MARŨA MA KERĨ KŨRĨ TIMOTHEO

1 Nĩ niĩ Paulo, mũtũmwo wa Kristo Jesu nĩ ũndũ wa wendi wa Ngai kũringana na kĩĩranĩro kĩa muoyo kũgerera Kristo Jesu,+ 2 kũrĩ Timotheo, mwana nyendete:+

Ũrogĩa na ũtugi mũnene, tha, na thayũ kuuma kũrĩ Ngai Ithe witũ, na Kristo Jesu Mwathani witũ.

3 Nĩ njokagĩria Ngai ngatho, o we ndutagĩra ũtungata mũtheru o ta ũrĩa maithe makwa ma tene meekaga, na ndĩ na thamiri theru, ndiagaga gũkũririkana mũthenya na ũtukũ thĩinĩ wa mathaithana makwa. 4 Na nĩ ndĩriragĩria gũkuona ndaririkana maithori maku, nĩguo njiyũrũo nĩ gĩkeno. 5 Tondũ nĩ ndirikanaga wĩtĩkio waku ũtarĩ na ũhinga,+ o ũcio waambĩte gũkorũo na cũcũ wanyu Loisi na maitũguo Eunike, na ndĩ na ma atĩ wĩtĩkio o ro ũcio ũrĩ thĩinĩ waku.

6 Tondũ wa ũguo, ndĩrakũririkania ũhurutagĩre o ta mwaki kĩheo kĩa Ngai kĩrĩa kĩrĩ thĩinĩ waku kĩrĩa waamũkĩrire hĩndĩ ĩrĩa ndakũigĩrĩire moko.+ 7 Nĩ gũkorũo Ngai ndaatũheire roho wa guoya,+ no aatũheire roho wa hinya+ na wa wendo na wa meciria mega. 8 Nĩ ũndũ ũcio, ndũgaconokagĩre ũira wĩgiĩ Mwathani+ o na kana ũnjĩgiĩ, o niĩ njohetwo nĩ ũndũ wake, no nyitanagĩra harĩ gũkirĩrĩria mĩnyamaro+ nĩ ũndũ wa ũhoro ũrĩa mwega na njĩra ya kwĩhoka hinya wa Ngai.+ 9 Nĩ aatũhonokirie na agĩtwĩta na rĩĩtana itheru,+ ti tondũ wa ciĩko citũ, no nĩ tondũ wa muoroto wake mwene na ũtugi wake mũnene.+ Twaheirũo ũtugi ũcio thĩinĩ wa Kristo Jesu mbere ya mahinda ma tene, 10 no rĩu nĩ wonanĩtio wega biũ kũgerera kũguũrio kwa Mũhonokia witũ, Kristo Jesu,+ ũrĩa ũniinĩte gĩkuũ+ na akarehe ũtheri wĩgiĩ muoyo+ na kwaga kũbutha+ kũgerera ũhoro ũrĩa mwega,+ 11 ũrĩa ndathuurirũo nduĩke mũhunjia na mũtũmwo na mũrutani waguo.+

12 Ningĩ nĩkĩo ndĩranyamarĩka na maũndũ maya,+ no ndiraconoka.+ Nĩ gũkorũo Ũcio niĩ njĩtĩkĩtie nĩ ndĩmũĩ, na ndĩ na ma atĩ arĩ na ũhoti wa kũgitĩra kĩrĩa ndĩmwĩhokeire o nginya mũthenya ũcio.+ 13 Thiĩ na mbere kũrũmia gĩthimi* gĩa ciugo iria ciagĩrĩire*+ o icio waiguire kuuma kũrĩ niĩ, ũrĩ na wĩtĩkio na wendo ũrĩa uumanaga na ũiguano hamwe na Kristo Jesu. 14 Gitagĩra ũndũ ũyũ mwega wĩhokeirũo kũgerera roho mũtheru, ũrĩa ũikaraga thĩinĩ witũ.+

