KŨRĨ AGALATIA

1 Nĩ niĩ Paulo, mũtũmwo ũtoimanĩte na andũ kana kũgerera mũndũ, no nĩ kũgerera Jesu Kristo+ na Ngai Ithe witũ,+ o ũcio wamũriũkirie kuuma kũrĩ arĩa akuũ, 2 o hamwe na ariũ othe a Ithe witũ arĩa tũrĩ nao, kũrĩ ciũngano cia Galatia:

3 Mũrogĩa na ũtugi mũnene na thayũ kuuma kũrĩ Ngai Ithe witũ, na Mwathani Jesu Kristo. 4 Eerutire we mwene nĩ ũndũ wa mehia maitũ+ nĩguo atũhonokie kuuma mũtabarĩre-inĩ ũyũ mũũru wa maũndũ*+ kũringana na wendi wa Ngai Ithe witũ,+ 5 nake arogoocagwo tene na tene. Ameni.

6 Niĩ ndĩ mũmaku nĩ ũndũ wa ũrĩa mũratigana narua na* Ũrĩa wamwĩtire kũgerera ũtugi mũnene wa Kristo, mũgathiĩ kũrĩ ũhoro mwega wa mũthemba ũngĩ.+ 7 Ti atĩ nĩ kũrĩ ũhoro mwega ũngĩ; no nĩ harĩ andũ amwe maramũrehera thĩna+ na makenda gũthũkia ũhoro ũrĩa mwega wĩgiĩ Kristo. 8 No rĩrĩ, o na kana nĩ ithuĩ kana nĩ mũraika kuuma igũrũ angĩmũhunjĩria ũndũ ũngĩ ũrĩ ũhoro mwega tiga ũhoro mwega ũrĩa twamũhunjĩirie, aronyitwo nĩ kĩrumi. 9 O ta ũrĩa twoigĩte hau kabere, ndĩroiga o rĩngĩ atĩ, Mũndũ o wothe ũmũhunjagĩria ũndũ ũngĩ ũrĩ ũhoro mwega tiga ũrĩa mwetĩkĩrire, aronyitwo nĩ kĩrumi.

10 Atĩrĩrĩ, hihi rĩu ndĩrageria kwĩyendithĩrĩria kũrĩ andũ kana nĩ kũrĩ Ngai? Kana hihi ndĩrageria gũkenia andũ? Angĩkorũo nginyagia rĩu no andũ ndĩrageria gũkenia-rĩ, ndingĩkorũo ndĩ ngombo ya Kristo. 11 Nĩ gũkorũo ndĩrenda mũmenye atĩrĩrĩ ariũ a Ithe witũ, atĩ ũhoro mwega ũrĩa ndamũhunjĩirie ndumanĩte na andũ;+ 12 tondũ ndiawamũkĩrire kuuma kũrĩ mũndũ, o na ti kũrutwo ndarutirũo, no Jesu Kristo nĩwe wanguũrĩirie.

13 Hatarĩ nganja nĩ mwaiguire ũhoro wa mĩthiĩre yakwa ya tene ndĩ thĩinĩ wa ndini ya Ayahudi,+ atĩ nĩ ndanyariraga kĩũngano kĩa Ngai mũno o na ngakĩananga;+ 14 na nĩ ndathiaga na mbere mũno maũndũ-inĩ ma ndini ya Ayahudi gũkĩra andũ aingĩ a riika rĩakwa thĩinĩ wa rũrĩrĩ rwitũ, nĩ gũkorũo ndarĩ na kĩyo kĩnene makĩria harĩ irĩra cia maithe maitũ.+ 15 No hĩndĩ ĩrĩa Ngai, o we wanyamũranirie na nda ya maitũ na akĩnjĩta kũgerera ũtugi wake mũnene,+ oonire arĩ wega 16 kũguũria Mũrũwe kũgerera harĩ niĩ nĩguo hunjie ũhoro ũrĩa mwega ũmwĩgiĩ kũrĩ ndũrĩrĩ,+ ndiahoire mũndũ* o na ũrĩkũ ũtaaro o hĩndĩ ĩyo; 17 o na ndiambatire Jerusalemu kũrĩ arĩa maatuĩkĩte atũmwo mbere yakwa, no ndathiire Arabia na thutha ũcio ngĩcoka Dameski.+

18 Mĩaka ĩtatũ thutha ũcio, ngĩambata Jerusalemu+ gũceerera Kefa,*+ na ngĩikara hamwe nake thikũ 15. 19 No gũtirĩ mũtũmwo ũngĩ o na ũmwe ndonire tiga Jakubu+ mũrũ wa nyina na Mwathani. 20 Rĩu ha ũhoro wa maũndũ marĩa ndĩramwandĩkĩra, ndĩramwĩra na ma mbere ya Ngai atĩ ndiraheenania.

