Ithomo rĩa 9
No Mũhaka Ndungata cia Ngai Ikorũo Irĩ Theru
Nĩũndũ kĩ nĩtwagĩrĩirũo gũkorũo tũrĩ atheru na njĩra ciothe? (1)
Gũkorũo tũrĩ atheru kĩĩroho kwĩ na gĩtũmi kĩrĩkũ? (2)
gũkorũo tũrĩ atheru mĩthiĩre-inĩ ya ũthingu? (3) gũkorũo tũrĩ atheru meciria-inĩ? (4) gũkorũo tũrĩ atheru kĩĩmwĩrĩ? (5)
Nĩ mĩario ya mũthemba ũrĩkũ ĩtarĩ mĩtheru twagĩrĩirũo nĩ gũthema? (6)
1. Jehova Ngai nĩ mũtheru. We erĩgagĩrĩra athathayia ake mathiĩ na mbere gũthera—kĩĩroho, mĩthiĩre-inĩ ya ũthingu, meciria-inĩ, na kĩĩmwĩrĩ. (1 Petero 1:16) Kĩo kĩingĩ nĩkĩendekanaga nĩguo tũthiĩ na mbere gũkorũo tũrĩ atheru maitho-inĩ ma Ngai. Tũtũũraga thĩinĩ wa thĩ ĩtarĩ theru. O na ningĩ nĩtũcindanaga na mĩerekera iitũ ithuĩ ene ya gwĩka ũũru. Ĩndĩ no mũhaka tũtigakue ngoro.
2. Ũtheru wa Kĩĩroho: Akorũo nĩtũkwenda gũtungatĩra Jehova, tũtingĩhota gũthiĩ na mbere kũrũmia morutani na mĩtugo o na ĩrĩkũ ya ndini ĩtarĩ ya ma. No mũhaka tuume thĩinĩ wa ndini ĩtarĩ ya ma na tũtikamĩnyite mbaru na njĩra o na ĩrĩkũ. (2 Akorintho 6:14-18; Kũguũrĩrio 18:4) Tũrĩkĩtie kwĩruta ma igũrũ rĩa Ngai, no mũhaka twĩmenyerere tũtikanahĩtithio nĩ andũ arĩa marutanaga maheeni.—2 Johana 10, 11.
3. Ũtheru wa Mĩthiĩre ya Ũthingu: Jehova endaga athathayia ake mathiage na mĩthiĩre ya Akristiano a ma hingo ciothe. (1 Petero 2:12) We nĩonaga ũndũ o wothe ũrĩa twĩkaga, o na tũngĩwĩka hitho-inĩ. (Ahibirania 4:13) Twagĩrĩirũo gũthema mĩthiĩre ĩtarĩ ya ũthingu ũhoro-inĩ ũkoniĩ gũkomania o na maũndũ mangĩ memenyeretio matarĩ matheru ma thĩ ĩno.—1 Akorintho 6:9-11.
4. Ũtheru wa Meciria-inĩ: Tũngĩiyũria meciiria maitũ meciria matheru, makembu, o naguo mũthiĩre witũ no ũkorũo wĩ mũtheru. (Afilipi 4:8) Ĩndĩ tũngĩĩciria maũndũ matarĩ matheru, moumĩrĩro ma ũguo nĩ ciĩko njũru. (Mathayo 15:18-20) Nĩtwagĩrĩirũo nĩ gũthema maũndũ ma gwĩkenia marĩa mangĩthũkia meciria maitũ. No tũiyũrie meciiria maitũ na meciria mega tũngĩĩruta Kiugo kĩa Ngai.
5. Ũtheru wa Kĩĩmwĩrĩ: Tondũ Akristiano makoragwo marũgamĩrĩire Ngai, maagĩrĩire kũiga mĩĩrĩ na nguo ciao irĩ theru. Twagĩrĩirũo gwĩthamba moko maitũ thutha wa kũhũthĩra kĩoro, na nĩtwagĩrĩirũo kũmathambia mbere ya kũrĩa irio kana kũhutia irio. Angĩkorũo ndũrĩ na mĩberethi yaagĩrĩire ya kweheria gĩko-rĩ, mai maagĩrĩire gũthikwo. (Gũcokerithia Maathani 23:12, 13) Kũrũmia ũtheru wa kĩĩmwĩrĩ gũteithagia kũrehe ũgima mwega wa mwĩrĩ. Nyũmba ya Mũkristiano yagĩrĩirũo ĩkorũo ĩrĩ theru thĩinĩ na nja. Yagĩrĩirũo ĩkorũo ĩrĩ kĩonereria kĩega itũũra-inĩ.
6. Mwario Mũtheru: No mũhaka ndungata cia Ngai ciaragie ma hingo ciothe. Aheenania matigatonya Ũthamaki-inĩ wa Ngai. (Aefeso 4:25; Kũguũrĩrio 21:8) Akristiano matihũthagĩra mĩario mĩũru. Matithikagĩrĩria kana makaringana itherũ rĩtarĩ itheru kana makaheana ngʼano itarĩ theru. Nĩũndũ wa mwario wao mũtheru, o monekaga me na ngũũrani wĩra-inĩ kana cukuru-inĩ na itũũra-inĩ.—Aefeso 4:29, 31; 5:3.
[Mbica karatathi ka 18, 19]
No mũhaka ndungata cia Ngai ikoragwo irĩ theru maũndũ-inĩ mothe