KŨRĨ AFILIPI

1 Nĩ ithuĩ Paulo na Timotheo, ngombo cia Kristo Jesu, kũrĩ arĩa othe aamũre thĩinĩ wa Filipi arĩa marĩ na ũiguano na Kristo Jesu,+ o hamwe na arori na ndungata cia kĩũngano:+

2 Mũrogĩa na ũtugi mũnene na thayũ kuuma kũrĩ Ngai Ithe witũ, na Mwathani Jesu Kristo.

3 Hĩndĩ ciothe nĩ njokagĩria Ngai wakwa ngatho rĩrĩa ndamũririkana inyuĩ 4 mathaithana-inĩ makwa mothe nĩ ũndũ wanyu inyuothe. Hingo ciothe thaithanaga ngenete,+ 5 nĩ ũndũ wa itemi rĩanyu harĩ* ũhoro ũrĩa mwega kuuma o mũthenya wa mbere nginya rĩu. 6 Nĩ gũkorũo ndĩ na ma na ũndũ ũyũ, atĩ ũrĩa waambĩrĩirie wĩra mwega thĩinĩ wanyu nĩ akaaũrĩkia+ o nginya mũthenya ũrĩa wa Kristo Jesu.+ 7 Nĩ ũndũ mwagĩrĩru harĩ niĩ gwĩciria ũguo ũhoro-inĩ wanyu inyuothe, nĩ gũkorũo mũrĩ ngoro-inĩ yakwa, inyuĩ mũnyitanagĩra na niĩ harĩ ũtugi mũnene wa Ngai cioho-inĩ ciakwa+ na harĩ kũrũĩrĩra na kũrũmia ũhoro ũrĩa mwega kĩĩwatho.+

8 Nĩ gũkorũo Ngai nĩ mũira wakwa atĩ nĩ ndĩrerirĩria kũmuona inyuothe ndĩ na wendo muororo ta ũrĩa Kristo Jesu akoragwo naguo. 9 Na ũndũ ũyũ nĩguo thiaga na mbere kũhoya, atĩ wendo wanyu ũingĩhe mũno makĩria+ hamwe na ũmenyo ũrĩa wa ma+ na ũtaũku wothe;+ 10 atĩ mũkũũranage maũndũ marĩa ma bata makĩria,+ nĩguo mũkoragwo mũtarĩ na ũcuke na mũtekũhĩnga andũ arĩa angĩ+ o nginya mũthenya ũrĩa wa Kristo; 11 na atĩ mũiyũrũo nĩ maciaro ma ũthingu, marĩa monekaga kũgerera Jesu Kristo,+ nĩguo Ngai agoocagwo na akumagio.

12 Rĩu ariũ a Ithe witũ-rĩ, ngwenda mũmenye atĩ, maũndũ marĩa mangorete nĩ matũmĩte ũhoro ũrĩa mwega ũthereme, 13 o nginya cioho ciakwa+ nĩ ũndũ wa Kristo ikamenyeka wega+ nĩ Arangĩri othe a Mũthamaki na andũ arĩa angĩ othe. 14 Rĩu ariũ a Ithe witũ aingĩ thĩinĩ wa Mwathani nĩ magĩĩte na hinya nĩ ũndũ wa cioho ciakwa, na nĩ maronania ũmĩrĩru makĩria harĩ kũhunjia kiugo kĩa Ngai matarĩ na guoya.

