MARŨA MA JAKUBU

1 Nĩ niĩ Jakubu,+ ngombo ya Ngai na ya Mwathani Jesu Kristo, kũrĩ mĩhĩrĩga ĩrĩa 12 ĩhurunjũkĩte kũndũ na kũndũ:

Nĩ ndamũgeithia!

2 Ariũ a Ithe witũ, onagai kĩrĩ gĩkeno gĩtheri rĩrĩa mwacemania na magerio matiganĩte,+ 3 mũkĩmenyaga atĩ wĩtĩkio ũcio wanyu ũgeretio nĩ ũtũmaga mũgĩe na ũkirĩrĩria.+ 4 No rekagai ũkirĩrĩria ũrĩkie wĩra waguo, nĩgetha mũkoragwo mũrĩ akinyanĩru na mũrĩ agima maũndũ-inĩ mothe, mũtekwaga ũndũ o na ũmwe.+

5 Kwoguo mũndũ o na ũrĩkũ wanyu angĩkorũo atarĩ na ũũgĩ, nĩ athiĩ na mbere kũhoya Ngai+ na nĩ ekũheo,+ nĩ gũkorũo Ngai aheaga andũ othe arĩ na ũtaana na ategũkũũmana.*+ 6 No nĩ athiĩ na mbere kũhoya arĩ na wĩtĩkio,+ atarĩ na nganja o na hanini,+ tondũ mũndũ ũrĩa ũkoragwo na nganja ahaana ta ikũmbĩ rĩa iria rĩrĩa rĩtwaragwo nĩ rũhuho rĩkahurutwo kũndũ na kũndũ. 7 Ma nĩ atĩ, mũndũ ũcio ndagĩrĩire kwĩrĩgĩrĩra atĩ nĩ ekwamũkĩra kĩndũ kuuma kũrĩ Jehova;* 8 nĩ mũndũ wa ngoro igĩrĩ,+ ũtehandĩte wega njĩra-inĩ ciake ciothe.

9 No mũrũ wa Ithe witũ ũrĩa mũthĩni nĩ akene* nĩ ũndũ wa gũtũũgĩrio,+ 10 nake ũrĩa mũtongu akene nĩ ũndũ wa kũnyihio,+ tondũ agaathira o ta ihũa rĩa mũgũnda. 11 Nĩ gũkorũo o ta ũrĩa riũa rĩrathaga rĩgakorũo na ũrugarĩ mũnene rĩgatũma mũmera ũhoohe, na ihũa rĩaguo rĩkagwa thĩ naguo ũthaka waguo wa na nja ũgathira-rĩ, noguo mũndũ ũrĩa mũtongu agaathira arĩ o maũndũ-inĩ marĩa athingataga.+

12 Gũkena nĩ mũndũ ũrĩa ũthiaga na mbere gũkirĩrĩria igerio,+ tondũ arĩkia gwĩtĩkĩrĩka nĩ akaamũkĩra thũmbĩ ya muoyo,+ ĩrĩa Jehova* eerĩire arĩa mathiaga na mbere kũmwenda.+ 13 Rĩrĩa mũndũ o wothe aragerio ndakoige: “Ndĩragerio nĩ Ngai.” Nĩ gũkorũo Ngai ndangĩgerio na maũndũ moru, nake we mwene ndageragia mũndũ o na ũrĩkũ. 14 Ĩndĩ o mũndũ ageragio na njĩra ya kũgucĩrĩrio na kũheenererio nĩ merirĩria make mwene.+ 15 Na merirĩria macio marĩkia kuoha nda maciaraga mehia; namo mehia marĩkia gwĩkwo, marehaga gĩkuũ.+

16 Mũtikahĩtithio, inyuĩ ariũ a Ithe witũ nyendete. 17 Kĩheo o gĩothe kĩega na gĩkinyanĩru kiumaga igũrũ,+ gĩgaikũrũka kiumĩte kũrĩ Ithe wa motheri ma igũrũ,+ o we ũtagarũrũkaga kana agacenjia ta ciĩruru iria icenjacenjagia.+ 18 Warĩ wendi wake gũtũma tũgĩe kuo kũgerera kiugo kĩa ũhoro ũrĩa wa ma,+ nĩguo tũtuĩke maciaro mamwe ma mbere ma ciũmbe ciake.+

