Ũhoro wa Kwambĩrĩria

Mũndũ ũmwe wĩtagwo Dauda augire ũũ: “Ndaarereirũo itũũra-inĩ rĩmwe bũrũri-inĩ wa Sierra Leone. Hĩndĩ ĩmwe ndĩ mũnyinyi, nĩ kwagĩire na ngucanio ya mũgũnda gatagatĩ ka famĩlĩ iitũ na famĩlĩ ĩngĩ. Othe maagucanagĩria mũgũnda ũmwe. Nĩguo maniine ngucanio ĩyo-rĩ, magĩta mũndũ mũgo ũmwe. Akĩnengera mũthuri ũmwe gĩcicio, agĩcoka akĩmũhumbĩra na gĩtambaya kĩa rangi mwerũ. Thutha wa kahinda kanini mũthuri ũcio akĩambĩrĩria kũinaina na gũthithina. O arorete gĩcicio-inĩ, agĩkayũrũrũka akiugaga ũũ: ‘Ndĩrona mũthuri mũkũrũ agĩũka! Ehumbĩte nguo cia rangi mwerũ. Nĩ mũkũrũ, mũraihu, na ũrĩ na mbuĩ, na arathiĩ ainamĩrĩire.’

“Aataaragĩria ũhoro wa Guuka witũ! Amakĩte mũno akĩanĩrĩra akiuga ũũ: ‘Ũkai mwĩyonere, angĩkorũo mũtiretĩkia!’ No hatirĩ o na ũmwe witũ warĩ na ũmĩrĩru wa gwĩka ũguo! Mũndũ mũgo ũcio akĩmũminjaminjĩria mĩthaiga yaarĩ kaihũri-inĩ, ĩrĩa aathondekete na mahuti na maĩ, akĩhoorera.

“Akĩaria kũgerera kũrĩ mũndũ ũcio warĩ na gĩcicio, ‘Guuka,’ akiuga atĩ mũgũnda ũcio warĩ wa famĩlĩ itũ. Akĩra cũcũ witũ aũrĩme atarĩ na guoya. Famĩlĩ ĩyo ĩngĩ ĩgĩtĩkĩra itua rĩu na ngucanio ĩyo ĩgĩthira.”

Maũndũ ta macio nĩ monekaga kaingĩ Afrika ya Ithũĩro. Kũu, o ta kũndũ kũrĩa kũngĩ thĩinĩ wa thĩ, andũ milioni nyingĩ makoragwo metĩkĩtie atĩ andũ makua mathiaga gũtũũra ciikaro cia kĩĩroho, na no mahote kuona na kũingĩrĩra mũtũũrĩre wa andũ arĩa marĩ gũkũ thĩ. Hihi wĩtĩkio ũcio nĩ wa ma? Hihi kũna akuũ marĩ muoyo? Angĩkorũo tiguo-rĩ, nĩa acio metuaga maroho ma andũ arĩa maakuire? Kũmenya ũhoro wa ma wĩgiĩ ciũria icio nĩ kwa bata mũno.