15 Nĩ ma, andũ amwe marahunjia Kristo nĩ ũndũ wa ũiru na ngarari, no angĩ nĩ ũndũ wa wendi mwega. 16 Acio marĩ na wendi mwega marahunjia Kristo nĩ ũndũ wa wendo, nĩ gũkorũo nĩ moĩ atĩ nyamũrĩtwo nĩguo ndũĩrĩre ũhoro ũrĩa mwega;+ 17 ĩndĩ acio angĩ mareka ũguo nĩ ũndũ wa ngũĩ, matarĩ na muoroto mwega, nĩ gũkorũo marenda kũndeherera thĩna ndĩ cioho-inĩ ciakwa. 18 Moimĩrĩro nĩ marĩkũ? Atĩ na njĩra o yothe, Kristo nĩ arahunjio, o na angĩkorũo nĩ na njĩra ya ũhinga kana ya ũhoro wa ma, na nĩ ndĩrakenio nĩ ũndũ ũcio. Ti itherũ, nĩ ngũthiĩ na mbere gũkena, 19 nĩ gũkorũo nĩ njũĩ atĩ ũhoro ũcio nĩ ũgaatũma honokio nĩ ũndũ wa mathaithana manyu+ o hamwe na ũteithio wa roho wa Jesu Kristo.+ 20 Ũndũ ũcio nĩ ũratwarana na ũrĩa ngoragwo ndĩrirĩirie mũno na ngerĩgĩrĩra atĩ ndigaaconorithio o na atĩa, no atĩ kũgerera wĩyathi wothe wa kwaria, rĩu, o ta ũrĩa gũtũire hau kabere, Kristo nĩ ekũgoocithio kũgerera mwĩrĩ wakwa, ndĩ muoyo o na kana nguĩte.+

21 Nĩ gũkorũo ũhoro-inĩ wakwa, gũtũũra muoyo nĩ Kristo+ na gũkua nĩ ũguni.+ 22 Rĩu-rĩ, ingĩthiĩ na mbere gũtũũra muoyo thĩinĩ wa mwĩrĩ, ũndũ ũcio nĩ maciaro ma wĩra wakwa; no rĩrĩ, ũndũ ũrĩa ingĩthuura, ndikũũmenyithania. 23 Ndĩraigua ngĩgucanĩrio nĩ maũndũ maya merĩ, nĩ gũkorũo nĩ ndĩrerirĩria ũhoro wa kũrekererio na gũkorũo hamwe na Kristo,+ na hatarĩ nganja ũcio nĩguo ũndũ ũrĩa mwega makĩria.+ 24 No rĩrĩ, nĩ ũndũ wa bata makĩria atĩ njikare thĩinĩ wa mwĩrĩ nĩ ũndũ wanyu. 25 Hakĩrĩ ũguo-rĩ, nĩ ũndũ wa gũkorũo na ũũma ũcio, nĩ njũĩ atĩ nĩ ngũikara na thiĩ na mbere gũkorũo hamwe na inyuĩ inyuothe nĩgetha mũthiĩ na mbere gũkũra na mũgĩe na gĩkeno thĩinĩ wa wĩtĩkio, 26 nĩgetha gĩkeno kĩanyu gĩkaaiyũrĩrĩra thĩinĩ wa Kristo Jesu nĩ ũndũ wakwa rĩrĩa ngaakorũo hamwe na inyuĩ rĩngĩ.

27 Ndĩramwĩra o ũndũ ũyũ, atĩ mũthiage na mĩthiĩre ĩrĩa yaganĩrĩire na* ũhoro ũrĩa mwega wĩgiĩ Kristo,+ nĩguo o na ingĩũka ndĩmuone kana o na ngorũo itarĩ hamwe na inyuĩ, njiguage ũhoro wanyu na menyage atĩ no mũrũgamĩte mwĩhandĩte thĩinĩ wa roho o ũmwe, mũrĩ kĩndũ kĩmwe,+ mũkĩrũagĩrĩra mũrĩ na ũrũmwe wĩtĩkio wa ũhoro ũrĩa mwega, 28 na mũtegwĩtigĩra thũ cianyu o na hanini. Ũndũ ũcio guo wiki nĩ ũira wa kwanangwo+ harĩ o, no nĩ wa ũhonokio harĩ inyuĩ;+ na uumĩte harĩ Ngai. 29 Nĩ gũkorũo nĩ mũheetwo mweke wa mwanya nĩ ũndũ wa Kristo, to wa kuonania wĩtĩkio wanyu harĩ we, no nĩ nginya wa kũnyamarĩka nĩ ũndũ wake.+ 30 Tondũ mũracemania na mbaara o ta ĩrĩa muoonire ngĩcemania nayo,+ o ĩrĩa rĩu mũraigua atĩ no ndĩracemania nayo.