19 Menyai ũndũ ũyũ ariũ a Ithe witũ nyendete: O mũndũ no mũhaka ahiũhage gũthikĩrĩria, ndakahiũhage kwaria,+ na ndakahiũhage kũrakara,+ 20 nĩ gũkorũo marakara ma mũndũ matirehaga ũthingu wa Ngai.+ 21 Nĩ ũndũ ũcio, eheriai gĩko gĩothe na ũndũ o wothe mũũru,*+ na mwĩtĩkĩre mũrĩ na ũhooreri kũhandwo kiugo kĩrĩa kĩngĩhota kũmũhonokia.*

22 O na kũrĩ ũguo, tuĩkai a kũhingagia kiugo+ no to kũigua tu, mũkĩĩheenagia inyuĩ ene na mwĩcirĩrie wa maheeni. 23 Tondũ mũndũ o wothe angĩtuĩka wa kũigua kiugo no ndakĩhingagia,+ mũndũ ũcio atariĩ ta mũndũ ũkwĩrora ũthiũ wake mwene* gĩcicio-inĩ. 24 Tondũ eroraga, agacoka agathiĩ na akariganĩrũo o rĩo nĩ ũrĩa atariĩ. 25 No mũndũ ũrĩa ũroraga na kinyi watho ũrĩa mũkinyanĩru+ ũrĩa ũrehaga wĩyathi na agatũũra thĩinĩ waguo, ndaiguaga agacoka akariganĩrũo, ĩndĩ nĩ ahingagia maũndũ macio; na nĩ arĩkenagĩra ũndũ ũrĩa areka.+

26 Mũndũ o wothe angĩĩciria atĩ nĩ mũthathaiya wa Ngai* no ndagiragĩrĩria rũrĩmĩ rwake,*+ nĩ ngoro yake mwene araheenia, na ũthathaiya wake nĩ wa tũhũ. 27 Ũthathaiya* ũrĩa mũtheru na ũtarĩ thahu kũringana na mawoni ma Ngai o we Ithe witũ nĩ ũyũ: kũrũmbũyagia ciana cia ndigwa+ na atumia a ndigwa+ mathĩna-inĩ mao,+ na mũndũ gũikaraga atarĩ na kameni kuumana na thĩ ĩno.+

2 Ariũ a Ithe witũ, hihi mũrageria kũrũmia wĩtĩkio wa Mwathani witũ ũrĩ riri Jesu Kristo o mũrĩ na kĩmenyano?+ 2 Nĩ gũkorũo mũndũ wĩkĩrĩte mbete cia thahabu ciara na akehumba nguo cia goro angĩingĩra mũcemanio-inĩ wanyu, na mũndũ mũthĩni wĩhumbĩte nguo irĩ na gĩko o nake aingĩre, 3 hihi muonaga ũcio wĩhumbĩte nguo cia goro arĩ wa bata makĩria na mũkamwĩra, “Wee ikara thĩ haha hega,” nake ũcio mũthĩni mũkamwĩra, “Wee ikara ũrũngiĩ” kana, “Ikara thĩ harĩa rungu rwa gaturũa ka magũrũ makwa”?+ 4 Angĩkorũo nĩguo-rĩ, na githĩ mũtikĩrĩ na mũthutũkanio gatagatĩ-inĩ kanyu,+ ningĩ githĩ mũtigĩtuĩkĩte atuanĩri ciira mũgatuaga matua moru?+