15 Nĩ ũĩ ũndũ ũyũ, atĩ andũ othe a gĩcigo kĩa Asia+ nĩ mandiganĩirie, o hamwe na Fugelo na Herimogene. 16 Mwathani aroiguĩra nyũmba ya Onesiforo+ tha, nĩ gũkorũo nĩ aanjĩkĩraga hinya kaingĩ, na ndaaconokagĩra mĩnyororo yakwa ya njera. 17 Mũgarũ na ũguo, hĩndĩ ĩrĩa aarĩ Roma, aanjaririe na kĩyo nginya akĩnyona. 18 Mwathani aromwĩtĩkĩria akaaiguĩrũo tha nĩ Jehova* mũthenya ũcio. Na wee nĩ ũĩ wega ũtungata ũrĩa wothe aarutire Efeso.

2 Nĩ ũndũ ũcio wee mwana wakwa-rĩ,+ thiĩ na mbere kũgĩa na hinya thĩinĩ wa ũtugi mũnene ũrĩa ũrĩ thĩinĩ wa Kristo Jesu; 2 namo maũndũ marĩa waiguire kuuma kũrĩ niĩ, marĩa maanyitirũo mbaru nĩ aira aingĩ,+ maũndũ macio mehokere arũme arĩa ehokeku, arĩa nao megũkorũo marĩ agĩrĩru biũ kũruta andũ arĩa angĩ. 3 Tondũ wee ũrĩ mũthigari mwega+ wa Kristo Jesu, nyitanagĩra harĩ gũkirĩrĩria mĩnyamaro.+ 4 Gũtirĩ mũndũ ũtungataga arĩ mũthigari wĩingĩragia* biacara-inĩ cia* ũtũũro, tondũ nĩ arenda gwĩtĩkĩrũo nĩ ũrĩa wamũtuire mũthigari. 5 O na mathaako-inĩ, gũtirĩ mũthaaki ũheagwo thũmbĩ o tiga athaakire kũringana na mawatho.+ 6 Mũrĩmi ũrĩa ũrĩ kĩyo no mũhaka akorũo arĩ we wa mbere kũrĩa maciaro. 7 Ikara ũgĩĩcũranagia igũrũ rĩgiĩ maũndũ marĩa ndĩroiga; Mwathani nĩ arĩkũheaga ũtaũku maũndũ-inĩ mothe.

8 Ririkana atĩ Jesu Kristo nĩ aariũkirio kuuma kũrĩ arĩa akuũ,+ na aarĩ wa mbeũ ya* Daudi,+ kũringana na ũhoro ũrĩa mwega hunjagia,+ 9 o ũcio ndĩranyamarĩka nĩ ũndũ waguo na ngohwo ta mwĩki-naĩ.+ O na kũrĩ ũguo, kiugo kĩa Ngai ti kĩohe.+ 10 Na nĩkĩo gĩtũmaga thiĩ na mbere gũkirĩrĩria maũndũ mothe nĩ ũndũ wa arĩa athuure,+ nĩguo o nao magĩe na ũhonokio ũrĩa uumanaga na Kristo Jesu, o hamwe na riri wa tene na tene. 11 Ciugo ici nĩ cia kwĩhokeka: Angĩkorũo na ma twakuire hamwe nake, ningĩ nĩ tũgaatũũra hamwe nake;+ 12 tũngĩthiĩ na mbere gũkirĩrĩria, ningĩ nĩ tũgaathana hamwe nake tũrĩ athamaki;+ tũngĩmũkaana, o nake nĩ agaatũkaana;+ 13 tũngĩaga kwĩhokeka, we aikaraga arĩ o mwĩhokeku, nĩ gũkorũo ndangĩĩkaana we mwene.