21 Thutha ũcio ngĩthiĩ icigo-inĩ cia Siria na Kilikia.+ 22 No niĩ mwene ndioĩkaine nĩ ciũngano cia Judea iria ciarĩ na ũiguano na Kristo. 23 No kũigua maaiguaga atĩrĩ: “Mũndũ ũrĩa watũnyariraga tene,+ rĩu nĩ kũhunjia arahunjia ũhoro ũrĩa mwega wĩgiĩ wĩtĩkio ũrĩa aanangaga tene.”+ 24 Magĩkĩambĩrĩria kũgooca Ngai nĩ ũndũ wakwa.

2 Na rĩrĩ, thutha wa mĩaka 14 nĩ ndambatire Jerusalemu o rĩngĩ hamwe na Baranaba,+ o na tũgĩthiĩ na Tito.+ 2 Ndambatire nĩ ũndũ wa kũguũrĩrio njĩke ũguo, na ngĩmamenyithia ũhoro ũrĩa mwega hunjagia kũrĩ ndũrĩrĩ. O na kũrĩ ũguo, ndekire ũguo hatarĩ andũ angĩ, mbere ya athuri arĩa maaheetwo gĩtĩo mũno, nĩguo ndigĩrĩre atĩ ndiatengʼeraga kana ndiatengʼerete tũhũ. 3 No rĩrĩ, o na Tito+ ũrĩa twarĩ nake ndaahatĩrĩirio arue,+ o na gũtuĩka aarĩ Mũngiriki. 4 No ũndũ ũcio woimĩrire tondũ wa ariũ a Ithe witũ a maheeni arĩa maatonyirio kĩũngano-inĩ na njĩra ya wara,+ o acio maaingĩrire nĩguo mathigane ũhoro wĩgiĩ wĩyathi+ ũrĩa tũkoragwo naguo tũrĩ na ũiguano na Kristo Jesu, nĩgetha matũtue ngombo biũ;+ 5 no tũtietĩkĩrire kũmaathĩkĩra+ o na hanini,* nĩgetha ma ya ũhoro ũrĩa mwega ĩthiĩ na mbere gũkorũo hamwe na inyuĩ.

6 Ĩndĩ ũhoro-inĩ wĩgiĩ arĩa moonagwo marĩ a bata+—o ũrĩa mangĩkorũo maatariĩ gũtirĩ ũndũ kuugĩte harĩ niĩ, nĩ gũkorũo Ngai ndaroraga ũrĩa mũndũ atariĩ na nja—andũ acio maaheetwo gĩtĩo mũno gũtirĩ ũndũ mwerũ maanyongereire. 7 Mũgarũ na ũguo, rĩrĩa moonire atĩ nĩ ndehokeirũo wĩra wa kũhunjia ũhoro ũrĩa mwega kũrĩ andũ arĩa matarĩ aruu,+ o ta ũrĩa Petero eehokeirũo kũhunjĩria arĩa aruu— 8 nĩ gũkorũo ũrĩa wahotithirie Petero gũtuĩka mũtũmwo kũrĩ andũ arĩa aruu nowe wahotithirie o na niĩ gũtuĩka mũtũmwo kũrĩ andũ a ndũrĩrĩ+— 9 ningĩ rĩrĩa maamenyire ũhoro wĩgiĩ ũtugi mũnene ũrĩa ndaheetwo,+ Jakubu+ na Kefa* na Johana, arĩa moonagwo marĩ itugĩ, maatũheire tũrĩ na Baranaba+ guoko kwa ũrĩo kwa ũnyitanĩri, nĩgetha tũthiĩ kũrĩ andũ a ndũrĩrĩ, ĩndĩ o mathiĩ kũrĩ andũ arĩa aruu. 10 Ũndũ ũrĩa maatwĩrire no atĩ tũigage arĩa athĩni meciria-inĩ, na ũndũ ũcio o naguo nĩ ndĩrutanĩirie mũno kũwĩka.+

11 O na kũrĩ ũguo, rĩrĩa Kefa*+ ookire Antiokia,+ nĩ ndamũkararirie* ũthiũ kwa ũthiũ, tondũ hatarĩ nganja nĩ aahĩtĩtie. 12 Nĩ gũkorũo andũ amwe arĩa mooimĩte kũrĩ Jakubu+ matanoka, nĩ aarĩanagĩra na andũ a ndũrĩrĩ;+ no rĩrĩa maakinyire, agĩtiga gwĩka ũguo na akĩĩyamũrania nao nĩ ũndũ wa gwĩtigĩra gĩkundi kĩa arĩa maarĩ aruu.+ 13 O nao Ayahudi acio angĩ makĩnyitanĩra nake ũhinga-inĩ ũcio wake, o nginya Baranaba nake akĩgucĩrĩrio ũhinga-inĩ ũcio wao. 14 No rĩrĩa ndonire atĩ matiathiaga marũngĩrĩirie hamwe na ũhoro wa ma wa ũhoro ũrĩa mwega,+ ngĩra Kefa* mbere ya andũ acio othe ũũ: “Angĩkorũo wee, o na ũrĩ Mũyahudi ũikaraga ta ũrĩa andũ a ndũrĩrĩ maikaraga na ti ta ũrĩa Ayahudi maikaraga-rĩ, ũngĩkĩhatĩrĩria atĩa andũ a ndũrĩrĩ maikarage kũringana na mĩtugo ya Ayahudi?”+