5 Ariũ a Ithe witũ nyendete, ta thikĩrĩriai. Na githĩ Ngai ndaathuurire andũ arĩa athĩni kũringana na mawoni ma thĩ nĩguo matuĩke itonga ũhoro-inĩ wa wĩtĩkio+ na agai a Ũthamaki, o ũcio eerĩire arĩa mamwendete?+ 6 No inyuĩ mũtiheaga athĩni gĩtĩo. Na githĩ itonga ticio imũhinyagĩrĩria+ na ikamũkururia ikamũtwara magooti-inĩ? 7 Na githĩ itirumaga rĩĩtwa rĩega rĩrĩa mwetanirio narĩo? 8 Rĩu-rĩ, angĩkorũo nĩ mũhingagia watho wa mũthamaki kũringana na rĩandĩko rĩrĩ, “No mũhaka wende mũndũ ũrĩa mũriganĩtie nake o ta ũrĩa wĩyendete wee mwene,”+ nĩ mwĩkaga wega. 9 No angĩkorũo mũthiaga na mbere gũkorũo na kĩmenyano,+ nĩ mũrehia, na nĩ mũtuĩrĩirũo nĩ watho atĩ mũrĩ ehia.+

10 Nĩ gũkorũo mũndũ angĩathĩkĩra Watho wothe ĩndĩ ahĩngwo ũndũ-inĩ ũmwe, nĩ agararĩte Watho wothe.+ 11 Tondũ ũrĩa woigire, “Ndũkanatharie,”+ ningĩ nĩ ooigire, “Ndũkanoragane.”+ Rĩu-rĩ, o na ũngĩaga gũtharia ĩndĩ ũũragane, nĩ uunĩte watho. 12 Thiĩi na mbere kwaria na gwĩka maũndũ o ta andũ arĩa magaatuĩrũo nĩ watho wa andũ arĩa marĩ na wĩyathi.*+ 13 Nĩ gũkorũo mũndũ ũrĩa ũtaiguanagĩra tha agaatuĩrũo atekũiguĩrũo tha.+ Tha nĩ itooragia ituĩro.

14 Harĩ na ũguni ũrĩkũ ariũ a Ithe witũ, mũndũ angiuga arĩ na wĩtĩkio no ndarĩ na ciĩko?+ Hihi wĩtĩkio ũcio no ũhote kũmũhonokia?+ 15 Kũngĩkorũo na ariũ kana aarĩ a Ithe witũ matarĩ na gĩa kwĩhumba* na irio cia kũmaigana mũthenya ũcio, 16 no ũmwe wanyu ameere, “Thiĩi na thayũ; mwĩhumbe mũigue ũrugarĩ na mũrĩe wega,” na mwage kũmahe kĩrĩa marabatara nĩ ũndũ wa mwĩrĩ wao-rĩ, ũndũ ũcio ũngĩkorũo na ũguni ũrĩkũ?+ 17 O ta ũguo-rĩ, wĩtĩkio mũtheri ũtarĩ na ciĩko, nĩ mũkuũ.+

18 O na kũrĩ ũguo, mũndũ ahota kuuga atĩrĩ: “Wee ũrĩ na wĩtĩkio, na niĩ ndĩ na ciĩko. Nyonia wĩtĩkio waku ũtarĩ na ciĩko, na niĩ nguonie wĩtĩkio wakwa kũgerera ciĩko ciakwa.” 19 Na githĩ ndwĩtĩkĩtie atĩ kũrĩ Ngai ũmwe? Nĩ ũreka wega. No rĩrĩ, o na ndaimono nĩ ciĩtĩkĩtie na ikainaina.+ 20 No wee mũndũ ũyũ ũtarĩ kĩene-rĩ, hihi nĩ ũrenda kũmenya atĩ wĩtĩkio ũtarĩ na ciĩko nĩ wa tũhũ? 21 Githĩ Iburahimu ithe witũ ndaatuirũo mũthingu kũgerera ciĩko thutha wa kũruta mũrũwe Isaaka kĩgongona-inĩ?+ 22 Nĩ mũkuona atĩ wĩtĩkio wake warutaga wĩra hamwe na ciĩko na wĩtĩkio wake watuirũo mũkinyanĩru nĩ ciĩko ciake,+ 23 na rĩandĩko rĩkĩhinga rĩrĩa riugaga ũũ: “Iburahimu aagĩire na wĩtĩkio harĩ Jehova,* na ũndũ ũcio ũgĩtarũo atĩ nĩ ũthingu harĩ we,”+ na agĩtwo mũrata wa Jehova.*+

