracaria gĩtũmi* gĩa kuoneka maiganaine na ithuĩ maũndũ-inĩ marĩa* merahagĩra. 13 Nĩ gũkorũo andũ ta acio nĩ atũmwo a maheeni, aruti wĩra a maheeni, arĩa metuaga atũmwo a Kristo.+ 14 Na ũcio ti ũndũ wa kũgegania tondũ o na Shaitani we mwene aikaraga agĩĩtuaga mũraika wa ũtheri.+ 15 Na kwoguo ti ũndũ wa mwanya mũno ndungata ciake o nacio ingĩikara igĩĩtuaga ndungata cia ũthingu. No marigĩrĩrio ma cio magaakorũo maringaine o na ciĩko ciacio.+

16 O rĩngĩ ndĩroiga ũũ: Mũndũ o na ũrĩkũ ndagecirie atĩ ndĩ na ũrimũ. No o na mũngĩciria ũguo, mũkĩnjĩtĩkĩre ta mũndũ ũrĩ na ũrimũ, nĩgetha o na niĩ ndĩĩrahe hanini. 17 Ũrĩa ndĩroiga rĩu, ndiroiga ngĩrũmĩrĩra kĩonereria kĩa Mwathani, no nĩ ta ũrĩa mũndũ ũrĩ na ũrimũ angiuga, mũndũ ũreraha na wĩĩtĩkĩtie mũno. 18 Tondũ andũ aingĩ nĩ mareraha kũringana na mwĩrĩ-rĩ,* o na niĩ nĩ ngwĩraha. 19 Tondũ mũrĩ “ogĩ” mũno-rĩ, nĩkĩo mwamũkagĩra arĩa marĩ na ũrimũ mũkenete. 20 Mwamũkagĩra mũndũ o wothe ũmũtuaga ngombo, mũndũ o wothe ũtamburaga indo cianyu, mũndũ o wothe ũmũtunyaga kĩrĩa mũrĩ nakĩo, mũndũ o wothe wĩtũũgagĩria harĩ inyuĩ, na mũndũ o wothe ũmũgũthaga ũthiũ.

21 Ũndũ ũcio ndoiga nĩ wa gũtũconorithia, tondũ ithuĩ no tuoneke ta twĩkĩte maũndũ tũtarĩ na hinya.

No angĩkorũo arĩa angĩ mekaga maũndũ na ũcamba—na ndĩraria na ũrimũ—o na niĩ njĩkaga maũndũ na ũcamba. 22 Hihi o nĩ Ahibirania? O na niĩ ndĩ Mũhibirania.+ Hihi o nĩ Aisiraeli? O na niĩ ndĩ Mũisiraeli. Hihi o nĩ mbeũ ya* Iburahimu? O na niĩ ndĩ mbeũ ya* Iburahimu.+ 23 Hihi o nĩ ndungata cia Kristo? Ngũcokia ta mũgũrũki, niĩ ndĩ ndungata na njĩra nene makĩria: Nĩ ndutĩte wĩra mũingĩ kũmakĩra,+ ngohwo njera maita maingĩ kũmakĩra,+ ngahũũrũo maita maingĩ, na ngakuhĩrĩria gũkua maita maingĩ.+ 24 Ndanahũũrũo maita matano iboko 40 hatarĩ kĩmwe nĩ Ayahudi,+ 25 maita matatũ ngĩhũũrũo na thanju,+ riita rĩmwe ngĩhũũrũo na mahiga,+ maita matatũ ngĩthũkĩrũo nĩ meri,+ na hĩndĩ ĩmwe ngĩraara na ngĩtinda iria-inĩ; 26 ndanakorũo ngʼendo-inĩ kaingĩ, ngona mogwati njũũĩ-inĩ, mogwati ma atunyani, mogwati ma andũ a rũrĩrĩ rwitũ,+ mogwati ma andũ a ndũrĩrĩ,+ ngona mogwati itũũra-inĩ,+ ngona mogwati werũ-inĩ, ngona mogwati iria-inĩ, ngona mogwati ndĩ gatagatĩ-inĩ ka andũ arĩa metuaga ariũ a Ithe witũ, 27 ngaruta wĩra wa mĩnoga na wĩra mũritũ, ngaraara kaingĩ itarĩ toro,+ ngahũta na nganyota,+ ngaga irio maita maingĩ,+ na ngakorũo heho-inĩ itarĩ na gĩa kwĩhumba.*

28 Hamwe na maũndũ macio ma na nja, nĩ harĩ ũndũ ũngĩ ũũthĩnagia thĩinĩ wakwa mũthenya o mũthenya:* gũtangĩka nĩ ũndũ wa ciũngano ciothe.+ 29 Nũũ ũtarĩ na hinya, na niĩ ngakorũo na hinya? Nũũ ũhĩngĩkĩte, na niĩ ngakorũo itarakarĩte?