2 Angĩkorũo nĩ harĩ ũndũ o wothe wa gwĩkĩrana ngoro thĩinĩ wa Kristo, angĩkorũo nĩ harĩ ũndũ o wothe wa kũũmanĩrĩria nĩ ũndũ wa wendo, angĩkorũo nĩ harĩ ngwatanĩro o yothe ya kĩĩroho,* angĩkorũo nĩ harĩ wendo o wothe muororo na gũcayanĩra-rĩ, 2 tũmai gĩkeno gĩakwa gĩkinyanĩre na njĩra ya gũkoragwo na mwĩcirĩrie ũmwe, wendo ũmwe, mũrĩ na ũrũmwe biũ,* na mwĩcirĩrie ũmwe.+ 3 Mũtikaneke ũndũ o na ũmwe na ngũĩ+ kana na kwĩĩkĩrĩra,+ ĩndĩ mũrĩ na wĩnyihia* onagai arĩa angĩ marĩ a bata kũmũkĩra,+ 4 mũtekũrũmbũiya o maũndũ manyu moiki,+ no mũkarũmbũyagia nginya maũndũ ma arĩa angĩ.+

5 Ikaragai mũrĩ na mwerekera ũyũ wa meciria ta ũrĩa warĩ na Kristo Jesu,+ 6 ũcio, o na gũtuĩka aatũũraga na mũhianĩre wa Ngai,+ o na ndaigana gwĩciria ũrĩa angĩgeria kũiganana na Ngai.+ 7 Aca, ĩndĩ aatiganire na kĩrĩa gĩothe aarĩ nakĩo, akĩĩhaanania na ngombo,+ agĩtuĩka mũndũ.*+ 8 Makĩria ma ũguo, hĩndĩ ĩrĩa ookire arĩ mũndũ-rĩ,* nĩ eenyihirie na agĩathĩka o nginya gĩkuũ,+ ĩni, nginya rĩrĩa aakuĩrĩire mũtĩ-inĩ wa kũnyarirĩrũo.*+ 9 Nĩ ũndũ wa gĩtũmi kĩu, Ngai nĩ aamũtũũgĩririe akĩmũnenehia makĩria,+ na nĩ ũndũ wa ũtugi akĩmũhe rĩĩtwa rĩkĩrĩte marĩĩtwa marĩa mangĩ mothe,+ 10 nĩguo thĩinĩ wa rĩĩtwa rĩa Jesu maru mothe magaturio—ma arĩa marĩ igũrũ na arĩa marĩ gũkũ thĩ na arĩa marĩ rungu rwa thĩ+— 11 na nĩmĩ ciothe ciumbũre atĩ Jesu Kristo nĩ Mwathani+ nĩguo Ngai o we Ithe agoocagwo.

12 Nĩ ũndũ ũcio endwa akwa-rĩ, o ta ũrĩa mũtũire mwathĩkĩte, to hĩndĩ ĩrĩa ndĩ hamwe na inyuĩ no makĩria rĩrĩa itarĩ hamwe na inyuĩ na mũgeka ũguo mwĩyendeire, thiĩi na mbere kũrutĩra ũhonokio wanyu wĩra mũgĩĩtigagĩra na mũkĩinainaga. 13 Nĩ gũkorũo Ngai, nĩ ũndũ wa ũrĩa onaga arĩ wega, nĩwe ũmwĩkagĩra hinya, akamũhe wendi o na ũhoti wa gwĩka maũndũ. 14 Ĩkagai maũndũ mothe mũtekũnuguna+ na mũtegũkararania,+ 15 nĩguo mũkorũo mũtarĩ na ũcuke, na mũtuĩke atheru, ciana cia Ngai+ itarĩ na kameni gatagatĩ-inĩ ka rũciaro ruogomu na rũhĩngĩcanu,+ o rũu mwaraga ta ũtheri thĩinĩ wa thĩ mũrĩ gatagatĩ-inĩ karuo,+ 16 mũrũmĩtie biũ kiugo kĩrĩa kĩa muoyo.+ Hĩndĩ ĩyo nĩ ngaagĩa na gĩtũmi gĩa gũkena mũthenya ũrĩa wa Kristo, ngĩmenyaga atĩ ndiatengʼerire tũhũ, na wĩra wakwa wa kĩyo ndwarĩ wa tũhũ. 17 O na kũrĩ ũguo-rĩ, o na angĩkorũo ndĩraitwo ta igongona rĩa ndibei+ igũrũ rĩa igongona+ na ũtungata mũtheru* ũrĩa wĩtĩkio wanyu ũmũtongoretie harĩ guo, nĩ ndĩrakena na ngacanjamũka hamwe na inyuĩ inyuothe. 18 O ta ũguo, o na inyuĩ nĩ mwagĩrĩirũo gũkena na gũcanjamũka hamwe na niĩ.