14 Ikaraga ũkĩmaririkanagia maũndũ macio, ũkĩmataaraga* mbere ya Ngai atĩ matikarũage igũrũ rĩa ciugo, ũcio nĩ ũndũ ũtarĩ ũguni o na hanini tondũ nĩ ũthũkagia* arĩa marathikĩrĩria. 15 Ĩka ũrĩa wothe ũngĩhota kuonania atĩ ũrĩ mwĩtĩkĩrĩku nĩ Ngai, mũruti wĩra ũtarĩ na ũndũ angĩconokera, ũkĩhũthagĩra wega kiugo kĩa ũhoro ũrĩa wa ma.+ 16 No rĩrĩ, reganaga na mĩario ya tũhũ ĩrĩa ĩthahagia maũndũ matheru,+ nĩ ũndũ ĩrĩthiaga o ĩgĩtongoragia harĩ kwagĩra Ngai gĩtĩo, 17 na kiugo kĩao kĩrĩtheremaga o ta kĩronda kĩa ndĩĩra. Himenayo na Fileto nĩ amwe ao.+ 18 Andũ acio nĩ moimĩte nja ya ũhoro wa ma, tondũ moigaga atĩ andũ nĩ marĩkĩtie kũriũkio,+ na nĩ maragarũra wĩtĩkio wa andũ amwe. 19 O na kũrĩ ũguo, mũthingi ũrĩa mũrũmu wa Ngai ũtũũraga wĩhandĩte, ũrĩ na mũhũũri ũyũ, “Jehova* nĩ oĩ arĩa marĩ ake,”+ na, “Ũrĩa wothe ũkayagĩra rĩĩtwa rĩa Jehova*+ nĩ aregane na maũndũ matarĩ ma ũthingu.”

20 Thĩinĩ wa nyũmba nene gũkoragwo na indo cia thahabu na cia betha o hamwe na cia mbaũ na cia rĩũmba, na nĩ kũrĩ imwe cia wĩra mũtĩĩku na ingĩ cia wĩra ũtarĩ mũtĩĩku. 21 Kwoguo mũndũ angĩĩthema icio cia wĩra ũtarĩ mũtĩĩku, arĩkoragwo arĩ kĩndũ kĩa wĩra mũtĩĩku, gĩtheru, kĩrĩ na ũguni harĩ mwene, kĩhaarĩirio nĩ ũndũ wa wĩra wothe mwega. 22 Nĩ ũndũ ũcio-rĩ, ũragĩra merirĩria ma wĩthĩ, ĩndĩ ũthingatage ũthingu, wĩtĩkio, wendo, thayũ, ũrĩ hamwe na arĩa makayagĩra Mwathani marĩ na ngoro theru.

23 Ningĩ, reganaga na ngarari cia ũrimũ na ũkĩgu,+ tondũ nĩ ũĩ atĩ irehaga haaro. 24 Nĩ gũkorũo ngombo ya Mwathani ndĩagĩrĩirũo kũrũa, no yagĩrĩirũo gũkorũo ĩrĩ hooreri* kwerekera andũ othe,+ ĩrĩ na ũhoti wa kũrutana, ĩkegirĩrĩria rĩrĩa yahĩtĩrio,+ 25 ĩgĩtaaraga arĩa matarĩ na mwerekera mwega ĩrĩ na ũhooreri.+ No kũhoteke Ngai atũme merire* nĩguo magĩe na ũmenyo ũrĩa wa ma,+ 26 nao no macokererũo nĩ meciria mao na methare kuuma mũtego-inĩ wa Mũcukani, kuona atĩ nĩ amanyitĩte marĩ muoyo nĩguo mekage wendi wake.+

3 No menya ũndũ ũyũ, atĩ matukũ-inĩ ma kũrigĩrĩria+ nĩ gũkaagĩa mahinda ma ũgwati maritũ kũhiũrania namo. 2 Nĩ gũkorũo andũ nĩ magaatuĩka eyendi, endi mbeca, egani, egaathi, arumi Ngai, matathĩkagĩra aciari, matarĩ ngatho, matarĩ ehokeku, 3 matarĩ wendo ũrĩa wa ndũire, matendaga ũiguano, acambania, mategiragĩrĩria, matarĩ tha, matendete maũndũ mega,* 4 akunyanĩri, momĩtie ciongo, etĩi, mendete ikeno handũ ha kwenda Ngai, 5 monekaga ta marĩ na wĩyamũrĩri Ngai no nĩ mareganaga na hinya waguo;+ wĩtheme biũ andũ acio. 6 Gatagatĩ-inĩ kao kuumagĩra arũme meingĩragia na wara nyũmba-inĩ cia andũ makagucagĩrĩria atumia arĩa matarĩ hinya na maritũhĩirũo mũno nĩ mehia, magĩtongoragio nĩ merirĩria ma mĩthemba ngũrani, 7 makĩĩrutaga hingo ciothe ĩndĩ matirĩ hĩndĩ mahotaga kũgĩa na ũmenyo wa ma.