15 Ithuĩ arĩa tũciarĩtwo tũrĩ Ayahudi, no ti ehia kuuma ndũrĩrĩ-inĩ, 16 nĩ tũĩ atĩ mũndũ atuagwo mũthingu, ti tondũ wa ciĩko cia watho, no nĩ ũndũ tu wa gũkorũo na wĩtĩkio+ harĩ Jesu Kristo.+ Nĩ ũndũ ũcio ithuĩ nĩ tũigĩte wĩtĩkio witũ harĩ Kristo Jesu, nĩguo tũtuwo athingu nĩ ũndũ wa gũkorũo na wĩtĩkio harĩ Kristo no ti tondũ wa ciĩko cia watho, nĩ gũkorũo gũtirĩ mũndũ* o na ũmwe ũgaatuwo mũthingu nĩ ũndũ wa ciĩko cia watho.+ 17 Angĩkorũo o na ithuĩ tuonagwo tũrĩ ehia tondũ nĩ tũcaragia gũtuwo athingu kũgerera Kristo-rĩ, hihi ũguo nĩ kuuga atĩ Kristo nĩ ndungata ya mehia? Tiguo o na hanini! 18 Angĩkorũo maũndũ o marĩa hĩndĩ ĩmwe ndamomoraga no mo ndĩraka rĩngĩ-rĩ, ũndũ ũcio ũronania atĩ ndĩ mwĩhia. 19 Nĩ gũkorũo kũgerera watho nĩ ndakuire ũhoro-inĩ wĩgiĩ watho,+ nĩgetha ndũũre muoyo ũhoro-inĩ wĩgiĩ Ngai. 20 Ndĩ mũhũũrĩrĩre mĩcumarĩ mũtĩ igũrũ hamwe na Kristo.+ Ti niĩ rĩu ndũũraga muoyo,+ no nĩ Kristo ũtũũraga muoyo arĩ na ũiguano hamwe na niĩ. Hatarĩ nganja, ũtũũro ũrĩa ndũũraga rĩu ũhoro-inĩ wa mwĩrĩ ndũũraga nĩ ũndũ wa wĩtĩkio harĩ Mũrũ wa Ngai,+ o we wanyendire na akĩĩneana we mwene nĩ ũndũ wakwa.+ 21 Ti kũrega ndĩrarega* ũtugi mũnene wa Ngai,+ tondũ angĩkorũo ũthingu wonekaga kũgerera watho-rĩ, Kristo aagĩkuire o tũhũ.+

3 Inyuĩ Agalatia aya mũtarĩ wĩcirio! Nũũ ũmũhĩtithĩtie ũguo,+ o inyuĩ muoonirio wega Jesu Kristo ahũũrĩrĩirũo mĩcumarĩ mũtĩ igũrũ?+ 2 Ngwenda kũmũũria* ũndũ ũyũ ũmwe: Hihi mwaamũkĩrire roho nĩ ũndũ wa ciĩko cia watho kana nĩ ũndũ wa gũkorũo na wĩtĩkio harĩ maũndũ marĩa mwaiguire?+ 3 Kaĩ mwagĩte wĩcirio atĩa? Thutha wa kwambĩrĩria na njĩra ya kĩĩroho-rĩ,* kaĩ rĩu mũrarĩkia na njĩra ya kĩĩmwĩrĩ?*+ 4 Hihi mwanyamarĩkire ũguo wothe o tũhũ? Angĩkorũo kũna ũndũ ũcio warĩ wa tũhũ. 5 Nĩ ũndũ ũcio-rĩ, hihi ũrĩa ũmũheaga roho na ageka mawĩko ma hinya+ gatagatĩ-inĩ kanyu ekaga ũguo nĩ ũndũ wa ciĩko cianyu cia watho, kana nĩ ũndũ wa wĩtĩkio wanyu harĩ maũndũ marĩa mwaiguire? 6 O ta ũrĩa Iburahimu “aagĩire na wĩtĩkio harĩ Jehova,* na ũndũ ũcio ũgĩtarũo atĩ nĩ ũthingu harĩ we.”+