19 Rĩu-rĩ, ndĩ na kĩĩrĩgĩrĩro harĩ Mwathani Jesu atĩ ica ikuhĩ nĩ ngũtũma Timotheo+ kũrĩ inyuĩ, nĩguo o na niĩ ngeekĩrũo ngoro ndaigua ũhoro wanyu. 20 Nĩ gũkorũo ndirĩ na mũndũ ũngĩ ũrĩ na mwerekera ta wake, ũrĩa ũkũrũmbũiya maũndũ manyu arĩ na wĩhokeku. 21 Tondũ arĩa angĩ othe marũmbũyagia maũndũ mao ene, ti marĩa ma Jesu Kristo. 22 No nĩ mũĩ ũrĩa eeyonanirie atĩ nĩ agĩrĩire, na o ta mwana+ na ithe, nĩ aatungatire hamwe na niĩ gũtheremia ũhoro ũrĩa mwega. 23 Nĩ ũndũ ũcio, nĩwe ndĩrerĩgĩrĩra gũtũma o narua ndarĩkia kũmenya ũrĩa maũndũ makwa megũikara. 24 Na niĩ mwene-rĩ, ndĩ na ma biũ thĩinĩ wa Mwathani atĩ nĩ ngũka o narua.+

25 No ihinda-inĩ rĩrĩ, ndĩrona kwagĩrĩire gũtũma mũrũ wa Ithe witũ Epafrodito, o we mũrutithania wĩra na mũthigari hamwe na niĩ na nĩwe mwandũmĩire arĩ ndungata ya kũrũmbũyagia mabataro makwa,+ 26 tondũ nĩ arerirĩria mũno kũmuona inyuothe na nĩ athuthĩkĩte ngoro tondũ nĩ mwaiguire atĩ aarĩ mũrwaru. 27 Ũrĩa kũrĩ nĩ atĩ, aarwarĩte hakuhĩ akue; no Ngai akĩmũiguĩra tha, na to we wiki aaiguĩrĩire tha, no nĩ nginya niĩ, nĩguo ndikagĩe na kĩeha kĩmwe thutha wa kĩrĩa kĩngĩ. 28 Nĩ ũndũ ũcio, ndĩramũtũma na mĩtũkĩ mũno, nĩguo mwamuona mũgĩe na gĩkeno rĩngĩ, na niĩ nyihĩrũo nĩ mĩtangĩko. 29 Kwoguo-rĩ, mwamũkĩrei ta ũrĩa mwamũkagĩra arĩa marĩ thĩinĩ wa Mwathani mũrĩ na gĩkeno kĩnene, na andũ ta acio mũmatĩage mũno,+ 30 nĩ gũkorũo aarĩ hakuhĩ gũkua nĩ ũndũ wa wĩra wa Kristo, akĩiga muoyo wake ũgwati-inĩ nĩguo aiyũrie ithenya rĩa inyuĩ gũkorũo mũtarĩ ho nĩguo mũndungatĩre.+

3 Ngĩrĩkĩrĩria ariũ a Ithe witũ-rĩ, thiĩi na mbere gũkena thĩinĩ wa Mwathani.+ Ndinogaga kũmwandĩkĩra maũndũ o marĩa, na nĩ tondũ wa ũgitĩri wanyu.