30 Angĩkorũo no mũhaka ndĩĩrahe, ngwĩrahĩra maũndũ marĩa monanagia atĩ ndirĩ na hinya. 31 Ngai o we Ithe wa Mwathani Jesu, Ũrĩa wagĩrĩire kũgoocwo tene na tene, nĩ oĩ atĩ ndiraheenania. 32 Thĩinĩ wa Dameski, ngavana ũrĩa warĩ rungu rwa mũthamaki Areta nĩ aarangĩrire itũũra rĩa Adameski nĩguo aanyite, 33 no ngĩikũrũkio kũgerera ndirica rũthingo-inĩ rwa itũũra ndĩ thĩinĩ wa gĩkabu,+ ngĩhonoka kuuma moko-inĩ make.

12 No mũhaka ndĩĩrahe. Rĩu ngwaria ũhoro wa cioneki cia mwanya+ na maũndũ marĩa nguũrĩirio nĩ Mwathani,+ o na gũtuĩka ũndũ ũcio ndũrĩ na ũguni. 2 Nĩ njũĩ mũndũ ũmwe warĩ na ũiguano hamwe na Kristo, woirũo agĩtwarũo igũrũ rĩa gatatũ mĩaka 14 mĩhĩtũku—okorũo aarĩ thĩinĩ wa mwĩrĩ kana ndaarĩ thĩinĩ wa mwĩrĩ, niĩ ndiũĩ; Ngai nĩwe ũĩ. 3 Ĩĩ, nĩ njũĩ mũndũ ta ũcio—okorũo aarĩ thĩinĩ wa mwĩrĩ kana ndaarĩ thĩinĩ wa mwĩrĩ, niĩ ndiũĩ; Ngai nĩwe ũĩ⁠— 4 ũrĩa woirũo agĩtwarũo paradiso na akĩigua ciugo itangĩario na itetĩkĩrĩtio kũgwetwo nĩ mũndũ. 5 Nĩ ngwĩraha nĩ ũndũ wa mũndũ ta ũcio, no ndikwĩraha igũrũ rĩakwa mwene o tiga igũrũ rĩgiĩ maũndũ marĩa itarĩ na hinya. 6 Tondũ o na ingĩenda kwĩraha-rĩ, ndingĩkorũo ndĩ kĩrimũ, nĩ gũkorũo ingiuga ũhoro wa ma. No ndĩĩgiragĩrĩria gwĩka ũguo, nĩguo gũtikagĩe mũndũ o na ũrĩkũ ũkũngaathĩrĩria na ũndũ ũkĩrĩte ũrĩa onaga ndariĩ kana akaigua kuuma kũrĩ niĩ, 7 tondũ tu wa kũguũrĩrio maũndũ macio ma magegania.

Nĩguo ndikae gwĩtũũgĩria mũno, ndaheirũo mũigua thĩinĩ wa mwĩrĩ,+ mũraika wa Shaitani, njikarage ngĩhũũragwo rũhĩ nĩwe,* nĩgetha ndigetũũgĩrie mũno. 8 Ngĩthaitha Mwathani maita matatũ nĩ ũndũ wa ũndũ ũcio, atĩ ũnjeherere. 9 No akĩnjĩra atĩrĩ: “Ũtugi wakwa mũnene nĩ ũkũiganĩte, nĩ gũkorũo hinya wakwa ũtuĩkaga mũkinyanĩru harĩa hatarĩ na hinya.”+ Nĩ ũndũ ũcio-rĩ, ngwĩrahĩra maũndũ marĩa itarĩ na hinya ngenete mũno, nĩguo hinya wa Kristo ũtũũre igũrũ rĩakwa o ta hema. 10 Kwoguo-rĩ, nĩ ngenagĩra kwaga hinya, kũrumwo, mahinda ma wagi, kũnyarirũo na moritũ, nĩ ũndũ wa Kristo. Tondũ hĩndĩ ĩrĩa itarĩ na hinya, nĩrĩo ngoragwo na hinya.+