24 Nĩ mũkuona atĩ mũndũ atuagwo mũthingu nĩ ũndũ wa ciĩko no ti ũndũ wa wĩtĩkio wiki. 25 Na njĩra o ta ĩyo-rĩ, githĩ Rahabu ũrĩa warĩ mũmaraya ndaatuirũo mũthingu nĩ ũndũ wa ciĩko thutha wa kũnyita ũgeni na njĩra ya ũtugi andũ arĩa maatũmĩtwo na akĩmoimia nja amagereirie njĩra ĩngĩ?+ 26 Ti itherũ, o ta ũrĩa mwĩrĩ ũtarĩ na roho* ũrĩ mũkuũ,+ no taguo wĩtĩkio ũtarĩ na ciĩko ũrĩ mũkuũ.+

3 Ariũ a Ithe witũ, ti aingĩ gatagatĩ-inĩ kanyu magĩrĩirũo gũtuĩka arutani, mũkĩmenyaga atĩ nĩ tũkaamũkĩra ituĩro iritũ gũkĩra arĩa angĩ.+ 2 Nĩ gũkorũo ithuothe nĩ tũhĩngagwo* maita maingĩ.+ Angĩkorũo mũndũ ndahĩngĩkaga akĩaria, ũcio nĩ mũkinyanĩru, nĩ ahotaga kũgirĩrĩria mwĩrĩ wake wothe o naguo. 3 Tũngĩoha kanua ka mbarathi na mĩkwa nĩguo itwathĩkĩre, nĩ tũhotaga gũtongoria mwĩrĩ wacio wothe o naguo. 4 Ningĩ ta mwĩciriei ũhoro wa meri: O na gũtuĩka nĩ nene mũno na itindĩkagwo nĩ huho nene-rĩ, itwarithagio na thukani* nini mũno o kũrĩa guothe mũndũ ũrĩa ũracitwarithia arenda gũthiĩ.

5 Ũndũ ũmwe na ũcio, rũrĩmĩ nĩ kĩĩga kĩnini kĩa mwĩrĩ, ĩndĩ nĩ rwĩgaathaga mũno. Ta rorai ũrĩa kamwaki kanini kagwatagia mũtitũ mũnene! 6 Rũrĩmĩ o naruo nĩ mwaki.+ Rũrĩmĩ rũrũgamĩrĩire thĩ ĩtakoragwo na ũthingu thĩinĩ wa ciĩga citũ cia mwĩrĩ, tondũ nĩ rũthahagia mwĩrĩ wothe+ na rũkagwatia mũtũũrĩre wothe, na rũgwatagio mwaki nĩ Jehanamu.* 7 Nĩ gũkorũo mĩthemba yothe ya nyamũ cia gĩthaka na nyoni na ciũmbe iria itambaga thĩ o hamwe na cia iria-inĩ no ihoorerio na cianahoorerio nĩ andũ. 8 No gũtirĩ mũndũ ũngĩhooreria rũrĩmĩ. Rũtikindagĩria na rũrehaga maũndũ moru, rũiyũire thumu wa kũũragana.+ 9 Tũgoocaga Jehova* Ithe witũ naruo, na ningĩ no tũrumaga andũ naruo, o acio mombĩtwo “na mũhianĩre wa Ngai.”+ 10 Thĩinĩ wa kanua o karĩa kuumaga kĩrathimo nokuo kuumaga kĩrumi.

Ariũ a Ithe witũ, maũndũ matiagĩrĩire gũthiĩ ũguo.+ 11 Kaĩ itherũkĩro rĩa maĩ rĩrutaga maĩ mega* na rĩkaruta maĩ marũrũ kuuma irima-inĩ rĩmwe? 12 Ariũ a Ithe witũ, kaĩ mũkũyũ ũngĩciara ndamaiyũ, kana mũthabibũ ũciare ngũyũ?+ O namo maĩ ma cumbĩ matingĩruta maĩ mega.