7 Hatarĩ nganja nĩ mũĩ atĩ andũ arĩa marũmagia wĩtĩkio nĩo ariũ a Iburahimu.+ 8 Rĩu nĩ ũndũ wa kuona kabere atĩ Ngai nĩ angĩgaatua andũ a ndũrĩrĩ athingu kũgerera wĩtĩkio, rĩandĩko nĩ rĩamenyithirie Iburahimu ũhoro mwega o mbere rĩkĩmwĩra ũũ: “Ndũrĩrĩ ciothe nĩ ikaarathimwo kũgerera harĩ wee.”+ 9 Kwoguo andũ arĩa marũmagia wĩtĩkio nĩ mararathimwo hamwe na Iburahimu, o ũcio warĩ na wĩtĩkio.+

10 Andũ arĩa othe mehokaga ciĩko cia watho marĩ rungu rwa kĩrumi, nĩ gũkorũo nĩ kwandĩke atĩrĩ: “Kũnyitwo nĩ kĩrumi nĩ mũndũ o wothe ũtatũũraga maũndũ-inĩ mothe marĩa mandĩkĩtwo thĩinĩ wa gĩkũnjo kĩa Watho na njĩra ya kũmeka.”+ 11 Makĩria ma ũguo, nĩ kũmenyekete wega atĩ gũtirĩ mũndũ ũtuagwo mũthingu harĩ Ngai kũgerera watho,+ tondũ “mũndũ ũrĩa mũthingu agaatũũra nĩ ũndũ wa wĩtĩkio.”+ 12 Rĩu-rĩ, Watho ndwĩhocetie harĩ wĩtĩkio. Ithenya rĩa ũguo, “mũndũ o wothe wĩkaga maũndũ macio, nĩ agaatũũra nĩ ũndũ wamo.”+ 13 Kristo nĩ aatũgũrire,+ agĩtũrekereria+ kuuma harĩ kĩrumi kĩa Watho na njĩra ya gũtuĩka kĩrumi ithenya ritũ, tondũ nĩ kwandĩke atĩrĩ: “Mũndũ o wothe ũcuurĩtio mũtĩ igũrũ nĩ mũrume.”+ 14 Ũndũ ũcio wekĩkire nĩguo kĩrathimo kĩa Iburahimu gĩkinyĩre ndũrĩrĩ kũgerera Kristo Jesu,+ nĩguo twamũkĩre roho ũrĩa weranĩirũo+ nĩ ũndũ wa wĩtĩkio witũ.

15 Ariũ a Ithe witũ, ngũhũthĩra ngerekano ya andũ: Kĩrĩkanĩro kĩarĩkia gwĩkĩrũo hinya, o na angĩkorũo nĩ kũgerera harĩ mũndũ, gũtirĩ mũndũ ũkĩniinaga o na kana agakĩongerera maũndũ mangĩ. 16 Rĩu-rĩ, Iburahimu na mbeũ yake* nĩo meerĩirũo ciĩranĩro icio.+ Rĩandĩko rĩtiugaga, “na kũrĩ njiarũa* ciaku,” ta arĩ andũ aingĩ meeragwo. Ithenya rĩa ũguo, riugaga, “na kũrĩ mbeũ yaku,”* rĩkiuga ũhoro wa mũndũ ũmwe, nĩwe Kristo.+ 17 Ningĩ nguuga atĩrĩ: Watho, o ũcio wokire mĩaka 430 thutha ũcio,+ ndweheragia kĩrĩkanĩro kĩu gĩathondeketwo nĩ Ngai mbere ĩyo, atĩ nĩguo ũniine kĩĩranĩro kĩu. 18 Tondũ angĩkorũo igai rĩĩhocetie harĩ watho, rĩtikĩĩhocetie harĩ kĩĩranĩro rĩngĩ; no Ngai nĩ aheete Iburahimu igai rĩu arĩ na ũtugi kũgerera kĩĩranĩro.+

19 Watho wakĩrĩ wa kĩ? Woongereirũo nĩgetha ũtũme mahĩtia mamenyeke,+ o nginya rĩrĩa mbeũ* ĩrĩa yerĩirũo kĩĩranĩro kĩu ĩngĩgaakinya;+ na wakinyanĩirio nĩ araika+ kũgerera harĩ guoko kwa mũiguithania.+ 20 Rĩu-rĩ, gũtikoragwo na mũiguithania rĩrĩa harĩ na mũndũ o ũmwe tu, no Ngai nĩ ũmwe tu. 21 Kaĩ Watho ũkĩreganĩte na ciĩranĩro cia Ngai? Aca o na hanini! Tondũ kũngĩkorũo nĩ kũrĩ watho waheanĩtwo ũngĩheana muoyo, ũthingu ũngĩonekaga kũgerera harĩ watho. 22 No Rĩandĩko nĩ rĩaneanire maũndũ mothe kĩoho-inĩ kĩa mehia, nĩguo kĩĩranĩro kĩrĩa kiumanaga na wĩtĩkio harĩ Jesu Kristo kĩheanwo kũrĩ arĩa monanagia wĩtĩkio.

