Gũtirĩ Kĩndũ Kĩngĩamagirĩrĩirie

Mũndũ ũmwe ũtaahotaga gũthiĩ aaikaraga thĩ kĩhingo-inĩ kĩa hekarũ akĩhoyahoyaga o mũthenya. Hĩndĩ ĩmwe thutha wa mĩaraho nĩ oonire Petero na Johana magĩthiĩ hekarũ-inĩ, na akĩmeera ũũ: ‘Ndamũthaitha mũhe kĩndũ.’ Nake Petero akĩmwĩra: ‘Ndĩ na kĩndũ kĩega ingĩkũhe gũkĩra mbeca. Thĩinĩ wa rĩĩtwa rĩa Jesu, rũgama wĩtware!’ Petero akĩmũteithĩrĩria kũrũgama na mũndũ ũcio akĩambĩrĩria gwĩtwara! Kĩrĩndĩ gĩgĩkena mũno nĩ ũndũ wa kĩama kĩu na andũ aingĩ magĩtuĩka etĩkia.

No athĩnjĩri-Ngai na Asadukai nĩ maarakarire mũno. Maanyitire atũmwo, makĩmatwara igooti-inĩ na makĩmoria ũũ: ‘Nũũ ũramũheire hinya wa kũhonia mũndũ ũyũ?’ Nake Petero agĩcokia: ‘Tũraheirũo hinya nĩ Jesu Kristo ũrĩa muoragire.’ Atongoria a ndini makĩmagũthũkĩra makĩmeera ũũ: ‘Mũtikarie ũhoro wa Jesu rĩngĩ!’ No atũmwo makĩmacokeria ũũ: ‘No mũhaka twarie ũhoro wake. Tũtigũtiga kwaria.’

Rĩrĩa Petero na Johana maarekereirio, nĩ maathiire kũrĩ arutwo acio angĩ na makĩmeera ũrĩa gwekĩkĩte. Makĩhoya Jehova ũũ marĩ hamwe: ‘Twagũthaitha ũtũhe ũmĩrĩru nĩguo tũhote gũthiĩ na mbere kũruta wĩra waku.’ Jehova akĩmahe roho wake mũtheru na magĩthiĩ na mbere kũhunjia na kũhonania. Andũ aingĩ mũno magĩtuĩka etĩkia. Asadukai nĩ maaiguire ũiru mũno nginya makĩnyita atũmwo na makĩmaikia njera. No ũtukũ ũcio Jehova agĩtũma mũraika athiĩ ahingũre mĩrango ya njera na akĩra atũmwo acio ũũ: ‘Cokai hekarũ-inĩ mũkarutane kuo.’

Mũthenya ũyũ ũngĩ rũcinĩ, igooti rĩa atongoria a ndini rĩrĩa rĩetagwo Sanhedrini, rĩkĩrũo ũũ: ‘Njera no hinge, no athuri arĩa mũranyitire matirĩ kuo! Marĩ hekarũ-inĩ makĩrutana!’ Atũmwo acio makĩnyitwo rĩngĩ na magĩtwarũo kũrĩ Sanhedrini. Mũthĩnjĩri-Ngai ũrĩa mũnene akĩmoria ũũ: ‘Na githĩ tũtiramwathire mũtige kwaria ũhoro wa Jesu?’ No Petero akĩmũcokeria ũũ: “No mũhaka twathĩkĩre Ngai arĩ we mũtongoria, no ti andũ.”

Atongoria acio a ndini makĩrakara mũno nginya makĩenda kũũraga atũmwo acio. No Mũfarisai ũmwe wetagwo Gamalieli akĩrũgama akĩmeera: ‘Mwĩmenyererei mũno! No gũkorũo Ngai arĩ hamwe na andũ aya. Mũrenda kũrũa na Ngai?’ Nĩ maathĩkĩire ũtaaro wake. Maahũũrire atũmwo acio iboko, makĩmaatha o rĩngĩ matige kũhunjia, magĩcoka makĩmarekereria. No ũndũ ũcio ndwatũmire atũmwo matige kũhunjia. Maathiire na mbere kũhunjia ũhoro ũrĩa mwega thĩinĩ wa hekarũ na nyũmba kwa nyũmba marĩ na ũmĩrĩru.