2 Mwĩmenyagĩrĩrei ngui; mwĩmenyagĩrĩrei arĩa mekaga maũndũ moru; mwĩmenyagĩrĩrei arĩa matinagia mwĩrĩ.+ 3 Nĩ gũkorũo nĩ ithuĩ tũruĩte kũrua kũrĩa kwa ma,+ o ithuĩ tũraruta ũtungata mũtheru kũgerera roho wa Ngai na tũkeraha nĩ ũndũ wa Kristo Jesu,+ na mwĩhoko witũ ndũkoragwo harĩ ũhoro wa mwĩrĩ, 4 no niĩ-rĩ, ndĩ na itũmi cia kwĩhoka ũhoro wa mwĩrĩ gũkĩra mũndũ ũngĩ o wothe.

Angĩkorũo nĩ harĩ mũndũ ũreciria atĩ arĩ na itũmi cia kwĩhoka ũhoro wa mwĩrĩ, niĩ ndĩ na nyingĩ kũmũkĩra: 5 ndaruire mũthenya wa kanana,+ ndĩ wa rũrĩrĩ rwa Isiraeli, kuuma mũhĩrĩga wa Benjamini, Mũhibirania ũciarĩtwo nĩ Ahibirania;+ ũhoro-inĩ wĩgiĩ watho, ndĩ Mũfarisai;+ 6 ũhoro-inĩ wĩgiĩ kĩyo, nĩ ndanyaririre kĩũngano;+ ũhoro-inĩ wĩgiĩ ũthingu ũrĩa uumanaga na watho, nĩ ndeyonanĩtie atĩ ndiarĩ na ũcuke. 7 No rĩrĩ, maũndũ marĩa ndonaga marĩ na ũguni, rĩu ndĩmonaga marĩ ma tũhũ* nĩ ũndũ wa Kristo.+ 8 Makĩria ma ũguo-rĩ, nyonaga maũndũ mothe marĩ ma tũhũ nĩ ũndũ wa thogora mũnene wa ũmenyo wĩgiĩ Kristo Jesu Mwathani wakwa. Nyonaga maũndũ mothe marĩ ma tũhũ nĩ ũndũ wake, na ngamona matariĩ ta gĩko kĩingĩ, nĩguo ndĩgĩĩre na Kristo 9 na ngorũo na ũiguano nake, ti tondũ wa ũthingu wakwa mwene ũrĩa uumanaga na kũrũmĩrĩra Watho, no nĩ tondũ wa ũthingu ũrĩa uumanaga na gũkorũo na wĩtĩkio+ harĩ Kristo,+ ũthingu ũrĩa uumaga kũrĩ Ngai nĩ ũndũ wa wĩtĩkio.+ 10 Muoroto wakwa nĩ kũmũmenya na kũmenya hinya ũrĩa wamũriũkirie,+ nyitanĩre nake mĩnyamaro-inĩ yake,+ na ngue o ta ũrĩa aakuire,+ 11 nĩguo nyone kana kũngĩhoteka no ngĩe na ũriũkio ũrĩa wa kĩambĩrĩria kuuma kũrĩ arĩa akuũ.+