8 Rĩu-rĩ, o ta ũrĩa Janesi na Jambare maakararirie Musa, noguo acio o nao mathiaga na mbere gũkararia ũhoro ũrĩa wa ma. Andũ ta acio nĩ mathũkĩte biũ meciria, na nĩ maregetwo ũhoro-inĩ wa wĩtĩkio. 9 No rĩrĩ, matigũthiĩ na mbere rĩngĩ tondũ ũrimũ* wao nĩ ũkuoneka wega nĩ andũ othe, o ta ũrĩa kwarĩ harĩ arũme acio erĩ.+ 10 No wee nĩ ũrũmĩrĩire biũ ũrutani wakwa, mũtũũrĩre wakwa,+ muoroto wakwa, wĩtĩkio wakwa, wetereri wakwa, wendo wakwa, ũkirĩrĩria wakwa, 11 kũnyarirũo gwakwa na mĩnyamaro ta ĩrĩa ndacemanirie nayo Antiokia,+ Ikoniamu,+ na Listra.+ Nĩ ndakirĩrĩirie kũnyarirũo kũu, nake Mwathani akĩĩhonokia kuumana na maũndũ macio mothe.+ 12 Na rĩrĩ, arĩa othe meriragĩria gũtũũra na wĩrutĩri Ngai marĩ na ngwatanĩro hamwe na Kristo Jesu o nao nĩ marĩnyariragwo.+ 13 No andũ aganu na arĩa metuaga ũrĩa matarĩ marĩkĩragĩrĩria o kũũruha, makĩhĩtithagia andũ na makĩhĩtithagio.+

14 No wee-rĩ, thiĩ na mbere kũrũmĩrĩra maũndũ marĩa werutire na ũgĩteithio gwĩtĩkia,+ tondũ nĩ ũĩ werutire kuuma kũrĩ ũ 15 na atĩ kuuma ũrĩ o gakenge+ ũkoretwo ũĩ maandĩko marĩa matheru,+ o marĩa mangĩtũma ũtuĩke mũũgĩ nĩgetha ũkaahonoka kũgerera wĩtĩkio harĩ Kristo Jesu.+ 16 Rĩandĩko o rĩothe, rĩtongoretio nĩ roho wa Ngai+ na rĩrĩ ũguni harĩ kũrutana,+ gũkaanania, kũrũnga maũndũ, na kũherithia na njĩra ya ũthingu,+ 17 nĩgetha mũndũ wa Ngai akoragwo arĩ mwagĩrĩru kũna, ahaarĩirio biũ nĩ ũndũ wa wĩra wothe mwega.

4 Ndagwatha mbere ya Ngai na Kristo Jesu, o ũcio ũgaatuĩra+ arĩa marĩ muoyo na arĩa akuũ,+ na kũgerera kũguũrio gwake+ o na Ũthamaki wake:+ 2 Hunjia kiugo;+ ĩka ũguo ũtekũmaĩrĩria mahinda marĩa magĩrĩru o na marĩa maritũ; rũngaga andũ,+ ũkamakaania, na ũkamataaraga ũrĩ na wetereri wothe o na ũhoti mwega wa kũrutana.+ 3 Tondũ nĩ gũkaagĩa na ihinda andũ matagaakirĩrĩria ũrutani ũrĩa wagĩrĩire,*+ no kũringana na merirĩria mao ene, nĩ makeeyũnganĩria arutani a gũkenagia matũ mao.*+ 4 Nĩ magaatiga gũthikĩrĩria ũhoro ũrĩa wa ma na mathikagĩrĩrie ngʼano cia maheeni. 5 No wee-rĩ, tũũria ũhoti waku wa gwĩciria maũndũ-inĩ mothe, kiragĩrĩria moritũ,+ rutaga wĩra wa mũhunjia,* hingia ũtungata waku biũ.+