11 Nduĩkĩte kĩrimũ. Na nĩ inyuĩ mũtũmĩte nduĩke ũguo, tondũ nĩ mwaagĩrĩirũo kũngaathĩrĩria. Nĩ gũkorũo atũmwo acio anyu ega mũno matingĩrĩte ũndũ-inĩ o na ũmwe, o na gũtuĩka ndĩ wa tũhũ.+ 12 Atĩrĩrĩ, maũndũ marĩa monanagia atĩ mũndũ nĩ mũtũmwo nĩ moonekire gatagatĩ-inĩ kanyu na ũkirĩrĩria mũnene,+ na kũgerera imenyithia na maũndũ ma magegania* o na mawĩko ma hinya.+ 13 Tondũ rĩrĩ, nĩ maũndũ-inĩ marĩkũ mwanyihĩirũo kũrĩ ciũngano iria ingĩ o tiga atĩ niĩ mwene ndiatuĩkire mũrigo harĩ inyuĩ?+ Ndamũthaitha mũnjohere ihĩtia rĩu.

14 Atĩrĩrĩ, rĩrĩ nĩ riita rĩa gatatũ ndĩhaarĩirie gũka kũrĩ inyuĩ, na ndigaatuĩka mũrigo. Nĩ gũkorũo ti indo cianyu ndĩrenda,+ no nĩ inyuĩ; tondũ ciana+ itiĩrĩgagĩrĩrũo kũigĩra aciari a cio mũthithũ, no aciari nĩo merĩgagĩrĩrũo maigĩre ciana ciao. 15 Niĩ-rĩ, ngũhũthĩra indo ciothe iria ndĩ nacio ngenete mũno na hũthĩrũo biũ nĩ ũndũ wanyu.+ Angĩkorũo nĩ ndĩmwendete ũguo wothe-rĩ, kaĩ niĩ itagĩrĩire kwendwo o ta ũguo? 16 O na kũrĩ ũguo-rĩ, ndiatuĩkire mũrigo harĩ inyuĩ.+ No rĩrĩ, inyuĩ muugaga atĩ ndarĩ na “wara” na atĩ ndahũthĩrire “maheeni” kũmũnyita. 17 Hihi nĩ kũrĩ mũndũ o na ũmwe ndaheenirie kũgerera arĩa othe ndatũmire kũrĩ inyuĩ atĩ nĩguo niĩ mwene ngʼunĩke? 18 Ndathaithire Tito na ngĩmũtũma arĩ hamwe na mũrũ wa Ithe witũ ũmwe. Hihi Tito nĩ aamũheenirie nĩguo egune we mwene?+ Ndaamũheenirie o na hanini. Twathiaga tũrĩ na roho o ũmwe, kana tiguo? Twarũmagĩrĩra makinya mamwe, kana tiguo?

19 Hihi ihinda rĩrĩ rĩothe mũtũũrĩte mwĩcirĩtie atĩ tũkoretwo tũgĩĩtetera harĩ inyuĩ? Tũraria tũrĩ mbere ya Ngai tũrĩ na ũiguano na Kristo. No rĩrĩ, endwa aitũ, maũndũ mothe marĩa twĩkaga, tũmekaga nĩguo tũmwake. 20 Nĩ gũkorũo ndĩ na guoya atĩ, ndakinya, ndahota gũkora mũtahaana ũrĩa ingĩenda gũkora mũhaana na inyuĩ mwahota gũkora itahaana ũrĩa mũngĩenda ngorũo haana, hihi ngore mũrĩ na ngũĩ, ũiru, marakara maingĩ, ngarari, njukũ, mũcene, mwĩtĩo, o na kwaga kĩhaarĩro. 21 No kũhoteke hĩndĩ ĩrĩa ngooka rĩngĩ, Ngai wakwa ahota gũkaanjonorithia mbere yanyu, na njakaĩre andũ aingĩ arĩa meehĩtie mbere ĩyo no makaga kwĩrira nĩ ũndũ wa mĩtugo yao ĩtarĩ mĩtheru, ngomanio itagĩrĩire,* na mĩtugo ya rũtũrĩko* ĩrĩa meekĩte.

