Ũrathi wa Bata Mũno
“Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe; na hĩndĩ ĩo nĩrĩo ithirĩro rĩgakinya.”—MATHAYO 24:14.
ATHOMI aingĩ nĩ metĩkagĩra atĩ mũhari ũcio nĩ wa bata mũno. Nĩ wa bata tondũ wĩra ũrĩa ũheanaga ũhoro waguo ũngĩkarutwo thĩinĩ wa thĩ yothe. Ningĩ nĩ wa bata, tondũ nĩ wonanagia wĩra ũrĩa Akristiano magĩrĩirũo nĩ gũkorũo makĩruta wa kũhunjia, ũrĩa ũngĩkamenyithania mbere ũndũ mũnene na wa magegania ũrĩa Jesu eetire “ithirĩro.”
Ũrathi ũrĩa ũrĩ thĩinĩ wa mũhari ũcio nĩ ũrahinga ihinda-inĩ rĩrĩ. Ũrathi ũcio nĩ ũgũkoniĩ tondũ ũhoro ũcio mwega ũkuuĩte rĩĩtana na mũkaana. Ũkũheaga mweke wa gwĩthuurĩra: Gwĩtĩkĩra kana kũregana na Ũthamaki wa Ngai. Ũndũ ũrĩa ũgũthuura nĩ ũgũkorũo na moimĩrĩro ũtũũro-inĩ waku.
Ta wĩcirie maũndũ mangĩ makonainie na mũhari ũcio. Matukũ manyinyi Jesu atanoragwo, arutwo nĩ mookire kũrĩ we na makĩmũũria ũhoro wa mahinda marĩa maarĩ mbere yao. Meendaga kũmenya rĩrĩa Ũthamaki wa Ngai, ũrĩa Jesu aaragia ũhoro waguo kaingĩ ũngĩkahandwo. Ningĩ nĩ meendaga kũmenya ũhoro wĩgiĩ “ithirĩro rĩa mahinda maya,” kana “ithirĩro rĩa thĩ” kũringana na ũrĩa Bibilia imwe itaũrĩte ciugo icio.”—Mat. 24:3, American Standard Version, King James Version.
Akĩmacokeria ũhoro ũcio Jesu oigire atĩ nĩ kũngĩgakorũo na mbaara nene, ngʼaragu, mĩrimũ mĩũru ĩrĩa ĩrehaga mũthiro na ithingithia nene. Ningĩ akiuga atĩ ũremi nĩ ũkongerereka, andũ aingĩ mahĩtithio nĩ arutani a ndini cia maheeni, nao Akristiano a ma mathũũrũo na manyarirũo. Ũcio wothe waarĩ ũhoro mũũru.—Mathayo 24:4-13; Luka 21:11.
No ningĩ kwarĩ na ũhoro mwega. Jesu aacokire akĩaria ciugo icio igwetetwo hau igũrũ, iria irurumũrĩte andũ na igatũma magĩe na mwĩhoko kwa ihinda iraya. O na gũtuĩka andũ nĩ metĩkagĩra atĩ ciugo icio cia Jesu nĩ cia bata-rĩ, matiĩtĩkanagia na ũrĩa ciugĩte. Ũhoro ũcio mwega nĩ kĩĩ kũna? Ũthamaki ũcio nĩ kĩĩ? Ũrathi ũcio ũkahinga rĩ na nĩa makaũhingia? Narĩo “ithirĩro” nĩ kĩĩ? Rekei tuone.
FACSIMILE OF THE WASHINGTON MANUSCRIPT OF FOUR GOSPELS. MATTHEW 24:14 IS HIGHLIGHTED
From the book Facsimile of the Washington Manuscript of the Four Gospels in the Freer Collection 1912
▶