13 Nĩ mũndũ ũrĩkũ gatagatĩ-inĩ kanyu mũũgĩ na ũrĩ na ũtaũku? Kũgerera mĩthiĩre yake mĩega nĩ onanie ciĩko ciĩkĩtwo na njĩra ya ũhooreri ũrĩa uumanaga na ũũgĩ. 14 No angĩkorũo mũrĩ na ũiru mũnene+ na ngũĩ*+ ngoro-inĩ cianyu, mũtikegaathage+ na mũkaheenania igũrũ rĩgiĩ ũhoro ũrĩa wa ma. 15 Ũcio ti ũũgĩ ũrĩa ũikũrũkaga uumĩte igũrũ; nĩ wa gũkũ thĩ,+ ta wa nyamũ, wa ndaimono. 16 Nĩ gũkorũo harĩa hothe harĩ na ũiru na ngũĩ,* ningĩ hatingĩaga ngucanio na maũndũ mothe moru.+

17 No ũũgĩ ũrĩa uumaga igũrũ o mbere nĩ mũtheru,+ ningĩ nĩ ũrĩ thayũ,+ nĩ ũrĩ ũigananĩru,+ ũkoragwo wĩhaarĩirie gwathĩka, ũiyũirũo nĩ tha na maciaro mega,+ ndũrĩ mũthutũkanio,+ ndũrĩ ũhinga.+ 18 Makĩria ma ũguo, maciaro ma ũthingu mahandagwo handũ harĩ na thayũ+ nĩ ũndũ wa arĩa* macaragia thayũ.+

4 Mbaara na haaro ciumaga kũ gatagatĩ-inĩ kanyu? Githĩ itiumanaga na merirĩria manyu ma mwĩrĩ marĩa mathiaga na mbere kũrũa thĩinĩ wanyu?*+ 2 Mwĩriragĩria no mũtirĩ. Mũthiaga na mbere kũũragana na gũcumĩkĩra, ĩndĩ mũtihotaga kũgĩa. Mũthiaga na mbere kũhaarana na kũrũa.+ Mũtirĩ tondũ mũtihoyaga. 3 Rĩrĩa mwahoya mũtiheagwo tondũ mũhoyaga mũrĩ na muoroto mũũru, nĩguo mũcihũthĩre kũhingia merirĩria manyu ma mwĩrĩ.

4 Inyuĩ itharia ici,* kaĩ mũtoĩ atĩ kũgĩa ũrata na thĩ nĩ kũgĩa ũthũ na Ngai? Nĩ ũndũ ũcio, mũndũ o wothe wendaga gũtuĩka mũrata wa thĩ etuaga thũ ya Ngai.+ 5 Kana mũgwĩciria rĩandĩko riugaga ũũ hatarĩ gĩtũmi: “Roho ũrĩa ũikaraga thĩinĩ witũ ũthiaga na mbere kwĩrirĩria ũrĩ na ũiru”?+ 6 O na kũrĩ ũguo, ũtugi mũnene ũrĩa We aheanaga nĩ mũnene makĩria. Kwoguo rĩandĩko riugaga: “Ngai nĩ areganaga na arĩa etĩi,+ no arĩa enyihia nĩ amaheaga ũtugi mũnene.”+

7 Nĩ ũndũ ũcio, mwĩnyihagĩriei Ngai;+ no reganagai na Mũcukani,+ nake nĩ ekũmũũrĩra.+ 8 Kuhĩrĩriai Ngai, nake nĩ ekũmũkuhĩrĩria.+ Mwĩthambei moko manyu inyuĩ ehia,+ na mũtherie ngoro cianyu,+ inyuĩ mũrĩ na ngoro igĩrĩ. 9 Nyitwoi nĩ kĩeha, mũcakae, na mũrĩre.+ Gĩtheko kĩanyu nĩ kĩgarũrũke gĩtuĩke mũcakayo, nakĩo gĩkeno kĩanyu gĩtuĩke mĩtangĩko. 10 Mwĩnyihiei maitho-inĩ ma Jehova,*+ nake nĩ ekũmũtũũgĩria.+