13 Rĩrĩ nĩrĩo riita rĩa gatatũ ndĩroka kũrĩ inyuĩ. “No mũhaka ũndũ o wothe ũmenyekage wega kũgerera ũira wa* andũ erĩ kana atatũ.”+ 2 O na gũtuĩka rĩu ndirĩ hamwe na inyuĩ, no ta ndĩ hamwe na inyuĩ riita rĩa kerĩ, na nĩ ngũheana mũkaana o mbere kũrĩ arĩa meehĩtie mbere ĩyo, na arĩa angĩ othe, atĩ ingĩgooka rĩngĩ ndikaamacaĩra, 3 tondũ nĩ mũrenda kuona ũira atĩ Kristo, ũrĩa ũtakoragwo aagĩte hinya harĩ inyuĩ no arĩ na hinya gatagatĩ-inĩ kanyu, nĩwe kũna ũraria kũgerera harĩ niĩ. 4 Tondũ nĩ ooragĩirũo mũtĩ-inĩ nĩ ũndũ wa kwaga hinya, no rĩu arĩ muoyo nĩ ũndũ wa hinya wa Ngai.+ Nĩ ma, o na ithuĩ nĩ twagĩte hinya hamwe nake, no nĩ tũgaatũũra muoyo hamwe nake+ nĩ ũndũ wa hinya wa Ngai harĩ inyuĩ.+

5 Ikaragai mũkĩĩgeragia kana mũrĩ thĩinĩ wa wĩtĩkio; ikaragai mũgĩĩthuthuragia ũrĩa mũtariĩ kũna.+ Kana hihi mũtiũĩ atĩ Jesu Kristo arĩ na ũiguano hamwe na inyuĩ? O tiga akorirũo nĩ mũregetwo. 6 Ndĩrerĩgĩrĩra na ma nĩ mũkũmenya atĩ ithuĩ tũtiregetwo.

7 Rĩu-rĩ, tũrahoya Ngai atĩ mũtikaneke ũndũ o na ũmwe mũũru, ti nĩguo tuoneke atĩ nĩ twĩtĩkĩrĩkĩte, ĩndĩ nĩgetha mwĩkage ũrĩa kwagĩrĩire, o na angĩkorũo ithuĩ tũkuoneka ta tũregetwo. 8 Tondũ tũtingĩka ũndũ o na ũrĩkũ ũreganĩte na ũhoro ũrĩa wa ma, o tiga wa ũhoro ũrĩa wa ma. 9 Hatarĩ nganja nĩ tũkenaga hĩndĩ ĩrĩa yothe tũtarĩ na hinya no inyuĩ mũgakorũo na hinya. Na ũyũ nĩguo ũndũ ũrĩa tũrahoya igũrũ rĩaguo, atĩ mũrũngwo. 10 Nĩkĩo ndĩramwandĩkĩra maũndũ maya hĩndĩ ĩno itarĩ hamwe na inyuĩ, nĩgetha rĩrĩa ngaakorũo hamwe na inyuĩ, ndikanahũthĩre wathani ũrĩa ndaheirũo nĩ Mwathani itarĩ na tha,+ tondũ ndaheirũo wathani wa kũmwaka no ti wa kũmũmomora.

11 Ariũ a Ithe witũ, ngĩrĩkĩrĩria-rĩ, thiĩi na mbere gũkenaga, kũrũngagwo, kũũmagĩrĩrio,+ kũgĩaga na mwĩcirĩrie ũmwe,+ na gũikaranagia na thayũ;+ nake Ngai mwene wendo na thayũ+ nĩ arĩkoragwo hamwe na inyuĩ. 12 Geithaniai inyuĩ ene na ngeithi theru cia kũmumunyana. 13 Arĩa othe aamũre nĩ maamũgeithia.

14 Inyuothe mũrogĩa na ũtugi mũnene wa Mwathani Jesu Kristo na wendo wa Ngai o hamwe na kũgwatanĩra roho mũtheru.