23 No rĩrĩ, wĩtĩkio ũtanoka, twagitagĩrũo rungu rwa watho, tũneanĩtwo kĩoho-inĩ, tũcũthĩrĩirie wĩtĩkio ũrĩa warĩ hakuhĩ kũguũrio.+ 24 Kwoguo Watho ũgĩtuĩka mũreri* witũ wa gũtũtongoria kũrĩ Kristo,+ nĩguo tũtuwo athingu kũgerera wĩtĩkio.+ 25 No rĩu tondũ wĩtĩkio nĩ ũkinyĩte,+ tũtirĩ rungu rwa mũreri* rĩngĩ.+

26 Atĩrĩrĩ, inyuothe mũrĩ ariũ a Ngai+ nĩ ũndũ wa wĩtĩkio wanyu harĩ Kristo Jesu.+ 27 Nĩ gũkorũo inyuothe arĩa mwabatithirio thĩinĩ wa Kristo nĩ mwĩhumbĩte Kristo.+ 28 Gũtirĩ Mũyahudi kana Mũngiriki,+ gũtirĩ ngombo kana mũndũ ũrĩ na wĩyathi,+ gũtirĩ mũthuri kana mũtumia,+ nĩ gũkorũo inyuothe mũrĩ kĩndũ kĩmwe mũrĩ na ũiguano na Kristo Jesu.+ 29 Makĩria ma ũguo, angĩkorũo mũrĩ a Kristo, mũrĩ mbeũ ya*+ Iburahimu kũna, agai+ kũringana na kĩĩranĩro.+

4 Rĩu nguuga atĩrĩ, hĩndĩ ĩrĩa yothe mũgai arĩ kaana kanini, ndakoragwo arĩ ngũrani na ngombo, o na gũtuĩka nĩwe mwathani wa indo ciothe, 2 no akoragwo rungu rwa arũgamĩrĩri na aramati o nginyagia mũthenya ũrĩa watuĩtwo o mbere nĩ ithe. 3 O ta ũguo, o na ithuĩ rĩrĩa twarĩ ciana, twarĩ ngombo cia maũndũ ma mũthingi ma thĩ ĩno.+ 4 No rĩrĩa mũthia wa ihinda rĩrĩa rĩatuĩtwo wakinyire, Ngai nĩ aatũmire Mũrũwe, ũrĩa waciarirũo nĩ mũtumia+ na agĩkorũo arĩ rungu rwa watho,+ 5 nĩgetha arekererie na njĩra ya kũgũra arĩa maarĩ rungu rwa watho,+ nĩguo tũtuwo ariũ.+

6 Rĩu tondũ inyuĩ mũrĩ ariũ, Ngai nĩ atũmĩte roho+ wa Mũrũwe thĩinĩ wa ngoro citũ,+ naguo wanagĩrĩra ũkoiga: “Abba,* Baba!”+ 7 Nĩ ũndũ ũcio, wee ndũrĩ ngombo rĩngĩ no ũrĩ mũriũ; na angĩkorũo ũrĩ mũriũ, ningĩ ũrĩ mũgai kũgerera harĩ Ngai.+

8 O na kũrĩ ũguo, hĩndĩ ĩrĩa mũtaamenyete Ngai, mwarĩ ngombo cia ngai iria itarĩ ngai kũna. 9 No tondũ rĩu nĩ mũrĩkĩtie kũmenya Ngai, kana na njĩra ĩngĩ mũkarĩkia kũmenywo nĩ Ngai, mũragĩcoka na thutha nĩkĩ maũndũ-inĩ ma mũthingi marĩa matarĩ hinya+ na matarĩ kĩene, mũkenda gũtuĩka ngombo ciamo o rĩngĩ?+ 10 Nĩ mwĩkĩrĩire mũno ũhoro wa mĩthenya na mĩeri+ na imera na mĩaka. 11 Ndĩ na guoya nĩ ũndũ wanyu, tondũ kũroneka ta kĩyo gĩakwa harĩ inyuĩ gĩtuĩkĩte gĩa tũhũ.

