Ũgunĩki Mwagĩrĩru wa Bata wa Ũhoro Ũrĩa Mwega Harĩ Mũingĩ
THĨINĨ wa thĩ ũmũthĩ tuiguaga andũ makĩgweta ũũ: “Mawatho ma Ũkristiano matingĩhotekeka. Matingĩruta wĩra harĩ rũciaro rũrũ rwa ũmũthĩ rũcanũku.” O na kũrĩ ũguo, mĩario yaribotirũo ya mũtogoria Mũhĩndĩ Mohandas K. Gandhi na Gavana Mũngeretha wa na hau kabere wa India, Lord Irwin, monanirie mawoni me ngũũrani mũno. Kwĩrĩkanaga atĩ Lord Irwin oririe Gandhi eciragia nĩ ũndũ ũrĩkũ ũngĩahotire kũnina ngucanio gatagatĩ-inĩ ka Ngeretha na India. Gandhi oire Biblia na akĩhingũra Mathayo gĩcunjĩ gĩa ithano na akiuga ũũ: “Rĩrĩa bũrũri waku na wakwa ikagwatanĩra ũrutani ũrĩa waheanirũo nĩ Kristo thĩinĩ wa Mahunjio ma Kĩrĩma-inĩ, nĩ tũgakorũo tũtoretie to mathĩna ma mabũrũri maitũ tu ĩndĩ o na marĩa ma thĩ yothe.”
Mahunjio macio maaragia ũhoro wa gũcaria maũndũ ma kĩĩroho na gũtuĩka ahoreri, thayũ, kũgĩa tha, na kwenda ũthingu. Mahunjio macio makaananĩtie to kũragana gwiki tu ĩndĩ o na kũrakarĩra arĩa angĩ, na to ũtharia wiki tu ĩndĩ o na gũkorũo na maciria moru. Makananĩtie ciĩko cia ndigano ĩtarĩ na gĩtũmi gĩtarĩ kĩene kĩrĩa kĩharaganagia mĩciĩ na kũnyamaria ciana. Matwĩraga ũũ: ‘Enda o na arĩa magũthũire, he abatari, tigagai gũtuĩra arĩa angĩ hatarĩ tha, mekagei o ta ũrĩa ũngĩenda magwĩke.’ Ũtarani ũyũ, ũngĩhingio, ũngĩrehe maciaro maingĩ mũno. Andũ aingĩ a ĩtũũra mangĩũhingia, no guo itũũra rĩ kwagĩra!
Aira a Jehova nĩ magucagĩrĩria andũ gwĩka ũguo. Biblia ĩmarutaga gũtĩĩa ũhiki. Ciana ciao irutagwo kũrũmia mawatho. Mũthingi wa famĩlĩ nĩ wĩkagĩrĩrwo mũno. Famĩlĩ inyitaine nĩ kĩrathimo harĩ mũingĩ o na harĩ rũrĩrĩ. Historia ĩyũirũo nĩ mĩhiano ya thirikari cia thĩ ikĩhehenjeka rĩrĩa ũiguano wa famĩlĩ wathũka na mĩtugo ya ũtharia yaingĩha. O ũrĩa andũ ũmwe ũmwe na famĩlĩ maagucĩrĩrio nĩ Aira a Jehova kũrũmĩrĩra mawatho ma Ũkristiano-rĩ, wĩki naĩ, ũtharia, na uni watho noguo ũkũnyiha thĩinĩ wa itũũra rĩanyu.
Rũmena nĩ ruo rũmwe rũa mathĩna marĩa manene mathũkagia mũingĩ na ndũrĩrĩ. Ngũrani ya ũguo-rĩ, mũtũmwo Petero oigire ũũ: “Ti-itherũ ndĩ kuona atĩ Ngai ndatĩagĩra andũ maũthĩ: no thĩinĩ wa ndũrĩrĩ ciothe mũndũ ũrĩa ũmwĩtigagĩra na ageka maũndũ ma ũthingu nĩetĩkagĩrũo nĩwe.” Nake Paulo akĩandĩka ũũ: “Gũtingĩcoka gũthuranio Mũyahudi kana Mũyunani, arĩa me ngombo kana arĩa matarĩ ngombo, andũ arũme kana andũ-a-nja: nĩ ũndũ-rĩ, inyuĩ inyuothe mũtuĩkĩte o ũmwe ki thĩinĩ wa Kristo Jesu.” (Atũmwo 10:34, 35; Agalatia 3:28) Aira a Jehova nĩ metĩkĩtie ũguo. Andũ a iruka ciothe na marangi maikaraga na makaruta wĩra hamwe thĩinĩ wa hendikuota yao ya thĩ yothe, o na thĩinĩ wa honge cia wabici ciao na ikundi-inĩ.
Thĩinĩ wa Afrika mĩhĩrĩga ĩmwe ndĩngĩtukana ĩtekũrũa. O na kũrĩ ũguo-rĩ, ciũngano-inĩ cia Aira a Jehova kũu, andũ kuuma mĩhĩrĩga mĩingĩ marĩaga, magakoma, na magathathaiya na kũgwatanĩra hamwe me na ũũrũmwe. Maobithaa a Thirikari magegagio nĩ kuona ũndũ ũyũ. Kĩonereria kĩa ũiguano ũyũ wa Ũkristiano wa ma nĩ wa gwetirũo ũhoro wa guo nĩ ngathĩti ya Amsterdam News ya New York ya Agosti 2, 1958. Gĩtũmi gĩa kũgweta ũguo nĩ ũndũ wa kũona kĩũngano kĩa ndũrĩrĩ kĩrĩa tũgwetete hau mbere hĩndĩ ĩrĩa Aira makĩria robo ya milioni macemanĩtie thĩinĩ wa Mũciĩ wa New York.
“Kũndũ guothe Andũ Airũ, Athũngũ, na andũ a Irathĩro, andũ a mĩthemba yothe matonyanĩte hamwe marĩ na gĩkeno hatarĩ mũhaka. . . . Aira athathaiya kuuma mabũrũri 120 matũũrire na gũthathaiya hamwe na thayũ, makĩonia Amerika ũrĩa arĩ ũhũthũ gwĩka ũguo. . . . Kĩũngano kĩu nĩ kĩonereria kĩa ũrĩa andũ mangĩhota kũruta wĩra na gũtũũra hamwe.”
Aingĩ mahota kuuga atĩ mawatho ma Ũkristiano matiagĩrĩire harĩ thĩ ya rĩu. O na kũrĩ ũguo-rĩ, nĩ ũndũ ũrĩkũ ũngĩ ũrutĩte wĩra kana ũkaaruta? Mawatho ma Akristo no makorũo marĩ na bata mũnene mangĩhũthĩrũo kũrĩ mũingĩ ũmũthĩ, marĩa mangĩkorũo marĩ mũthingi wa kũnyitithania andũ oothe a ‘ndũrĩrĩ, mĩhĩrĩga na nduka’ a thĩ yothe rungu rũa Ũthamaki wa Ngai igũrũ rĩa andũ.—Kũguũrĩrio 7:9, 10.
[Kohoro karatathi ka 23]
Andũ a iruka ciothe na rangi marutithanagia wĩra hamwe
[Kohoro karatathi ka 24]
Ũkristo nĩ ũrutaga wĩra. Nĩ ũndũ ũngĩ ũrĩkũ gũkĩra ũcio wagĩrĩire?