Marũa Kuuma Kũrĩ Kĩama Kĩrĩa Gĩtongoragia

Ahunjia Ende a Ũhoro Ũrĩa Mwega:

Tũrĩ na mweke wa mwanya wa gũkorũo tũkĩnyitanĩra ũthathaiya-inĩ wa Ngai ũrĩa wa ma, Jehova. Tũkoragwo tũrĩ “arutithania wĩra hamwe na Ngai,” na twĩhokeirũo wĩra wa kũhonokia mĩoyo kũgerera kũhunjia na kũrutana ũhoro ũrĩa mwega wa Ũthamaki wake. (1 Kor. 3:9; Mat. 28:19, 20) Nĩguo tũhingie wĩra ũcio tũrĩ na ũrũmwe na thayũ, no mũhaka tũkorũo na mĩbango mĩega.​—1 Kor. 14:40.

Ibuku rĩrĩ nĩ rĩgũgũteithia gũtaũkĩrũo nĩ ũrĩa kĩũngano gĩa Gĩkristiano kĩrutaga wĩra matukũ-inĩ maya. Rĩarĩrĩirie wĩra na maũndũ marĩa wĩhokeirũo ũrĩ Mũira wa Jehova. Woya na ũritũ wĩra ũrĩa ũheetwo na ũhingie maũndũ marĩa wĩhokeirũo, nĩ ũrĩgĩaga na “hinya ũhoro-inĩ wa wĩtĩkio.”​—Atũm. 16:4, 5; Gal. 6:5.

Nĩ ũndũ ũcio, tũragwĩkĩra ngoro ũthome ibuku rĩrĩ na kinyi. Caria ũrĩa ũngĩhũthĩra ũhoro ũrĩa ũrĩ thĩinĩ ũtũũro-inĩ waku. Kwa ngerekano, angĩkorũo nĩ hĩndĩ ũratuĩkire mũhunjia ũtarĩ mũbatithie-rĩ, nĩ makinya marĩkũ wagĩrĩirũo kuoya nĩguo ũbatithio? Na angĩkorũo ũrĩ mũbatithie-rĩ, ũngĩka atĩa nĩguo ũthiĩ na mbere gũkũra kĩĩroho na wongerere ũtungata waku harĩ Jehova? (1 Tim. 4:15) Nĩ maũndũ marĩkũ ũngĩka nĩguo ũteithĩrĩrie kĩũngano gĩkorũo na thayũ? (2 Kor. 13:11) No wone macokio ma ciũria icio ibuku-inĩ rĩrĩ.

Angĩkorũo ũrĩ mũrũ wa Ithe witũ, ũngĩka atĩa nĩguo wagĩrĩre gũtuĩka ndungata ya kĩũngano na thutha-inĩ ũtuĩke mũthuri wa kĩũngano? O ũrĩa andũ aingĩ marathiĩ na mbere gũka ithondeka-inĩ rĩa Jehova, noguo kũragĩa na bata mũnene wa ariũ a Ithe witũ arĩa magĩrĩire a kũrũmbũiya andũ a Jehova. Ibuku rĩrĩ nĩ rĩgũgũteithia kũmenya maũndũ marĩa mendekanaga harĩ ‘kwĩrutanĩria’ gũkinyĩra mĩoroto ĩyo ya kĩĩroho.​—1 Tim. 3:1.

Nĩ ihoya ritũ atĩ ibuku rĩrĩ nĩ rĩgũgũteithia kũmenya na kuoya na ũritũ itemi rĩaku ithondeka-inĩ rĩa Jehova. Nĩ tũmwendete mũno inyuothe na tũtitigaga kũhoya atĩ mũgaakorũo gatagatĩ-inĩ ka arĩa magaatũũra makenagĩra gũthathaiya Ithe witũ wa igũrũ, Jehova, tene na tene.​—Thab. 37:10, 11; Isa. 65:21-25.