12 Atĩrĩrĩ ariũ a Ithe witũ, ndĩramũthaitha mũtuĩke ta niĩ, tondũ o na niĩ ndatariĩ o ta inyuĩ.+ Gũtirĩ ũndũ mũũru mwanjĩkire. 13 No nĩ mũĩ atĩ ndagĩire na mweke wa kũmũhunjĩria ũhoro ũrĩa mwega riita rĩa mbere nĩ ũndũ wa mũrimũ wa mwĩrĩ. 14 Na o na gũtuĩka mũrimũ ũcio warĩ igerio harĩ inyuĩ, mũtianyararire kana mũkĩmena,* no mwanyamũkĩrire ta mũraika wa Ngai, ta Kristo Jesu. 15 Kaĩ gĩkeno kĩrĩa mwarĩ nakĩo gĩathiire kũ? Nĩ gũkorũo ndĩ mũira atĩ korũo nĩ kũngĩahotekire, nĩ mũngĩakũũrire maitho manyu mũũhe.+ 16 Rĩu-rĩ, kaĩ ngĩtuĩkĩte thũ yanyu nĩ ũndũ wa kũmwĩra ũhoro wa ma? 17 Marerutanĩria nĩguo mamũgucĩrĩrie mwena wao, no matirĩ na muoroto mwega; marenda kũmũtigithũkania na niĩ, nĩguo mũmarũmĩrĩre na kĩyo. 18 O na kũrĩ ũguo, nĩ wega hĩndĩ ciothe mũndũ angĩĩrutanĩria kũmũgucĩrĩria arĩ na muoroto mwega, na to rĩrĩa ndĩ hamwe na inyuĩ, 19 twana twakwa,+ o inyuĩ ndĩraiguĩra ruo rĩngĩ ta rwa mũtumia akĩgĩa mwana nginya hĩndĩ ĩrĩa Kristo agaakorũo eyũmbĩte thĩinĩ wanyu. 20 Na arĩ korũo no ngorũo hamwe na inyuĩ rĩu njarie na inyuĩ na njĩra ngũrani, tondũ ũhoro wanyu nĩ ũndigithĩtie.

21 Ta njĩrai atĩrĩ inyuĩ mũrenda gũkorũo rungu rwa watho, Kaĩ mũtaiguaga Watho? 22 Kwa ngerekano-rĩ, nĩ kwandĩke atĩ Iburahimu aarĩ na ariũ erĩ, ũmwe waciarirũo nĩ ndungata ya mũirĩtu+ na ũngĩ waciarirũo nĩ mũtumia ũrĩ na wĩyathi;+ 23 no ũcio waciarirũo nĩ ndungata ya mũirĩtu aaciarirũo na njĩra ya ndũire*+ nake ũrĩa waciarirũo nĩ mũtumia ũrĩ na wĩyathi agĩciarũo kũgerera kĩĩranĩro.+ 24 Maũndũ macio no merũo nĩ ngerekano; nĩ gũkorũo atumia acio erĩ marũgamĩrĩire irĩkanĩro igĩrĩ, kĩmwe kiumĩte Kĩrĩma-inĩ gĩa Sinai,+ kĩrĩa kĩgĩaga ciana cia ũkombo na nĩkĩo Hagari. 25 Hagari arũgamĩrĩire Sinai,+ kĩrĩma gĩkoragwo Arabia, na agerekanĩtio na Jerusalemu ya ũmũthĩ, nĩ gũkorũo arĩ ũkombo-inĩ hamwe na ciana ciake. 26 No Jerusalemu ya igũrũ ĩrĩ na wĩyathi, na nĩyo nyina witũ.

27 Nĩ gũkorũo nĩ kwandĩke atĩrĩ: “Kena wee mũtumia ũyũ thata ũtagĩaga ciana; anĩrĩra ũkenete, wee mũtumia ũyũ ũtanyitagwo nĩ ruo rwa kũgĩa mwana; nĩ gũkorũo ciana cia mũtumia ũrĩa ũtiganĩirio nĩ nyingĩ gũkĩra cia mũtumia ũrĩa wĩ na mũthuri.”+ 28 Rĩu inyuĩ ariũ a Ithe witũ, mũrĩ ciana cia kĩĩranĩro kĩu o ta ũrĩa Isaaka aarĩ.+ 29 Ĩndĩ o ta ũrĩa hĩndĩ ĩyo ũcio waciarirũo na njĩra ya ndũire* aambĩrĩirie kũnyarira ũrĩa waciarirũo na njĩra ya roho,+ noguo gũtariĩ o na ũmũthĩ.+ 30 O na kũrĩ ũguo-rĩ, hihi rĩandĩko riugaga atĩa? “Ingata ndungata ĩyo ya mũirĩtu hamwe na mũrũwe, nĩ gũkorũo mũrũ wa ndungata ĩyo ya mũirĩtu gũtirĩ hĩndĩ agaatuĩka mũgai hamwe na mũrũ wa mũtumia ũcio ũrĩ na wĩyathi.”+ 31 Nĩ ũndũ ũcio ariũ a Ithe witũ-rĩ, ithuĩ tũtirĩ ciana cia ndungata ya mũirĩtu, no tũrĩ ciana cia mũtumia ũcio ũrĩ na wĩyathi.