11 Ariũ a Ithe witũ, tigai kwaria ũũru igũrũ rĩgiĩ mũndũ na ũrĩa ũngĩ.+ Mũndũ wothe waragia ũũru igũrũ rĩgiĩ mũrũ wa Ithe kana agatuĩra mũrũ wa Ithe, aragia ũũru igũrũ rĩgiĩ watho na agatuĩra watho. Na angĩkorũo nĩ ũtuagĩra watho, wee ndũrĩ mũhingia wa watho no ũrĩ mũtuanĩri ciira. 12 Mũheani Watho na Mũtuanĩri Ciira+ no ũmwe tu, o we ũngĩhota kũhonokia na kũniina.+ No wee-rĩ, ũkĩrĩ ũ nĩguo ũtuagĩre mũndũ ũrĩa ũngĩ?+

13 Atĩrĩrĩ inyuĩ arĩa muugaga: “Ũmũthĩ kana rũciũ nĩ tũgaathiĩ itũũra rĩna na tũikare kuo mwaka ũmwe, na tũhũũre biacara na tũgĩe na uumithio,”+ 14 no mũtiũĩ ũrĩa ũtũũro wanyu ũgaakorũo ũhaana rũciũ.+ Nĩ gũkorũo mũrĩ kĩbii kĩrĩa gĩũkaga o kahinda kanini gĩgacoka gĩgathira.+ 15 Handũ ha ũguo, mwagĩrĩirũo kuuga atĩrĩ: “Jehova* angĩenda,+ nĩ tũgũtũũra muoyo na twĩke ũndũ ũyũ kana ũrĩa.” 16 No rĩrĩ, inyuĩ mwĩrahagĩra mwĩgaatho wanyu wa mwĩtĩo. Mwĩgaatho wothe ta ũcio nĩ mũũru. 17 Nĩ ũndũ ũcio, angĩkorũo mũndũ nĩ oĩ gwĩka ũndũ ũrĩa wagĩrĩire no ndawĩkaga, ũndũ ũcio nĩ mehia harĩ we.+

5 Atĩrĩrĩ inyuĩ andũ arĩa atongu, rĩrai na mũcakae nĩ ũndũ wa mathĩna marĩa mekũmũkora.+ 2 Ũtonga wanyu nĩ ũbuthĩte, na nguo cianyu ikarĩo nĩ memenyi.+ 3 Thahabu na betha cianyu nĩ ndĩe nĩ gutu, na gutu wacio nĩ ũgaatuĩka ũira wa kũmũũkĩrĩra na nĩ ũkaarĩa nyama cia mĩĩrĩ yanyu. Indo iria mũigĩte igaatuĩka o ta mwaki matukũ-inĩ ma kũrigĩrĩria.+ 4 Atĩrĩrĩ, mĩcara ĩrĩa mũregete kũrĩha aruti a wĩra arĩa maagethire mĩgũnda yanyu ĩikaraga ĩgĩkayaga, na kĩrĩro kĩa agethi acio gĩa kũhoya ũteithio nĩ gĩkinyĩire matũ ma Jehova* mũnene wa ita.+ 5 Mũtũũrĩte mũtũũrĩre wa mĩago mũkĩhingagia merirĩria manyu gũkũ thĩ. Mũnoretie ngoro cianyu nĩ ũndũ wa mũthenya wa gũthĩnjwo.+ 6 Nĩ mũtuanĩire ciira; nĩ mũũragĩte mũndũ ũrĩa mũthingu. Githĩ we ndareganaga na inyuĩ?