12 Ti atĩ nĩ ndĩkĩtie kwamũkĩra ũndũ ũcio kana ngatuwo mũkinyanĩru, no nĩ ndĩrerutanĩria+ nĩguo nyone kana no nyite kĩndũ kĩu gĩatũmire Kristo Jesu aathuure.*+ 13 Ariũ a Ithe witũ, ndionaga ta ndĩkĩtie gũkĩnyita; no nĩ harĩ ũndũ ũmwe wa ma: Nĩ ndiganĩirũo nĩ maũndũ marĩa ndatigire+ na ngerutanĩria gũkinyĩra maũndũ marĩa marĩ mbere,+ 14 nĩ ndĩrerutanĩria nĩguo nginyĩre muoroto wa kĩheo+ kĩa rĩĩtana rĩa Ngai rĩa gũthiĩ igũrũ+ kũgerera Kristo Jesu. 15 Nĩ ũndũ ũcio-rĩ, andũ arĩa agima gatagatĩ-inĩ gaitũ+ nĩ magĩe na mwerekera ta ũcio wa meciria, na angĩkorũo mũrĩ na mwĩcirĩrie ũngĩ o na ũrĩkũ, Ngai nĩ akaamũguũrĩria mwerekera ũcio ũrĩ hau igũrũ. 16 O ũrĩa kũngĩkorũo kũrĩ, harĩa tũrĩkĩtie gũkinya-rĩ, nĩ tũthiĩi na mbere na mĩthiĩre ĩrĩa yagĩrĩire na njĩra o ĩyo.

17 Ariũ a Ithe witũ, mwĩgerekanagiei na niĩ mũrĩ na ũrũmwe,+ na mwĩciragie ũhoro wa arĩa mathiaga na njĩra ĩratwarana na kĩonereria kĩrĩa tũmũigĩire. 18 Tondũ kũrĩ andũ aingĩ ndagwetaga kaingĩ no rĩu ndĩmagwetaga na maithori, o acio matũũraga ta thũ cia mũtĩ wa kũnyarirĩrũo* wa Kristo. 19 Marigĩrĩrio mao nĩ kwanangwo, na ngai yao nĩ nda yao, na riri wao nĩguo gĩconoko kĩao kũna, namo meciria mao makoragwo o harĩ maũndũ ma gũkũ thĩ.+ 20 No ithuĩ tũrĩ raiya+ a kũrĩa igũrũ,+ na nĩ twetereire mũno mũhonokia kuuma kuo, nĩwe Mwathani Jesu Kristo,+ 21 ũrĩa ũkaagarũra mwĩrĩ ũyũ witũ ũtarĩ hinya ũhaane ta mwĩrĩ wake ũrĩa ũrĩ riri+ akĩhũthĩra hinya wake mũnene ũrĩa ũmũhotithagia gũtũma indo ciothe imwathĩkĩre.+

4 Nĩ ũndũ ũcio-rĩ, inyuĩ ariũ a Ithe witũ nyendete mũno na ndĩrerirĩria kuona, o inyuĩ gĩkeno gĩakwa na thũmbĩ yakwa,+ rũgamai mwĩhandĩte+ na njĩra ĩyo thĩinĩ wa Mwathani, inyuĩ endwa akwa.

2 Ndĩrathaitha Yudia na ngathaitha Sintike makoragwo na mwĩcirĩrie ũmwe thĩinĩ wa Mwathani.+ 3 Ĩni, o nawe ndagũthaitha, tondũ ũrĩ mũrutithania wĩra hamwe na niĩ kũna,* ũthiĩ na mbere gũteithia atumia acio merutanĩirie mũno* hamwe na niĩ nĩ ũndũ wa ũhoro ũrĩa mwega, o hamwe na Klementi na acio angĩ tũrutithanagia wĩra nao, arĩa marĩĩtwa mao marĩ ibuku-inĩ rĩa muoyo.+

4 Hingo ciothe kenagai thĩinĩ wa Mwathani. O rĩngĩ nguuga, Kenagai!+ 5 Rekei ũigananĩru wanyu+ ũmenyekage nĩ andũ othe. Mwathani arĩ hakuhĩ. 6 Mũtigatangĩkage nĩ ũndũ o na ũrĩkũ,+ no maũndũ-inĩ mothe menyithagiai Ngai maũndũ marĩa mũbataraga kũgerera mahoya na mathaithana o hamwe na gũcokia ngatho;+ 7 naguo thayũ+ wa Ngai ũrĩa ũkĩrĩte ũtaũku wothe nĩ ũrĩgitagĩra ngoro cianyu+ na ũhoti wanyu wa gwĩciria* kũgerera Kristo Jesu.