5 Nĩ gũkorũo Kristo aatũkũũrire nĩguo tũgĩe na wĩyathi ũcio. Nĩ ũndũ ũcio, rũgamai mwĩrũmĩtie,+ na mũtigetĩkĩre kuohwo icoki-inĩ rĩa ũkombo rĩngĩ.+

2 Atĩrĩrĩ, niĩ Paulo ngũmwĩra atĩ mũngĩrua, Kristo ndangĩkorũo na ũguni harĩ inyuĩ.+ 3 O rĩngĩ ndĩraruta ũira kũrĩ mũndũ o wothe ũrĩa ũkũrua atĩ nĩ agĩrĩirũo kũrũmĩrĩra Watho ũrĩ wothe.+ 4 Nĩ mwamũranĩtio na Kristo, inyuĩ mũrageria gũtuwo athingu kũgerera watho;+ nĩ mũgwĩte kuuma ũtugi-inĩ wake mũnene. 5 Ithuĩ-rĩ, kũgerera roho nĩ twetagĩrĩra mũno ũthingu ũrĩa wĩrĩgagĩrĩrũo, o ũcio uumanaga na wĩtĩkio. 6 Tondũ ũhoro-inĩ wĩgiĩ ũiguano na Kristo Jesu, kũrua kana kwaga kũrua gũtirĩ bata,+ no ũndũ ũrĩa wa bata nĩ wĩtĩkio ũrĩa ũrutaga wĩra kũgerera wendo.

7 Nĩ mwatengʼeraga wega.+ Nũũ wamũgirĩrĩirie gũthiĩ na mbere gwathĩkĩra ũhoro ũrĩa wa ma? 8 Kũringĩrĩrio kwa mũthemba ũcio gũtiumanĩte na Ũrĩa ũmwĩtĩte. 9 Gatawa kanini ga kũimbia kagagatagia kĩmere gĩothe.+ 10 Ndĩ na ma atĩ inyuĩ arĩa mũrĩ na ũiguano na Mwathani+ mũtigwĩciria ũndũ ũngĩ; no mũndũ ũrĩa ũramũrehera thĩna,+ o na angĩkorũo arĩ ũ, nĩ akaamũkĩra ituĩro rĩrĩa rĩmwagĩrĩire. 11 No niĩ ariũ a Ithe witũ-rĩ, angĩkorũo no ndĩrahunjia ũhoro wa kũrua, ndĩrakĩnyarirũo nĩkĩ? Ũndũ-inĩ ũcio, mũhĩnga wa mũtĩ wa kũnyarirĩrũo*+ nĩ weheretio. 12 Na arĩ korũo andũ acio marageria kũmwagagia no mehakũre.*

13 Atĩrĩrĩ ariũ a Ithe witũ, inyuĩ mwetĩirũo wĩyathi; no mũtikahũthĩre wĩyathi ũcio ũrĩ mweke wa gũthingata merirĩria ma mwĩrĩ,+ no nĩ ũndũ wa wendo-rĩ, tungatanagĩrai o mũndũ na ũrĩa ũngĩ.+ 14 Nĩ gũkorũo Watho wothe ũhingĩtio* thĩinĩ wa rĩathani rĩmwe, atĩ: “No mũhaka wende mũndũ ũrĩa mũriganĩtie nake o ta ũrĩa wĩyendete wee mwene.”+ 15 No rĩrĩ, mũngĩthiĩ na mbere kũrũmana na gũtamburana inyuĩ ene-rĩ,+ mwĩmenyererei mũtikaniinane inyuĩ ene.+

16 No nguuga atĩrĩ, Tũũrai mũthiaga na roho+ na mũtirĩhingagia merirĩria ma mwĩrĩ o na hanini.+ 17 Nĩ gũkorũo mwĩrĩ nĩ ũreganaga na roho harĩ merirĩria maguo, naguo roho ũkaregana na mwĩrĩ; icio cierĩ itiiguanaga, na nĩ ũndũ ũcio mũtiĩkaga maũndũ marĩa mwendaga gwĩka.+ 18 Ningĩ, angĩkorũo nĩ mũratongorio nĩ roho, mũtirĩ rungu rwa watho.

19 Rĩu ciĩko cia kĩĩmwĩrĩ nĩ cionekaga wega, na nĩcio ngomanio itagĩrĩire,*+ maũndũ matarĩ matheru, mĩtugo ya rũtũrĩko,*+ 20 ũhoi mĩhianano, maũndũ ma ũgo,*+ ũthũ, ngũĩ, ũiru, marakara manene, ngarari, ngayũkano, ikundi cia nyamũkano, 21 gũcumĩkĩra, ũrĩĩu,+ maruga makĩrĩtie njano, na maũndũ ta macio.+ Ndĩramũkaania o mbere ũhoro wĩgiĩ maũndũ macio, o ta ũrĩa ndanamũkaania, atĩ arĩa mekaga maũndũ ta macio matikaagaya Ũthamaki wa Ngai.+

22 No rĩrĩ, maciaro ma roho nĩ wendo, gĩkeno, thayũ, wetereri,* ũtugi, wega,+ wĩtĩkio, 23 ũhooreri, na kwĩgirĩrĩria.+ Gũtirĩ watho ũgirĩtie maũndũ ta macio. 24 Makĩria ma ũguo, arĩa makoragwo marĩ a Kristo Jesu nĩ mahũũrĩrĩire mwĩrĩ mũtĩ igũrũ o hamwe na thuti na merirĩria maguo.+

25 Angĩkorũo tũratũũra na roho, nĩ tũgĩthiĩi na mbere na mĩthiĩre ĩrĩa yagĩrĩire tũtongoretio nĩ roho.+ 26 Tũtigatuĩke andũ a kwĩĩkĩrĩra,+ a gũtũmaga kũgĩe macindano gatagatĩ-inĩ gaitũ,+ na a kũiguanagĩra ũiru.