7 Nĩ ũndũ ũcio ariũ a Ithe witũ-rĩ, gĩai na wetereri o nginya hĩndĩ ya gũkorũo kuo kwa Mwathani.+ Atĩrĩrĩ, mũrĩmi aikaraga etereire maciaro mega ma thĩ, akonania wetereri nĩ ũndũ wamo o nginya mbura ya mbere na mbura ya thutha-inĩ ĩkinye.+ 8 O na inyuĩ onaniai wetereri;+ ĩkĩrai ngoro cianyu hinya, tondũ gũkorũo kuo kwa Mwathani nĩ gũkuhĩrĩirie.+

9 Ariũ a Ithe witũ, mũtigatetage* nĩ ũndũ wa mũndũ ũrĩa ũngĩ, nĩgetha mũtigatuĩrũo.+ Atĩrĩrĩ, Mũtuanĩri Ciira arũgamĩte mbere ya mĩrango. 10 Ariũ a Ithe witũ, rũmĩrĩrai kĩonereria kĩega gĩa kũnyamarĩka nĩ ũndũ wa maũndũ moru+ na gĩa kuonania wetereri+ kĩa anabii arĩa maaragia thĩinĩ wa rĩĩtwa rĩa Jehova.*+ 11 Atĩrĩrĩ, tuugaga gũkena* nĩ andũ arĩa maakirĩrĩirie.+ Nĩ mũiguĩte ũhoro wa ũkirĩrĩria wa Ayubu+ na mũkona ũrĩa Jehova* eekire marigĩrĩrio-inĩ,+ atĩ Jehova* arĩ wendo muororo mũno* na nĩ mũigua tha.+

12 Makĩria ma ũguo ariũ a Ithe witũ-rĩ, tigai kwĩhĩta na igũrũ o na kana na thĩ kana na mwĩhĩtwa ũngĩ o wothe. No rekagai “Ĩĩ” yanyu ĩtuĩke ĩĩ na “Aca” yanyu, ĩtuĩke aca,+ nĩgetha mũtigatuĩke a gũgaaciirithio.

13 Hihi nĩ harĩ mũndũ ũrĩ na moritũ gatagatĩ-inĩ kanyu? Nĩ athiĩ na mbere kũhoya.+ Hihi nĩ harĩ mũndũ mũkenu? Nĩ aine thaburi.+ 14 Hihi nĩ harĩ mũndũ mũrwaru gatagatĩ-inĩ kanyu? Nĩ ete athuri+ a kĩũngano, nao mamũhoere makĩmũhakaga maguta+ thĩinĩ wa rĩĩtwa rĩa Jehova.* 15 Na ihoya rĩu rĩa wĩtĩkio nĩ rĩgũtũma mũndũ ũcio mũrwaru* ahone, na Jehova* nĩ ekũmuoya na igũrũ. Ningĩ angĩkorũo nĩ ekĩte mehia, nĩ ekuoherũo.

16 Nĩ ũndũ ũcio, umbũranagĩrai mehia manyu+ mũtekũhithĩrĩra na mũhoyanagĩre, nĩguo mũhonio. Ithaithana rĩa mũndũ mũthingu nĩ rĩrĩ ũhoti mũnene.*+ 17 Elija aarĩ mũndũ o ta ithuĩ, no hĩndĩ ĩrĩa aahoire mũno mbura ndĩkoire, gũtioirire thĩinĩ wa bũrũri ũcio ihinda rĩa mĩaka ĩtatũ na mĩeri ĩtandatũ.+ 18 Agĩcoka akĩhoya rĩngĩ, narĩo igũrũ rĩkiuria mbura, na bũrũri ũkĩgĩa na maciaro.+

19 Ariũ a Ithe witũ, mũndũ o na ũrĩkũ gatagatĩ-inĩ kanyu angĩhĩtithio oime ũhoro-inĩ ũrĩa wa ma nake mũndũ ũngĩ amũgarũre amũcokie, 20 menyai atĩ mũndũ o wothe ũgarũraga mwĩhia akamũcokia kuuma mahĩtia-inĩ+ ma njĩra yake, nĩ akaamũhonokia kuuma gĩkuũ-inĩ na nĩ akaahumbĩra mehia maingĩ.+