Nyũmba cia Ũthamaki Ciakagwo Nĩkĩ na Ciakagwo Atĩa?

O ta ũrĩa rĩĩtwa Nyũmba ya Ũthamaki rĩonanĩtie, ũrutani wa Bibilia ũrĩa waragĩrĩrio kuo ũkoragwo ũkonainie na Ũthamaki wa Ngai, ũrĩa Jesu aaragĩrĩria mũno ũtungata-inĩ wake.​—⁠Luka 8:⁠1.

Nĩ kũndũ kwa andũ gũcemania ũthathaiya-inĩ wa ma. Kũu nĩkuo Aira a Jehova mabangagĩra wĩra wa kũhunjia gĩcigo-inĩ kĩao. (Mathayo 24:14) Nyũmba cia Ũthamaki itikoragwo ciganaine na ciakagwo na mĩakĩre ĩtiganĩte, no itikoragwo na maũndũ maingĩ, na nyingĩ ciacio ihũthagĩrũo nĩ makĩria ma kĩũngano kĩmwe. Mĩaka-inĩ ya ica ikuhĩ, nĩ twakĩte kana tũgacokereria Nyũmba cia Ũthamaki ngiri nyingĩ (mũigana wa ithano o mũthenya) nĩ ũndũ wa wongerereku wa ciũngano. Tũhotaga atĩa gwĩka ũguo?​—⁠Mathayo 19:⁠26.

Ciakagwo na mĩhothi ĩrĩa ĩcokanagĩrĩrio kuuma kũndũ na kũndũ. Mĩhothi ĩyo ĩtũmagwo kũrĩ wabici ya rũhonge nĩguo ciũngano iria ingĩbatara gwaka kana gũthondeka Nyũmba cia Ũthamaki iteithĩrĩrio na mbeca icio.

Ciakagwo nĩ erutĩri matarĩ a kũrĩhwo, moimĩte kũndũ gũtiganĩte, na marĩ na ũhoti ũtiganĩte. Mabũrũri-inĩ maingĩ, nĩ gũkoragwo na Ikundi cia Mĩako ya Nyũmba cia Ũthamaki. Ikundi cia aaki na erutĩri ithiaga kuuma kĩũngano kĩmwe nginya kĩrĩa kĩngĩ bũrũri-inĩ, o na kũrĩa kũraihĩrĩirie, igateithĩrĩrie ciũngano cia kũu gwaka Nyũmba cia Ũthamaki. Mabũrũri-inĩ mangĩ, Aira a Jehova arĩa marĩ na ũmenyeru nĩ mamũrĩtwo nĩguo marũgamĩrĩre wĩra wa mĩako na wa gũthondeka Nyũmba cia Ũthamaki gĩcigo-inĩ kĩrĩa magaĩirũo. O na gũtuĩka andũ aingĩ marĩ na ũmenyeru wa mĩako nĩ merutagĩra gũteithia mĩako-inĩ yothe, andũ aingĩ arĩa mateithagĩrĩria makoragwo marĩ a kĩũngano kĩu kĩrakĩrũo. Maũndũ macio mothe mahotekaga nĩ ũndũ wa roho wa Jehova o hamwe na wĩrutĩri wa ngoro yothe wa andũ ake.​—⁠Thaburi 127:1; Akolosai 3:⁠23.

• Kũrĩa tũthathayagĩria gwĩtagwo Nyũmba ya Ũthamaki nĩkĩ?

• Tũhotaga atĩa gwaka Nyũmba cia Ũthamaki thĩ yothe?