6 Ariũ a Ithe witũ, o na mũndũ angĩthiĩ na njĩra ĩtagĩrĩire atarĩ aramenya-rĩ, inyuĩ mũrĩ na ngumo cia kwagĩrĩra kĩĩroho geragiai kũmũrũnga mũrĩ na roho wa ũhooreri.+ No mwĩroragei inyuĩ ene,+ nĩguo o na inyuĩ mũtikagerio.+ 2 Thiĩi na mbere gũkuuanĩra mĩrigo o mũndũ na ũrĩa ũngĩ,+ na njĩra ĩyo nĩ mũrĩhingagia watho wa Kristo.+ 3 Nĩ gũkorũo mũndũ angĩciria atĩ we nĩ kĩndũ na hĩndĩ ĩyo we ti kĩndũ,+ nĩ kwĩheenia areheenia. 4 No o mũndũ nĩ athuthurie ciĩko ciake mwene, na hĩndĩ ĩyo nĩ ekũgĩa na gĩtũmi gĩa gũkena nĩ ũndũ wake mwene,+ no ti kwĩringithania na mũndũ ũrĩa ũngĩ.+ 5 Nĩ gũkorũo o mũndũ arĩkuuaga mũrigo wake mwene.+

6 Makĩria ma ũguo, mũndũ o wothe ũrarutwo* kiugo nĩ agayanage maũndũ mothe mega hamwe na ũrĩa ũheanaga ũrutani ũcio.*+

7 Mũtikahĩtithio: Ngai ti wa kũnyũrũrio. Nĩ gũkorũo kĩrĩa gĩothe mũndũ arahanda, kĩu nokĩo akaagetha;+ 8 tondũ mũndũ ũrĩa ũrahanda atongoretio nĩ mwĩrĩ akaagetha kũbutha kuumana na mwĩrĩ wake, no ũrĩa ũrahanda atongoretio nĩ roho akaagetha muoyo wa tene na tene kuumana na roho.+ 9 Nĩ ũndũ ũcio tũtigakue ngoro harĩ gwĩkaga wega, nĩ gũkorũo nĩ tũkaagetha hĩndĩ ĩrĩa yagĩrĩire twaga kũnoga.*+ 10 Gũkĩrĩ ũguo-rĩ, rĩrĩa rĩothe tũrĩ na mweke,* nĩ twĩkagei andũ othe wega, na makĩria arĩa twĩtainwo nao thĩinĩ wa wĩtĩkio.

11 Ta rorai ũrĩa ndĩmwandĩkĩire marũa maya na ndemwa nene na guoko gwakwa mwene.

12 Andũ arĩa othe marenda kwĩyonania ũrĩa marĩ ega thĩinĩ wa mwĩrĩ* nĩo marageria kũmũhatĩrĩria mũrue, na mekaga ũguo nogetha metheme mĩnyamaro ya mũtĩ wa kũnyarirĩrũo* wa Kristo. 13 Nĩ gũkorũo nginya arĩa mararua, o ene matirũmagĩrĩra Watho,+ no marenda inyuĩ mũrue nĩguo magĩe na gĩtũmi gĩa kwĩraha ũhoro-inĩ wĩgiĩ mĩĩrĩ yanyu. 14 No niĩ ndĩroaga kwĩraha, tiga o ũhoro-inĩ wĩgiĩ mũtĩ wa kũnyarirĩrũo* wa Mwathani witũ Jesu Kristo+ ũrĩa kũgerera we thĩ nĩ yũragĩtwo* maitho-inĩ makwa, na niĩ nĩ njũragĩtwo maitho-inĩ ma thĩ. 15 Nĩ gũkorũo kũrua kana kwaga kũrua tikuo kwa bata,+ no kĩũmbe kĩerũ nĩkĩo kĩa bata.+ 16 Arĩa othe mathiaga na mĩthiĩre ĩrĩa yagĩrĩire kũringana na ũtaaro ũcio, o acio Isiraeli a Ngai,+ marogĩa na thayũ na maiguĩrũo tha.

17 Kuuma rĩu hatikagĩe mũndũ ũgũtũma ngĩe na thĩna, nĩ gũkorũo mwĩrĩ-inĩ wakwa ndĩ na irema cia kuonania atĩ ndĩ ngombo ya Jesu.+

18 Ũtugi mũnene wa Mwathani witũ Jesu Kristo ũroikara na roho ũrĩa muonanagia, inyuĩ ariũ a Ithe witũ. Ameni.