Riboti Kuuma Kũrĩ Ahunjia a Ũthamaki

Nĩ Aagĩire na Muoroto Ũtũũro-inĩ

JESU oigĩte atĩ nĩ oĩ ngʼondu ciake. (Johana 10:14) Angĩkorũo mũndũ nĩ arĩ ngoro njega na nĩ endete thayũ na ũthingu, nĩ arĩgucagĩrĩrio kũrĩ arũmĩrĩri a Jesu. Mũndũ ta ũcio nĩ arĩgĩaga na muoroto ũtũũro-inĩ, ta ũrĩa gwathire harĩ mũtumia ũmwe bũrũri-inĩ wa Belgium. Rũrũ nĩruo rũgano rwake:

“Ihinda-inĩ rĩrĩa Aira a Jehova mookire gwakwa, nĩ ndathuthĩkĩte ngoro mũno, na ndeciragia kwĩruta muoyo. Nĩ ndakenirio nĩ ũrĩa Aira a Jehova mooigire igũrũ rĩgiĩ kũniinwo kwa mathĩna thĩinĩ wa thĩ ĩno, no ndiakenirio nĩ rĩciria rĩa atĩ Ngai nĩwe ũngĩmaniina. Nĩ ndatigĩte gũthiaga kanitha mĩaka ĩnana mbere ĩyo, tondũ nĩ ndathũire ũhinga ũrĩa ndonete kuo. No rĩu nĩ ndataũkĩrũo atĩ Aira a Jehova nĩ maarutanaga ũhoro wa ma, na ningĩ ngĩtaũkĩrũo atĩ nĩ ndabataraga Ngai.

“Ũndũ wa kĩeha nĩ atĩ thutha wa Aira a Jehova kũnjeerera maita maigana ũna, nĩ tuoranirũo nao. Nĩ ndakuire ngoro mũno. Ngĩambĩrĩria kũnyuaga thigara mbagiti igĩrĩ o mũthenya, na nginya ngĩambĩrĩria kũhũthĩra ndawa cia kũrebia. Nĩ ndendaga kwaria na guka ũrĩa wakuĩte, kwoguo ngĩambĩrĩria kũgeria kwaranĩria na maroho. Nĩ ũndũ wa kwĩingĩrania na maũndũ macio, ũtukũ ũmwe ndĩ nyiki nĩ ndatharĩkĩirũo nĩ ndaimono, na ũndũ ũcio ũkĩmakia mũno. Nĩ ciathire na mbere gũũtharĩkagĩra ihinda-inĩ rĩa mĩeri mĩingĩ. O hwaĩ-inĩ nĩ ndamakaga mũno ndeciria atĩ ngũkorũo ndĩ o nyiki.

“Mũthenya ũmwe ngĩceeraceera, nĩ ndagereire gacĩra itaageragĩra kaingĩ, na ngĩkora handũ haarĩ na mwako mũnene wakagwo. Haarĩ na andũ aingĩ mũno mwako-inĩ ũcio. Ndakuhĩrĩria ndonire atĩ nĩ Aira a Jehova magĩaka Nyũmba ya Ũthamaki. Ngĩririkana ũrĩa Aira a Jehova maanjeeragĩra gwakwa mũciĩ, na ngĩciria ũrĩa angĩkorũo arĩ ũndũ mwega korũo andũ othe thĩinĩ wa thĩ no maikare ta ũrĩa Aira a Jehova maikaraga.

“Nĩ nderiragĩria mũno korũo Aira a Jehova no moke gwakwa mũciĩ rĩngĩ, kwoguo ngĩaria na amwe a arĩa maarĩ mwako-inĩ ũcio. Nĩ ndahoire Ngai, na thikũ ikũmi thutha ũcio, mũthuri ũrĩa wanjeereire hĩndĩ ya mbere akĩnjeerera rĩngĩ. Akĩnjũria kana no nyende gũthiĩ na mbere kwĩruta Bibilia, na ngĩtĩkĩra. O hĩndĩ ĩyo, akĩnyita ũgeni thiĩ mĩcemanio thĩinĩ wa Nyũmba ya Ũthamaki na ngĩtĩkĩra. Ndonire maũndũ itarĩ ndona handũ hangĩ. Ndatũũrĩte njethaga andũ mendanĩte na marĩ na gĩkeno. Na rĩu nĩ ndamona!

“Kuuma hau ndathiaga mĩcemanio yothe. Thutha wa kĩndũ ciumia ithatũ, ngĩtiga mũtugo ũcio mũũru wa kũnyua thigara. Ngĩte mabuku makwa mothe marĩa maahutanĩtie na ũtuĩria wa njata na nyĩmbo iria ciothe ciahutanĩtie na ũndaimono, na ngĩambĩrĩria kũigua atĩ ndaimono nĩ ciambĩrĩirie gũtigana na niĩ. Ngĩambĩrĩria gũtũũra kũringana na ithimi cia Jehova cia Bibilia, na thutha wa mĩeri ĩtatũ ngĩambĩrĩria kũhunjagia ũhoro ũrĩa mwega. Thutha wa mĩeri ĩtandatũ ngĩbatithio. Thikũ igĩrĩ thutha wa kũbatithio, ngĩambĩrĩria gũtungata ndĩ painia wa gũteithĩrĩria.

“Nĩ njokagĩria Jehova ngatho nĩ ũndũ wa maũndũ mothe mega marĩa anjĩkĩire. Rĩu nĩ ngĩte na muoroto ũtũũro-inĩ. Nĩ ma, rĩĩtwa rĩa Jehova nĩ nyũmba ndaya na igũrũ na nũmu, harĩa ndagĩire na ũgitĩri. (Thimo 18:10) Njiguaga biũ o ta ũrĩa mwandĩki wa Thaburi aaiguaga rĩrĩa aandĩkire ciugo ici cia Thaburi 84:10: ‘Mũthenya ũmwe nja-inĩ ciaku nĩ mwega gũkĩra mĩthenya ngiri ĩmwe handũ hangĩ o hothe! Niĩ ingĩthuura kũrũgama itonyero-inĩ rĩa nyũmba ya Ngai wakwa handũ ha gũikara hema-inĩ cia waganu.’”

Mũtumia ũcio mwĩnyihia nĩ aagĩire na muoroto ũtũũro-inĩ. Ũguo no taguo kũngĩthiĩ harĩ mũndũ wothe ũrĩ na ngoro njega ũrenda kũmenya Jehova.