6 Nĩ gũkorũo rĩu niĩ ndĩraitwo ta igongona rĩa ndibei,+ na ihinda rĩakwa rĩa kũrekererio+ rĩrĩ hakuhĩ. 7 Nĩ ndũĩte mbaara ĩrĩa njega,+ nĩ ndengʼerete ihenya nginya mũthia,+ nĩ nũmĩtie wĩtĩkio. 8 Kuuma rĩu, kĩrĩa niĩ njigĩirũo nĩ thũmbĩ ya ũthingu,+ ĩrĩa ngaaheo mũthenya ũcio ĩrĩ kĩheo+ nĩ Mwathani, o we mũtuanĩri ciira mũthingu,+ no to niĩ nyiki ngaaheo, no nĩ nginya arĩa othe mendete kũguũrio gwake.

9 Ĩka ũrĩa wothe ũngĩhota ũũke kũrĩ niĩ o na ihenya. 10 Nĩ gũkorũo Dema+ nĩ aandiganĩirie tondũ nĩ eendire mũtabarĩre ũyũ wa maũndũ,* na nĩ athiĩte Thesalonike, Kreseni nake agathiĩ Galatia, nake Tito agathiĩ Dalamatia. 11 Luka wiki nowe ũrĩ hamwe na niĩ. Oya Mariko mũũke nake, tondũ nĩ andeithagia ũtungata-inĩ. 12 No nĩ ndatũma Tikiko+ athiĩ Efeso. 13 Na ũgĩũka-rĩ, ndehera kabuuti karĩa ndatigire gwa Karipo kũu Teroa, na ikũnjo, makĩria iria cia njũũa.

14 Aleksanda ũrĩa mũturi wa indo cia gĩcango nĩ aanjĩkire ũũru mũno. Jehova* nĩ akaamũrĩha kũringana na ciĩko ciake.+ 15 O nawe nĩ ũrabatara kũmwĩmenyerera, tondũ nĩ aakararirie ndũmĩrĩri itũ na gĩkĩro kĩnene mũno.

16 Hĩndĩ ĩrĩa ndetetagĩra riita rĩa mbere-rĩ, gũtirĩ mũndũ wokire kũndeithia, othe no kũndiganĩria maandiganĩirie—matikanatuĩrũo nĩ ũndũ wa ũguo. 17 No Mwathani nĩ aarũgamire hakuhĩ na niĩ na akĩnjĩkĩra hinya, nĩguo kũgerera harĩ niĩ, wĩra wa kũhunjia ũhingio biũ na ndũrĩrĩ ciothe ciigue ndũmĩrĩri ĩyo;+ na nĩ ndahonokirio kuuma kanua-inĩ ka mũrũthi.+ 18 Mwathani nĩ akaahonokia kuumana na gĩĩko o gĩothe kĩa waganu na aahonokie nĩ ũndũ wa Ũthamaki wake wa igũrũ.+ We arogĩa na riri tene na tene. Ameni.

19 Ngeithĩria Priska na Akila+ na nyũmba ya Onesiforo.+

20 Erasito+ aatigirũo Korintho, no Trofima+ ngĩmũtiga Mileto arĩ mũrwaru. 21 Ĩka ũrĩa wothe ũngĩhota ũkinye gũkũ mbere ya hĩndĩ ya heho.

Nĩ wageithio nĩ Eubulu, na Pudene, Lino, Kilaudia, o hamwe na ariũ a Ithe witũ othe.

22 Mwathani aroikara na roho ũrĩa wonanagia. Naguo ũtugi wake mũnene ũroikara hamwe na inyuĩ.