8 Ngĩrĩkĩrĩria ariũ a Ithe witũ-rĩ, maũndũ o mothe ma ma, maũndũ o mothe ma bata, maũndũ o mothe ma ũthingu, maũndũ o mothe matheru, maũndũ o mothe ma kwendeka, maũndũ o mothe matĩĩku, maũndũ o mothe mega, na maũndũ o mothe ma kũgaathĩrĩrio, thiĩi na mbere gwĩciragia* maũndũ macio.+ 9 Maũndũ marĩa mwerutire na mũgĩĩtĩkĩra na mũkĩigua na mũkĩona ũhoro-inĩ wakwa, mekagei,+ nake Ngai wa thayũ nĩ arĩkoragwo hamwe na inyuĩ.

10 Nĩ ndĩrakena mũno thĩinĩ wa Mwathani kuona atĩ rĩu nĩ mũrurumũkĩtie ũhoro wa kũnũmbũiya.+ O na gũtuĩka nĩ mwanũmbũyagia, mũtiarĩ na mweke wa gwĩka ũguo. 11 Ndiroiga ũguo tondũ atĩ ndĩ na bata, nĩ gũkorũo nĩ ndĩrutĩte kũiganĩra gũtekũmakania ũrĩa maũndũ makwa matariĩ.+ 12 Nĩ njũĩ gũikara itarĩ na indo nyingĩ+ na gũikara ndĩ na indo nyingĩ. Maũndũ-inĩ mothe na ũrĩa wothe kũngĩkorũo gũtariĩ nĩ ndĩrutĩte hitho ya gũikara hũniĩ na gũikara hũtiĩ, gũkorũo na indo nyingĩ na gũkorũo itarĩ. 13 Maũndũ-inĩ mothe nĩ ngoragwo na hinya kũgerera ũrĩa ũũheaga hinya.+

14 No rĩrĩ, nĩ mwekire wega nĩ kũnyitanĩra na niĩ thĩna-inĩ wakwa. 15 Na rĩrĩ, inyuĩ Afilipi ningĩ nĩ mũĩ atĩ rĩrĩa mwerutire ũhoro ũrĩa mwega riita rĩa mbere, ndoima Makedonia, gũtirĩ kĩũngano kĩngĩ kĩanyitanĩire na niĩ ũhoro-inĩ wĩgiĩ kũheana na kwamũkĩra, tiga o inyuĩ;+ 16 tondũ rĩrĩa ndarĩ Thesalonike, nĩ mwandũmĩire kĩndũ nĩ ũndũ wa mabataro makwa, na to riita rĩmwe, ĩndĩ nĩ maita merĩ. 17 Ti atĩ nĩ kĩheo ndĩracaria, no ndĩrenda maciaro marĩa mekuongerera uumithio mũthithũ-inĩ wanyu. 18 No rĩrĩ, ndĩ na kĩrĩa gĩothe ndĩrabatara, o na makĩria. Ndĩ na indo ciothe, tondũ nĩ nyamũkĩrĩte kuuma kũrĩ Epafrodito+ kĩrĩa mũrandũmĩire, mũtararĩko mwega,+ igongona rĩretĩkĩrĩka, na rĩrakenia Ngai. 19 Nake Ngai wakwa nĩ arĩmũheaga biũ mabataro manyu mothe+ kũringana na ũtonga wake ũrĩ riri kũgerera Kristo Jesu. 20 Rĩu-rĩ, Ngai o we Ithe witũ arogoocwo tene na tene. Ameni.

21 Ngeithĩriai mũndũ o wothe mwamũre ũrĩ na ũiguano na Kristo Jesu. Ariũ a Ithe witũ arĩa tũrĩ nao nĩ mamũgeithia. 22 Arĩa othe aamũre, na makĩria arĩa a nyũmba ya Kaisari,+ nĩ mamũgeithia.

23 Ũtugi mũnene wa Mwathani Jesu Kristo ũroikara na roho ũrĩa muonanagia.